Marcos 13 - La'aqtaqa Ñim Lo'onatac 'Enauacna 2013

So Jesús ỹa'axata'a da qailaxachigui aso no'onaxanaxaqui late'erai

¹ Qaq So Jesús co'ollaq ca'ai aso no'onaxanaxaqui late'erai, nache so 'oonolec soua lapaxaguenataqa 'enapego' Somaye, 'eeta': –'Am Napaxaguenataxanaq, ¡ña 'aumeten na coma'pi maye lo'oxonaxat ne'ena nỹecpi namayepi ỹataqta qaica ca 'ena'am da llo'oxoyec!

² Nache So Jesús 'enapeco': –¡Qami' qauloito'ot nagui ne'ena lta'araic nỹecpi! Namayepi qome saishet da huo'o ca 'oonolec da nachattañi. 'Enauac qome namayepi qailaxachigui.

Na na'anecpi maye ỹa'axata'a ca loga'tna

³ Ime, nache So Jesús qataq soua lapaxaguenataqa nqo'oora aso qaỹoqotcheguemec 'alhua, maye nanqa' ana Olivo nalotta aso no'onaxanaxaqui late'erai. Nache So Jesús nso'ooñi, qaq co'ollaq mashe nda'a't soomaye, nache so Pedro, Santiago, Juan qataq so Andrés inattrac Somaye, 'eetra':

⁴ –¿Chaq lagui, qaq ivita ca laloqo' da qailaxachigui añi no'onaxanaxaqui late'erai? Qataq ¿chaq negue't ca la'anaxat 'enauac de'era qom ivita da ipacchigui?

⁵ Nache So Jesús 'enapeco': –¡Maxatchoxo' qome! Saishet da huo'o ca qami' ỹatenache't.

⁶ Cha'aye ỹataqta qalota qome na anac da nactaigui da ỹe'enaxat, nache 'eeta': «Nachaỹem maye aỹem Lca'aguishec Ñim Lo'onatac 'Enauacna», nache ỹataqta qalota qome na ỹatenachet.

⁷ Qaq qami' qom qaua'aqaitega ca alaataxac da chemaqchiguiñalo, qalaq saishet qome da qayi'i, cha'aye nachera da 'eetec qome, qalaxaye saxanaxa da ivita ca loga'tna.

⁸ Cha'aye na ỹotta'a't shiỹaxauapi deloguiỹa't, qataq ca lta'alpi ca shiỹaxauapi delogui' ca lỹa nta'a, qataq qalota na qalagoxoñi ana 'alhua, qataq huo'o ca nqouaxa. Qaq 'enauac ne'ena, nachena na chegoqchiguiña na que'eenaxacpi ana 'alhua.

⁹ Qalaxaye maxatchaxa qome. Cha'aye qami' qoỹaneua'alo qome na lataxala'pi na shiỹaxauapi, nache qami' iuaxaata'ape da huaigui ana napaxaguenaxaquipi na judiopi. Huaña, nache qami' qanachaalataxaneua'alo na nta'alpi maye ilotegueto naua 'aleu', qataq na lta'alpi namayepi souaxat da Aỹem qoquiitague'. Qalaxaye huaña qome, nache Aỹem qaua'axache da qaua'aqtaxañim namayepi.

¹⁰ Cha'aye de'era no'on na'axaỹaxac maye ỹa'axat da lo'onataxanaxac Ñim Lo'onatac 'Enauacna, damaye, iuen da qaỹa'aqtaxanem 'enauac nam shiỹaxauapi maye huetalec ana 'alhua, qom saxanaxa da ivita ca loga'tna.

¹¹ Qaq qom ivita da qami' qoỹaneua'alo na lta'alpi na shiỹaxauapi da qami' nmi't, nache saishet qome da leetapigui ye qarvilỹaxaqui da qoñiitega sa qauaỹachiñi ca qartaxaỹaxaqui. Cha'aye Ñim Lo'onatac 'Enauacna qami' ỹanema qome ca qara'aqtaqui, saishet da nache qami' da qautaqai, cha'aye nacheso So Saqcha'a Na'añaxac Qui'itta so qami' detaqleguete.

¹² Ca nqaỹa maiche ỹaneguet da nalaataguec ca maiche lqaỹa, qataq ca nta'a ỹaneguet da nalaataguec ca maiche llalaqpi, qaq ca ñalaqpi maiche dataỹa'agueta caua lta'al, nache ỹalaua't.

¹³ Qaq 'enauac qome na shiỹaxauapi ỹataqta qami' nquiỹalo, souaxat da Aỹem qoquiitague'. Qalaxaye cam qaica ca iqocha'a, choche ivitta'a ca loga't da nachaalataxac, qaq nacheca ca qanca'alaxatec.

¡Qauataiuec qome da yo'oq de'era na'anec!

¹⁴ Qaq cam itaxaỹaxan de'era, nache iuen da mpogoxoinapegue' da ỹaỹaten de'era sheetega. Qom qauloỹa'a ca ne'enaqtac maye ỹataqta qaiqaiga da hueta'a ye ndaqa' maye saishettaxa da hueta'a, nache sa qanaỹaloxoñi qome da qauataiueeguesop. Qaq nam shiỹaxauapi maye hueta'a na 'alhua Judea, no'on da datauec da tasheguema ana qaỹoqotcheguemec 'alhuapi,

¹⁵ qaq cam netasheguemec na l-laq ca lma' que'eca na'a'q, camaye da huenotec da datauec, nache saishet da ime'eguet da pa'aigui ca lma' da huo'o ca ỹache,

¹⁶ qataq cam huetauga na no'onaxa, camaye saishet qome da ỹe'eguelaxaua'a ca lma' da huo'o ca ỹache na logoxot.

¹⁷ Qaq cam 'alpi maye hualaxaipi que'eca na'a'q ỹataqta lta'araic da lachoxoyec. ¡Qalaxaye ỹactec da lachoxoyec aca ñaq cheta'ague da ñiguiñi ca llalec que'eca na'a'q!

¹⁸ Qaq ỹoqo'oye qami' qauỹaxañiỹot qome Ñim Lo'onatac 'Enauacna, da yaqto' saishet da huetoigui ca no'omaxa de'era,

¹⁹ cha'aye na shiỹaxauapi ỹataqta lta'araic da nque'eenaxac que'eca na'a'q. Chegoqchiguiña co'ollaq Ñim Lo'onatac 'Enauacna ỹo'ot ana 'alhua, choche ivitta'a nagui da na shiỹaxauapi sa nauane' da huo'o ca lta'araic nque'eenaxac da 'ena'am de'era. Qataq de'era que'eenaxac saishet da qaltaq ỹe'eguelaxalec qome.

²⁰ Ñim Lo'onatac 'Enauacna ỹataqta ỹauotec na lca'aguishecpi, qaq ỹoqo'oye que'eca na'a'q maye huaigui que'eca que'eenaxac saq qaỹauec. Cha'aye da saishet taxa da nache 'eetec de'era, nache saishet da huo'o ca lca'alaxaic.

²¹ Qaq que'eca na'a'q da huo'o ca 'eeta': «Ñaq qauloỹa, 'ena na Lca'aguishec Ñim Lo'onatac 'Enauacna hueta'a ne'ena», huo'otaq da, 'eeta': «'Iñi cha'a ñi Lca'aguishec Ñim Lo'onatac 'Enauacna», qalaq saishet qome da qaua'amaqchiñi.

²² Cha'aye nvi' qome na datenataxanpi 'eetega lca'aguishecpi qataq la'aqtaxanaxanecpi Ñim Lo'onatac 'Enauacna, nache ỹo'ot qome na sa qaỹauanapega maye ỹataqta huo'o da llo'oxoyec da yaqto' ỹatenachet na shiỹaxauapi. Ivira'a da ishet da ỹatenachet nataqa'en nam ỹataqta iỹaxanapi Ñim Lo'onatac 'Enauacna.

²³ ¡Maxatchaxa qome! Cha'aye mashe sogote da qami' sevitaqteetagalo 'enauac de'era, nagui da saxanaxa da ivita.

Da lviraxac qome na Shiỹaxaua Llalec

²⁴ Qaq qom mashe inoxoore'c que'ecaua na'axa'te maye que'eenaxaqui', nache 'om qome añi nala', qataq qaica ca le'eraxa ñi ca'agoxoic.

²⁵ Qataq naañi qome ana huaqaañipi, qataq ivira'a da cholaxan nam na'añaxacpi maye hueto'ot na piguem.

²⁶ Nache qaila'aguet qome Aỹem Shiỹaxaua Llalec da sootalec ca lo'oc na piguem ỹataqta qaica ca 'ena'am da ỹa'añaxac qataq da ỹo'oxoyec.

²⁷ Ime, nache samaqteegalo na ỹamaxashecpi da coleelec imauec ana 'alhua, da lapona't nam Aỹem quetague'pi.

Da qaỹaỹaten maye chegoqchigui aso higo lcheyec

²⁸ Qaq qanapaxagueñiỹa qome ana higo lcheyec. Da'ara qo'oipaq da ivita da ñaxatec ana lcouepi qataq dalaxai ana lauepi, nache qami' qauaỹaañi da mashe saqaỹapigui naua nta'api.

²⁹ Qaq nache 'eetec nataqa'en qom qauloỹa'a da yo'oq 'enauac ne'ena qami' sa'axattapeguema, nache qauaỹaañi da mashe saqaỹapeque da qaltaq ñevi'.

³⁰ Qaq ỹataqta 'eesa de'era qami' sa'axatema, da 'enauac qome ne'ena hua'auñi da yo'oq qom saxanaxa da ileu nam shiỹaxauapi maye ñaq nca'altauec nagui.

³¹ Na piguem qataq ana 'alhua imeuo qome, qalaxaye da ỹa'aqtac saishet da imeuo.

³² Qalaxaye qaica ca ỹaỹaten ca na'a'q qataq ca laloqo' da ñevi', ivira'a na namaxashec piguem le'ecpi sa ỹaỹaten. Nataqa'en Aỹem sa saỹaten, nachaqñita Ñim Lo'onatac 'Enauacna maye ỹaỹaten.

³³ Qaq ỹoqo'oye qami' ỹataqta qanchilỹañi qome qataq qanloitec, cha'aye sa qauaỹaañi ca laloqo' ca ỹe'eguelaxasoxoc.

³⁴ Qaq de'era 'eeta'am ca shiỹaxaua da huo'otaq taigue ca qaỹoqtegue. Qalaxaye da yaqta'a da jec, nache iỹaxaneuga ca lamaxashecpi da ipataxalec da ilo'ogue ca lma'. Nache ñi 'oonolec ỹataqtac nam ipataxalec lo'onataxanaxac, qaq ca ilotague' ca lasom qalaq 'enapega da ỹataqta nlotec.

³⁵ Qaq camayepi ỹataqta nlotec, cha'aye sa ỹaỹaten da que'eca lalamaxat ca nỹec da nvi' da avit, huo'otaq da laiñi ca pe, huo'otaq da yo'oxoñitai'. Qaq nache qoñiitec qome, iuen da ỹataqta qanloitec,

³⁶ cha'aye Aỹem ishet da ñeque'elaxatta da ñevi', nache qami' selaleguete da qauo'ocheeta.

³⁷ Qaq de'era qami' sa'aqtaxaateguema, damaye nataqa'en sa'aqtaxanem 'enauac na shiỹaxauapi: ¡Ỹataqta qanloitec qome qataq nache 'eetai' da qauauanaxañiitac!