Lucas 6 - La'aqtaqa Ñim Lo'onatac 'Enauacna 2013

Soua lapaxaguenataqa So Jesús napocta'ape ana ala na trigo so na'a'q mataxaqui

¹ Huo'o so na'a'q mataxaqui, nache So Jesús qataq soua lapaxaguenataqa ỹa'axasoxoorelec so nanaxanaqa' maye nma' na trigo. Nache soua lapaxaguenataqa napocta'ape na trigo, nache nqateua'a na ala da yaqto' che'c.

² Nache so fariseopi ỹauaachiguilo soua napaxaguenataqa da ỹo'ottrac de'era, nache denataxa'n, 'eeta': –¿Ta'ainco' qami' ye sa qaualaqaiguet da namaxasoxonaxac? De'era qauo'oche damaye sa qaishetapec na na'a'q mataxaqui.

³ Nache So Jesús 'enapeco': –¿Saishet peta'a da qautaxaỹaxañiỹapec da nanettalec ana la'aqtac lmalate Ñim Lo'onatac 'Enauacna da 'eetec co'ollaxa so David, qataq soua lỹa't da ỹataqta iqoua't?

⁴ Nache so David pa'aigui so lma' Ñim Lo'onatac 'Enauacna, nache ỹacona aso nauole maye sa qaishetapec, qataq nda'a't ca ntaxaỹaxanaxanec da qaỹasheetem asomaye da chec, qalaxaye, nache 'ena'am chec somaye qataq nataqa'en soua nnaictagueto.

⁵ Aỹem Shiỹaxaua Llalec, Aỹem maiche Aỹem chegoqtot da huo'o ca so'ot, qataq ca saishet da so'ot ye na'a'q mataxaqui.

So Jesús nataren so ỹale so na'a'q mataxaqui

⁶ Qaq so lỹa na'a'q mataxaqui, nache So Jesús qaltaq inoxoneua'a asom napaxaguenaxaqui na judiopi da yaqto' dapaxaguenataxan. Qaq ỹalectauo so ỹale maye deqaqta na lhuaq aloiguishec.

⁷ Qaq na chegaqaigui na fariseo qataq nam dapaxaguenataxaatapeguec na namaxasoxonaxacpi, choche nauaatac So Jesús da huo'otaq nataren na lhuaq se'eso ỹale. Da ỹo'ot de'era, nache ishet da qaỹachegoxotchigui da huasoilec qanqa'en da do'onataxangui so na'a'q mataxaqui.

⁸ Qalaxaye So Jesús ỹaỹaten da lhuennataxac somayepi; nache 'enapego' som ỹale maye deqaqta na lhuaq, 'eeta': «Qoñisheguem qome. Ime, qaq 'anachaangui na laiñi.» Nache so ỹale nachaañi tangui na laiñi so shiỹaxauapi.

⁹ Nache So Jesús 'enapega 'enauac som hueta'a yi'iye, 'eeta': «Aỹem qami' sena't nagui: ¿Chaq negue't ca ỹaỹamaqchiguiñi da qaỹo'ot ne'ena na'a'q mataxaqui, ca no'on huo'otaq ca qauem? ¿Qanca'alaxatec ca achaalataxac huo'otaq qailaxachigui?»

¹⁰ Qaq co'ollaq ime da ỹamataigui so shiỹaxauapi, nache So Jesús 'enapega so ỹale, 'eeta': «Ña 'auachaxanec na 'arhuaq.» Nache so ỹale ỹachaxanec na lhuaq, nache ỹataqta no'oita na lhuaq.

¹¹ Qalaxaye so shiỹaxauapi ỹataqta dalemata. Nache chegoqchiguiña da nmittaique ca lataxac da dataỹa'aguet So Jesús.

So Jesús lca'aua'alo soua doce lamaxa'she

¹² Qaq se'esoua na'axa'te So Jesús tasheguemec aso saqaỹoqotcheguemec 'alhua da yaqto' nqouagaxauen, nache imattec se'eso pe da na'aqtaxaatague' Ñim Lo'onatac 'Enauacna.

¹³ Qaq so lỹa na'a'q, nache iỹaxana so qalota ca'attague'pi Somaye. Ime, nache lca'aua'alo soua doce somayepi, nache ỹauo'oi lamaxa'she.

¹⁴ Qaq 'enaua naua le'enaqa'ate soomaye: Simón som ilonec da le'enaxat Pedro, qataq so Andrés som lqaỹa so Pedro, qataq so Santiago, qataq so Juan, Felipe, qataq so Bartolomé,

¹⁵ Mateo, qataq so Tomás, qataq so Santiago som llalec so Alfeo, qataq so Simón maye chegaqaigui nam dataỹa'aguet naxa na nta'alpi,

¹⁶ qataq Judas som lqaỹa so Santiago, qataq so Judas Iscariote maye ỹaneuo co'olloxocheye So Jesús.

So Jesús dapaxaguenataxan qataq datannaxan

¹⁷ Nache So Jesús qataq soua doce lamaxa'she huenoteeguesopa aso qaỹoqotcheguemec 'alhua, nache nqo'onalo so nalochiguiñi 'alhua. Huaña yemaye, nache lapona't so qalota maye ca'attague' Somaye. Nataqa'en qalota na hueta'a yemaye na chegaqa'alo naua 'aleu' maye huaigui ye 'alhua Judea, nataqa'en na chegaqa'a ye nỹecpi ye Jerusalén qataq huo'o na chegaqa'a ye nỹecpi Tiro qataq Sidón,

¹⁸ nvi' da yaqto' na'axaỹaxana So Jesús qataq yaqto' Somaye nataren na lalolaxa. Qataq nam huo'o na netaigui saqcha'a na'añaxac leguemaxaic nataqa'en no'oita.

¹⁹ Nache 'enauac huotaique da ipoteua'a So Jesús cha'aye ỹaỹaten da la'añaxac maye hueto'ot Somaye da ishet da datannaxan.

Da taỹa'ague na choxoraqpi qataq na sallaxanecpi

²⁰ Nache So Jesús ỹamataigui so lapaxaguenatacpi, nache 'enapeco': «Ñim Lo'onatac 'Enauacna qami' ỹaaleguete da lqouagaxanaqtaic qami' maye qami' choxora'q, cha'aye da lo'onataxanaxac Ñim Lo'onatac 'Enauacna qaralamaxache.

²¹ Ñim Lo'onatac 'Enauacna ỹaaleguete qami' da lqouagaxanaqtaic, qami' maye nagui huo'o na qarqouaqai, cha'aye chochaq huañi qome na qo'oqoi. Ñim Lo'onatac 'Enauacna ỹaaleguete qami' da lqouagaxanaqtaic, qami' maye nagui qoviitaigui da qauaquicoitac, cha'aye qami' qome qoviitaigui da lta'araic qarlagaxayiqui.

²² Ñim Lo'onatac 'Enauacna qami' ỹaaleguete da lqouagaxanaqtaic souaxat na shiỹaxauapi da qami' nquiỹalo, huo'otaq da qami' isheueeta'ape qataq da qami' sa qaỹaconegueta, qataq qaica ca huotaique da qami' ỹalecta'agueta. Na shiỹaxauapi qami' ỹo'oteque de'era, cha'aye souaxat da Aỹem qaualaqaiguet, Aỹem Shiỹaxaua Llalec.

²³ Qaq ỹataqta qauamaichiguiñi qome, qataq qauasocheetai' da qantonaxaqui, cha'aye Ñim Lo'onatac 'Enauacna mashe iqataxaatai' da lta'araic qansheetenaguiiqui. Cha'aye nataqa'en, nache 'eetec co'ollaxa so chegoxoguet namayepi da sa iyacnapec so hua'au la'aqtaxanaxanecpi Ñim Lo'onatac 'Enauacna.»

²⁴ Nache So Jesús ỹamataigui so laỹepi shiỹaxauapi, nache 'enapeco': «¡Ỹataqta qauem da qa'aita'ague qami', maye qami' sallaxanecpi, cha'aye nagui qoviitaigui da qavi'imaqaitac qataq qaica ca da!

²⁵ ¡Ỹataqta qauem da qa'aita'ague qami', maye sa qaviñi ca qolliqui cha'aye qaviyeeguet qome da qauqouache! ¡Ỹataqta qauem da qa'aita'ague qami', maye nagui qauaỹalleguiyiitac, cha'aye qauaỹachiñi qome ca noinaxac qataq da qanayeetaigui ca naquicoxo!

²⁶ ¡Ỹataqta qauem da qa'aita'ague qami' maye, nache 'eetai' da qami' qaỹo'oxoreeta'ape! Cha'aye soua qaỹoqteguelo vi'iye so qaralamaxache qarhuo'oi le'ecpi nataqa'en ỹo'oxoreetac co'ollaxa so na'aqtaxanaxanecpi maye tenataxanaxaicpi.

Da 'eetec da qaỹauotec ca depa'aguenataxaatac

²⁷ ¡Ỹataqta qana'axaỹaxañiichigui da huotaique qami' sa'aqtaxanema!: Qauauochec qome ca qami' ipa'agueeta'ape, qataq ỹataqta qauaỹamaxacheeta ca qami' sa iyacna'ape.

²⁸ Ca qami' isheueeta'ape da qauasacheeguet qalaq qauaỹamaxachiichiguiñi ca qara'aqtaqui. Qaq ca sa qami' ỹaconegueta qalaq qanqouagaxauñiitalec camaye.

²⁹ Qaq da huo'otaq huo'o ca iuaxangui ana 'aramelque, qaq nataqa'en 'aỹa'anem ana lỹa 'aramelque. Qataq da huo'otaq huo'o ca deuotaxanec ca 'arpo', qalaq nataqa'en 'aua'aqta'a da ỹache ca 'al-lomaxaqui.

³⁰ Qataq da huo'o ca 'am ỹashela, qalaq 'aỹa'anem ca iỹaxanaique, qataq da huo'o ca deuotaxanec ca 'aralamaxat, qalaq saishet da qonapega da 'am ỹe'eguelaxatem.

³¹ Qaq cam no'on maye qauauoitaique da qami' ỹo'oteque na shiỹaxauapi, qaq nacheca qauo'ochec qome namayepi.

³² Cha'aye da ndotec da qauauochec na qami' ỹauoteque, nache qaica ca qauo'oche ỹactec da ỹaỹamaqchiguiñi. ¡Cha'aye ivira'a na 'etaxaloxoicpi ishet da ỹo'ot de'era!

³³ Qaq da huo'otaq qandoxocheetec ca qami' ỹo'oteque ca ỹaỹamaqchiguiñi da qauo'ochec ca no'on, qaq ¿negue'to' cam ỹactec ỹaỹamaqchiguiñi maye ishet da qauo'oche? ¡Ye ivira'a nam 'etaxaloxoicpi nataqa'en ishet da ỹo'ot de'era!

³⁴ Qami' da qandoxocheetec da qaua'aalaxanaxañi cam qaupichiỹa'a da huo'o nataqa'en ca chegoqo'ot, nache qami' saishet da huo'o ca qauo'oche ca naigui da ishet da qaỹauo'o ca qansheetenaguiiqui. Cha'aye nataqa'en nam 'etaxaloxoicpi ishet da na'aalaxana't, qalaxaye naquitta'a da huo'o aca late'erai laueque.

³⁵ Qalaxaye qami' ỹataqta qauauochec ca qami' ipa'agueeta'ape, qataq qauaỹamaxacheeta qataq da huo'o ca qaua'aalaxanaxañic qalaq saishet da qauacheeta'a da qami' isheete'n. Cha'aye da nache qoñiitec de'era, nache Ñim Lo'onatac 'Enauacna maye 'amaqtaqaic qami' ỹanema ca qansheetenaguiiqui qataq ỹataqta qami' llalqa. Ñimaye ỹataqta choxonnataxanaxaic, ichoxoren na shiỹaxauapi maye qauem da lataxac qataq sa nmanapec.

³⁶ Qami' iuen da ỹataqta qami' choxonnataxanaxaiqa, qauchoxoyiñi 'enauac na shiỹaxauapi, qoñiita'am Ñim Lo'onatac 'Enauacna maye Qarta'a, Ñimaye choxonnataxanaxaic.»

Saishet da qanmichi ca lasouaxashet ca qarỹai

³⁷ So Jesús nataqa'en 'enapeco': Saishet da qanmichi ca lasouaxashet ca qarỹai, yaqto' Ñim Lo'onatac 'Enauacna, saishet da qami' nmi't. Qataq saishet da qauauo'oi ca nhuaxanaguec ca qarỹai, yaqto' Ñimaye saishet da ỹauo'o ca qanhuaxanaguiiqui. Qauapalaxache ca lasouaxashet ca qarỹai, yaqto' Ñim Lo'onatac 'Enauacna ỹapalaxat ca qarasouaxashechi.

³⁸ Qaỹa'añim ca qarỹai cam iueetaique, yaqto' Ñim Lo'onatac 'Enauacna qami' ỹanema cam qaviñiitaique. Cha'aye ỹoqta 'eesa da Ñim Lo'onatac 'Enauacna, da cam lcata cam qaỹa'añim ca qarỹai, qaq nache lcatam cam qami' ỹanema Ñimaye. Da huo'otaq qaỹa'añim ca qarỹai ca trigo, nache qami' qoỹanema ca laỹe' na trigo ỹataqta qantoqoochiguiñi qataq ỹataqta nlaqchigui, nache saishet da iuen da qauloitaique.

³⁹ So Jesús nataqa'en ỹauo'o so daloqnaxana, 'eeta': Ca sanauaañi saishet da ỹaueca'aguet ca lỹa sanauaañi, cha'aye ishet da 'enauaque da tayingui aca llimiaxañi.

⁴⁰ Ca napaxaguenatac saishet da napacalec na ỹaỹaten ca napaxaguenaxala'. Qalaxaye da huo'otaq mashe inoxonaqchetec nam qaỹapaxaguenecpi, nache ishet da 'eeta'am cam napaxaguenaxala'.

⁴¹ ¿Ta'ainco' ye 'aulotagui ca qauem maye ỹo'ot ca 'arỹa? ¿Sa 'ananomo' peta'a na qalota lataxacpi qauem maye 'auo'ottac? 'Eeta'am da 'aula'a ca ltagoxoshet 'auaqpi lte ca 'arỹa ana la'aite, qaq sa 'ananoma ca maiche 'artagoxoshet 'epaq laỹe.

⁴² ¿Ta'ainco' da qonapega ca 'arqaỹa da qoneta': «Ỹaqaỹa, ña 'aua'aqta'a da ñeqat ye 'artagoxoshet 'auaqpi lte añi 'ara'aite», da 'am sa 'ananoma ye maiche 'artagoxoshet 'epaq laỹe? ¡'Am tenataxanaxaic! 'Aua'auaxaañi da 'anqat ye maiche 'artagoxoshet 'epaq laỹe maye huetaigui añi 'ara'aite, yaqto' ỹoqta 'anauaachiguiñi da 'anqat ca ltagoxoshet 'auaqpi lte ca 'arqaỹa.

Aca qo'oipaq qataq aca ala

⁴³ So Jesús nataqa'en 'enapeco': «Qaca aca qo'oipaq da 'onaxai, nache aca ala qauem, qataq nataqa'en qaca aca qo'oipaq da qauem, nache aca ala 'onaxai.

⁴⁴ Qaq aca 'oonole qo'oipaq maiche qaỹauatton souaxat aca ala. Ỹoqo'oye saishet da qanqat ana ala ana nañiguishe le'enaxat da higo qataq ana uva, da qaỹachegoxotaigui aca qo'oipaq maye huo'o ana le.

⁴⁵ Na no'on shiỹaxauapi, nache 'eetai' da ỹo'ottac ca ỹaỹamaqchiguiñi, cha'aye da no'on huetaigui da lquiyaqteỹaxac. Qaq nam qauem shiỹaxauapi, nache 'eetai' da ỹo'ottac da qauem, cha'aye da lquiyaqteỹaxac huetaigui da qauem. Naua 'ara'aqtaqa maye nauoiguilo na 'ap naamaye ỹachaxa'n naua huetanguilo añi 'arquiyaqte.»

Naua dos lataxaco ca shiỹaxaua

⁴⁶ So Jesús queto'ot da da'aqtaxaatac 'eeta': «Qami' qoñiitega naxa da Aỹem Qarataxala'ai qataq qami' ỹalamaqa'ate, qalaxaye saishet da qauo'oche da qami' samaxaleguete.

⁴⁷ Da huo'o ca nquigueua'a Aỹem qataq na'axaỹaxana da ỹapaxaguenataxanaxac qataq Aỹem ỹalaxaguet,

⁴⁸ camaye 'eeta'am ca ỹale maye ỹo'ot ca lma', qaq ỹa'auaxaañi da desheraxan, ỹataqta qaỹoqchiguingui naqa'en ca lsherec ivittaña ca coma'. Huaña, nache lapaxañi ca lo'oxonaxala' naqa'en ca nỹec. Qaq da ivita da nvi' na ndep, nache na la'auataxa na 'etaxat ỹataqta iuaxanot ca nỹec. Qalaxaye ca nỹec saishet da deraỹapigui', cha'aye ỹataqta 'onaxaic da no'oxonaguec.

⁴⁹ Qaq ca na'axaỹaxaatega da ỹapaxaguenataxanaxac, qalaxaye saishet da Aỹem ỹalaxaguet, qaq camaye 'eeta'am ca ỹale da no'oxoosheguem ca lma' da ỹaatelec ca 'alhua maye sa da'angui. Qaq da ivita da nvi' na ndep, nache na la'auataxa na 'etaxat iuaxanot que'eca nỹec, nache camaye hua'axañi, nache ỹataqta dolachigui.»