Lucas 5 - La'aqtaqa Ñim Lo'onatac 'Enauacna 2013

So ña'acoxoc maye sa qaỹauanapega

¹ Qaq huo'o so na'a'q So Jesús hueto'ot na loigue aso lapel late'erai ye Galilea, nache ỹataqta qalota so shiỹaxauapi laponeua'a Somaye da yaqto' na'axaỹaxana da la'aqtac Ñim Lo'onatac 'Enauacna.

² Nache So Jesús ila'alo soua dos nllocta qui'itchiguilo, neto'oto na loigue asa'aso lapel late'erai, cha'aye som ya'acoxoicpi huenoteeguesopa soomaye. Qataq iỹota'ape soua lalegue'c.

³ Aso 'oonole se'esoua nllocta lalamaqte so Simón Pedro, nache So Jesús huenooñigui asomaye, ime, nache iỹaxanot so Pedro da cara'ac da nquigaxattaxaasom asomaye. Ime, nache So Jesús nso'ooñi netangui aso nllocta, nache cot da ỹapaxaguen so shiỹaxauapi.

⁴ Qaq So Jesús co'ollaq ime da lapaxaguenataxanaxac, nache 'enapega so Pedro, 'eeta': –'Auauegaxaama ye laiñi ana lapel ana 'al-llocta. Ime, nache 'aualliguiñi na 'araleguec.

⁵ Nache so Pedro 'enapeco': –'Am Napaxaguenataxanaq, qomi' imauec so pe da sha'acoqtac, qalaq qaica ca qaralliiguishec. Qalaxaye 'am da aỹem 'auamaq, nache nagui sasaxañi na ỹaleguec.

⁶ Qaq co'ollaq qaỹo'ot da 'enapec So Jesús, nache ỹataqta qalota so nalliiguishecpi nỹaq. Qaq ỹoqo'oye huotaique da colaqa'ague so lalegue'c.

⁷ Nache soomaye ỹatecapeguetalo soua lỹa't maye netanguilo aso lỹa nllocta, da yaqto' je'c da itaua'n soomaye. Nache se'esoua lỹa't je'c, nache ỹataqta qanlaxatchiguilo soua dos nllocta. Qaq ỹoqo'oye ỹataqta huotaique da iyiiyiñi.

⁸ Qaq co'ollaq ila'a de'era so Pedro, nache ỹa'aroto naua l-llectel So Jesús, nache 'enapega, 'eeta': ¡'Am Ỹataxala' aỹem qoca'ai, cha'aye aỹem ỹataqta aỹem 'etaxaloxoic!

^9-10 So Pedro Santiago qataq so Juan maye llalqa so Zebedeo qataq 'enauac so laỹepi ỹataqta ỹaguec da lcolanaxa, souaxat se'eso qaica ca 'ena'am lla'acoxo'c maye ỹo'o't. Qalaxaye So Jesús 'enapega so Pedro, 'eeta': –Saishet qome da 'añi'i, cha'aye nache chegoqchiguiña nagui da qaỹa'axañiiñi da qaya'acoxoqui, nache Aỹem qami' sapaxagueneque da lataxac da yaqto' Aỹem qanaviquiiua'a na shiỹaxauapi da yaqto' Aỹem quegue.

¹¹ Ime, nache ỹaueguetra so loigue soua l-llocta', nache no'onaxatchiguilo 'enauac nam ỹachetacpi, nache ca'atregue So Jesús.

So Jesús nataren so nchega na lo'oc

¹² Qaq huo'o so na'a'q co'ollaq hueta'a so nỹecpi So Jesús. Nache nvireuo so 'oonolec ỹale maye sa no'on, somaye nchega na lo'oc; nache ỹa'aroto naua l-llectel So Jesús iviraxata'aguet na latap naqa'en na 'alhua. Nache nachoxoreetacot, 'eeta': –'Am Ỹataxala' aỹem saỹaten da 'aushet da aỹem 'anataren. ¿'Auo'ot peta'a de'era?

¹³ Nache So Jesús ipoteua'a somaye, nache 'enapega, 'eeta': –¡Aja', seshet! ¡Nagui 'am no'oita! Nache saqaỹaloq da qaica so lalolaxa se'eso sa no'on.

¹⁴ Ime, nache So Jesús 'enapega somaye, 'eeta': –Saishet qome da huo'o ca 'aua'aqtaxanem de'era. Nachaqrata da 'am qojec, 'anachaxaneua'a ñi ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna. Ime, qaq 'aỹa'aneuo aca 'arachetaqtaxanaqte maye damaxasoxoolec co'ollaxa so Moisés, yaqto' na ntaxaỹaxanaxanecpi ỹaỹaten da mashe qaica so 'aralolaxa.

¹⁵ Nache So Jesús ỹataqta nquictauec da na'aqtaguec. Nache ỹataqta qalota na shiỹaxauapi anac da ỹauotaique da na'axaỹaxana qataq huo'o na anac da huotaique da qanataren.

¹⁶ Qalaxaye So Jesús, nache 'eetai' naxa da nmittaique cam huaña da ishet da 'oonolec da yaqto' nqouagaxauen.

So Jesús nataren so ỹale maye sa da'añiigue

¹⁷ Qaq huo'o so na'a'q So Jesús dapaxaguenataxaatac hueta'a so nỹec. Qaq huo'o na ỹalectauo nso'ootañi nam ỹalectaigui na fariseopi qataq nam dapaxaguenataxaatapeguec na namaxasoxonaxacpi. Somayepi chegaqa'alo naua 'aleu' yem 'alhua ye Galilea, qataq ye 'alhua Judea qataq ye nỹecpi ye Jerusalén, da yaqto' na'axaỹaxana So Jesús. –Qaq souaxat da So Jesús hueto'ot da la'añaxac Ñim Lo'onatac 'Enauacna da yaqto' nataren na sa no'onpi,

¹⁸ nache nvildeuo soua shiỹaxau' npeetragui so mala' huetalec so ỹale maye saishet da queuoỹapigui'. Nache se'eso sa no'on qaỹauotaique da qairoua'a So Jesús,

¹⁹ qalaxaye saishet da ỹanatra cam tateua'a naqa'e'n se'eso nỹec, cha'aye so ñegueuo ỹataqta qalota na shiỹaxauapi. Huaña, nache huenoldesheguemec na l-laq so nỹec, nache ỹauo'o so lauata'c. Nache tachiguingui naqa'e'n so lmala' so sa no'on da ỹasaxaña cam laiñi som lapoota'a't shiỹaxauapi qataq ỹataxaatrelec So Jesús.

²⁰ Nache So Jesús co'ollaq ila'a da lta'araic lpi'iỹaxa'c soomaye, nache 'enapega so sa no'on, 'eeta': «¡'Am ñauochaxaua, nagui sapalaxat na 'arasouaxashetpi!»

²¹ Nache nam dapaxaguenataxaatapeguec na namaxasoxonaxacpi maye chegoqo'ot so Moisés qataq na fariseopi deuennataxaatac, 'eeta': «¿Negue't cam ipettega dam da'? ¡Da nasaxauec la'aqtac ỹataqta dataỹa'aguet Ñim Lo'onatac 'Enauacna! ¡Nachaqñita Ñimaye da ishet da ỹapalaxat ca nasouaxashet!»

²² Qalaxaye So Jesús ỹaỹaten da lhuennataxa somayepi, nache denataxan 'eeta': «¿Ta'ainco' ye qarhuennataxaqui de'era?

²³ Ñaq Aỹem qaua'aqtaxañim: ¿negue't ca ỹoqta saqalaq da qoỹenapec, peta'a da qaỹapalaxa't naua lasouaxashe'ete ne'ena sa no'on, huo'otaq da qanataren?

²⁴ Qalaxaye nagui qami' sachaxanalo da Aỹem, maye Aỹem Shiỹaxaua Llalec huo'o da ỹa'añaxac ana'ana 'alhua da sapalaxat na nasouaxashetpi.» Huaña, nache 'enapega som ỹale maye sa da'añiigue, 'eeta': «Qoñisheguem, 'auacona na 'armala'. Ime, qaq qojec, 'anqo'ona ca 'arma'.»

²⁵ Nache saqaỹaloq da ñesheguem som sa da'añiigue, ỹauaachigui 'enauac somayepi. Ime, nache ỹacona so lmala' maye nnaatalec co'ollaxa, nache nqo'ona ca lma', ỹataqta ỹo'oxoreetac Ñim Lo'onatac 'Enauacna.

²⁶ Nache 'enauac so shiỹaxauapi ỹataqta huo'o da la'aalaxa, qataq nlaqchigui da lcolanaxa, ime, nache ỹo'oxoreetac Ñim Lo'onatac 'Enauacna, 'eeta': «¡Ỹataqta qaica ca 'ena'am da llo'oxoyec da sauanaqchigui ne'ena na'a'q!»

So Jesús iỹaxana so Mateo

²⁷ Qaq co'ollaq ime de'era, nache So Jesús ca'ai yi'iye hueta'a. Qaq co'ollaq queta, nache ila'a so ỹale le'enaxat Mateo do'onataxaatac ỹacootapeeguet ana nsheetenaqte ca nta'a maye netaña ye Roma. Nache So Jesús 'enapego' somaye, 'eeta': «Aỹem 'auca'ategue.»

²⁸ Nache so Mateo ñesheguem, no'onaxatchigui 'enauac nam hueto'otpi, nache ca'ategue So Jesús.

²⁹ Qaq nacheso se'eso na'a'q da so Mateo ỹo'ot so lta'araic lquia'axac, souaxat da huo'o naq 'enec naqa'en So Jesús. Nache iỹaxana da lquia'axaua so qalota nam ỹacootapeeguet ana nsheetenaqte ca nta'a maye netaña ye Roma, qataq qalota so laỹepi.

³⁰ Qalaxaye huo'o na fariseopi qataq huo'o na dapaxaguenataxaatapeguec na namaxasoxonaxacpi da quetrapegueleguete soua lapaxaguenataqa So Jesús. Nache 'eetregalo, 'eetra': –¿Ta'ainco' qami' ye qarquia'axauai nam ỹacootapeeguet ana nsheetenaqte ca nta'a qataq nam shiỹaxauapi maye qauem da lataxac?

³¹ Nache So Jesús 'enapeco': –Nam iuen ca natannaxanaq nachena nam sa no'onpi, qaq saishet da nachena nam no'oitapi.

³² Aỹem ñanac da seỹaxana nam 'etaxaloxoicpi da yaqto' ỹe'eguelaqot Ñim Lo'onatac 'Enauacna, qaq saishet da nachena nam 'eetega da no'on da lataxac.

Qainat So Jesús da chaq 'eetec ca lataxac ca shiỹaxaua da nqouaqchet

³³ Nache huo'oi soua 'enapegalo So Jesús, 'eetra': –Na lapaxaguenatacpi so Juan maye nachelaxanataxanaq qataq nam quetague' na fariseopi ỹataqta ỹaguec da nqouagaxaunaxac qataq nqouaqchetaxac. Qaq naua 'arapaxaguenataqa qalaq nda'a't da lquia'axac qataq da nỹomaxac.

³⁴ Nache So Jesús 'enapeco': –Ca ncoyeguenatacpi da ỹalectaua'a ca naronaxac, camayepi saishet da nqouaqchet da ña ỹalecta'aguet ca auonaxaua.

³⁵ Qalaxaye qom ivita ca laloqo' da qaỹauec que'eca aronaq, huaña, nache ishet da nqouaqchet cam ncoyeguenatacpi.

³⁶ So Jesús nataqa'en ỹauo'o da daloqnaxana, 'eeta': «Da huo'otaq huo'o aca togoshe npoto da huo'otaq colaqa'ague, nache qaica ca icheguec ca laỹe aca npoto maye dalaxaale da naparen aca togoshe. Cha'aye da nache 'eetec, nache na'axat aca dalaxaale. Qataq nataqa'en ca dalaxaicolec napannaxanaxat saq taiguet aca togoshe npoto.

³⁷ Qataq nataqa'en saishet da qaicoyigui aca shiguiỹac lo'oc ltoxoi ca lataxa maye dalaxaicolec. Cha'aye ca dalaxaicolec lataxa da ỹashiiyigui, nache ishet da ỹachipiaxata'ague aca lo'oc, nache ca lataxa qataq aca lo'oc caamaye deqa't.

³⁸ Qaq ỹoqo'oye que'eca dalaxaicolec lataxa, camaye iuen da qaicoyigui aca dalaxaale lo'oc ca shiguiỹac.

³⁹ Qataq nataqa'en da huo'o ca ỹe'eguen ca togoshec lataxa, nache camaye saishet da huotaique da qaltaq ỹe'eguelaxa da nỹomgui ca dalaxaicolec lataxa, cha'aye mashe ỹaỹaten da ca togoshec lataxa nacheca ca ỹataqta 'onaxaic.»