Lucas 2 - La'aqtaqa Ñim Lo'onatac 'Enauacna 2013

Da lañoxoc So Jesús

¹ Co'ollaq nayeeta'a da ñiguiñi So Jesús, nache so lta'a na nta'alpi le'enaxat Augusto maye netaña ye Roma, damaxasoxoolec da qaỹo'ot ca naloqnaguec na shiỹaxauapi maye ilotague' somaye.

² Se'eso na'a'q so Quirino maye lta'a na netaña ye 'alhua Siria, qaq nacheso so qoỹami' da namaxasoxonaxac da ỹo'ot ca naloqnaguec na shiỹaxauapi maye netaña ye 'alhua Palestina.

³ Nache 'enauac na shiỹaxauapi da taỹalo na ỹataqta hueta'a na lauo' le'ecpi, da yaqto' qoỹereua'a aso naneraxalate somayepi.

⁴ Qaq so José maye chegoxoguet na llalaqpi so David, somaye hueta'a ye nỹecpi le'enaxat Nazaret, nache somaye iuen da taỹa ye nỹecpi le'enaxat Belén da yaqto' nanereuo, cha'aye nacheye yem lañoqo' co'ollaxa so nta'a David.

⁵ Nnaictague' aso lhua María, qaq asomaye hualaxai.

⁶ Qaq co'ollaq mashe huetra'a ye Belén, nache ivita so laloqo' da aso María

⁷ ñiguiñi so la'auaxanec llalec. Qaq souaxat ye sa ỹanatra cam nỹec maye ishet da huera'a se'eso pe, nache soomaye huera'a so lma' na nlo shiguiỹacpi. Nache huaña yemaye co'ollaq ñiguiñi so llalec, nache aso María lpataxangui so lapo' hualoq laỹe. Ime, nache ỹachangui aso lquia'axaqui na shiguiỹacpi.

So namaxashecpi piguem le'ecpi qataq so qagueta lo'opi

⁸ Qaq nacheso se'eso pe da huo'o so qagueta lo'opi maye ilotague' aso lalopi huetauga ye saqaỹapeque ye nỹecpi maye le'enaxat Belén.

⁹ Nache nque'elaxatta da so 'oonolec lamaxashec Ñim Lo'onatac 'Enauacna nachaxana somayepi, qaq da llo'oxoyec Ñim Lo'onatac 'Enauacna icoỹarelec cam hueta'a somayepi. Qaq som qagueta lo'opi ỹataqta lta'araic da lcolanaxa,

¹⁰ qalaxaye so lamaxashec Ñim Lo'onatac 'Enauacna 'enapeco': «Saishet da qayi'i, cha'aye aỹem qami' ñera'alo da no'on qara'axaỹaxaqui. Qaq damaye ỹo'ot qome da lta'araic da qantonaxaqui:

¹¹ ¡Ye Qarca'alaxaqui mashe ñiguiñi hueta'a ye Belén! ¡Nacheye ye Lca'aguishec Ñim Lo'onatac 'Enauacna qataq Nataxala'!

¹² Qaq ỹataqteguet yemaye cha'aye do'ocheta, netangui añi shiguiỹac lquia'axaqui, qalpataxaatagui ye lapo'.»

¹³ Huaña, nache nque'elaxatta da nachaxan so qalota namaxashecpi piguem le'ecpi, somayepi do'onaxaatac ỹo'oxoreetac Ñim Lo'onatac 'Enauacna, 'eeta':

¹⁴ «¡Ỹataqta lta'araic da ño'oxonnataguec Ñim Lo'onatac 'Enauacna maye neto'ot na piguem, nataqa'en ana 'alhua huo'o da l-lagaxayec 'enauac nam ỹauotec Ñimaye!»

¹⁵ Nache so lamaxashecpi Ñim Lo'onatac 'Enauacna co'ollaq mashe ỹe'eguelaxague da piguem, nache som qagueta lo'opi detaqtega't, 'eeta': «¡'Onaxaic da qolaq qome, ñeqalgoxosoqtaua'a ye Belén da semeenaxanaxaua'a chaq 'eetec dam da' maye qomi' da'aqtaxaateguema Ñim Lo'onatac 'Enauacna!»

¹⁶ Nache so qagueta lo'opi ỹataqta iỹalapigui' da jec da nqo'oneua'a ye nỹecpi ye Belén, nache ỹanatra aso María qataq so José, nataqa'en so nogotolec huetangui aso lquia'axaqui na shiguiỹacpi maye nlo.

¹⁷ Ime, nache pa'are'c, qataq ỹa'axattra'c da la'aqtac so lamaxashec Ñim Lo'onatac 'Enauacna co'ollaq ỹa'axattac so nogotolec.

¹⁸ Nache 'enauac nam hueta'a yi'iye co'ollaq hua'aqchigui de'era na'aqtaxanaxac, nache ỹataqta huo'o da la'aalaxa.

¹⁹ Nache aso María nataqa'en ỹataqta huo'o da la'aalaxa 'enauac de'era, nache saishet da ỹaxaañi da iuennatega.

²⁰ Qaq so qagueta lo'opi co'ollaq ime, nache ỹe'eguelaxauga aso qaguetapi da ilo'ogue. Qaq co'ollaq quetrague' so nqa'aic, nache ỹataqta ỹo'oxoreetrac Ñim Lo'onatac 'Enauacna, qataq ỹaatacot da na'achec souaxat dam ỹauaachigui qataq dam hua'aqchigui. Ỹataqta 'enauac da ipacchigui nam ỹa'axattac som namaxashec co'ollaxa.

So nogotolec Jesús qairoua'a aso no'onaxanaxaqui late'erai

²¹ Qaq co'ollaq mashe ivi' soua ocho na'axa'te da lañoxoc so nogotolec, nache qaỹauo'o so la'anaxat na lo'oc Somaye. Ime, qaq qoỹanagui da le'enaxat Jesús, dam ne'enaxat maye da'aqtaxanem co'ollaxa so lamaxashec Ñim Lo'onatac 'Enauacna aso María co'ollaq saxanaxa da hualaxai.

So Jesús qataq so Simeón

²² Qaq co'ollaq mashe inoxoore'c soua cuarenta na'axa'te da ñiguiñi So Jesús, nache soua lta'al iroreua'a so nogotolec aso no'onaxanaxaqui late'erai maye naña ye nỹecpi le'enaxat Jerusalén, da yaqto' ỹaarot Ñim Lo'onatac 'Enauacna.

²³ Cha'aye nache lamaxasoxonaxac na nqataxacpi maye chegoqo'ot so Moisés: «Da que'eca na'auaxanec ñalec maye ñiguiñi, camaye da ỹale, nache iuen da qoỹanot Ñim Lo'onatac 'Enauacna.»

²⁴ Na namaxasoxonaxacpi nataqa'en ỹa'axat da iuen da qaỹauo'o aca nachetaqtaxanaqte da qoỹanot Ñim Lo'onatac 'Enauacna, ishet da qaỹauota'a dos qoto', huo'otaq caua dos llalqa na 'ollolec.

²⁵ Qaq se'eso na'a'q hueta'a ye nỹecpi le'enaxat Jerusalén so ỹale le'enaxat Simeón. Somaye ỹataqta no'on da lataxac qataq ỹalaxaguet Ñim Lo'onatac 'Enauacna. Somaye iuattaique da Ñim Lo'onatac 'Enauacna nca'alaxatec na Israel le'ecpi. Qaq So Saqcha'a Na'añaxac Qui'itta, nache hueta'aguet somaye.

²⁶ Qataq 'enapec co'ollaxa da saishet da imeuo da nachaalataxac qom saxanaxa da ilogui ca Lca'aguishec Ñim Lo'onatac 'Enauacna maye ỹachaxanapec co'ollaxa.

²⁷ Qaq se'eso na'a'q So Saqcha'a Na'añaxac Qui'itta ỹamaq so Simeón da taua'a aso no'onaxanaxaqui late'erai. Nache se'eso na'a'q nataqa'en soua lta'al So Jesús huenoxooroigui aso no'onaxanaxaqui late'erai, ỹacheta'ape so nogotolec da yaqto' ipaqueelec da lamaxasoxonaxac na nqataxacpi,

²⁸ nache so Simeón ỹaconeguet so nogotolec da ỹachaleguete naua lhua'q. Ime, qaq ỹo'oxoreetac Ñim Lo'onatac 'Enauacna, 'eeta':

²⁹ «Nagui, 'am maye 'Aro'onatac 'Enauacna ishet da aỹem 'aỹa'anem da saqca ca da ca loga't da ñachaalataxac. ¡Cha'aye mashe ipacchigui dam 'auachaxanapec!

³⁰ Cha'aye aỹem ñema'ai' nagui da ñelota'ai' nam Nca'alaxaqui,

³¹ nam 'anamaq da yaqto' 'enauac nam shiỹaxauapi ila'a.

³² Namaye nachena na ncoỹaraxanaqte, maye icoỹarelec 'enauac na shiỹaxauapi, qataq namaye nache llo'oxoyec nam 'aralamaxatpi maye Israel le'ecpi.»

³³ Nache so José qataq aso María ỹataqta huo'o da la'aalaqa' nam hua'aqchiyigui la'aqtacpi so Simeón co'ollaq detaqtapeguelec so nogotolec.

³⁴ Nache so Simeón ỹan da no'on la'aqtac. Ime, nache 'enapega aso María asom late'e So Jesús, 'eeta': –Ñim Lo'onatac 'Enauacna namaq ne'ena nogotolec da yaqto' qalota na nca'alec na Israel le'ecpi, qaq ca laỹepi na Israel le'ecpi qalaq huo'o ca nhuaxanaguec. Ñim Lo'onatac 'Enauacna namaq namaye da yaqto' qaỹaỹateeteguet da 'eetapeguec Ñimaye, qalaxaye qalota qome na dataỹa'aguet.

³⁵ Huaña, nache ishet da qaỹaỹaten ca ỹoqta lhuennataxac ñi 'oonolec. Qaq 'am María, de'era qome ỹataqta ỹo'ot da 'anque'eenaxac, 'ena'am da ỹa'attagui qome añi 'arquiyaqte ca ỹeelonec.

So Jesús qataq aso Ana maye la'aqtaxanaxana Ñim Lo'onatac 'Enauacna

³⁶ Qaq aso no'onaxanaxaqui late'erai hueta'a nataqa'en aso 'alo ỹa'axaino'ole, asomaye la'aqtaxanaxana Ñim Lo'onatac 'Enauacna le'enaxat Ana. Asomaye llale so Peniel maye chegoxoguet so Aser. Co'ollaq ña qa'añole aso Ana, nache huaron, qaq ivi' siete vi'iye da neta'aguet so lhua,

³⁷ qalaxaye nagui asomaye pa'ai qataq mashe ivi' ochenta y cuatro vi'i da llaxa. Asomaye hueta'a añi no'onaxanaxaqui late'erai ye pe qataq ye na'a'q nqouaqchettac, nqouagaxaueetac qataq ỹo'oxoreetac Ñim Lo'onatac 'Enauacna.

³⁸ Qaq co'ollaq ime da la'aqtaxanaxac so Simeón, nache aso Ana nquigueuo, nache chegoqchiguiña da ỹo'oxoreetac Ñim Lo'onatac 'Enauacna, qataq ỹa'axattac se'eso nogotolec Jesús, da'aqtaxaatapeguem 'enauac nam iuattaique da Ñim Lo'onatac 'Enauacna huesochiguiñi naqa'en na hueta'a ye nỹecpi le'enaxat Jerusalén.

³⁹ Qaq so José qataq aso María co'ollaq mashe ima't da ỹo'o't 'enauac nam damaxasoxoolec nam lqataxacpi Ñim Lo'onatac 'Enauacna, nache soomaye ỹe'eguelaxaregue da maiche lma't Nazaret, maye huaigui ye 'alhua Galilea.

⁴⁰ Qaq so nogotolec Jesús nquictasheguem da lañaxataxac qataq da la'añaxac saqcha'a. Qataq Somaye ỹataqta nlaqchigui da laỹaanataxanaxac, qaq Ñim Lo'onatac 'Enauacna ỹataqta lta'araic da ntootapeguec Somaye.

So nogotolec Jesús huetaua'a aso no'onaxanaxaqui late'erai

⁴¹ So José qataq aso María 'enauaque naua vi'iye da ỹe'eguelaqtra'ague da Jerusalén naxa da iviteuga so naponaxac maye le'enaxat da Lapascua.

⁴² Qaq So Jesús co'ollaq mashe ivi' naua doce vi'iye da llaxa, nache nnaicapegueto soua lta'al da taregue da Jerusalén, cha'aye nache lataxac naxa da iviteuga se'eso na'a'q naponaxaqui.

⁴³ Qaq co'ollaq mashe ivilde'c soua na'axa'te maye naponaxaqui', nache soua lta'al ỹe'eguelaxara ca lma', qalaxaye saishet da nomalo da So Jesús no'onaña ye Jerusalén.

⁴⁴ Qaq so José qataq aso María co'ollaq mashe 'oonolec na'a'q da quete', nache ipettrego' da So Jesús ca'attaigui so laỹepi maye qannaictague'pi de'era ñecỹaxac. Ime', nache nmittrapigui so lauo' le'ecpi qataq so nauattonaxauapi,

⁴⁵ qalaxaye saishet da ỹanatra So Jesús. Huaña, nache soomaye ỹe'eguelaxaregue da Jerusalén da nmitraique.

⁴⁶ Qaq so lỹa na'a'q, nache ỹanatra So Jesús huetaigui aso no'onaxanaxaqui late'erai ỹalectaigui nam dapaxaguenataxaateguec na namaxasoxonaxacpi. Somaye na'axaỹaxaatac qataq huo'o na lnataxanaxacpi.

⁴⁷ Nache 'enauac nam na'axaỹaxaatega So Jesús ỹataqta huo'o da la'aalaxa souaxat na laỹaanec, qataq da ỹasateguet da lnataxanaxac somayepi.

⁴⁸ Nache soua lta'al ỹataqta huo'o da le'elqa' co'ollaxa iloraua'a Somaye, nache aso late'e 'enapego' Somaye, 'eeta': –'Am ỹalcolec, ¿ta'ainco' ye qomi' 'auo'oteque de'era? Da 'arta'a qataq aỹem ỹataqta lta'araic da qarhuogoxo da 'am ñimitaqtaique.

⁴⁹ Qalaxaye So Jesús ỹasategueto', 'eeta': –¿Ta'ainco' ye Aỹem qanmichiitaique? ¿Sa qauaỹaañiỹo' peta'a da Aỹem iuen da soota'a na lma' Ñim Ita'a?

⁵⁰ Qalaxaye soomaye saishet da ỹaỹateereguet da la'aqtac Somaye.

⁵¹ Nache So Jesús ỹe'eguelaq nnaicapegueto soua lta'al da ỹe'eguelaxaregue da Nazaret, qataq ỹataqta ỹalaxagueta soomaye. Qaq aso late'e ỹataqta deuennataxaateguelec 'enauac de'era huaiguilo soomaye.

⁵² Nache So Jesús nquictasheguem da laỹaanec qataq ye locta. Qaq Ñim Lo'onatac 'Enauacna qataq 'enauac na shiỹaxauapi ỹataqta ntootapeguec Somaye, qataq ỹataqta lta'araic da nauoche.