Lucas 14 - La'aqtaqa Ñim Lo'onatac 'Enauacna 2013

So Jesús nataren so sano'on

¹ Qaq huo'o so na'a'q mataxaqui, nache So Jesús nqo'oneua'a da lquia'aqa' so lma' som 'oonolec nam lataxala'pi na fariseopi. Qaq som laỹepi maye ỹalectauo, 'enauac somayepi choche nauaatac So Jesús.

² Qaq nque'elaxatta da huo'o so ỹale maye nalaua't naua lchel qataq naua lhua'q datato'ot Somaye.

³ Nache So Jesús, inattac nam dapaxaguenataxaatapeguec na namaxasoxonaxacpi qataq som fariseopi, 'eeta': –¿Ishet peta'a da qaỹasheeta da qanataren ca sa no'on ye na'a'q mataxaqui, qalqo' saishet?

⁴ Qalaxaye somayepi ỹe'emaqtom. Nache So Jesús ỹacona na lhuaq so sa no'on, nache no'oita naqa'en, nache 'enapega da jec.

⁵ Nache 'enapega so fariseopi, 'eeta': –Da huo'o ca 'oonolec da qoñiita da huo'otaq tangui aca nshere ca lalo 'ashena, huo'otaq ca lauegaxanaxala' huaca, qaq ¿saishet peta'a da nqatsheguem, na'aictaxa da huo'otaq huetoigui ca na'a'q mataxaqui?

⁶ Qalaxaye saishet da huo'o ca ỹasat somayepi.

Som qaicoyeguenpi da yaqto' ỹalectauo so naronaxac

⁷ Qaq So Jesús co'ollaq ỹauaachigui som ncoyeguenatacpi se'eso nquia'axac da lca'ataua'a anam ỹo'oxoraq so'onaxaquipi som nquia'axala'. Nache ỹan da lqataxac, 'eeta':

⁸ –Da huo'otaq huo'o ca 'am icoyeguen da yaqto' 'aualectaua'a ca naronaxac, qalaq saishet qome da 'anso'ongui aca so'onaxaqui maye ỹo'oxoraq, cha'aye saiuena'a da nvireuo ca lỹa ncoyeguenatac maye 'am napacalec da llo'oxoyec.

⁹ Nache cam 'am icoyegue'n ishet da anac, nache 'am 'enapega, 'eeta': «Ñaq 'aỹa'anem ana 'anso'onaxaqui de'era 'arỹa.» Huaña, nache 'am huo'o da 'ara'aloxo da 'anso'ongui aca pa'atec so'onaxaqui.

¹⁰ Qaq ỹoqo'oye, da 'am qaicoyeguen qalaq 'am 'anso'ongui aca pa'atec so'onaxaqui, yaqto' da nvi' ca 'am icoyeguen, qaq 'am 'enapega, 'eeta': «'Am ỹaqaỹa, 'aỹala, 'anso'ongui ana'ana so'onaxaqui maye ỹo'oxoraq.» Huaña, nache huo'o da 'año'oxonnataguec, 'am ỹo'oxoren nam 'anso'onaxauapi.

¹¹ Cha'aye ca nshetaique da 'amaqtaqaic, qaq nacheca ca saq 'amaqtaq qanqa'en, qaq cam sa na'amaqten, qaq nacheca ca 'amaqtaq qanqa'en.

¹² Nataqa'en 'enapega som shiỹaxaua maye dequia'axanataxan, 'eeta': –Da ivita da 'auo'ot ca 'arquia'axac ca na'a'q laiñi, huo'otaq ca pe, qalaq saishet qome da 'arquia'axaua ca 'anauochaxaua qataq ca 'arqaỹa, huo'otaq ca camachaqca 'arhuo' le'ec, huo'otaq na 'arhuoreuapi sallaxanecpi, cha'aye namayepi ishet da qaltaq 'am ỹe'eguelaxateguet da 'am iquia'axan, huaña, qaq huo'o da 'ansheetenaguec.

¹³ Qaq ỹoqo'oye da ivita da 'auo'ot ca 'arquia'axac, qalaq 'aucoyeguen nam choxoraqpi qataq na sa da'añiigue qataq nam ñe'eerauo naua lchel qataq nam qanamaicpi,

¹⁴ yaqto' ishet da ỹataqta 'auamachiguiñi. Cha'aye namayepi saishet da 'am isheetena'aguet. Qalaxaye 'am qome huo'o ca 'ansheetenaguec qom ivita da qaltaq qanca'alaxatec nam shiỹaxauapi maye ỹo'ottac nam ỹaỹamaxareeta Ñim Lo'onatac 'Enauacna.

Qaỹaloqnaxana ca lta'araic nquia'axac

¹⁵ Qaq co'ollaq hua'aqchigui de'era som 'oonolec maye nso'ootañi datatalec so nquia'axala', nache 'enapega So Jesús, 'eeta': –Ỹataqta machiguiñi qome ca dequi'iỹapegueua'a ca nallec qom qanayeetaigui da lo'onataxanaxac Ñim Lo'onatac 'Enauacna.

¹⁶ Nache So Jesús 'enapeco': –Huo'o so ỹale ỹo'ot so lta'araic lquia'axac, nache icoyeguen so qalota shiỹaxauapi da lquia'axaua.

¹⁷ Qaq co'ollaq mashe ivireuga so laloqo' da deque'e, nache ỹamaq so lamaxashec da ỹe'eguenauga so lcoyeguenatacpi da 'enapega, 'eeta': «Qauanaqui qome, cha'aye mashe ime da nallec.»

¹⁸ Qalaxaye 'enauac somayepi huo'oi naua ỹegalo. Nache som la'auaxanec, 'eeta': «Aỹem cheta'ague da sesheenaxana ye ña'alhua, qaq aỹem ashec da semeenaxaneuga. Ỹoqo'oye 'am ñachoxonnot da choche aỹem 'auchoxoren.»

¹⁹ Qaq so lỹa qalaq, 'eeta': «Aỹem qalaxaye cheta'ague da sesheenaxanalo yeua cinco nataxau' ỹauegaxanaxala'ate huaca, qaq nagui aỹem sauotaique da she'egue'n. Ỹoqo'oye 'am ñachoxonnot da choche aỹem 'auchoxoren.»

²⁰ Qaq so lỹa qalaq, 'eeta': «Aỹem cheta'ague da saron, qaq ỹoqo'oye aỹem saishet da ashec.»

²¹ Qaq so namaxashec co'ollaq mashe ñe'eguelaq, nache da'aqtaxaatapeguem 'enauac de'era so na'aco'. Nache somaye 'enapega so lamaxashec, 'eeta': «Qojec qome, sa 'anaỹaloxon da qoqueguelo naua lta'al nqa'aico qataq naua nqa'aicolqa nam nỹecpi. Ime, qaq 'anauegueuo qome na choxoraqpi qataq nam sa da'añiigue qataq nam ñe'eerauo naua lchel qataq nam qanamaicpi.»

²² Qaq co'ollaq mashe ñe'eguelaq so namaxashec, nache da'aqtaxan, 'eeta': «'Am ña'aco', mashe sogote da so'ot 'enauac da aỹem 'auamaxalec, qalaxaye ñaqaiyeta ñaq huo'o ye ndaqa'.»

²³ Nache so 'aco' 'enapega so lamaxashec, 'eeta': «Qojec, 'anqo'oneugalo qome naua nqa'aico lta'al qataq naua nqa'aicolqa nam pa'auec. Nache qonapega na laỹepi shiỹaxauapi da yaqto' nnoxoneuo. Cha'aye sauotaique da nlaqchigui na ima'.

²⁴ Qalaxaye saishet da iquia'axaua 'enauac nam hua'auchiguiñi da secoyeguenpi.»

Da lqalaic cam nshetaique da quegue So Cristo

²⁵ Qaq ỹataqta qalota so shiỹaxauapi maye ca'attague' So Jesús, nache Somaye namataique somayepi. Nache 'enapega, 'eeta':

²⁶ –Saishet da ỹapaxaguenatac ca Aỹem naua'a, da huo'otaq ỹapagaqnauec da ỹauotec ca lta'a, huo'otaq aca late'e, lhua, qataq ca llalaqpi, lqaỹañecpi ỹalleppi qataq 'alpi. Nachaqcata ca ỹactec da Aỹem ỹauotec, saq 'ena'am da maiche nachaalataxac, qaq nacheca ca ỹapaxaguenatac.

²⁷ Qataq ca Aỹem quegue, da huo'otaq saishet da lhuennataxa da Aỹem ileetalec, qaq camaye saishet da ỹapaxaguenatac.

²⁸ Da huo'otaq huo'o ca 'oonolec da qoñiita da nshetaique da no'oxoosheguem aca naue, qaq ¿saishet peta'a da ỹa'auaxaañi da nso'ooñi da naloqten da huo'otaq nalotalec aca lasheue que'eca ỹo'ot?

²⁹ Cha'aye saiuena'a da huo'otaq mashe lapaxañi cam lo'oxonaxala' naqa'en aca'aca naue, qaq da ime da lapaxañi, nache sa ỹañoxot da imat. Qanache 'enauac nam ỹauaachigui camaye, nache ishet da ỹe'en.

³⁰ Nache 'enapec da la'aqtac namayepi: «De'era ỹale, damaye huotaique da no'oxoosheguem aca naue, qalaxaye sa ỹañoxot da imat.»

³¹ Huo'otaq ca nta'a da huotaique da delogui' ca lỹa nta'a, qaq ¿saishet peta'a da ỹa'auaxaañi da naloqten da ca diez mil nalleppi ishet da nala'aguet cam huotaique da delogui' maye nnaictague' ca veinte mil nalleppi?

³² Qaq da huo'otaq ila'a da saishet da nalo'oguet, nache da ña qaỹoqteguet camaye, nache iuen da ỹamaq ca la'aqtaxanaxanec da yaqto' nmane' camaye.

³³ Ỹoqo'oye camachaqca ca huotaique da ỹapaxaguenatac, nache 'onaxaic da nataqa'en deuennataxaatelec da huo'otaq ishet da ỹañoxot da ỹaxanec 'enauac nam hueto'ot.

Ca toue da huo'otaq mashe deqat da lle'euaxa

³⁴ Ca toue ỹataqta 'onaxaic, qalaxaye da huo'otaq deqat da lle'euaxa, nache camaye mashe qaica ca taiguet,

³⁵ na'aictaxa da qaỹaỹamaxat da lata' qanqa'en ca nañiguishe lma'. Chaqrata da qaỹalat. ¡Da ỹataqta 'eesa da huo'oi naua qartelai lauacolli', qaq no'on qome da ỹataqta qana'axaỹaxañiichiguiñi!