Levítico 3 - La'aqtaqa Ñim Lo'onatac 'Enauacna 2013

Aso nachetaqtaxanaqte maye qanhuaachigui

¹ «Qaq da huo'o ca 'oonolec da qoñiita da ndouo aca lachetaqtaxanaqte, nache ỹauota'a aca huaca 'alo, huo'otaq ỹale da ỹanot Ñim Nataxala', da yaqto' qanhuaachigui, qalaxaye que'eca shiguiỹac iuen da qaica ca lque'emaxa.

² Nache que'eca ỹaneuo aca lachetaqtaxanaqte, camaye nacheca ca ỹashel-lec na lqaic que'eca shiguiỹac, ime nache ipelecot na lqosot huaña naqa'en ye ñegueuo ñi npe'l maye huaña naxa da qanauane' Ñim Nataxala'. Qaq ñeua llalqa so Aarón maye ntaxaỹaxanaxanaqa, icoroto naua laỹel añi nca'atoxonaxalate ca ltago'q que'eca shiguiỹac.

³ Nache que'eca ỹaneuo aca lachetaqtaxanaqte, camaye ỹanot Ñim Nataxala' ca lcheta na lauel le'ec que'eca shiguiỹac, da yaqto' lachetaqtaxanaqte maye qaỹavigaxat,

⁴ qataq caua lchiguishel ima'aguet naqa'en ca lcheta, qataq ca lcheta ca l-laq lapat, nataqa'en ca lsheenec ca l-lamec.

⁵ Qaq ñeua llalqa so Aarón, nache ỹavigaxat 'enauac camaye npa'axatcheguem da ỹachalec añi nca'atoxonaxalate maye huetalec ca lỹa shiguiỹac nachetaqtaxanaxat qaỹavigaxatta, cha'aye nachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala'.

⁶ Qaq da huo'o ca ỹaneuo aca qagueta huo'otaq quetaq da lachetaqtaxanaxat qanhuaachigui, nache ỹauota'a ca ỹale huo'otaq 'alo qataq qaica ca lque'emaxa.

⁷ Qaq da ỹaneuo ca qagueta llalec da lachetaqtaxanaxat da ỹanot Ñim Nataxala',

⁸ nache ỹashel-lec na lqaic. Ime, nache ipelecot na lqosot huaña naqa'en ye ñegueuo ñi npe'l maye huaña naxa da qanauane' Ñim Nataxala'. Ime, nache ñeua llalqa so Aarón icoroto naua laỹel añi nca'atoxonaxalate ca ltago'q.

⁹ Nache ca ỹaneuo aca lachetaqtaxanaqte qanhuaachigui, camaye ỹanot Ñim Nataxala' da yaqto' qaỹavigaxat 'enauac ca lcheta ca la'araxashet, qataq ca lcheta na lauel le'ecpi,

¹⁰ qataq caua lchiguishel ima'aguet naqa'en ca lcheta, qataq ca lcheta ca l-laq lapat, nataqa'en ca lsheenec ca l-lamec.

¹¹ Ime, nache ca ntaxaỹaxanaxanec ỹavigaxat 'enauac camaye ỹachalec añi nca'atoxonaxalate, cha'aye nachetaqtaxanaxat nallec maye qaỹavigaxat da qoỹanot Ñim Nataxala'.

¹² Qaq da ỹaneuo aca quetaq da lachetaqtaxanaqte da ỹanot Ñim Nataxala',

¹³ nache ỹashel-lec na lqaic. Ime, nache ipelecot na lqosot, huaña naqa'en ye ñegueuo ñi npe'l maye huaña naxa da qanauane' Ñim Nataxala'. Ime, nache ñeua llalqa so Aarón, icoroto naua laỹel añi nca'atoxonaxalate ca ltago'q.

¹⁴ Nache ca ỹaneuo aca lachetaqtaxanaqte, camaye ỹanot Ñim Nataxala' da yaqto' qaỹavigaxat 'enauac ca lcheta na lauel le'ecpi que'eca shiguiỹac,

¹⁵ qataq caua lchiguishel ima'aguet naqa'en ca lcheta qataq ca lcheta ca l-laq lapat, nataqa'en ca lsheenec ca l-lamec.

¹⁶ Ime, nache ca ntaxaỹaxanaxanec ỹavigaxat 'enauac camaye ỹachalec añi nca'atoxonaxalate, cha'aye nachetaqtaxanaxat nallec maye qaỹavigaxat da qoỹanot Ñimaye, yaqto' da ama laitaỹaxac ỹamaateguet Ñim Nataxala'. Qaq 'enauac que'eca lcheta nache lalamaxat Ñimaye.

¹⁷ Qaq 'era qome da nache 'eetai' lataxac da qoyecỹaxaqui, qataq ca qaỹa'alquipi, qataq cam qami' chegoxogueta, na'aictaxa ca pa'aigue ca qoñiitaña ana 'alhua, qalaq saishet qome da qollequi ca lcheta qataq ca ltago'q ca shiguiỹac».