Levítico 27 - La'aqtaqa Ñim Lo'onatac 'Enauacna 2013

Da 'eetec da qañe'eguelaxaala't ca shiỹaxaua maye mashe qoỹanot Ñim Nataxala'

¹ Ñim Nataxala' 'enapega so Moisés, 'eeta':

² «'Aua'aqtaxanem qome na Israel le'ecpi, qoneta': Da huo'otaq huo'o ca ỹachaxanapec co'ollaxa ca lauo' le'ec da ỹanot Ñim Nataxala', nache da huotaique da ñe'eguelaxaala't camaye, nache isheeten ipagaqchiichigui aca lasheue.

³ Qaq camaye da ỹale qataq mashe ivi' caua veinte vi'iye, huo'otaq sesenta vi'iye da nachaalataxac, nache cincuenta naqa'en caua lca'achole aca plata aca lasheue, nache iroua'a ñi npe'l maye huaña naxa da qanauane' Ñim Nataxala'.

⁴ Qaq da 'alo, nache treinta naqa'en caua lca'achole aca plata aca lasheue.

⁵ Qaq da ỹale da mashe ivi' naua cinco vi'iye huo'otaq veinte vi'iye da nachaalataxac, nache veinte caua lca'achole aca plata aca lasheue. Qaq da huo'otaq 'alo qataq nache 'eeta'ama da llaxa que'ecaua ỹale't, nache diez caua lca'achole aca plata aca lasheue naqa'en.

⁶ Qaq da ñaq nogotolec da mashe ivi' ca 'oonolec ca'agoxoic, huo'otaq da mashe ivi' cinco vi'iye da nachaalataxac, nache cinco caua lca'achole aca plata aca lasheue, qaq da huo'otaq 'alo aca'aca nogotole, qataq nache 'eeta'ama da llaxa que'ecaua ỹale't, nache tres caua lca'achole aca plata aca lasheue naqa'en.

⁷ Qaq da ỹale, da mashe napacalec caua sesenta vi'iye da nachaalataxac, nache quince caua lca'achole aca plata aca lasheue, qaq da huo'otaq 'alo qataq nache 'eeta'am da llaxa que'eca ỹale, nache diez caua lca'achole aca plata aca lasheue naqa'en.

⁸ Qaq que'eca shiỹaxaua da ỹachaxanapec co'ollaxa da ỹan ca lauo' le'ec, da ỹapac choxoraq da sa nalolec da isheeten aca lasheue camaye, nache iuen da taua'a ca ntaxaỹaxanaxanec da yaqto' camaye ỹo'ot aca lasheue, maye nalota'ai' da isheeten camaye.

Da 'eetec da qañe'eguelaxaala't ca mashe qoỹan

⁹ Qaq da shiguiỹac ca qaỹachaxanapec da qoỹanot Ñim Nataxala' da nachetaqtaxanaxat, nache que'eca shiguiỹac camaye lalamaxat Ñimaye.

¹⁰ Qataq saishet da nmeneguet ca lỹa shiguiỹac, na'aictaxa camaye da 'onaxaic, huo'otaq da qallegueme da 'onaxaic. Cha'aye da nmena't que'ecaua shiguiỹa'c, nache 'enauaque caamaye da lalamaqa'ate Ñimaye.

¹¹ Qaq da qaỹachaxanapec ca shiguiỹac da qoỹanot Ñim Nataxala' nam saishet da qui'itta, nache que'eca shiguiỹac qairoua'a ca ntaxaỹaxanaxanec,

¹² da yaqto' camaye ỹauo'o ca lashiichiỹaxac. Nache aca lasheue maye ỹanagui ca ntaxaỹaxanaxanec, nachaca aca lasheue.

¹³ Qaq da huo'otaq qaỹauotaique da qaỹe'eguelaxat que'eca shiguiỹac, nache aca lasheue camaye huo'o aca qaỹauaxaỹaxaalec.

¹⁴ Qaq da huo'o ca ỹanot Ñim Nataxala' ca lma', nache ca ntaxaỹaxanaxanec ỹo'ot aca lasheue que'eca nỹec. Nache aca lasheue maye ỹanagui ca ntaxaỹaxanaxanec, nachaca aca lasheue camaye.

¹⁵ Qalaxaye ca ỹaneuo que'eca nỹec da huo'otaq ñe'eguelaxaala't, nache iuen da ỹauo'o aca ỹauaxaỹaxaalec aca ỹoqta lasheue camaye. Nache que'eca nỹec ishet da ỹe'egueloqot que'eca shiỹaxaua.

¹⁶ Qaq da huo'o ca ỹachaxanapecot da ỹanot Ñim Nataxala' ca na'alhua laỹe, nache aca lasheue qanaloqnagui ye lcachiguiñi que'eca 'alhua, nache aca doscientos veinte kilos aca nañiguishe ala cebada, acamaye cincuenta caua lca'achole ca lcat plata aca lasheue da qaisheeten que'eca lalamaxat 'alhua.

¹⁷ Qaq da huo'otaq huetoigui ca vi'i cincuenta maye laloxoqui da ỹe'eguelaxa da huesochiguiñi 'enauacna, nache camaye ipacchigui aca maiche lasheue maye qoỹanagui co'ollaxa.

¹⁸ Qalaxaye da ỹaneuo co'ollaq mashe inoxonec que'eca vi'i, nache ca ntaxaỹaxanaxanec naloqteetegueta aca lasheue caua vi'iye da saxanaxa da ivireuga ca vi'i, da ỹe'eguelaxa da qaltaq huesochiguiñi 'enauacna.

¹⁹ Qaq que'eca ỹaneuo que'eca na'alhua, da huo'otaq huotaique da ñe'eguelaxaala't, nache iuen da ỹauo'o aca ỹauaxaỹaxaalec aca ỹoqta lasheue camaye. Nache que'eca 'alhua ishet da ỹe'egueloqot que'eca shiỹaxaua.

²⁰ Qalaxaye da sa ỹañoxot da ñe'eguelaxaala't, qataq mashe imenot ca lỹa shiỹaxaua que'eca na'alhua, nache camaye saishet da ỹe'eguelaxa da ñe'eguelaxaala't.

²¹ Qaq que'eca 'alhua da ivita ca vi'i maye laloxoqui da ỹe'eguelaxa da huesochiguiñi 'enauacna, nache camaye nache 'eetai' da lalamaxat Ñim Nataxala', qataq lalamaxat ca ntaxaỹaxanaxanecpi.

²² Da huo'o ca ỹachaxanapec da ỹanot Ñim Nataxala' ca 'alhua maye lsheenaxanaxat, da saishet da lalamaxat co'ollaxa ca maiche lauo' le'ecpi camaye,

²³ nache ca ntaxaỹaxanaxanec naloqteetegueta aca lasheue caua vi'iye, da saxanaxa da ivireuga ca vi'i da ỹe'eguelaxa da qaltaq huesochiguiñi 'enauacna. Nache que'eca shiỹaxaua huetoigui naqa'en que'eca na'a'q da isheeten aca lasheue ca 'alhua. Ime, nache ỹanot Ñim Nataxala'.

²⁴ Qaq da ivita ca vi'i maye laloxoqui da ỹe'eguelaxa da huesochiguiñi 'enauacna, nache huaña da ỹe'egueloqot ca lalamaxat que'eca 'alhua, cam ỹataqta chegoqtot co'ollaq qaisheenaxana.

²⁵ Qaq 'enauac aca'aca nsheetenaxanaqtepi, nache qanaloqchiichigui ye lcata aca anompiole maye qaỹo'onataxaatega naxa ñi npe'l, maye ivi' ca diez gramos añi 'oonole.

Da 'eetec da qañe'eguelaxaala't cam qoỹanot Ñim Nataxala'

²⁶ Qaq ca la'auaxanec llalec ca 'atetpi, camaye nache 'eetai' da lalamaxat Ñim Nataxala'. Ỹoqo'oye qaica qome ca ỹe'egueeta'a da ỹaneuo ca huaca llalec, huo'otaq ca qagueta llalec, cha'aye camaye mashe sogote da lalamaxat Ñim Nataxala'.

²⁷ Qaq da huo'o ca huotaique da ñe'eguelaxaala't ca shiguiỹac maye ỹaneuo co'ollaxa nam saishet da qui'itta, nache isheeten aca lasheue maye ỹanagui ca ntaxaỹaxanaxanec, qataq ỹauo'o aca ỹauaxaỹaxaalec aca ỹoqta lasheue camaye. Qalaxaye da saishet da ñe'eguelaxaala't da desheenaxana, nache camaye qaimen qataq ipacchigui aca lasheue maye ỹanagui ca ntaxaỹaxanaxanec.

²⁸ Qaq da huo'otaq huo'o ca mashe ỹanot co'ollaxa Ñim Nataxala' ca lalamaxat logoxoshetpi, huo'otaq da shiỹaxaua, shiguiỹacpi, huo'otaq na'alhua da yaqto' nache 'eetai' da lalamaxat Ñimaye, nache saishet da imen, qataq da ñe'eguelaxaala't da desheenaxana, cha'aye ỹataqta sa qaishetapec, qataq mashe lalamaxat Ñim Nataxala'.

²⁹ Qataq ca shiỹaxaua maye mashe qoỹanot Ñim Nataxala' da yaqto' nache 'eetai' da lalamaxat Ñimaye, nache saishet da qaltaq qañe'eguelaxaala't da qaisheenaxana, nacherata da qaỹalauat da yaqto' nachetaqtaxanaxat.

³⁰ Qaq aca diezmo maye chegaqaigui ca nañiguishec, qataq aca ala aca qo'oipaq maye ishet da qanallec, acamaye qaiỹotauga, cha'aye lalamaqte Ñim Nataxala'.

³¹ Qaq da huo'otaq huo'o ca nshetaique da ñe'eguelaxaala't aca diezmo maye ala ca nañiguishec, nache camaye isheeten aca lasheue, qataq ỹauo'o aca ỹauaxaỹaxaalec.

³² Qataq ca 'oonolec caua diez ca 'atetpi huaca, huo'otaq aca qagueta, qataq quetaq, nache qaiỹotauga da qoỹanot Ñim Nataxala',

³³ qalaxaye saishet da qalca'aua'a da nmeneguet ca lỹa shiguiỹac, na'aictaxa camaye da 'onaxaic, huo'otaq da qallegueme da 'onaxaic. Cha'aye da nmena't que'ecaua shiguiỹac, nache 'enauaque caamaye da lalamaqa'ate Ñimaye. Qaq ỹoqo'oye saishet da qaltaq qaỹe'eguelaxa't da qaisheenaxanalo.»

³⁴ Qaq 'ena na lamaxasoxonaxacpi Ñim Nataxala' maye ỹanem co'ollaxa so Moisés da yaqto' ỹanem so Israel le'ecpi, co'ollaq huaña añi qasoxonaxa Sinaí.