Levítico 26 - La'aqtaqa Ñim Lo'onatac 'Enauacna 2013

Da nchoxonnataguec ca huo'o da lalaxayec

¹ Saishet qome da qauo'oche ca ỹotta'a't ne'enaqtac nqui'ipi, qataq ca no'onatac coma' atamnaxala', qataq saishet da qanatamñiitacot camaye, cha'aye Aỹem Nataxala' maye Qanatamnaxala'ai.

² Qataq huo'o naq 'enec qanqa'eñi ca na'a'q mataxaqui, qataq ye ỹanataqa' maye huaña naxa da Aỹem qanauane'. Qaq 'era da ỹa'aqtac, Aỹem Nataxala'.

³ Qaq da qaualaqaigueta naua iqataxaco, qataq ỹataqta qauo'oche' naua ỹamaxasoxonaxaco,

⁴ nache Aỹem ipacchiguilo ñaqa'en naua na'axa'te maye laloxoqui' na auot da qami' ñamaxalo, nache ana 'alhua qataq ana qo'oipaqpi maye hualec na no'onaxa huo'o da alaỹaxac,

⁵ nache sa qoue qome na ala ca nañiguishec, choche ivitta'a da qanqat aca ala aca uva, qaq aca ala aca uva, acamaye choche ivitta'a qome ca laloxoqui da qaltaq qoỹaañi ca nañiguishec, nache que'eca qoñiitaña qana'alhuai, qaica ca leetapigui lauel, cha'aye sa qoue qome ca qanallec ivitta'a da ỹataqta qami' comaraxaiqa.

⁶ Qataq qami' sanema da qami' lacchiyiñi qome, qataq qaica ca ỹe'elaqtapigui' na lo'ochaxa, cha'aye Aỹem jec qome ñaqa'en ca shiguiỹacpi maye dequi'iỹapec, qataq que'eca qana'alhuai qaica ca alaataxac.

⁷ Qataq qami' dataueguesopa ca qami' ipa'agueeta'ape, qataq iqallem ca qaro'ogoxonaxache da qami' dataỹa'agueta.

⁸ Qaq caua cinco da qoñiita, nache datauec naqa'en ca cien, qaq ca cien da qoñiita, nache datauec naqa'en ca diez mil. Nache ca qami' ipa'agueetacpi iqallem qome ca qaro'ogoxonaxache da qami' dataỹa'agueta.

⁹ Qaq Aỹem nache ỹataqta qami' saỹamaxareete' da qami' selota'alo, qataq nquictauec qome ñaqa'en da qoñiita yaqto' qami' qalota, qataq nache 'eetai' ñaqa'en da ñaỹamaxataxac da qoñiita.

¹⁰ Qataq qollequiitac qome aca ala ca hua'auñi qa'añiguishe ca lỹa vi'i, nache ivitta'a da qanqacheeuec ca togoshec qaraỹamaqtaqui souaxat da qauaỹamaxache ca dalaxaic ala.

¹¹ Qaq Aỹem nache qami' sootanguilo qome, qataq saishet da qami' sa seuoonegueta.

¹² Qataq qami' ñenaictegueto, qaq nache Aỹem Qanatamnaxala'ai, qataq qami' nhuo' le'ecpi maiche qami' ỹalamaxatpi.

¹³ Qaq 'era da ỹa'aqtac, Aỹem Nataxala' maye Qanatamnaxala'ai maye qami' ñeqateeguesopa co'ollaxa ye Egipto da yaqto' saishet da nache 'eetai' da qami' l-lataqa yemayepi. Qataq qami' ñeqateeguesopa da qapa'atta qanlataguiiqui, nache huaỹoxootegue ñaqa'en da qarqauaxaqui.

Da nhuaxanaguec ca saishet da ỹalaq

¹⁴ Qalaxaye qami', da Aỹem sa qaualaqaiguet qataq da saishet da qauo'oche 'enauac ne'ena ỹamaxasoxonaxacpi,

¹⁵ qataq da saishet da qauacoñiiguet, qataq sa qaushetaxachiiguet na iqataxacpi, qataq na ỹamaxasoxonaxacpi, qataq da sa qaualaqaiguet namayepi, qataq qaica ca 'enec qanqa'eñi da ñaỹamaxataxac,

¹⁶ nache Aỹem qami' ñamaxalo qome ca ncolanaxa lta'araic, qataq ca nalolaxasat maye qanlem, qataq ca napaxa maye ỹo'ot na ne'eraxa, qataq na'aqche't naua na'ai'te, qataq qaica naqa'en ca la'añaxac da no'ocỹaxac, qataq choche qaỹa'añiiteguiñi qome ca qa'añiguishequi, qalaxaye ca qampa'aguenaxauaipi nacheca ca chec ca ala camaye.

¹⁷ Qaq Aỹem nache qami' sataỹa'agueta qome, qataq qami' naue'c ñaqa'en ca qampa'aguenaxauaipi. Qataq qami' ilatta'ape ca qami' lquiỹaqa'ate, nache huaña qaq maiche qauataiuec na'aictaxa da qaica ca qami' icaata'ape.

¹⁸ Qaq da ñaq 'eetalec da saishet da Aỹem qaualaqaiguet, nache siete da she'eguelaxalec da qami' seuaxa'n souaxat da qaye'etaxalqoi.

¹⁹ Qataq selaxachigui da qana'amqaanaxaqui, qataq so'ot da qaica ca auot ana 'alhua, qataq qaica ca alaỹaxac.

²⁰ Qataq shaco' da qana'añaxachiitac da qauo'ocheetac ca qana'alhuai, ye camaye qaica ca lañaxataxac, qataq aca qo'oipaqpi ca no'onaxa qaca aca ala.

²¹ Nache da ñaq 'eetalec da Aỹem qandaqaitapeeguet, qataq saishet da Aỹem qaualaqaiguet. Qaq huaña, nache qaltaq siete da she'eguelaxalec qome da qami' seuaxa'n souaxat da qaye'etaxalqoi.

²² Nache qami' samaxaleguete ca shiguiỹacpi maye dequi'iỹapec, da yaqto' chec ca qaỹa'alquipi, qataq ito ca qareloipi, nache nquigaxattañi, qataq ivitta'a da toteguelo caua qanqa'aicolli'.

²³ Qaq da ñaq 'eetalec da sa qaualaqai, qataq Aỹem qauataita'aguet,

²⁴ nache Aỹem qome nataqa'en, qaltaq siete da she'eguelaxalec da qami' seuaxa'n souaxat da qaye'etaxalqoi.

²⁵ Qataq qami' nagueleguete ñaqa'en ca no'ogoxonaxat, da yaqto' huo'o da lvi' ñaqa'en da ñaỹamaxataxac, nache na'aictaxa da qavi'igueñiiua'a ca maiche qaralamaxache huaqta'a't nỹecpi maye qanpaxattaua'a, qalaxaye Aỹem qami' hueque ñaqa'en ca nalolaxasat maye qanlem, huaña nache ỹataqta qami' loxonqa ca qampa'aguenaxauaipi.

²⁶ Qaq da ivita da selaxachigui ca qaraỹamaqtaqui nallec, huaña nache caua diez 'alo, da ỹauot aca qanqoi nauolepi, nache dauoxonoigui aca 'oonole qatelaxanaxaqui, souaxat da saq 'amaqtaq ca nallec. Qataq da qanallec, nache ỹataqta qalcoreeta, huaña nache saishet da ỹataqta qami' comaraxaiqa.

²⁷ Qaq da ñaq 'eetalec da sa qaualaqai qataq Aỹem qauataita'aguet,

²⁸ nache Aỹem nataqa'en qami' sataỹa'agueta qome, qataq qami' seroleguete da ỹayeloxo da ỹoltaq siete da qami' seuaxa'n souaxat da qaye'etaxalqoi,

²⁹ huaña qome nache qollequi ca maiche qaỹa'alquipi, qataq aca qaỹa'allipi.

³⁰ Qataq Aỹem selaxachigui ca qanatamnaqa'aipi maye netaña ca ne'enaqtacpi, qataq dolagui ñaqa'en aca lca'atoxolate ca nchenaxanaxat ama na laita, qaq da qaro'ocỹaxaqui maye mashe leuaxaic, nache llapoolec qome ca ne'enaqtacpi maye qanatamnaxala'aipi, cha'aye ỹataqta qami' saỹemeque.

³¹ Qataq nlachiguiñi ñaqa'en ca qaralamaxache huaqta'a't nỹecpi, qataq dolachigui ñaqa'en ca qanatamnaqa'aipi, qataq sevira'a da saishet da sesheteguet da laitaỹaxac aca qarachetaqtaxanaqche maye samaateguet co'ollaxa.

³² Nache ỹataqta 'enauac ñelaxatchiguiñi qome ca qana'alhuai, nache ca qampa'aguenaxauaipi maye anac da nalec camaye, ỹataqta huo'o qome da la'aalaxa.

³³ Nache qami' selagaxaaleguete ca ỹaqa'a 'alhuapi, souaxat da ñeqatsheguem ca ỹainec da yaqto' qami' secaata'ape, ivitta'a da ỹataqta toolec ñaqa'en ca qana'alhuai, qataq ñelaxaañi ca qaralamaxache huaqta'a't nỹecpi.

³⁴ Nache ca 'alhua ỹataqta lacchiguiñi qome, cha'aye huo'o da nmataxac 'enauaque que'ecaua vi'iye da toolec, qataq da qoñiitaña ca na'alhua ca qanpa'aguenaxauaipi, nache ca qana'alhuai ỹataqta nmatec qome, souaxat da qaica ca nmataxac co'ollaxa.

³⁵ Qaq nache 'enauaque que'ecaua vi'iye da toolec, ca 'alhua ỹataqta nmatec qome, saq 'ena'am co'ollaq qoñiitalec nache qaica ca nmataxac.

³⁶ Nache 'enauac ca lca'alaxaicpi da qoñiita maye hueta'a ca na'alhua ca qanpa'aguenaxauaipi, ỹataqta sa la'axaic ñaqa'en qome da lli'iỹaxa, nache da choche hua'axaỹa da dauaclec aca qo'oipaq laue nache datauec, 'eeta'am ca dataueeguesop ca no'ogoxonaxat, qataq maiche huañi, na'aictaxa da qaica ca ncaatague'.

³⁷ Qataq ỹe'egueetega'tpi, 'eeta'am ca dataueeguesop ca alaataxac, na'aictaxa da qaica ca ncaatague', nache qaica ca 'oonolec da qoñiita ca ishet da dataỹa'aguet ca npa'aguenaxauapi.

³⁸ Huaña, nache qaulliviỹalec ca ỹaqa'a 'alhua, qataq qami' nmatchiyiñi ca qanpa'aguenaxauaipi.

³⁹ Qataq ca lca'alaxaic maye hueta'a ca na'alhua ca npa'aguenaxauapi, camayepi ivitta'a qome da maiche imeuo, souaxat na maiche lle'etaxaloxosat qataq na lle'etaxaloxosat ca lta'alpi.

⁴⁰ Qalaxaye da qaua'axacheeta ca qarasouaxashichi, qataq ca lasouaxashetpi so qarta'ailpi, qataq da 'eetec da ỹe'eguelaqtalec da Aỹem qauataiỹa'aguet, qataq Aỹem qauatenachichi naxa,

⁴¹ qaq nachera da ỹo'ot qome da qami' sataỹa'agueta, qataq qanqo'oñiỹa ñaqa'en ca na'alhua ca qampa'aguenaxauaipi, yaqto' sa na'amaqten da qarquiyaqteỹaxaqui. Huaña, nache saishet da qauqolliguichi da qanhuaxanaguiiqui.

⁴² Huaña, nache tachigui iuel qome da ñaỹamaxate' co'ollaxa so Jacob, Isaac qataq so Abraham, qataq seuennate yi'iye 'alhua maye sachaxanapeguema co'ollaxa soomaye,

⁴³ yem 'alhua maye taỹa'a da qoquiỹa'ai qome, da yaqto' ỹataqta nmatec, nachichiigui da qami' saishet da qoñiỹalec. Qalaxaye qauaỹachiñiita qome da qami' huo'o da qanpe'enaxaqui, souaxat da sa qaualaqailec na ỹamaxasoxonaxacpi qataq na iqataxacpi.

⁴⁴ Qaq na'aictaxa da ñaq qoñiitaña ca na'alhua ca qampa'aguenaxauaipi, qalaxaye saishet qome da qami' so'ota'n, qataq saishet da qami' imereuo ñaqa'en, cha'aye saishet da ñelaxaañi so ñaỹamataxac co'ollaq ñaỹamaxate' so qarta'ailpi. Qaq 'era da ỹa'aqtac, Aỹem Nataxala' maye Qanatamnaxala'ai.

⁴⁵ Nacherata da sepagaqchigui qome da ñaỹamaxataxac co'ollaq ñaỹamaxate' so qarta'ailpi, maye ñeqateeguesop co'ollaxa ye Egipto, ỹauaachigui ñaqa'en na lma' naua lỹa't 'aleu' da yaqto' Aỹem Qanatamnaxala'ai. Qaq 'era da ỹa'aqtac, Aỹem Nataxala'.»

⁴⁶ Qaq 'ena na nqataxacpi, qataq na namaxasoxonaxacpi qataq na napaxaguenataxanaxacpi, maye lapaxañi co'ollaxa so Moisés, chegoqchigui Ñim Nataxala', da ỹanem so Israel le'ecpi, huaña añi qasoxonaxa Sinaí.