Levítico 23 - La'aqtaqa Ñim Lo'onatac 'Enauacna 2013

Som naponaxacpi

¹ Ñim Nataxala' 'enapega so Moisés, 'eeta':

² «Qonapega qome na Israel le'ecpi da 'ena na laloxoquipi na naponaxacpi maye ỹalamaxat, qaq qami' qauo'oche qome ne'ena naponaxacpi da yaqto' Aỹem qavio'oxoyiñi. Aỹem Nataxala' maye llapaxañi damaye.

So na'a'q mataxaqui

³ Qami' qauo'onataxañi qome caua seis na'axa'te, qalaxaye da ivireuga ca na'a'q siete, nache saishet qome da qauo'oche ca camachaqca no'onatac. Cha'aye que'eca na'a'q mataxaqui qauo'oche ca naponaxac da yaqto' Aỹem qavio'oxoyiñi. Nache na'aictaxa cam qoñiita'ague ana 'alhua, qalaq qauỹochiỹauga que'eca na'a'q mataxaqui, da Aỹem qavio'oxoyiñi.

⁴ Qaq 'ena na laloxoquipi qome da qauo'oche na naponaxacpi da yaqto' Aỹem qavio'oxoyiñi, Aỹem Nataxala'. Ỹoqo'oye qauo'oche qome ne'ena naponaxacpi.

So na'a'q maye huetoigui da qaỹo'ot so Lapascua

⁵ Da ivireuga ca na'a'q catorce ca la'auaxanec ca'agoxoic, qataq da mashe inoxoochiguiñi añi nala', nache qauo'oche ca Lapascua da yaqto' qavio'oxoyiñi Ñim Nataxala'.

⁶ Qaq da ivireuga ca na'a'q quince que'eca ca'agoxoic, nache qauo'oche qome ca nquia'axac maye qanallec aca nauole maye qaica ca lalegue ỹasheeraxachigui, da yaqto' qaỹo'oxoren Ñim Nataxala'. Qaq nache ivittrec caua siete na'axa'te da qollequiictac acamaye.

⁷ Nache ca la'auaxanec na'a'q, nache qauo'oche ca naponaxac da qaỹo'oxoren Ñimaye. Qataq saishet da qauo'oche ca camachaqca no'onatac.

⁸ Qaq nache 'enauaque que'ecaua siete na'axa'te da qauavigaxacheetac aca nachetaqtaxanaqtepi maye qoỹanot Ñim Nataxala'. Nache da ivireuga ca na'a'q siete, nache qauo'oche ca naponaxac da yaqto' qaỹo'oxoren Ñimaye. Qataq saishet da qauo'oche ca camachaqca nam no'onatacpi.»

Naponaxac da qoỹaneuo aca la'auaqteguishe ala ca nañiguishec

⁹ Ñim Nataxala' 'enapega so Moisés, 'eeta':

¹⁰ «Qonapega qome na Israel le'ecpi da ivita da qaunoxoñeeua'a ye 'alhua maye qami' sanema qome, nache da ivita da qanqache ca ala ca trigo, nache qaroiua'a qome ca ntaxaỹaxanaxanec aca 'oonole hua'auchiguiñi naqta que'eca nqateguishec.

¹¹ Qaq ca lỹa na'a'q que'eca na'a'q mataxaqui, nache ca ntaxaỹaxanaxanec ỹaasheguem da ỹanot Ñim Nataxala' da nachetaqtaxanaqte, yaqto' qaỹaỹamaxareeta.

¹² Qaq que'eca na'a'q maye huaigui da qaỹa'añeeuo aca'aca naqta, nache nataqa'en qaỹa'añeeuo ca 'oonolec qagueta llalec maye ivi' ca 'oonolec vi'i, qataq qaica ca lque'emaxa, da yaqto' qarachetaqtaxanaqche qaỹavigaxatta da qoỹanot Ñim Nataxala'.

¹³ Nataqa'en qaroiuo ca cuatro kilos ca ỹataqta no'on 'ayiiña maye qairaqneguet ca aceite, yaqto' qoỹanot Ñim Nataxala' da nachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala'. Qataq qaroiua'a nataqa'en aca 'oonole laỹe' ca lataxa da nachetaqtaxanaxat maye qaicoraxana.

¹⁴ Saishet qome da qollequi aca nauole, huo'otaq aca ña lmala ala ca nañiguishec, huo'otaq aca nqachilliguishe, nato' qom ivita ca na'a'q da qaroiuo da qaỹa'añeeuo aca qarachetaqtaxanaqche. Qaq 'era qome da nache 'eetai' lataxac da qoyecỹaxaqui, qataq ca qami' chegoxogueta, na'aictaxa cam pa'aigue ca qoñiitaña ana 'alhua.

Naponaxac maye laloxoqui da qanqat na ala ca nañiguishec

¹⁵ Qaq nache chegoqchiguiña qome que'eca na'a'q da qaỹa'añiiuo aca naqta ca trigo da yaqto' qarachetaqtaxanaqche, qaq damaye 'eeta': chegoqchiguiña qanqa'eñi ca naỹauo lỹa na'a'q que'eca mataxaqui da qanaloqchiñi' caua cuarenta y nueve na'axa'te.

¹⁶ Qaq ca lỹa na'a'q maye mataxaqui, nache ivi' cincuenta na'axa'te, qaq nache huaigui da qaỹa'añiỹot Ñim Nataxala' aca qarachetaqtaxanaqche cam dalaxaic ala ca trigo,

¹⁷ qataq ñi 'oonolec irouo caua dos lauole maye chegaqaigui ca ỹataqta no'on 'ayiiña maye lalegue ca ỹasheeraxachigui ca ndaqñiguishec, maye ivi' cuatro kilos añi 'oonole, da yaqto' nachetaqtaxanaqte la'auaqteguishe ala ca nañiguishec da qoỹanot Ñim Nataxala'.

¹⁸ Qaq que'ecaua nauole, nache lỹatreuo qome qanqa'eñi caua siete qagueta llalqa, maye ivi' ca 'oonolec vi'i qataq qaica ca lque'emaxa, qataq ca 'oonolec huaca, qataq caua dos qagueta, nache qanpa'axatchegue'm da qaỹachalec añi nca'atoxonaxalate maye huetalec aca nachetaqtaxanaqte qaỹavigaxatta, lỹateuo aca nachetaqtaxanaqte ala ca nañiguishec qataq ca nachetaqtaxanaxat lataxa, nache qaỹavigaxat, yaqto' da ama laitaỹaxac ỹamaateguet Ñim Nataxala'.

¹⁹ Nataqa'en qaỹa'añeeuo ca 'oonolec quetaq da qarachetaqtaxanaxache maye sa imauaq da qaỹavigaxat, qataq caua dos qagueta llalqa maye ivi' ca 'oonolec vi'i, da nachetaqtaxanaxat maye qanhuaachigui.

²⁰ Qaq ca ntaxaỹaxanaxanec, nache ỹaayishegue'm da ỹaareuo que'ecaua qagueta llalqa, da nachetaqtaxanaqa'ate da huaña ye lanataqa' Ñim Nataxala', qataq lỹateuo naqa'en aca nauole 'ayiiña maye chegaqaigui aca la'auaqteguishe ala ca nañiguishec, qataq caua dos qagueta llalqa. Nache ỹanoto Ñim Nataxala'. Ime, nache taỹot ca ntaxaỹaxanaxanec.

²¹ Qataq nacheca que'eca na'a'q da huetoigui nataqa'en da qauo'oche ca naponaxac da yaqto' Aỹem qavio'oxoyiñi, qataq saishet da qauo'oche ca camachaqca nam qapa'atta no'onatacpi. Qaq 'era qome da nache 'eetai' lataxac da qoyecỹaxaqui, qataq cam qami' chegoxogueta, na'aictaxa ca pa'aigue ca qoñiitaña ana 'alhua.

²² Qaq da ivita da qanqache ca ala ca qa'añiguishiqui, nache saishet da ỹataqta qanmacheeta ca ala camaye, qataq saishet da qanatoisheguem cam naañipi. Nacherata da qauaqaita'a da yaqto' nato ca choxoraqpi, qataq na chegaqauecpi. Qaq 'era da ỹa'aqtac, Aỹem Nataxala' maye Qanatamnaxala'ai.»

Naponaxac maye laloxoqui da qaỹashiiyigui ana nasheerepi

²³ Ñim Nataxala' 'enapega so Moisés, 'eeta':

²⁴ «Qonapega qome na Israel le'ecpi, qoneta': Ca la'auaxanec na'a'q ca ca'agoxoic siete, camaye mataxaqui, qataq huetoigui da qauo'oche ca naponaxac lta'araic, qataq qaỹashiiyigui aca nasheerepi da yaqto' qaỹo'oxoren Ñim Nataxala'.

²⁵ Qaq ỹoqo'oye qauavigaxache qome aca qarachetaqtaxanache da qaỹa'añiỹot Ñim Nataxala', qataq saishet da qauo'oche ca camachaqca nam qapa'atta no'onatacpi».

So na'a'q maye huetoigui da qaỹapalaxat ca nasouaxashet

²⁶ Ñim Nataxala' 'enapega so Moisés, 'eeta':

²⁷ «Qaq ca na'a'q diez ca ca'agoxoic siete, camaye nache laloxoqui da qaỹapalaxat ca nasouaxashet. Nache que'eca na'a'q qauo'oche ca naponaxac lta'araic, qataq qanqouaqchichi, qataq qauavigaxache aca qarachetaqtaxanaqche da qaỹa'añiỹot Ñim Nataxala'.

²⁸ Qataq saishet da qauo'oche ca camachaqca nam no'onatacpi que'eca na'a'q, cha'aye que'eca na'a'q laloxoqui da qaỹapalaxat ca nasouaxashet, nache qami', qaỹapalaxat ca qarasouaxashichi, huaña ye lanataqa' Ñim Nataxala' maye Qanatamnaxala'ai.

²⁹ Qaq ca shiỹaxaua, da saishet da ỹo'ot ca na'a'q maye qaỹo'ot da qouaqchetaxac, nache camaye qaỹo'orauec, ca'ai qanqa'en ca lauo' le'ecpi.

³⁰ Qaq ca shiỹaxaua da huo'o ca ỹo'ot na no'onatacpi que'eca na'a'q, nache camaye so'orauec, ca'ai ñaqa'en ca lauo' le'ecpi.

³¹ Nache qaica qome ca qauo'oche nam no'onatacpi. Qaq 'era qome da nache 'eetai' lataxac da qoyecỹaxaqui, qataq cam qami' chegoxogueta, na'aictaxa ca qoñiitaña ana 'alhua.

³² Nache qami', ỹataqta qanmachiiuec, qataq qanqouaqchichi, qataq nache chegoqtot qome ca avit ca na'a'q nueve que'eca ca'agoxoic, nache ivira'a ca avit ca lỹa na'a'q.»

So naponaxac laloxoqui da qanayinaigui na npe'lpi maye qo'oipaq lcouepi

³³ Ñim Nataxala' 'enapega so Moisés, 'eeta':

³⁴ «Qonapega qome na Israel le'ecpi, qoneta': Nachesota qome se'eso ca'agoxoic siete, da ivita ca na'a'q quince, nache ivittrec qome caua siete na'axa'te da qauo'oche ca naponaxac, qataq qoñiỹaigui ca npe'lpi qo'oipaq lcouepi, da yaqto' qavio'oxoyiñi Ñim Nataxala'.

³⁵ Nache ca la'auaxanec na'a'q que'eca naponaxac, nache qauo'oche ca naponaxac lta'araic. Qaq que'eca na'a'q, nache qaica qome ca qauo'oche na no'onatacpi.

³⁶ Qaq que'ecaua na'axa'te, nache qauavigaxache aca qarachetaqtaxanaqche da qavio'oxoyiñi Ñim Nataxala'. Qaq da ivita ca na'a'q ocho, nache nataqa'en qauo'oche ca naponaxac, qataq qaỹa'añeeuo aca qarachetaqtaxanaqche da qaỹa'añiỹot Ñim Nataxala'. Qaq que'eca na'a'q, nache naponaxac lta'araic, qataq qaica ca qauo'oche na no'onatacpi.

³⁷ Qaq 'ena na laloxoquipi na naponaxacpi da ivita da qaỹo'oxoren Ñim Nataxala'. Ỹoqo'oye qami', nache qauo'oche qome ne'ena naponaxacpi, qataq nache huetoigui da qami' qaỹa'añiiua'a Ñim Nataxala' aca qarachetaqtaxanaqchepi qaỹavigaxatta, qataq aca nachetaqtaxanaqte nañiguishe ala, qataq aca laỹe nachetaqtaxanaqtepi qataq ca nachetaqtaxanaxat lataxa, nache ỹataqtac ye laloxoqui camaye da qaỹo'ot.

³⁸ Qaq 'ena 'enauac na naponaxacpi maye qauo'oche, qalaxaye nataqa'en qauallecñiiuo ye na'a'q mataxaqui da qavio'oxoyiñi Ñim Nataxala', qataq qaỹa'añeeuo aca laỹepi qarachetaqtaxanaqche da huo'o ca ỹan ca la'aqtac, qataq ca maiche chegoqchigui da huo'o ca ỹan.

³⁹ Qaq ca na'a'q quince ca ca'agoxoic siete, qom mashe qanqache ca ala ca qa'añiguishequi, nache qauo'oche ca nquia'axac lta'araic huaiguilo que'ecaua siete na'axa'te da qavio'oxoyiñi Ñim Nataxala'. Qaq que'eca la'auaxanec na'a'q, qataq ca na'a'q ocho, nachecaua caua ỹoqta mataxaqui'.

⁴⁰ Nache que'eca la'auaxanec na'a'q qanqache aca ỹataqta no'on ala ana qo'oipaqpi, qataq qauchiquiiuec aca lcoue aca chaic, qataq aca lcoue aca qo'oipaq maye late'el naua laue, qataq aca lcoue aca ma'aic maye neto'ot na loigue ca tala, qaq nache 'enauaque caua siete na'axa'te da huaigui que'eca qantonaxaqui, qataq huaña ye lanataqa' Ñim Nataxala' maye Qanatamnaxala'ai.

⁴¹ Nache 'enauaque naua vi'iye, da ivira ca ca'agoxoic siete, nache qauo'oche que'eca nquia'axac huaiguilo caua siete na'axa'te da qavio'oxoyiñi Ñim Nataxala'. Qaq 'era qome da nache 'eetai' lataxac da qoyecỹaxaqui, qataq cam qami' chegoxogueta.

⁴² Qaq 'enauaque que'ecaua siete na'axa'te, da qami' Israel le'ecpi, qoñiitaigui qome ca npe'lpi qo'oipaq lcouepi,

⁴³ yaqto' 'enauac ca qaỹa'alquipi ỹaỹateeta da Aỹem so'ot da qoviito'ot co'ollaxa na npe'lpi qo'oipaq lcouepi co'ollaq qami' ñeqateeguesopa ye Egipto. Qaq 'era da ỹa'aqtac, Aỹem Nataxala' maye Qanatamnaxala'ai.»

⁴⁴ Qaq 'era da 'eetec so Moisés, da da'aqtaxanem so Israel le'ecpi na laloxoquipi so naponaxacpi maye lapaxañi Ñim Nataxala'.