Levítico 20 - La'aqtaqa Ñim Lo'onatac 'Enauacna 2013

Na ỹotta'a't nhuaxanaguec ca saishet da ỹalaq

¹ Ñim Nataxala' 'enapega so Moisés, 'eeta':

² «Qonapega qome na Israel le'ecpi qoneta': Da huo'o ca 'oonolec na Israel le'ecpi huo'otaq na chegaqauecpi maye netaña ne'ena 'alhua Israel, da huo'otaq ỹanot ca llalec ca atamnaxala' Moloc da ỹavigaxat da lachetaqtaxanaxat, nache ca lma' que'eca 'alhua iuen da ỹalauat camaye, irota'a ca coma' laỹepi da ỹasaq.

³ Nache Aỹem ỹataqta sataỹa'aguet qome que'eca shiỹaxaua, qataq so'orauec, ca'ai ñaqa'en ca lauo' le'ecpi, cha'aye ishepaxanaqchet ye atamnaqa' maye ỹanataqa', qataq ỹe'enai' da ỹataqta qui'itta ỹe'enaxat, souaxat da ỹanot ca llalec ca atamnaxala' Moloc.

⁴ Qaq na shiỹaxauapi maye lma' ne'ena 'alhua, da saishet da iqocha'a de'era qataq saishet da damaxasoxoolec da qaỹalauat que'eca shiỹaxaua,

⁵ nache Aỹem maiche sataỹa'aguet camaye qataq ca llalaqpi, nache imeuo ñaqa'en, qataq lỹaueegue' 'enauac ca natameetacot ca atamnaxala' Moloc.

⁶ Qataq da huo'o ca nqo'ona ca ltaxaỹaxaua na nqui'ipi qataq na ilaviigui ca lỹa, nache Aỹem ỹataqta sataỹa'aguet que'eca shiỹaxaua, qataq so'orauec, ca'ai ñaqa'en ca lauo' le'ecpi, souaxat da nquisheshaxac da ca'attague' so Moloc.

⁷ Ỹataqta qanañañi qome da yaqto' qami' ỹalamaqa'ate, qataq ỹataqta qui'itta da qarataxaqui. Qaq 'era da ỹa'aqtac, Aỹem Nataxala' maye Qanatamnaxala'ai.

⁸ Ỹataqta qauo'oche' qome naua iqataxaco, qataq qaualaqaigueta. Qaq 'era da ỹa'aqtac Aỹem Nataxala' maye qami' seỹotaugalo da yaqto' qui'itta da qarataxaqui, qataq qami' ỹalamaqa'ate.

⁹ Qaq ca shiỹaxaua da ilarapiguiñi ca lta'a huo'otaq aca late'e, nache camaye qaỹalauat, nache maiche nasouaxaala't da ileu.

¹⁰ Qaq ca shiỹaxaua da lauañi' aca lhua ca lỹa, nache que'eca ỹale qataq aca 'alo qaỹalaua't.

¹¹ Qaq da huo'o ca ỹale da lauañi' aca lhua ca lta'a, nache camaye ỹe'en ca lta'a. Qaq que'eca ỹale qataq aca 'alo qaỹalaua't, qaq caamaye, maiche nasouaxaala't da ileu'.

¹² Qaq da huo'o ca ỹale da lauañi' aca late, nache 'enauaque caamaye qaỹalaua't, qataq caamaye maiche lasouaxashe't da l-leuqa't, cha'aye damaye ỹataqta qauem.

¹³ Qaq da huo'o ca ỹale da huetapeeguet ca maiche nallishaxaua da 'eeta'am naqa'en aca 'alo, nache caamaye qaỹalaua't. Nache maiche lasouaxashe't da l-leuqa't, cha'aye ỹo'o't da ỹataqta qaiqaiga.

¹⁴ Qaq da huo'o ca ỹale da ỹauo'o lhua aca 'alo, qataq aca llale acamaye, nache caamaye ỹataqta qauem da ỹo'o't, qaq 'enauaque qome da nca'altraue'c qanqa'en da qaỹavigaxa't, yaqto' saishet qome da huo'o ca ỹe'enaxa't caamaye.

¹⁵ Qaq da huo'o ca ỹale da hue'eguet aca shiguiỹac, nache camaye qaỹalauat qataq aca shiguiỹac.

¹⁶ Qaq da huo'o aca 'alo da hue'eguet ca shiguiỹac, nache caamaye qaỹalaua't. Nache maiche lasouaxashe't da l-leuqa't.

¹⁷ Qaq da huo'o ca ỹale da hue'eguet aca maiche lqaỹa, da huo'otaq ỹaqauga llale ca lta'a, huo'otaq aca late'e, nache caamaye qaỹalaua't, ỹauaachigui qanqa'en ca lma' le'ecpi, cha'aye ỹe'en aca maiche lqaỹa. Nache nque'etaxangui de'era maiche lasouaxashet.

¹⁸ Qaq da huo'o ca ỹale da hue'eguet aca 'alo da huo'o da na'axac, nache caamaye qaỹo'oldaue'c, ca'ai qanqa'en na lauo' le'ecpi.

¹⁹ Saishet da huo'o ca hue'eguet aca lqaỹa aca late'e, huo'otaq aca lqaỹa ca lta'a, cha'aye naigui da ỹe'enai' aca maiche lauo' lashe. Ỹoqo'oye caamaye maiche nque'etaxanguilo qome de'era maiche lasouaxashe't.

²⁰ Qaq da huo'o ca lauañi' aca lhua ca ntesoqo', nache camaye ỹe'en ca maiche ntesoqo', nache nque'etaxanguilo qome de'era maiche lasouaxashe't. Ỹoqo'oye caamaye ileu', nache qaica ca llale'c.

²¹ Qaq da huo'o ca ỹale da deuotaxanec aca lhua ca lqaỹa, nache camaye saishet da qui'itta da lataxac, cha'aye ỹe'en ca maiche lqaỹa. Qaq damaye ỹataqta qauem, nache caamaye qaica qome ca llale'c.

²² Ỹataqta qoquiiteguelo qome naua lleco na iqataxacpi, qataq na ỹamaxasoxonaxacpi, qataq qaualaqaiguet. Yaqto' saishet qome da qami' ỹo'oldauec yi'iye 'alhua maye qami' sauegalo da yaqto' qaralamaxache.

²³ Saishet qome da qaue'enaxache da lataxac ye shiỹaxauapi maye so'orauec qome, cha'aye yemayepi ỹo'ottac 'enauac de'era, ỹoqo'oye Aỹem ỹataqta saỹemec.

²⁴ Qaq ỹoqo'oye qami' sanema da ỹa'aqtac, 'eeta': ‹Yi'iye 'alhua maye lalamaxat yemayepi, qami' sanema qome da yaqto' qaralamaxache, ye 'alhua maye huaña da qaica ca qoue na qanallec›. Qaq 'era da ỹa'aqtac, Aỹem Nataxala' maye Qanatamnaxala'ai maye qami' seỹotaugalo da yaqto' qami' ỹataxaraiqa da qoviitangui na ỹotta'a't shiỹaxauapi.

²⁵ Ỹoqo'oye ỹataqta qanqa'eñi qome na shiguiỹacpi qui'itta, qataq na saishet da qui'itta, qataq na maỹopi qui'itta qataq na saishet da qui'itta, yaqto' saishet da na'aqchet da qarataxaqui ne'ena shiguiỹacpi, maỹopi, qataq na hualectapeguelec ana 'alhua maye mashe qami' sachaxanalo da saishet da qui'itta.

²⁶ Nache qami' qome ỹataqta qui'itta da qarataxaqui, qaq 'era da ỹa'aqtac, Aỹem Nataxala' maye ỹataqta qui'itta da ỹataxac. Ỹoqo'oye qami' seỹotaugalo da yaqto' qami' ỹalamaqa'ate qataq qami' ỹataxaraiqa ñaqa'en da qoviitangui na ỹotta'a't shiỹaxauapi.

²⁷ Qaq da huo'o ca ỹale, huo'otaq aca 'alo da hueto'ot da 'onataxac da ilaviigui ca lỹa, qataq ca detaxaỹapegue' na nqui'ipi, nache camaye qaỹalauat, qairota'a ca coma' laỹepi, nache maiche nasouaxateguet da nalaataguec.»