Levítico 19 - La'aqtaqa Ñim Lo'onatac 'Enauacna 2013

Na ỹotta'a't nqataxacpi

¹ Ñim Nataxala' 'enapega so Moisés, 'eeta':

² «Qonapega qome na Israel le'ecpi da ỹa'aqtac, 'eeta': Ỹataqta qui'itta qome da qarataxaqui, cha'aye Aỹem Qarataxala'ai maye Qanatamnaxanala'ai, ỹataqta qui'itta da ỹataxac.

³ Ñi 'oonolec ỹataqta huo'o da 'enec naqa'en ca lta'a, qataq aca late'e. Qataq ỹataqta huo'o naq 'enec qanqa'eñi ye na'a'q mataxaqui, cha'aye Nachaỹem Nataxala' maye Qanatamnaxala'ai.

⁴ Saishet da qanqo'oñiỹa da huo'o ca qoñiitapeguec ca ne'enaqtac lqui'ipi na atamnaxala'pi, qataq saishet da huo'o ca ỹo'ot ca le'enaqtac lcat, cha'aye Nachaỹem Nataxala' maye Qanatamnaxala'ai.

⁵ Qaq da qaỹa'añiiua'a Ñim Nataxala' aca qarachetaqtaxanaqche maye qanhuaachigui, nache qaỹa'añiỹot aca ỹaỹamaxareeta Ñimaye.

⁶ Qaq que'eca shiguiỹac maye qoỹaneuo, camaye iuen da nache qanallec que'eca na'a'q, qaq ca no'onañi nache ishet da qanallec ca lỹa na'a'q. Qaq ca ivirauga ca na'a'q tres, nache iuen da qaỹalat, qataq qaỹavigaxat.

⁷ Qaq da huo'o ca chec aca nachetaqtaxanaqte da mashe ivirauga que'eca na'a'q tres, nache acamaye saishet da ỹaỹamaxaren Ñim Nataxala' cha'aye mashe qauem.

⁸ Qaq ca chec acamaye, nache nque'etaxangui ca maiche lasouaxashet, qaq camaye nache qaỹo'orauec, ca'ai qanqa'en ca lauo' le'ecpi, cha'aye qaica ca naigui naqa'en cam qoỹanot Ñim Nataxala'.

⁹ Da ivita ye laloxoqui da qanqache ca ala ca qa'añiguishequi, nache saishet qome da qanmacheeta ca ala, qataq saishet da qavi'iguelaqailec da qanatoi ca no'onañi ala.

¹⁰ Qataq saishet da qanmacheeta aca ala aca qa'añiguishe uva, qataq saishet da qanatoi aca lli'ishe. Qauaqaita'a da yaqto' natosheguem na choxoraqpi, qataq ca ỹaqa'a ca chegaqa'ague. Qaq 'era da ỹa'aqtac, Aỹem Nataxala' maye Qanatamnaxala'ai.

¹¹ Saishet da qaucachi. Saishet da qauatenataxañi, qataq saishet da huo'o ca ỹatenachet ca lỹa.

¹² Saishet da qaỹa'añi ca qara'aqtaqui da qauatenataxañiỹa da ỹe'enaxat. Cha'aye da nache qoñeetec de'era, nache 'eeta'am da qaica ca naigui da le'enaxat Nam Nataxala' maye Qanatamnaxala'ai. Qaq 'era da ỹa'aqtac, Aỹem Nataxala'.

¹³ Saishet da huo'o ca sa icherapec ca lỹa, qataq saishet da qauotaxañic ca maiche lalamaxat. Qataq saishet da qanlliitañi ca nsheetenaguec ca 'onataxanaxaic da qaviraxachiỹa'a ca lỹa na'a'q.

¹⁴ Saishet da huo'o ca isheueetac ca da'añaigui na lqaic. Qataq saishet da huo'o ca quia'aqñi naqa'en ca sa nauaañi, souaxat da huo'o naq 'enec qanqa'eñi Aỹem. Qaq 'era da ỹa'aqtac, Aỹem Nataxala'.

¹⁵ Saishet da huo'o ca qaỹo'ot sa ỹaỹamaxañi lataxac da qanmit ca huo'o ca lasouaxashet. Qataq saishet da qaiueelec ca choxoraq, huo'otaq ca sallaxanec. Nacherata da qaỹo'ot ca ỹoqta nalochiguiñi lataxac.

¹⁶ Saishet da huo'o ca na'aqtaqa lo'o' da ỹalectaigui ca laỹepi, qataq da taỹa'a naqa'en da lchec da nachaalataxac ca lỹa shiỹaxaua, souaxat ca latenataxanaxac. Qaq 'era da ỹa'aqtac, Aỹem Nataxala'.

¹⁷ Saishet da choche qauacheetaigui añi qarquiyaqche ca npe'enaxac ca qarỹai. Ỹataqta qoñiỹapega, yaqto' saishet da qanhuañiỹaua'a ca ỹo'ot lle'etaxaloxo.

¹⁸ Saishet da huo'o ca ipalaique lvi' da ỹe'enaxata'aguet ca qaỹo'otec, qataq saishet da nache queta da nquiỹatega ca lỹa da huo'o ca ỹasouaxat. Nacherata da ỹauotec ca lỹa, 'eeta'am da ỹauotec da maiche nachaalataxac. Qaq 'era da ỹa'aqtac, Aỹem Nataxala'.

¹⁹ Qauo'oche' qome ne'enaua iqataxaco. Saishet qome da huo'o ca ỹo'oquiaxanaxana't caua ỹotta'a't na'ate'te, da yaqto' ỹotta'a't na llalec. Saishet da huo'o ca ima'a't naqa'en aca ỹotta'a't nañiguishe ala da ỹaalec ca lanaxanaqa'. Saishet da huo'o ca ỹaayiñi caua anogo maye ỹotta'a't aca lo'opi.

²⁰ Qaq ca ỹale da lauañi' aca nlata maye mashe nqataxanata da lhua ca lỹa ỹale, qalaxaye ñaq saxanaxa da qaisheenaxana da yaqto' huesoueeguesop da nlataguec, nache iuen da isheeten ca ỹale maye huotaique da lhua acamaye. Qalaxaye saishet da qaỹalaua't caamaye, cha'aye aca'aca 'alo saxanaxa da huesoueeguesop da nlataguec.

²¹ Qaq que'eca ỹale iuen da ỹaneuo ca qagueta lhuaraic da yaqto' lachetaqtaxanaxat maye sa imauaq da qaỹavigaxat, qataq iroua'a ye ñegueuo ñi npe'l.

²² Nache ca ntaxaỹaxanaxanec ỹanot Ñim Nataxala' ca qagueta maye nachetaqtaxanaxat, yaqto' qaỹapalaxat ca lasouaxashet que'eca shiỹaxaua.

²³ Qaq da ivita da qaunoxoñiiua'a que'eca 'alhua, qataq da qaỹa'añiilec aca ỹotta'a't nañiguishe, qo'oipaq maye qanallec ana ala, nache saishet da qauchiqui aca lcoue qataq saishet da qollequi aca la'auaqteguishe ala, cha'aye acamaye saishet da qanallec caua tres vi'iye.

²⁴ Qaq da ivireuga ca vi'i cuatro, nache 'enauac aca ala aca'aca nañiguishe qoỹanot Ñim Nataxala', huetoigui qanqoỹen da qaỹo'ot ca ño'oxonnataxanaxac.

²⁵ Qaq da ivildec caua cinco vi'iye, nache ishet da qollequi aca ala. Qaq da qoñiitec de'era, nache ỹataqta nquiguec aca ala aca qa'añiguishe qo'oipaq. Qaq 'era da ỹa'aqtac, Aỹem Nataxala' maye Qanatamnaxala'ai.

²⁶ Saishet da qollequi ca ñaq huo'o na huetaigui ltago'q. Saishet da qaua'axachiỹaua'a ca saqcha'a nhuennataxac. Qataq saishet da qaunacheetac ca nqui'i, da yaqto' qaua'axachiỹa'aguet ca saqcha'a lataxac.

²⁷ Saishet da huo'o ca npetec na laue, qataq icheguec na lsheenec aca lqa' laue, souaxat da lasouaxac.

²⁸ Saishet da huo'o ca ipelectac na lo'oc, qataq da ỹauo'o aca na'are na lo'oc, souaxat da huo'o ca ileu. Qaq 'era da ỹa'aqtac, Aỹem Nataxala'.

²⁹ Saishet da 'auamaqtalec aca 'aỹa'ale da nquisheshaxac, souaxat ca qaỹa'amaqteetac, yaqto' saishet da 'enauac ana 'alhua nlaxalec na sa ỹaỹamaxañesat qataq da quishishaxac.

³⁰ Ñi 'oonolec ỹataqta huo'o naq 'enec naqa'en ye na'a'q mataxaqui. Qataq saishet da ỹa'ashaxanai' ye atamnaqa' maye ỹanataqa', qaq 'era da ỹa'aqtac, Aỹem Nataxala'.

³¹ Saishet qome da qanqo'oñiỹa ca ltaxaỹaxaua na nqui'ipi, qataq ca ilaviigui ca lỹa, cha'aye ỹo'ot da saishet da qui'itta da qarataxaqui. Qaq 'era da ỹa'aqtac, Aỹem Nataxala' maye Qanatamnaxala'ai.

³² Ỹataqta 'anachaañi da 'auqocha'a ca ỹa'axaiquiolec, souaxat da huo'o naq 'enec 'anqa'en. Qataq huo'o naq 'enec 'anqa'en na 'Anatamnaxala'. Qaq 'era da ỹa'aqtac, Aỹem Nataxala'.

³³ Saishet da qauauo'oi da nque'eenaxac ca ỹaqa'a ca chegaqa'ague maye qami' netaiguilo.

³⁴ Nacherata da 'eeta'am da qoñeetec ca maiche qarhuo'oi le'ec da ỹataqta qauauochec camaye, cha'aye nache 'ena'am da qoñiita. Cha'aye nache 'eetec qami' co'ollaq qoviita'a ye Egipto da qauachegoqỹauec. Qaq 'era da ỹa'aqtac, Aỹem Nataxala' maye Qanatamnaxala'ai.

³⁵ Saishet da sa ipaigui qanqa'eñi ca ỹoqta 'eesa loga't ca naloqnaxanaxat, huo'otaq aca naloqnaxanaxaqui, qataq aca naloqnaxaqui ca 'etaxat.

³⁶ Nacherata da qauo'ogoxoñiỹa aca naloqnaxaqui ca 'etaxat, qataq ca naloqnaxanaxat, qataq aca naloqnaxanaxaqui maye ỹataqta nalochiguiñi da huo'o ca qanaloqten. Qaq 'era da ỹa'aqtac, Aỹem Nataxala' maye Qanatamnaxala'ai maye qami' ñeqateeguesopa co'ollaxa ye Egipto.

³⁷ Qaq ỹoqo'oye qoquiiteguelo qome naua lleco naua iqataxaco, qataq naua ỹamaxasoxonaxaco, qataq qaupaquiichiguilo qome. Qaq 'era da ỹa'aqtac, Aỹem Nataxala'.»