Levítico 18 - La'aqtaqa Ñim Lo'onatac 'Enauacna 2013

Da nqataxac ca ỹale qataq 'alo da huo'o ca hue'eguet

¹ Ñim Nataxala' 'enapega so Moisés, 'eeta':

² «Qonapega qome na Israel le'ecpi da Aỹem, Nachaỹem Nataxala' maye Qanatamnaxala'ai.

³ Saishet qome da qaue'enaxache da lataxac ye Egipto le'ecpi, ye 'alhua maye qoñiitaña co'ollaxa. Saishet qome da qaue'enaxache da lataxac ye Canaán le'ecpi, ye 'alhua maye qami' sauegalo qome, qataq saishet da qaualaqailec da maiche lataxac yemayepi.

⁴ Nacherata da qaualaqailec qome na ỹamaxasoxonaxacpi, qataq qauo'oche na iqataxacpi, qataq qoquiitelec. Cha'aye Aỹem Qarataxala'ai qataq Qanatamnaxala'ai.

⁵ Ỹoqo'oye ỹataqta qauloitelec qome na iqataxacpi, qataq na ỹamaxasoxonaxacpi, cha'aye ca shiỹaxaua maye ỹalaq, nache nca'alec qome. Qaq 'era da ỹa'aqtac, Aỹem Nataxala'.

⁶ Qaica qome ca ỹale da hue'eguet aca 'alo, da maiche lalamaqte lauo' lashe. Qaq 'era da ỹa'aqtac, Aỹem Nataxala'.

⁷ Qaica qome ca ỹe'en ca lta'a, da huetapeeguet aca late'e, cha'aye acamaye maiche late'e, nache saishet da ỹo'otec de'era acamaye.

⁸ Qataq saishet qome da huo'o ca hue'eguet aca lhua lỹa ca lta'a. Cha'aye mashe lalamaqte lhua ca lta'a.

⁹ Qataq saishet da huo'o ca hue'eguet aca maiche lqaỹa, na'aictaxa da ỹaqauga llale ca lta'a, huo'otaq ỹaqauga llale aca late'e. Nache 'ena'am da lañoqo' ca maiche lma', huo'otaq da ỹaqa'a ca lañoqo', nataqa'en saishet qome da hue'eguet acamaye.

¹⁰ Qataq saishet qome da huo'o ca maiche ne'eela't da hue'eguet aca maiche laual, maye llale ca llalec, huo'otaq aca llale, acam llale.

¹¹ Qataq saishet da huo'o ca hue'eguet aca ỹaqauga llale ca lta'a. Cha'aye chegaqaigui ca lta'a, qataq maiche lqaỹa, nache saishet da hue'eguet acamaye.

¹² Qataq saishet da huo'o ca hue'eguet aca lqaỹa ca lta'a, cha'aye acamaye maiche lalamaqte lqaỹa ca lta'a.

¹³ Qataq saishet da huo'o ca hue'eguet aca lqaỹa aca late'e, cha'aye acamaye maiche lalamaqte lqaỹa aca late'e.

¹⁴ Qataq saishet qome da huo'o ca ỹe'en ca ntesoqo' da huetapeeguet aca lhua, cha'aye acamaye maiche lasoro.

¹⁵ Qataq saishet qome da huo'o ca huetapeeguet aca late, cha'aye acamaye maiche lhua ca llalec. Ỹoqo'oye saishet da huetapeeguet acamaye.

¹⁶ Qataq saishet da huo'o ca ỹe'en ca maiche lqaỹa da huetapeeguet aca lhua, cha'aye acamaye maiche lalamaqte lhua ca lqaỹa.

¹⁷ Qataq saishet da huo'o ca huetapeeguet aca 'alo maye mashe nmate', qataq aca llale acamaye, huo'otaq aca laual maye llale ca llalec, huo'otaq aca llale, cha'aye 'eeta'am da maiche lalamaqte. Qaq ỹoqo'oye damaye ỹataqta sa ỹaỹamaxañi da qaỹo'ot.

¹⁸ Qataq saishet qome da huo'o ca ỹe'egueeta'a da huaroneguet, huo'otaq da hue'eguet aca lqaỹa aca lhua, da huo'otaq ña nca'altauec aca maiche lhua, yaqto' saishet da npa'aguena't caamaye.

¹⁹ Qataq saishet qome da huo'o ca hue'eguet aca 'alo da saishet da qui'itta souaxat da na'axac.

²⁰ Qataq saishet qome da huo'o ca lauatapiguiñi' aca mashe huo'o ca lhua, yaqto' saishet da ỹo'ot da sa saishet da qui'itta souaxat acamaye.

²¹ Qataq saishet qome da huo'o ca ỹan ca llalec da yaqto' lachetaqtaxanaxat da ỹanot ca atamnaxala' Moloc da yaqto' ỹavigaxat, cha'aye saishet da huo'o ca ỹe'enai' na Atamnaxala'. Qaq 'era da ỹa'aqtac, Aỹem Nataxala'.

²² Qataq saishet qome da huo'o ca huetapeeguet ca maiche nallishaxaua da 'eeta'am naqa'en da hue'eguet aca 'alo, cha'aye damaye ỹataqta sa ỹaỹamaxañi.

²³ Qataq saishet qome da huo'o ca ỹale da hue'eguet ca shiguiỹac, yaqto' saishet da ỹo'ot da saishet da qui'itta souaxat de'era. Nataqa'en aca 'alo saishet da hue'eguet ca shiguiỹac, cha'aye damaye ỹataqta qauem.

²⁴ Saishet qome da qauo'oche de'era, cha'aye ỹo'ot da qami' nshepaxa'n. Cha'aye nachera da ishepaxanaqche't da lataxac yi'iye nhuo' le'ecpi maye so'orauec qome,

²⁵ cha'aye ivira'a ye na'alhua yemayepi da ỹataqta nshepaxan da lataxac. Ỹoqo'oye Aỹem so'ot da nhuaxanaguec souaxat de'era lle'etaxaloxo, qataq ivira'a yi'iye maiche na'alhua da deqaiga yemayepi.

²⁶ Qalaxaye qami' Israel le'ecpi, qataq na chegaqauecpi maye qami' netaiguilo, qauloitelec qome na iqataxacpi qataq na ỹamaxasoxonaxacpi, qataq saishet qome da qauo'oche ne'ena sa ỹaỹamaxañesat,

²⁷ cha'aye 'enauac ne'ena sa ỹaỹamaxañesat, ỹo'ottac co'ollaxa se'eso hua'auñi da netalec yi'iye 'alhua. Ỹoqo'oye yi'iye 'alhua ỹataqta nshepaxan da lataxac.

²⁸ Qaq saishet qome qaushepaxanaqchichi yi'iye 'alhua, yaqto' saishet da qami' ỹamaqraue'c, da 'eeta'am da 'eetec da ỹamaqauec so hua'auñi da netalec, qom saxanaxa da qoñiỹalec.

²⁹ Qaq da qoñiita da huo'o ca ỹo'ot ne'ena qauemsat, nache camaye qaỹo'orauec, ca'ai qanqa'en ca lauo' le'ecpi.

³⁰ Ỹoqo'oye, ỹataqta qoquiitegue qome na ỹamaxasoxonaxacpi, qataq saishet da qaue'enaxache da qauem lataxac so hua'auñi maye netalec yi'iye 'alhua, qom saxanaxa da qoñiỹalec yemaye, qataq saishet qome da qami' ishepaxanaqche't. Qaq 'era da ỹa'aqtac, Aỹem Qarataxala'ai maye Qanatamnaxala'ai.»