Lamentaciones 5 - La'aqtaqa Ñim Lo'onatac 'Enauacna 2013

Da natamnaxac so nhuo' le'ecpi maye huo'o da laquicoxo

¹ 'Am Nataxala', ña 'auennata'a qome da souaqaigui, qomi' 'anamata'alo nache 'aumeten da qane'enaguec.

² 'Enauac nam qaralamaxat co'ollaxa nagui hueto'ot na chegaqauec shiỹaxauapi, qataq na qarma'pi co'ollaxa, nagui netaigui na chegaqauecpi.

³ Qomi' mashe qaica ca qarta'a nache qomi' saploqpi, ana qarate'elpi qalaq 'eeta'am ana pa'aipi.

⁴ Na 'etaxat maye ñeỹomaqtapigui qalaq sesheenaxanaqta'a, qataq na 'epaq nataqa'en sesheenaxanaqta'a.

⁵ Qomi' ñeque'etaxanaxagui da qancanaguec damaye ỹataqta qomi' ipataxayiñi, ỹataqta ñasamaxañi qalaxaye ỹataqta qaica ca qanmataxac.

⁶ Na egipciopi qataq nam asiiriopi, qalaq sanaqto'oto naua qarhuaxaye da yaqto' sequia'aqtac.

⁷ Som qarta'alpi huo'o co'ollaxa na lasouaxashetpi qaq somayepi mashe ileu, qalaxaye qomi' taleguete nagui na lasouaxashetpi somayepi.

⁸ Qaq nagui nache maiche qomi' ỹoiqueeta'ape na nlatacpi, nache qaica ca qomi' isoueeguesopa da lhuaqỹaxac namayepi.

⁹ Sanaxaguet da lchec da qanachaalataxac da yaqto' sanataxa ca qonoq, na'aictaxa da coleetega't na alaataxaicpi ye toolec 'alhua.

¹⁰ Na qaro'oc qalaq 'eroigui 'eeta'am aca nqatelaxanaxaqui, qaq souaxat da ỹaguec na qarqouaxa nache ỹo'ot na qare'eraxa.

¹¹ Ye Sión qataq ye huaqta'a't nỹecpi ye Judá, qalaq qancat co'ollaxa ana ỹepi 'alpi qataq na qa'ampi.

¹² Som qarataxala'pi qalaq qaicoñerashegue'm co'ollaxa naua lhuaxaye, qataq so qarqueroxonecpi qalaq qaica ca 'enec qanqa'en.

¹³ Qaq so ỹalleppi maye 'añaxaicpi qalaq qaỹamaxalec da iconnaxaatagui so namaicnaxanaxatpi, so nsoxoppi qalaq qaica ca la'añaxac souaxat da lsallaxa na 'epaq maye nalonaxanaxatpi.

¹⁴ Qaq mashe qaica so ỹa'axaiquipi maye hueta'a naxa na ñegueuopi ye huaqta'a't nỹecpi, qataq mashe sa qaỹa'axaỹa da lo'onaxanaxac so nsoxoppi.

¹⁵ Da qarquiyaqteỹaxac qalaq mashe qaica ca ntonaxac, da qarasotaxac maye ỹo'ot naxa da qaramachiguiñi qalaq nmeneguet da qaraquicoxo.

¹⁶ Aso qanaro'o da qomi' nta'al qalaq naañi, ¡choxoraiqolqa qomi' cha'aye huo'o da qarasouaxashet!

¹⁷ Qaq souaxat de'era nache daquicota da qarquiyaqteỹaxac, qataq nquicta'a da napalñi da qarmeenaxanaxac.

¹⁸ Souaxat da mashe toolec añi qasoxonaxa Sión, nache nda'a't ana huaxaỹaxapi da coleeteguelec añimaye.

¹⁹ Qalaxaye 'Am Nataxala', da 'aro'onataxanaxac chochaq tatec qome, qataq nache 'eetai' qome da 'anso'ootangui añi 'anso'onaxaqui.

²⁰ Qaq ¿ta'ainco' da chochaq tatec da qomi' 'aucoua'aisalo? Qataq ¿ta'ainco' da qaỹoqteguelo naua vi'iye da qomi' 'auala't?

²¹ ¡'Am Nataxala', ña qomi' 'aua'aqta'alo qome da 'am she'eguelaxasoqot, yaqto' 'am she'eguelaxasaxa! Qataq 'auo'otec qome da qanachaalataxac da 'eeta'am so hua'auchiguiñi co'ollaxa.

²² ¿Qalqo' mashe imauec peta'a da qomi' 'auasaxare'c, qataq peta'a ỹataqta qomi' 'aualemataỹalo?