Lamentaciones 4 - La'aqtaqa Ñim Lo'onatac 'Enauacna 2013

Da lỹa noinaxac

¹ ¡Qaq na oro deqat da lo'oxoỹaxac! ¡Ỹataqta deqat imauec da lqashelgaxa! ¡Qaq na coma'pi maye no'onataxatpi co'ollaxa aso atamnaxaqui, qalaq laga't da huetaña ana lamaqaipi na nqa'aicpi!

² Qaq na lma'pi ye Sión, maye ỹataqta huo'o co'ollaxa da 'enec, qataq nauotaxatpi, napacalec da 'enec qanqa'en na oro, ¡qaq nagui qalaq 'eeta'am qanqa'en ana naco'oña 'alhua maye lo'onata ca 'alhua lo'o!

³ Matem qa'alaqpi qalaq illepaxan na llalaqpi, qalaxaye ana llalepi na ỹalamaxat nhuo' le'ecpi qalaq ỹataqta qaica ca ichoxonnai', 'eeta'am na mañecpi maye netalec na toolec 'alhua.

⁴ Qaq na ñaqpiolec maye ñaq lleptacpi qalaq ỹataqta ỹaguec na laquip, nache na lachaxat lapaxaguet na naquiaq. Na ñaqpiolec da iỹaxaataique aca nauole 'ayiiña, qalaq qaica ca ishet da ỹami' namayepi.

⁵ Qaq nam sa qoue co'ollaxa da lquia'axac, nagui qalaq ilem na lqouaxa huangui na nqa'aicpi. Qaq nam nacte' da ỹaatañi na no'on nogoxot, nagui qalaq ncocatapigui na lshepaxanaxa.

⁶ Nam lasouaxashetpi na Jerusalén le'ecpi, qalaq napacalec na lasouaxashetpi co'ollaxa na lma' ye Sodoma, maye nque'elaxatta da nlaguiñi co'ollaxa, saishet da huo'o ca anac da iloquiaxan.

⁷ Qaq som ỹalleppi maye nca'aguishecpi co'ollaxa, ỹataqta napacalec ana aloñi da lapagaxa, qataq napacalec da lapagaxa na nche'; qaq da ltogaxa na lo'oc napacalec ana viyec; qaq da lataxac 'eeta'am da lyacỹaxac na coma' zafiro.

⁸ Qaq nagui da lataxac namayepi qalaq ỹataqta napacalec da laueraxa na napalaxa, qataq da quetague' ca nqa'aic nache saishet da qaỹauatton. Qaq na lo'oc qalaq lapaxaguet naua lpi'ineqa, qataq ỹataqta deqaqte', 'eeta'am ca nalonaxanaxat 'epaq.

⁹ Ỹactec da ỹaỹamaqchiguiñi som ileualec da alaataxac, qaq saq 'ena'am co'ollaxa som ilem na lqouaxa, cha'aye somayepi qaỹaloqoolec da l-leuaxa, souaxat da sa nauane' da alaỹaxac nam huetalec ana 'alhua.

¹⁰ Na 'alpi maye no'on da lquiyaqteỹaxac qalaq maiche ỹaconeua'a so llalaqpi da ỹaneuaq, qaq se'eso ñalaqpi nacheso som qanallectac son na'a'q co'ollaq qailaxachigui ye Jerusalén.

¹¹ Ñim Nataxala' co'ollaq mashe ivita so laloqo' da layeloxo, nache saishet da ỹañoxot da nllañi nache ỹavigaxat ye Sión, nache ỹataqta ilaxachigui ivira'a so lo'oxonaxala'pi.

¹² Na nta'alpi qataq na shiỹaxauapi maye huetalec ana 'alhua, saishet co'ollaxa da ỹa'amaqten da na npa'aguenaxauapi qataq na lasaxauapi ishet da tateua'a na ñegueuopi da inoxoneua'a ye Jerusalén.

¹³ Qaq 'eetec de'era souaxat nam lasouaxashetpi so na'aqtaxanaxanecpi, qataq nam qauem maye ỹo'otpi so ntaxaỹaxanaxanecpi, cha'aye icolde'c naua ltago'q nam no'on da lataxac huangui naqa'en na laiñi ye huaqta'a't nỹecpi.

¹⁴ Da lqueuoxoc da queuotapigui' qalaq ỹe'egottapigui' 'eeta'am ca qanamaic da quetague' na nqa'aicpi, namayepi ỹataqta nshepaxan souaxat na ntago'q, nache qaica ca ishet da ipoteua'alo naua alogo.

¹⁵ Nache qaỹa'alaqtalec qoỹeeta': «¡Qoquiỹa'ai namayepi, qoquiỹa'ai namayepi, cha'aye namayepi ỹataqta nshepaxan saishet qome da qaupochiiua'a!» Qaq nam shiỹaxauapi maye ỹaqa'a da la'amqaanataxanaxac 'eeta': Namayepi coleetac cha'aye 'eltaxaicpi, ỹoqo'oye namayepi sa ỹaỹamaxañi da nache hueta'a ne'ena.

¹⁶ Ñim Nataxala' nacheñi Ñim ilagaxattac somayepi, nache saishet da ỹe'eguelaxa da ỹamata'a somayepi. Qataq qaica ca 'enec qanqa'en so ntaxaỹaxanaxanecpi, qataq saishet da qaichoxoreetac so ỹa'axaiquipi maye nataxala'pi.

¹⁷ Naua qara'ai'te qalaq mashe nasamyiñi, qaica ca naigui da seuataqtaique cam qomi' itaua'n, da qanaquitaxac da seuataqta'aguet da lviraxac nam shiỹaxauapi maye saishet da deca'alaqtaxan.

¹⁸ Naua qarqauaxaqui' qalaq ỹataqta qanaua'n, nache sa seshetaq da qolaqtague' na nqa'aicpi. Ye qoroga't mashe sa qaỹapeque, mashe qomi' nviralo ye qaraloqo', ¡mashe ivita ye qoroga't!

¹⁹ Nam qomi' icaata'ape qalaq ỹataqta qayaqaicpi napacalec na vi'ic piguem le'ec, ivira'a da sonaqtalec ana qasoxonaxapi da qomi' icaata'ape, qataq qomi' nqovi'n, ỹanalec na toolec 'alhuapi ana lqoinapi.

²⁰ Qaq nataqa'en som lca'aguishec Ñim Nataxala' noxonec, som ỹa'añaqchettac co'ollaxa da qanachaalataxac, som nta'a maye setaxasoqtega naxa shenaqta': «Souaqto'ot qome na lpaqal da salegaqtaigui na ỹotta'a't shiỹaxauapi».

²¹ ¡'Am huaqta'a't nỹecpi Edom, 'Antootapigui' qataq 'auamachiguiñi, 'am maye 'aulotague' ye 'alhua Us! Cha'aye nataqa'en taỹa'a da 'am qanỹomaxangui qome ana ỹomaxaqui maye huetagui na ỹataqta chem, nache 'am itaqchet qome ivitta'a da qouetauec.

²² 'Am huaqta'a't nỹecpi Sión, da 'anhuaxanaguec mashe ime, Ñim Nataxala' saishet qome da ỹe'eguelaxa da 'am ỹaneguet da 'ananoxonaguec. Qalaxaye 'am huaqta'a't nỹecpi Edom, Ñim Nataxala' ỹauo'o qome da 'anhuaxanaguec, souaxat nam qauem maye 'auo'otpi, qataq ỹachaxan nam 'arasouaxashetpi.