Lamentaciones 3 - La'aqtaqa Ñim Lo'onatac 'Enauacna 2013

Da lỹa noinaxac

¹ Nachaỹem maye ñauane' co'ollaxa da que'enaxac, aỹem iuaxaatalec Ñim Nataxala' souaxat da lalemataic.

² Ñimaye aỹem ỹauega nam 'alhuapi maye ỹataqta napalñi, shectague' naqa'en so nqa'aic maye qaica ca lcoỹaraxat.

³ Imauec ye na'a'q, da aỹem ỹe'eguelaxattalec da lhuaxanaxanaxac.

⁴ Nache nquigaxattañi da la'añaxac da ỹapacheỹaxac, qataq da ỹo'ocỹaxac, qataq ilaxachiguilo naua ipi'ineqa,

⁵ Qataq nauaxaỹaxaasheguem, da aỹem coleesop naqa'en da naquicoxo, qataq da que'eenaxac, 'eeta'am naqa'en ca npaqtaxanaxat,

⁶ qataq ỹo'ot da sootaigui na napalaxa, 'eeta'am naqa'en aỹem, so mashe salcoshe'egue da ileupi.

⁷ Aỹem ỹapotaua'a, nache sa seshet da senoxonec, qataq aỹem icoñerai', decoñetaxana so ỹataqta qapa'atta ncoñetaxanaxat lcat,

⁸ Qaq na'aictaxa da ña'alaqtapiguiñi, da seỹaxaatacot da aỹem itauan, qalaxaye saishet, da qochetega da ñachoxonnaxac,

⁹ qataq ỹapogui som ỹec, dapoxona so coma', qataq naralaxat so tateuga som ỹec.

¹⁰ Ñimaye, 'eeta'am ñaqa'en ca oso da aỹem nqapecto'ot, qataq ca llon da huotaique da aỹem iloquiaxan.

¹¹ Qataq aỹem ỹashoqchenec, da yaqto' aỹem icolaxattac, nache ỹataqta aỹem nlaxatchigui da icolanaxa.

¹² Qataq ỹaueguelec so lchecnec, nache aỹem iloxonaxaatagui aso lchecna.

¹³ Qaq asom lchecnapi maye ỹaỹenec Ñim Nataxala', ỹataqta ỹa'atchigui añi iquiyaqte.

¹⁴ Qaq 'enauac nam ihuo' le'ecpi ỹataqta aỹem ỹe'eetac, qaq nache imauec ye na'a'q da nache aỹemta da aỹem ỹe'eetac.

¹⁵ Ñim Nataxala', ỹataqta aỹem nlaxatchigui da ñequi'ic, qataq ỹataqta chem som aỹem nỹomaxangui.

¹⁶ Qataq aỹem iuaxaneguet ana 'alhua, qataq ỹo'ot da senactaigui na namoxoỹaxa.

¹⁷ Nache aỹem ca'ai da nlagaxayec, qataq secoua'ai dam ỹaỹamaqchiguiñi.

¹⁸ Nache ivira'a da sepettega da mashe imeuo dam ỹa'añaxac, qataq dam ñaquitaxac Ñim Nataxala'.

¹⁹ Qaq naxa da secuennate so ỹaquicoxo, qataq co'ollaq aỹem qaỹalata'a't, qataq so ñequi'ic qataq ñeque'eenaxac,

²⁰ nache da seuennataxaateguelec naxa, nache ỹataqta qaica ca ỹa'añaxac.

²¹ Qalaxaye huo'o da lỹa maye tachigui iuel, qaq damaye nachera da aỹem nlaxatchigui da ñaquitaxac:

²² Dam lauotaxanaqtaic Ñim Nataxala', qaica ca loga't, qataq dam lsoxoyec Ñimaye, saishet da imeuo,

²³ nacheye ye nte'eta qalaq dalaxaic dam lsoxoyec. ¡Qaq ỹataqta qaica ca 'ena'am Ñimaye da sanquic da lataxac!

²⁴ Qaq aỹem shenapec naxa, da Ñim Nataxala' nachaqñita 'oonolec ñaqa'en, qaq ỹoqo'oye aỹem sepi'iỹa'a Ñimaye.

²⁵ Ñim Nataxala', ỹauotec cam ỹataqta pi'iỹa'a Ñimaye, qataq cam ỹataqta nmitaique Ñimaye.

²⁶ Qaq ỹataqta no'on da ñe'emaxataq da suetaqa'aguet, Ñim Nataxala' da qomi' nca'alaxatrec.

²⁷ Qataq no'on da ca ỹale nañaneguet da ỹataqta huesota da lataxac da ña nsoqolec.

²⁸ Cam ỹale, iuen da 'eeta'am da ỹataqta ndauec, qataq choche ñe'emaxat da Ñim Nataxala' damaxasoxon,

²⁹ qataq camaye iuen da sana'amaten, qataq nqapaxaneguet na 'alhua, cha'aye saiuena'a da ñaqauo'o da naquitaxac,

³⁰ qataq ỹanem ana lỹa lamelque cam anac da iuaxangui, qataq ỹaconeguet cam lta'araic nsheunaguec.

³¹ Ñim Nataxala' saishet da nache queta da qomi' ca'aisalo.

³² Qaq na'aictoxo' da ỹauo'o da que'enaxac, qalaxaye nataqa'en dechoxonnataxan, cha'aye da lsoxoyec ỹataqta lta'araic.

³³ Qaq cha'aye ỹoqta 'eesa da saỹaỹamaxaren da daquicoqtaxan, qataq da ỹauo'o ca nqui'ic na shiỹaxauapi.

³⁴ Da saqaichoxonnai' da qaỹasottapigui nam ncoñeteguishecpi ana 'alhua,

³⁵ qataq da ỹauaachigui Ñim 'Amaqtaqaic da saqaipaguelec, nam lapaqtañi lataxacpi maye npaxaalec cam shiỹaxaua,

³⁶ qataq da qaỹashaxanec da ỹaỹamaqchiguiñi lataxac da huo'o ca qaỹo'ot, nache damaye ỹataqta saỹaỹamaxaren Ñim Nataxala'.

³⁷ ¿Negue't ca ishet da ỹa'axata'a cam taỹa'a da yo'oq, da saishet da nacheñi Ñim Nataxala' da ỹamaxalec?

³⁸ ¿Saisheto' peta'a da saq chegoqtot Ñim 'Amaqtaqaic, 'enauac nam no'on qataq nam qauem?

³⁹ Cam shiỹaxaua da 'etaxaloxoic, ¿qaq negue'to' cam nachoxoreetapeguem da ña nca'altauec?

⁴⁰ Qaq no'on da ñimitaq da maiche qarataxac, nache qaltaq she'eguelaxasoqot Ñim Nataxala'.

⁴¹ Sanaxam Ñim Lo'onatac 'Enauacna maye neto'ot na piguem, dam qarhuennataxac qataq nam qanatanmaxacpi.

⁴² Qomi', huo'o nam qarasouaxashetpi, qataq saishet da salaxasoq, qaq ỹoqo'oye saishet da qomi' 'auchoxore'n.

⁴³ Qomi' 'auconnaxasopa da 'arayeloxo, qataq qomi' 'aucana'ape, ¡nache saishet da qomi' 'auchoxore'n da qomi' 'aualaua't!

⁴⁴ 'Anqañoxotoigui na lo'oc na piguem, da yaqto' saishet da 'aua'axaỹa da qanatamnaxac.

⁴⁵ Nache qomi 'auo'oteque da ỹataqta qomi' qaiqaigalo, shenaqta'am ca lasogoñi, da salegaqta'aguet na shiỹaxauapi.

⁴⁶ 'Enauac nam qampa'aguenaxauapi da detaqa, qalaq qauema naua la'aqtaqa da qomi' detaqtegalo.

⁴⁷ Da qarcolanaxa qataq da qanqoinaguec qataq da qomi' qanlaxatcheyeñi, damaye nachera da qomi' taleguete.

⁴⁸ Naua ỹache' qalaq huecolde'c, naguinguilo naua ỹamelque, co'ollaq semeteetac da nlaguiñi som ỹauotaxat nỹecpi.

⁴⁹ Naua ỹa'ai'te qalaq qaica ca nmataqa', cha'aye qaica qome ca aỹem ỹa'añaqchet,

⁵⁰ choche ivitta'a ca na'a'q da Ñim Nataxala' maye neto'ot na piguem, qomi' namata'alo.

⁵¹ Naua ỹa'ai'te qalaq ỹataqta ỹaquicoqche't da ñachaalataxac, souaxat da semeteetac da nque'eenaxac nam 'alpi, maye hueta'a ye huaqta'a't nỹecpi maye ima'.

⁵² Nam ñepa'aguenaxauapi qaica ca huo'omshe aỹem icaatac, qaq huotaique da aỹem ỹaconeua'a sheeta'am naqa'en ca qoỹo,

⁵³ nache huotaique da ñeca'altauec naqa'en da aỹem ỹapogoña, qataq da ỹapogui so ỹeguesheguem dapoxona so coma'.

⁵⁴ Na 'etaxat qalaq ỹataqta imauec da aỹem ỹapolec, nache shenapec «'ena'amso' da nache ỹoga't ne'ena.»

⁵⁵ Aỹem seỹaxana da 'are'enaxat 'Am Nataxala', co'ollaq sootaña na pa'aguiñi añi ỹataqta qaỹoqchiguingui nshere,

⁵⁶ qaq 'Am 'aua'axaỹa co'ollaxa da ivilỹaxac, qataq saishet da sa'auqocha'a da ñachoxonnaxac.

⁵⁷ So na'a'q co'ollaq 'Am seỹaxana, nache aỹem 'auanaỹa, nache aỹem qonapega qoneta': «Saishet da 'añe'e.»

⁵⁸ 'Am Nataxala' aỹem 'aueelec co'ollaxa, nache 'anca'alaxatec da ñachaalataxac.

⁵⁹ 'Am Nataxala', 'Am maye 'aumeteetac, dam qauem maye aỹem qaỹo'otec, ¡ñaq aỹem 'aueelec!

⁶⁰ 'Am 'aumeteetac da lyaxa namayepi da ipalaique lvi', qataq 'enauac nam lapaxañipi namayepi da yaqto' aỹem dataỹa'aguet.

⁶¹ 'Am Nataxala', 'ana'axaỹaxaatega co'ollaxa da lsheunaxanaxac namayepi, qataq 'enauac nam lapaxañipi da yaqto' aỹem dataỹa'aguet,

⁶² qataq 'Am 'auaỹaten na ltaxaỹaxacpi nam ñepa'aguenaxauapi, da ỹataqta imauec ye na'a'q da qauema naua la'aqtaqa da aỹem detaqtega.

⁶³ ¡Ñaq 'aumeten 'enauac na ỹo'otpi namayepi, damaye ỹo'ot da ñe'enaguec!

⁶⁴ 'Am Nataxala', talec 'anqa'en namayepi cam nsheetenaguec na ỹo'ottac.

⁶⁵ 'Aỹa'anem da qaramchigui da lquiyaqteỹaxac, qataq talec 'anqa'en ca qauem namayepi.

⁶⁶ ¡'Am Nataxala', 'aucanapec qome namayepi, 'aurolec da 'arayeloxo, nache ỹataqta pal 'anqa'en da huetalec ana 'alhua!