Jueces 8 - La'aqtaqa Ñim Lo'onatac 'Enauacna 2013

So Gedeón loxonec so madianiitapi

¹ Qaq som nhuo' le'ecpi maye chegoxoguetpi so Efraín ỹataqta dalemataỹa co'ollaxa so Gedeón, nache ncotaỹapegue' souaxat da saishet da iỹaxana somayepi co'ollaq jec da delogui' so madianiitapi.

² Nache so Gedeón ỹasategueto' somayepi, 'eeta': «¿Peta'a sa qauaỹachiñi da ỹataqta lta'araic da qauo'oche, saq 'ena'am dam so'ot? Cha'aye de'eratai' qauo'oche ỹataqta napacalec dam so'otaq.

³ Ñim Lo'onatac 'Enauacna qami' ỹanema da qoroxoñiqui so Oreb qataq so Zeeb, soua lataxala'ate na madianiitapi. Qaq ¿negue't cam so'ot da ishet da qanaloqnaxaneguet dam qauo'oche?» Nache so chegoxoguetpi so Efraín co'ollaq hua'axaỹa de'era la'aqtac so Gedeón, nache vi'iiguet da lalemataic.

So Gedeón ỹacheyiñi soua lta'al so madianiitapi

⁴ Nache so Gedeón qataq so nnaictague' trescientos nalleppi co'ollaq ivira so Jordán, nache ỹa'axasoxoolec, qaq ye ỹataqta nasamñi somayepi souaxat da icaatac so mpa'aguenaxauapi,

⁵ nache so Gedeón co'ollaq ivita ye Sucot, nache 'enapega som shiỹaxauapi maye lma' yemaye, 'eeta': «Ñaq aỹem qanqouaquiic da qaỹa'añim ca nallec na ñenaictague'pi da yaqto' deque'e, cha'aye namayepi ỹataqta sa nasamñi. Cha'aye qomi' secanaqta'ape caua Zebaj qataq Zalmuná, maye lta'al na madianiitapi.»

⁶ Qalaxaye so lataxala'pi so lma' ye Sucot, 'enapeco': ¡'Ena'amctoxo' da mashe 'auacheyiñi caua Zebaj qataq ca Salmuná, da yaqto' sequia'axanaq na 'analleppi!

⁷ Nache so Gedeón, 'enapeco': «Ñaq saxanaxa da sachiyiñi, qalaxaye qom ime da Ñim Nataxala' aỹem ỹanem da ỹoxonec ca Zebaj qataq ca Salmuná, nache qami' ñe'eguelaxalo, nache qami' seroleguete ana ỹaxat qataq ana poqo maye hualec na toolec 'alhua da selaxatta da qaro'ocỹaxaqui.»

⁸ Qaq nache chegoqchiguiña yemaye da nqo'ona ye Peniel, huaña nache 'eeta'am da la'aqtac co'ollaq iỹaxanot na lma' ye Sucot. Qalaxaye so lma' ye Peniel nataqa'en 'eeta'am da la'aqtac co'ollaxa so lma' ye Sucot.

⁹ Nache so Gedeón 'enapeco': ¡Qom ñe'eguelaq da mashe sauegaxan, nache ñelaxaañi qome ana nalloxolate!

¹⁰ Qaq so Zebaj qataq so Salmuná huetra'a co'ollaxa ye Carcor, nache nnaictagueto so quince mil alleppi, som no'onañipi alleppi maye chegaqa'ague da pa'aỹa'ague da nala' lliguisheguem, cha'aye qaỹalauat co'ollaxa som ciento veinte mil maye laỹepi somayepi.

¹¹ Nache so Gedeón jec, quetegue so nqa'aic maye queto'ot so loigue so toolec 'alhua, maye pa'aỹa'ague da nala' lliguisheguem ye Nobaj qataq ye Yogbeá, nache ique'elaxatta da iloquiaxan so alleppi co'ollaq qaica ca huotaique da netaña so lpe'lpi.

¹² Nache so Zebaj qataq so Zalmuná datarec co'ollaxa, qalaxaye so Gedeón icana'ape, nache ivitta'a da loxonqa. Qaq so nalleppi qalaq ỹataqta ñi'i.

So Gedeón ipalaique lvi'

¹³ Qaq so Gedeón ỹe'eguelaq co'ollaq ime da nalaataxac, nache taalec ye Heres,

¹⁴ nache ỹaconeua'a co'ollaxa so nsoqolec maye lma' ye Sucot nache inattac, nache se'eso nsoqolec ỹiyiñi so setenta y siete le'enaxatpi so nataxala'pi, qataq so nqueroxonecpi maye lma' ye Sucot.

¹⁵ Huaña nache so Gedeón nqo'ona so nataxala'pi ye Sucot nache 'enapega, 'eeta': ¡'Ena na Zebaj qataq na Salmuná! Naua huo'omshe aỹem qavi'iñiitac co'ollaq choche nalotauo na ñalleppi souaxat na lasamaxa, nache qoñiita: ¿'Ena'amctoxo' da mashe 'auacheyiñi soua Zebaj qataq so Salmuná, da yaqto' sequia'axanaq na 'analleppi?

¹⁶ Nache so Gedeón ỹacona aso ỹaxat qataq aso poqo maye ỹachegoxotaña ye toolec 'alhua, nache ira'a asomaye da iuaxan som nqueroxonecpi nataxala'pi, maye lma' ye Sucot.

¹⁷ Qataq nataqa'en nlaxaañi aso nalloxolate maye naña ye Peniel, qataq ỹalauat so shiỹaxauapi maye netaigui se'eso huaqta'a't nỹecpi.

¹⁸ Ime, nache inat so Zebaj qataq so Salmuná, 'eeta': ¿Chaq 'eetec ca lasheguiỹaxac som ỹalleppi maye qaualauache co'ollaq huaña añi qasoxonaxa Tabor? Nache soomaye 'eetra': «Qomye 'eeta'ama da 'arashiguiỹaxac. Qataq ñi 'oonolec somayepi qalaq 'eeta'am cam llalec ca nta'a.»

¹⁹ Nache so Gedeón ỹataqta nhuoxootec da la'aqtac, 'eeta': ¡Soomaye maiche ỹaqaỹa't! ¡Qaualauache' soua maiche ỹaqaỹa't! Qalaxaye sanot da ỹa'aqtac Ñim Nataxala' maye nca'altauec, taxa da choche qauchoxoyiñi' soomaye, nache saishettaxa da qami' salaua't nagui.

²⁰ Nache somaye sa naỹaloxon da 'enapega so Jéter, som llalec ỹe, 'eeta': ¡Qoñisheguem nache 'aualaua't daamaye! Qalaxaye so Jéter, ye ỹataqta ña nsoqolec, nache huo'o da lli'iỹaxa, ỹoqo'oye saishet da naviguisheguem so lainec.

²¹ Huaña nache so Zebaj qataq so Salmuná 'enapegalo so Gedeón, 'eeta': ¡Ña qomi' 'aualaua't, cha'aye ca ỹale ishet da qaỹauatton da 'eesa da qaramchigui! Nache so Gedeón ñisheguem, nache ỹalaua't soomaye, nache ỹaconalo soua llo'oxoraqtel naua ltogue soua cameello maye lalol so Zebaj qataq so Salmuná.

So Gedeón sa nashen da qoỹanagui da nta'a

²² Nache so Israel le'ecpi 'enapega so Gedeón, 'eeta': Qaq cha'aye qomi' 'ausoueguesopa da la'añaxac so madianiitapi, nache 'onaxaictoxo' da nache 'am qarta'a, qataq nataqa'en qomi' ilo'oguelo qome ca 'aỹa'alaqpi.

²³ Qalaxaye so Gedeón, 'enapeco': Aỹem qataq ca ỹalaqpi saishet qome da qami' selo'oguelo. Cha'aye nacheñita Ñim Nataxala' da qami' ilotegueto.

²⁴ Qalaxaye nacherata da qami' seỹaxanoiguilo da aỹem qaỹa'añim aca chiguishaqtepi maye qarhuotaxanaqche. Qaq asa'aso chiguishaqtepi oro ỹaatañi co'ollaxa so alleppi maye mpa'aguenaxauapi somayepi, cha'aye lma' ye toolec 'alhua.

²⁵ Nache so Israel le'ecpi lapaxañi so npo', nache somayepi ỹachalec aso chiguishaqtepi maye lhuotaxanaqtepi co'ollaxa, nache qoỹenapega so Gedeón, qoỹeeta': 'Aye ayemayepi.

²⁶ Nache 'enauac asa'aso chiguishaqtepi maye oro, huac da ivi' diecinueve kilos co'ollaq qanaloqten, qalaxaye saishet da qaỹalecneuo so laỹepi 'otaxatpi, nqolapi, mpotoyec tocalec da lo'oxoỹaxac maye ỹachetac naxa so nta'alpi madianiitapi, qataq aso llo'oxoraqtepi ana ltogue aso lalo cameellopi.

²⁷ Qaq se'eso oro, nache do'onataxana so Gedeón da ỹo'ot so ntogue lapoxot le'enaxat efod, nache ỹanaña ye Ofrá, maye maiche lma' somaye. Nache 'enauac so Israel le'ecpi da nquisheshigui da la'amqaanataxanaxac souaxat se'eso no'onatac efod, qataq nacheso so 'eeta'am da nqoinot so Gedeón qataq so llalaqpi.

²⁸ Qaq 'era da 'eetec so Israel le'ecpi da maiche ỹoiqueetac cam ỹataxaateuga so madianiitapi, nache so madianiitapi saishet da ỹoltaq nauaqsheguem, ivittrauec soua cuarenta vi'iye. Qaq co'ollaq ñaq nca'altauec so Gedeón nache huo'o da nlagaxayec se'eso 'alhua.

Da l-leuaxa so Gedeón

²⁹ Ime, nache so Yerubaal, maye nacheso so Gedeón, jec da ỹe'eguelaxa so maiche lalamaxat lma'.

³⁰ Nache ivi' setenta so llalaqpi, cha'aye qalota aso lhuapi.

³¹ Qaq aso ỹaqauga lhua somaye maye naña ye Siquén, nataqa'en huo'o so llalec, nache somaye ỹanagui da le'enaxat Abimelec.

³² Qaq so Gedeón ileu co'ollaq mashe ỹa'axaiquiolec. Nache qailaroigui aso nhuachiqui so lta'a Joás, maye naña ye Ofrá, ye lma' som chegoxoguetpi so Abiezer.

³³ Qaq co'ollaq mashe ileu so Gedeón, nache so Israel le'ecpi qaltaq ỹe'eguelaxa da nquisheshigui da la'amqaanataxanaxac, nache nañaneguet da natameetacot so ỹotta'a't ne'enaqtac lqui'ipi so Baal, nache somayepi lca'ateua'a da ỹauo'o natamnaxala' so Baal Berit.

³⁴ Nache icoua'ai Ñim Nataxala' maye Natamnaxala', Ñim isoueeguesop co'ollaxa 'enauac so mpa'aguenaxauapi somayepi,

³⁵ qataq saishet da huo'o ca ỹanapoigui so llalaqpi so Yerubaal, maye nacheso so Gedeón, qataq icoua'ai 'enauac nam no'onpi maye ỹo'otec co'ollaxa so Israel le'ecpi.