Jueces 3 - La'aqtaqa Ñim Lo'onatac 'Enauacna 2013

So ỹotta'a't shiỹaxauapi maye no'onalec ye Canaán

¹ Qaq 'eso so ỹotta'a't shiỹaxauapi maye Ñim Nataxala' hua'aqta'a da nache netalec yi'iye 'alhua, da yaqto' Ñimaye ỹe'eguen so Israel le'ecpi, maye ñaq saxanaxa da ñiguiñi co'ollaq qailoctague' so Canaán le'ecpi.

² Qaq ỹoqo'oye Ñim Nataxala' nache 'ena'ac co'ollaxa de'era da yaqto' nam dalaxaic Israel le'ecpi, maye sa ỹauaneua'a co'ollaxa so hua'au loquiaxac, nagui ishet da ỹaỹaten da deloqui.

³ Nache no'oirañi co'ollaxa soua cinco lataxala'ate so filisteopi qataq 'enauac so cananeopi, sidoniopi qataq so heveopi maye netalec co'ollaxa aye qasoxonaxapi maye huaña ye Líbano, chegoqchiguiña añi qasoxonaxa Baal Hermón, nache ivitta'a so ñegueta ye Jamat.

⁴ Qaq Ñim Nataxala', no'onaxatañi somayepi da yaqto' ỹe'eguen so Israel le'ecpi, saiuena'a da somayepi ishet da ỹalaxaguet na namaxasoxonaxacpi, maye Ñimaye ỹanem co'ollaxa so hua'au lta'alpi somayepi, ỹachegoxotchigui so Moisés.

⁵ Qaq 'era da 'eetec so Israel le'ecpi da nache lauoreuapi co'ollaxa so cananeopi, hitiitapi, amorreopi, fereseopi, heveopi, qataq so jebuseopi.

⁶ Nache so llalaqpi qataq so llalpi so Israel le'ecpi, huaroneguet so llalaqpi qataq aso llalpi se'eso shiỹaxauapi, qataq natamnot so natamnaxala'pi somayepi.

So nataxala' Otoniel

⁷ Qaq so Israel le'ecpi ỹo'ot co'ollaxa nam ỹataqta sa ỹaỹamaxaren Ñim Nataxala', nache icoua'ai Ñimaye nache natameetacot so ỹotta'a't ne'enaqtac lqui'ipi so Baal qataq aso Aserá.

⁸ Ỹoqo'oye Ñim Nataxala' ỹataqta dalemataỹa somayepi, nache ỹaneguet da la'añaxac so Cusán Risatayin, som nta'a ye Mesopotamia. Nache somayepi ivi' ocho vi'iye da do'onataxaatacot so Cusán Risatayin.

⁹ Huaña nache somayepi ỹataqta nachoxoreetacot Ñim Nataxala', nache Ñimaye ỹo'ot da huo'o so nachaañi shiỹaxaua da yaqto' nca'alaxatec somayepi. Qaq somaye, nacheso so Otoniel, maye llalec so Cenaz, som lqaỹa na'asa so Caleb.

¹⁰ Nache so Saqcha'a La'añaxac Ñim Nataxala', anac da ỹo'ot da la'añaxac so Otoniel, da yaqto' lataxala' so Israel le'ecpi. Ỹoqo'oye co'ollaq jec da deloqui, nache Ñim Nataxala' ỹanem da loxonec so Cusán Risatayin.

¹¹ Qaq co'ollaq ime de'era, nache ỹataqta huo'o da nlagaxayec se'eso 'alhua imattrec soua cuarenta vi'iye, ivitta'a da ileu so Otoniel.

So Aod nca'alaxateeguesop so Moab so Israel le'ecpi

¹² Qaq so Israel le'ecpi qaltaq ỹe'eguelaxalec da ỹo'ot co'ollaxa na ỹataqta sa ỹaỹamaxaren Ñim Nataxala', ỹoqo'oye Ñimaye ỹanem da la'añaxac so Eglón, som nta'a ye Moab, nache napacalec da la'añaxac so Israel le'ecpi.

¹³ Qaq ỹoqo'oye so Eglón, naỹamaxate' co'ollaxa so 'amoniitapi qataq so 'amalequitapi da yaqto' huaxaiguet, nache jec da iloquiaxan so Israel le'ecpi, nache deuotaxanec so huaqta'a't nỹecpi maye le'enaxat Chaisat.

¹⁴ Huaña, nache so Israel le'ecpi, ivi' dieciocho vi'iye da do'onataxaatacot so Eglón,

¹⁵ qaq so Israel le'ecpi qaltaq ỹe'eguelaxalec da nachoxoreetacot Ñim Nataxala', nache Ñimaye qaltaq huo'o naqa'en so nachaañi da yaqto' nca'alaxatec somayepi. Nache lca'ateua'a som chegoxoguet so maiche lauo' le'ecpi so Benjamín, qaq somaye lo'onataxanaxat na ne'emaq lhuaq, le'enaxat Aod, som llalec so Gera. Qaq huo'o so na'a'q nache so Israel le'ecpi, ỹamaxa so nta'a Eglón aso lsheetenaxanaqte somayepi nache dachoxoolec so Aod.

¹⁶ Qaq so Aod ỹo'ot co'ollaxa so lainec maye dos naua llaqa'ate, maye ivi' medio metro nache ỹauo'o so lasot alaxa da na'achigui ipa'axana'ague da aloic, nache ỹapotelec naqa'en soua alogo.

¹⁷ Huaña nache jec da ira'a so nta'a Eglón aso nsheetenaxanaqte, qaq se'eso nta'a ỹataqta chaxaraic.

¹⁸ Nache so Aod co'ollaq ime da ỹanem so Eglón aso nsheetenaxanaqte, nache somaye ỹe'eguelaq, lỹatrec soua nnaictagueto co'ollaq npeetegueto aso nsheetenaxanaqte,

¹⁹ qalaxaye co'ollaq ivita so netaña so nqolacpi maye naña ye saqaỹapeque ye Gilgal, nache so Aod ỹe'eguelaxa co'ollaxa ye hueta'a so Eglón, nache 'enapega, 'eeta': «'Am 'amaqtaqaic nta'a, huo'o da ỹa'aqtaxanaxac qalaxaye iuen da nache 'amta da 'aua'aqchigui.» Nache so nta'a 'enapega so lamaxashecpi, da yaqto' qanayeca'ai, nache somayepi ca'ai somaye.

²⁰ Nache so Aod co'ollaq ndote' so nta'a Eglón, maye nso'ootañi, netasheguema so pa'aỹasheguem nỹec maye lpaqalaxaqui naxa da napaxaỹañi, nache nquicot somaye, nache, 'eeta': «Da na'aqtac maye 'am ñera'a, damaye chegoqo'ot Ñim Lo'onatac 'Enauacna.» Qaq so Eglón co'ollaq hua'aqchigui de'era, nache ñesheguem, ca'ai aso nso'onaxaqui.

²¹ Nache so Aod ỹauota'a na lhuaq ne'emaxashec da naviguisheguem so lainec nache ỹa'arapec, nache ỹa'attoigui na lauel so Eglón.

²² Qaq cha'aye ỹataqta na'axannec da ỹa'arapec, nache so ỹeelonec ỹapacaueegue na l-laq somaye, qaq cha'aye so Eglón ỹataqta chaxaraic, nache ana lpiỹo somaye ỹapolec so ỹeelonec, nache so Aod, saishet da nqat somaye.

²³ Ime, nache so Aod, ivingui da ỹapoguilo se'esoua laso'omi so pa'aỹasheguem nỹec, nache tachiviigui so nalloxoqui da jec.

²⁴ Qaq co'ollaq mashe ỹoxogue somaye, nache so lamaxashecpi so nta'a, tasheguema yem netasheguema so nta'a qaq co'ollaq ila'a da napotagui so lasom, nache ipeta'a da so nta'a napola't da yaqto' lcotela't.

²⁵ Qalaxaye co'ollaq mashe qaỹoqtegue da deuataxaatac somayepi, nache huo'o da lhuogoxo souaxat da ila'a da sa npa'auec so nta'a. Huaña nache somayepi ỹacona aso lvinaqte so lasom da yaqto' ỹauatoigui, qaq co'ollaq ỹauatoigui nache ilalec so na'aco da huetaiya', qataq mashe ileu.

²⁶ Qaq cha'aye somayepi imela'tpi, nache so Aod huo'o da ldaqa' da datauec, qaq co'ollaq mashe napacalec ye naña so nqolacpi maye naña ye Gilgal, nache nqañoxotoigui ye Seirat.

²⁷ Qaq co'ollaq ivita ye 'alhuapi maye huaña ana qasoxonaxapi ye Efraín, nache somaye ỹashiiyigui aso lasheere peenaq lcoue, da yaqto' laỹona't so Israel le'ecpi, nache namayepi huenoteeguesop añi qasoxonaxa da yaqto' datalec so Aod.

²⁸ Nache so Aod 'enapega somayepi, da ca'ategue somaye cha'aye Ñim Nataxala' ỹanem da loxonec so moabiitapi maye mpa'aguenaxauapi somayepi. Nache so Israel le'ecpi ca'ategue somaye, nache nqo'ona da nauan som ñeguetapi da qotaitague da le'ego so Jordán maye taỹa'a ye Moab, nache qaica ca ỹashenem da quegue se'eso ñeguetapi.

²⁹ Qaq se'eso na'a'q, somayepi ỹalauat so diez mil moabiitapi, qaq na'aictaxa co'ollaxa da somayepi ỹataqta 'añaxaicpi, qataq alaataxaicpi, qalaxaye ỹataqta qaica ca qoỹet.

³⁰ Qaq 'era da 'eetec co'ollaxa da so Israel le'ecpi nauec so Moab le'ecpi. Qaq co'ollaq ime de'era, nache huo'o da nlagaxayec se'eso 'alhua imattrec soua ochenta vi'iye.

So nataxala' Samgar

³¹ Qaq so nmeneguet co'ollaxa so Aod, le'enaxat Samgar, som llalec so Anat. Somaye ỹalauat so seiscientos filisteopi, irota'a aso logorai na'araxanaqte maye lo'o da qaỹo'orelec na nauegaxanaxala'pi huacapi. Nache so Samgar nataqa'en nca'alaxatec co'ollaxa so Israel le'ecpi.