Jueces 15 - La'aqtaqa Ñim Lo'onatac 'Enauacna 2013

So Sansón ipalaique lvi'

¹ Qaq co'ollaq mashe qaỹoqtegue de'era, nache huaigui so laloxoqui da qanqat na trigo, nache so Sansón jec da namaqtega aso lhua, nache ỹachetac so quetaq llalec. Qaq co'ollaq ivireuo, nache 'enapeco': «Aỹem sepa'aua'a aca ihua, cha'aye sauotaique da ỹo'ochaxaua acamaye.» Qalaxaye so lacho' saishet da ỹasheneuo da pa'auo somaye,

² cha'aye 'enapeco': Aỹem sepi'itaxaatega da mashe sa 'anqopita asomaye, ỹoqo'oye sanem so 'anauochaxaua da lhua ñaqa'en. Qalaxaye añi lqaỹa na'asa napacalec da lyac asomaye, nachañi nmeneguet 'anqa'en asomaye.

³ Qalaxaye so Sansón 'enapeco': ¡Nagui maye saishet da ỹasouaxashet qom huo'o ca so'otec na filisteopi!

⁴ Qaq huaña nache jec, nache ỹaconeua'a aso trescientos huaxaỹaxapi, nache ỹauaxaỹaxana't ñeua dos da icoñera'a't naua la'araxashe'ete, qataq icoñeraguilo aso lca'atoxonaqtepi somaye.

⁵ Ime, nache ỹe'eraxatoigui aso lca'atoxonaqtepi, nache ỹaxanec aso huaxaỹaxapi, ỹachaxaalec so lanaxanaqa'pi so filisteopi. Qaq 'era da 'eetec co'ollaq ỹavigaxat aso lapootasheguempi naqta trigo, qataq som nañiguishecpi maye saxanaxa da qanqat, qataq ivira'a so lma' aso nañiguishepi uva qataq so olivo lma'pi.

⁶ Nache so filisteopi ichemaxattac, chaq negue't cam ỹo'ot de'era, nache ivitta'a da ỹaỹaten da nacheso so Sansón som ỹo'ot de'era, souaxat so lacho' maye Timná le'ec ỹanec co'ollaxa aso llale da lhua naqa'en so lỹa ỹale, qaq huaña, nache so filisteopi nqo'ona da ỹavigaxat aso 'alo qataq so lta'a.

⁷ Qalaxaye so Sansón 'enapego' somayepi, 'eeta': Cha'aye mashe qauacoñiỹa da qoñeetec de'era, nache aỹem saishet da she'eeguet da sepalaique ivi' da qoñiita!

⁸ Huaña, nache iloquiaxan somayepi, nache ỹataqta ỹacagaxa't naua lpi'ineqa da ique'emaqchet somayepi, qataq qalota so ileu naqa'en. Ime, nache taỹa da nqañoxotoigui so auac maye naigui añi coma' Etam.

So Sansón ỹalauat so mil filisteopi

⁹ Nache so filisteopi inoxoneua'a co'ollaxa so na'alhua so chegoxoguetpi so Judá, huaña, nache hua'a da lanataqa' so saqaỹapeque ye Lehí.

¹⁰ Nache som shiỹaxauapi maye lma' ye Judá denataxan, 'eeta': ¿Ta'ainco' da qauanaqui da qomi' qauloquiaxañi'? Nache somayepi 'enapeco': Qomye ñanaguenaq da saconaxaua'a ca Sansón, da yaqto' se'enaxataqchigui dam qomi' ỹo'oteque camaye.

¹¹ Nache so lma' ye Judá, jec so tres mil ỹalleppi da nqo'ona so auac maye naigui aso coma' ye Etam. Nache somayepi 'enapego' so Sansón, 'eeta': ¿Peta'a sa 'auaỹaten da na filisteopi nachena na ilotague' nataqa'en na souaqta'a? ¿Ta'ainco' da qomi' 'auo'oteque de'era souaqaigui nagui? Nache so Sansón 'enapeco': Aỹem so'otec de'era namayepi da yaqto' se'enaxatchigui da aỹem ỹo'otec co'ollaxa.

¹² Huaña nache somayepi 'enapec: Qomi' ñanaguenaq da 'am saconaxaua'a da yaqto' 'am sanaxam na filisteopi. Nache so Sansón 'enapec: Ñaq aỹem qaỹa'añim nagui ca qara'aqtaqui da saishet da nache qami' da qauauoitaique da aỹem qaualauache.

¹³ Nache somayepi 'enapeco': ¡'A'i, saishet da 'am salauataq! Nachaqrata da sauoqtaique da 'am saconaxaua'a, nache 'am sanaxam na filisteopi. Huaña, nache qaỹauota'a soua dos nañeqa maye ñaq dalaxaiqolqa da qaicoñerai' somaye, nache qanqateeguesop som nqañoxotaqa' auac.

¹⁴ Qaq co'ollaq ivireua'a ye Lehí, nache so filisteopi ca'atta'aguet somaye, nache ỹa'alaqtai' da ntonaxac. Qalaxaye so Saqcha'a La'añaxac Ñim Nataxala' ỹanem da la'añaxac so Sansón, nache soua nañeqa maye qaicoñettaguilo naua lapique, qataq naua lhua'q, huesochiguilo naqa'en 'eeta'am ca hualoq laỹe da mashe ỹavic.

¹⁵ Huaña nache ila'a so 'ashena lanoc maye saxanaxa da daqaqta, huetaña ye qanayeuta'a. Qaq nacheso so irolec da ỹalauat so mil filisteopi.

¹⁶ Ime, nache 'eeta': «Sauota'a na 'ashena lanoc da llapoosheguem so ỹalleppi sauota'a na 'ashena lanoc da salauat so mil ỹalleppi.»

¹⁷ Qaq co'ollaq ime da ltaxaỹaxac, nache ỹasaxauec so 'ashena lanoc. Nache asa'aso lcomaraxalate ỹanagui da le'enaxat Ramat Lehí maye naigui da «'Ashena Lanoc.»

¹⁸ Qaq cha'aye so Sansón ỹataqta ỹaguec na laquip, nache iỹaxanot Ñim Nataxala', 'eeta': «¿Ta'ainco' ye aỹem 'aỹa'anem da lta'araic ỹa'añaxac da sauegaxan, qaq nagui qalaq seleu souaxat na ỹaquip, qataq da aỹem ỹalauat nam ỹalleppi maye sa ỹa'amaqtenaxanaxauapi?»

¹⁹ Huaña nache Ñim Lo'onatac 'Enauacna npaxaasheguem naqa'en na le'ec aso lcheque maye naña ye Lehí, nache so Sansón nỹomgui so 'etaxat maye chegaqangui asomaye, huaña nache qaltaq huo'o da la'añaxac. Qaq ỹoqo'oye, asa'aso chegaqangui so 'etaxat npaxaatasheguem maye naña ye Lehí, ỹamata'ac da le'enaxat Enacoré maye naigui da «Laquipiaxaqui som deỹaxan co'ollaxa», qaq nache ivitta'a nagui.

²⁰ Qaq so Sansón, ivi' soua veinte vi'iye da lataxala' so Israel le'ecpi, maye huetoiguilo co'ollaxa soua vi'iye da so filisteopi ilotague' se'eso 'alhua.