Jueces 13 - La'aqtaqa Ñim Lo'onatac 'Enauacna 2013

Da lañoxoc so Sansón

¹ Qalaxaye so Israel le'ecpi qaltaq ỹe'eguelaxalec da ỹo'ot co'ollaxa nam ỹataqta sa ỹaỹamaxaren Ñim Nataxala'. Ỹoqo'oye Ñimaye ỹaneguet co'ollaxa somayepi da la'añaxac so filisteopi soua cuarenta vi'iye.

² Qaq ye Sorá, maye lalamaxat som chegoxoguetpi so Dan, nache netaña co'ollaxa som ỹale maye le'enaxat Manoa, somaye qaica co'ollaxa ca llalec, cha'aye aso lhua somaye sa deco'o.

³ Qalaxaye so nale piguem le'ec Ñim Nataxala', nachaxana co'ollaxa asomaye, nache 'enapego', 'eeta': 'Am sa ỹauanega da huo'o ca 'aỹa'alaqpi, qalaxaye nagui 'am hualaxai, nache huo'o qome ca 'aỹa'alec.

⁴ Qalaxaye nacherata da saishet qome da 'anỹomgui ca lataxa, huo'otaq ca lỹa maye ishet da qantaxac, qataq saishet da qollec ca nallec maye sa qaỹashen da qanallec.

⁵ Qaq que'eca 'aỹa'alec maye ñiguiñi qome, camaye saishet da qanpetec na laue, cha'aye que'eca nogotolec qom saxanaxa da ñiguiñi, nache nale'ena da mashe qaiỹotauga da qoỹanot Ñim Lo'onatac 'Enauacna. Qaq camaye nacheca qome ca isoueeguesop na Israel le'ecpi da la'añaxac na filisteopi.

⁶ Nache asa'aso 'alo jec da da'aqtaxanem so lhua, 'eeta': «Huo'o so nale Ñim Lo'onatac 'Enauacna maye naỹa ye soota'a. Qaq da lataxac somaye ỹataqta ỹo'ot da ỹa'aalaxa, cha'aye 'eeta'am da lashiguiỹaxac nam nale piguem le'ec Ñim Nataxala'. Qaq aỹem saishet da senat ca chegaqa'ague, qataq somaye saishet da aỹem da'aqtaxanem ca 'eetec ca le'enaxat.

⁷ Qalaxaye somaye aỹem da'aqtaxanem da aỹem hualaxai qome, nache huo'o qome ca ỹalec, qaq ỹoqo'oye nagui saishet da ñeỹomgui na lataxa huo'otaq ca lỹa maye ishet da qantaxac, qataq saishet da sachec ca nallec maye sa qaỹashen da qanallec, cha'aye que'eca nogotolec qom saxanaxa da ñiguiñi, nache nale'ena da mashe qaiỹotauga da qoỹanot Ñim Lo'onatac 'Enauacna, nache choche ivitta'a qom ileu.»

⁸ Huaña, nache so Manoa nqouagaxaunot Ñim Nataxala', 'eeta': «'Am Ỹataxala', 'am ñachoxonnot da qaltaq 'añe'eguelaxat qome se'eso ỹale maye qomi' 'anamaxalo, da yaqto' qomi' ỹapaxague'n chaq shenaqtec qome que'eca nogotolec maye taỹa'a da ñiguiñi.»

⁹ Nache Ñim Lo'onatac 'Enauacna ỹasateguet co'ollaxa da nachoxonnaxac so Manoa, nache so nale piguem le'ec Ñimaye qaltaq ñe'eguelaxa aso 'alo, co'ollaq huetauga so no'onaxa. Qaq cha'aye saishet da nnaictague' so Manoa,

¹⁰ nache asomaye nqalgoqtaua'a so lhua da icoyeguen, 'eeta': «¡'Aỹala, ten da ỹale maye aỹem nachaxana so lỹa na'a'q, qaltaq ñe'eguelaq da aỹem nachaxana!»

¹¹ Nache so Manoa ñisheguem, nache ca'ateueegue aso lhua da tauga so hueta'a se'eso ỹale. Nache somaye, 'eeta': ¿Nache 'am peta'a maye 'autaqtague' ara ihua so lỹa na'a'q? Nache se'eso ỹale 'enapeco': Aja', nachaỹem.

¹² Nache so Manoa 'enapeco': Qom ivita da ipacchigui de'era qomi' 'aua'axattapeguema, ¿qaq chaq shenaqtec ca lataxac da sapaxaguenaq que'eca nogotolec? Qataq ¿chaq 'eetec ca lo'onataxanaxac camaye?

¹³ Nache so nale piguem le'ec Ñim Nataxala' 'enapec: Qomye ara'ara 'arhua ỹataqta ỹo'ot qome 'enauac nam iqataxacpi,

¹⁴ saishet qome da nỹomgui ca lataxa huo'otaq cam lỹa maye ishet da qantaxac, qataq saishet qome da chec ca nallec maye sa qaỹashen da qanallec. Nacherata da ipactelec da ỹo'ot nam samaxalecpi.

Da 'eetec so namaxashec piguem le'ec

¹⁵ Nache so Manoa 'enapega se'eso nale piguem le'ec Ñim Nataxala' 'eeta': «Qomi' 'anqouagueque da cara'ac da 'ano'onañi, yaqto' qomi' 'arquia'axau' da sacheguenaq ca quetaq llalec maye saqataxanaqai'.»

¹⁶ Qalaxaye so nale piguem le'ec Ñim Nataxala', 'enapec: Na'aictoxo' da soua'a ne'ena, qalaxaye sa seshet da sachec cam nallec maye 'auo'ot. Qalaxaye ishet da 'arachetaqtaxanaxat 'auavigaxatta que'eca quetaq llalec, da 'aỹa'anot Ñim Nataxala'.

¹⁷ Nache so Manoa inat so nale piguem le'ec Ñim Nataxala', 'eeta': ¿Ca 'eetec ca 'are'enaxat? Yaqto' 'am sho'oxorenaqtac qom ipacchigui de'era 'ara'aqtac maye qomi' 'aỹa'anema.

¹⁸ Qalaxaye so nale piguem le'ec Ñim Nataxala', 'enapec: ¿Ta'ainco' ye 'auauotaique da 'auaỹaten cam ỹe'enaxat? Ye damaye ỹataqta ỹapogoñi qataq ỹo'oxoraic.

¹⁹ Huaña nache so Manoa ỹacona so quetaq llalec, qataq aso lachetaqtaxanaqte maye chegaqaigui so ala nam nañiguishec, nache ỹachalec so coma' da lachetaqtaxanaxat ỹavigaxatta da ỹanot Ñim Nataxala'. Nache Ñimaye ỹo'ot so qaica ca 'ena'am llo'oxoyec, ỹauaachigui naqa'en so Manoa qataq aso lhua.

²⁰ Nache so le'eraxa so norec maye huetalec aso nca'atoxonaxalate huaỹoxoosheguem, nache so Manoa qataq aso lhua ỹauaachiguilo co'ollaxa da so nale piguem le'ec Ñim Nataxala', queuoigui so le'eraxa se'eso norec da taỹot na piguem. Nache soomaye ỹa'alyiñi naua l-llectel, iviraxata'agueta naqa'en na 'alhua na lata'pi,

²¹ nache se'eso nale piguem le'ec Ñim Nataxala' saishet da ỹe'eguelaxa da qaltaq nachaxan. Nache so Manoa qataq aso lhua co'ollaq nanoma da se'eso ỹale somaye nale piguem le'ec Ñim Nataxala',

²² nache somaye 'enapega aso lhua, 'eeta': Yo'oqta da seleuaq qome, cha'aye mashe ñauanaxai' Ñim Lo'onatac 'Enauacna.

²³ Qalaxaye asomaye 'enapeco': Ñim Nataxala' da nshapeque taxa da qomi' ỹalaua't, nache saishettaxa da ỹaconeguet so qarachetaqtaxanaxat maye qaỹavigaxatta, qataq aso qarachetaqtaxanaqte maye chegaqaigui ana ala nam nañiguishec, qataq saishettaxa da qomi' nachaxanalo qataq da qomi' da'aqtaxanema 'enauac de'era.

²⁴ Qaq co'ollaq ivita da ñiguiñi so llalec asa'aso 'alo, nache ỹanagui da le'enaxat Sansón. Nache so nogotolec nquictasheguem da lañaxataxac, qaq Ñim Nataxala' ỹanem da lchoxonnataxanaxa somaye.

²⁵ Nache huo'o so na'a'q da so Sansón hueta'a yem lanataqa' so Dan maye naña yem laiñi so huaqta'a't nỹecpi maye huaigui ye Sorá, qataq ye Estaol, qaq nache huaña co'ollaxa da so Saqcha'a La'añaxac Ñim Nataxala' yo'oq naqa'en da la'añaxac somaye.