Judas 1 - La'aqtaqa Ñim Lo'onatac 'Enauacna 2013

Da lquinaxanaxac so Judas

¹ Aỹem maye ỹe'enaxat Judas, so'onataxaatacot So Qarataxala' Jesucristo, qataq ỹaqaỹa so Santiago. Aỹem samaxa ana ỹere 'enauac nam lauotaxatpi qataq lca'aguishecpi Ñim Lo'onatac 'Enauacna, nam nataqa'en lhuateguishecpi So Jesucristo.

² Huo'o da iyaxa da Ñim Lo'onatac 'Enauacna qami' ỹo'oteque da lta'araic lauotaxanaqtaic qataq da lta'araic naqa'en da qarlagaxayiqui qataq da qarsoxoyiqui.

Da nqataxac da yaqto' qaivita'aguet da natenataxanaxac

³ Qami' ñauochaxau' ỹaqaỹa't maye sa'amaqtenaqtac So Cristo. Mashe qaỹoqtegue da iyaxa da sauotaique da shiyiñi da lataxac da nca'alaxa maye qomi' ỹanema Ñim Lo'onatac 'Enauacna. Qalaxaye nagui qami' samaxalo ana ỹere da qami' seỹaxanoto da qoquiito'ot da qauloquiitapeguelec da lapaxaguenataxanaxac Ñim Lo'onatac 'Enauacna, maye mashe ime da ỹami' 'enauac nam lalamaxatpi qataq lca'aguishecpi Ñimaye.

⁴ Aỹem ỹataqta lta'araic da sheeta, cha'aye huo'o na qami' ỹatenachetta'ape, qaq namayepi qami' ỹalectaiguilo. Namayepi ỹa'axattac da So Jesucristo saishet da nachaqsota da Qarataxala' qataq da qomi' lalamaqa'ate, qaq ỹoqo'oye saishet da iuen da salaxasoxoguet. Namayepi, da lhuennataxac 'eetega da Ñim Lo'onatac 'Enauacna ỹaguec da lauotaxanaqtaic da shenaqta, nache saishet da ỹauo'o ca qanhuaxanaguec souaxat nam qauem so'otaqpi. Mañaxasaco' soua qaỹoqteguelo vi'iye da ana nere maye huetalec na la'aqtacpi Ñim Lo'onatac 'Enauacna da 'eetega da Ñimaye ỹauo'o qome ca nhuaxanaguec namayepi.

⁵ Qaq na'aictaxa da qami' mashe sogote da qauaỹaañi de'era, qalaxaye nache 'ena'am sauotaique da qami' seuennataxanaxaneque da 'eetec co'ollaxa Ñim Lo'onatac 'Enauacna da nqateeguesop ye 'alhua Egipto so Israel le'ecpi, ime, nache ileu naqa'en so shiỹaxauapi maye saishet da ỹa'amaqten Ñimaye.

⁶ Qaq 'era da 'eetec nataqa'en som lamaxashecpi piguem le'ecpi Ñim Lo'onatac 'Enauacna, maye saishet co'ollaxa da ỹaỹamaxatec da lo'onataxanaxac maye ỹami' Ñimaye. Qaq Ñimaye chochaq tatec naqa'en da ncoñetaguec somayepi qataq ỹapotaua'a, hueta'a ca ỹataqta napalñi, choche ivitta'a que'eca pa'atec na'a'q maye qaica ca 'ena'am qom qanmit 'enauacna.

⁷ Qataq nache 'eeta'am da huaigui co'ollaxa so shiỹaxauapi maye lma' ye Sodoma qataq Gomorra qataq som nỹecpi maye saqaỹapeque yeemaye. Som hueta'a yemaye ỹataqta ỹaguec da lle'etaxaloxo qataq ỹo'ottac na ỹotta'a't lataxac da quisheguetaxac maye sa qaishetapec. Qaq ỹoqo'oye Ñim Lo'onatac 'Enauacna ỹauo'o da nhuaxanaguec, icorelec so norec maye saishet da 'om da yaqto' ỹo'ot da nque'eenaxac somayepi. Qaq damaye nachera da 'enauac qomi' qaivitaqteetegalo.

⁸ Qaq de'era nachera nataqa'en da talec nam qauemaicpi maye qami' sa'aqtaxaateguema. Cha'aye chegoqchiguilo naua qauema lhuennataxaco da ỹo'otec da qauem da lo'ocỹaxac, qataq sa ỹaconeguet da lamaxasoxonaxac Ñim Lo'onatac 'Enauacna qataq isheueetac nam lamaxashecpi piguem le'ecpi Ñimaye.

⁹ Qamaq so lataxala' na namaxashecpi, le'enaxat Miguel, saishet da ishet da ỹo'ot ca 'eeta'am de'era. Co'ollaq deloctague' so pa'aguenataxanaxaic da deuotaxanec so lo'ocỹaxac so Moisés, qalaq saishet da isheuen, nachaqrata da 'oonolec so la'aqtac da 'enapega, 'eeta': «Ñim Nataxala' ỹauo'o qome ca 'anhuaxanaguec.»

¹⁰ Qalaxaye ne'ena shiỹaxauapi ivira'a nam sa ỹauatton da isheueetac. Da lataxac 'ena'am na shiguiỹac da ỹauatton ca camachaqca qalaxaye saishet da ishet da deuennataxaalec, ỹoqo'oye ivira'a da maiche nalaala't.

¹¹ Qaq ỹataqta ¡choxoraxaso' namayepi! Cha'aye da lataxac 'eeta'am so Caín, qataq souaxat da lyaxa da nauec aca anom, nache 'eeta'am da lataxac so Balaam. Ỹataqta ỹaguec da qauemaicpi, ỹoqo'oye da l-leuaxa 'eeta'am da l-leuaxa so Coré souaxat da npa'aguenaxac.

¹² Namayepi ỹataqta ỹo'ot da na'agaxa da ỹalectaigui da qarquia'axaqui maye naigui da nsoxoyec. Cha'aye namayepi da deque'e qataq da nỹom, qalaq saishet da iuata'a na laỹepi. Namayepi huotaique da nataxala'pi, qalaxaye maiche nhuogoqtapeguela't, 'eeta'am na napo maye qaica ca lla'ac 'etaxat, choche ỹachetac na la'at. Nataqa'en 'ena'am aca qo'oipaq maye qaca aca ala, cha'aye maye qanapogosheguem, qanmachetcheguem na lpa'a'pi, nache ỹataqta daqaqta.

¹³ Qataq namayepi ỹataqta sa ncherapec. 'Enauac ishet da qaila'a nam qauem ỹo'ottac, cha'aye nam qauem maye ỹo'ottacpi, 'eeta'am na lcoche ana sa ncherapec lapaxa aso auaxai. Qataq namayepi 'eeta'am ana huaqaañipi maye ca'ai cam ỹoqta llec, nache qaiuaxanec da quetaigui nam chochaq tatec napalaxa.

¹⁴ So Henoc som huetoigui da siete nqochen na llalaqpi so Adán, somaye ỹa'axata'a co'ollaxa ne'ena shiỹaxauapi co'ollaq 'eeta': «Ñaq qauloỹa Nam Lo'onatac 'Enauacna anacta, nnaictague' na qalota maye saishet da qaivi' da qanaloqten lamaxashecpi piguem le'ecpi.

¹⁵ Anac da yaqto' ỹauo'o ca nhuaxanaguec 'enauac nam ỹo'ottac na qauem, qataq 'enauac na 'etaxaloxoicpi maye isheueetac co'ollaxa Ñimaye.»

¹⁶ Ne'ena shiỹaxauapi ỹataqta taxaỹaxaicpi qataq camachaqca ca quetapeguelec. Qataq nachaqrata da nmitta'a da ipacchigui ca maiche lqopitaxanaqtaic. Qataq naua la'aqtaqa ỹataqta ño'oxonnaxaiqa, qataq da detaxaỹa ca lỹa shiỹaxaua qalaq ỹataqta iyaata, qalaxaye choche ỹatenachettac.

Qaiqata na 'amqaanataxanaxaicpi

¹⁷ Qalaxaye qami' ñauochaxau' ỹaqaỹarolqa, qauennachiỹa'a dam mashe qami' da'aqtaxaateguema co'ollaxa soua lamaxa'she So Qarataxala' Jesucristo.

¹⁸ Soomaye qami' ỹapaxagueeta'ape qataq qami' da'aqtaxaateguema co'ollaxa da que'ecaua pa'atre'c na'axa'te, nache huo'o na shiỹaxauapi 'enaxanaxaicpi maye nañaneguet da quetague' nam maiche 'eetapeguecpi maye qauem.

¹⁹ Qaq ne'ena shiỹaxauapi, nachena na ỹayen da deloguiỹa't qataq colaxagui naqa'en na shiỹaxauapi, cha'aye ỹalaxaguet nam maiche 'eetapeguecpi qataq saishet da netanguit som Saqcha'a La'añaxac Ñim Lo'onatac 'Enauacna.

²⁰ Qalaxaye qami' ñauochaxau' ỹaqaỹa't, qanquigaxachiitasheguem da qarpi'iỹaxaqui Ñim Lo'onatac 'Enauacna. Cha'aye de'era qarpi'iỹaxaqui ỹataqta 'onaxaic. Qataq da qanqouagaxauñi, qalaq qauaqaita'a So Saqcha'a Na'añaxac Qui'itta da qami' da'aqtaxanema cam iuen da qanasaqaiuec.

²¹ Qataq ima'ape naua na'axa'te da qanaquichiỹa'a da lauotaxanaqtaic Ñim Lo'onatac 'Enauacna, qataq qauacheeta'a que'eca na'a'q da So Qarataxala' Jesucristo, qomi' ỹanema ca qanachaalataxac chochaq tatec, cha'aye Somaye nataqa'en qomi' lauotaqa'ate.

²² Qataq cam huo'o da lqolectaxanaxac qalaq ỹataqta qaua'aqtaxañiitem, qauacheetoigui da qarsoxoyiqui.

²³ Qanca'alaxacheeuec nam iuen da qanca'alaxateeguesop cam nhuaxanaqa' na 'etaxaloxoicpi, qataq qauchoxoyiñi nam nataqa'en iuen ca nchoxonnataguec. Qalaxaye ỹataqta qarvichiỹa'aguet da qauo'oche nataqa'en nam qauem maye ỹo'ottac namayepi.

Da pa'atec ño'oxonnataxanaxac Ñim Lo'onatac 'Enauacna

²⁴ Ñim Lo'onatac 'Enauacna ishet da qami' ntela'alo da yaqto' saishet da qauo'oche ca qauem, qataq nataqa'en huo'o da la'añaxac da yaqto' qami' nachaalataxaneua'alo cam hueta'a maye qaica ca 'ena'am da llo'oxoyec. Qaq da qanachaacheua'a Ñimaye, qalaq qami' nlaqchiguilo da qantonaxaqui qataq qami' qui'itte', qaica ca qarshepaxanaqai, qoñiita'am ca nogoxot da dalaxaicolec.

²⁵ Qaq ỹoqo'oye qavio'oxoyiñiitac qome Ñim Lo'onatac 'Enauacna maye Qarca'alaxaqui, qataq qaua'amaqchiñi da la'amaqchec qataq da la'añaxac qataq da 'enec, cha'aye Ñimaye qomi' namaxalo So Qarataxala' Jesucristo. Qaq ỹoqo'oye chochaq tatec qome da qayo'oxonnataxanaxac Ñimaye. Aja', nache 'eetec.