Juan 7 - La'aqtaqa Ñim Lo'onatac 'Enauacna 2013

Soua lqaỹa't So Jesús saishet da ỹa'amaqte'n Somaye

¹ Qaq co'ollaq ime de'era, nache So Jesús coleetac ye 'alhua Galilea. Somaye saishet da taỹa ye 'alhua Judea, cha'aye nam lataxala' na judiopi maye lma' yemaye nshetaique da ỹalauat Somaye.

² Qalaxaye mashe saqaỹapeque so naponaxac maye ivittre'c soua siete na'axa'te maye laloxoqui' da qanayenaiguilo naua qaỹa'ara'a't npe'lolqa qo'oipaq lcouepi.

³ Qaq ỹoqo'oye soua maiche lqaỹa't 'eetegalo Somaye, 'eetra': –Saishet da qoueta'a ne'ena. No'on da 'anqo'ona ye 'alhua Judea, yaqto' na 'am quetague'pi maye hueta'a yemaye, ishet nataqa'en da ỹauaachigui na lta'araic 'auo'otpi.

⁴ Cha'aye ca shiỹaxaua da nshetaique da qaỹauatton, nache saishet da nqañoxottañi da huo'o ca ỹo'ot. Qaq 'am, no'on da 'auachaxana 'enauac na shiỹaxauapi nam 'auo'otpi.

⁵ Qaq la'aqta'c de'era soomaye, cha'aye nataqa'en saishet da huotaique da ỹa'amaqte'n So Jesús.

⁶ Qalaxaye So Jesús 'enapeco': –Saxanaxa da ivita ye laloqo' da 'enauac da qaỹaỹaten negue't Aỹem. Qalaxaye qami' camachaqca ca na'a'q, nache 'onaxaic qanqa'eñi.

⁷ Nam shiỹaxauapi maye huetalec ana 'alhua, qaica cam ỹoqta 'eesa da qauasoviilec da huo'omshe qami' nquiỹategalo. Aỹem, qalaxaye Aỹem nquiỹa, cha'aye Aỹem ỹataqta sa'aqtaxaatem namayepi naua lataxaco maye sa ỹaỹamaxayiñi.

⁸ Qauesomiỹa, qanqo'oñiiua'a que'eca naponaxac. Aỹem, qalaxaye saishet da ñeqo'ona, cha'aye saxanaxa da ivita ye laloqo' da 'enauac qaỹaỹaten da chaq negue't Aỹem.

⁹ Qaq co'ollaq ime de'era 'enapec So Jesús, nache Somaye no'onaña ye 'alhua Galilea.

So Jesús ỹalectaua'alo soua na'axa'te maye naponaxaqui'

¹⁰ Qalaxaye co'ollaq mashe ỹoxoguelo soua maiche lqaỹa't, nache So Jesús nataqa'en nqo'oneua'a se'eso naponaxac. Qalaxaye Somaye saishet da huo'o ca da'aqtaxanem.

¹¹ Nache na lataxala'pi na judiopi nmittaique Somaye co'ollaq huaigui se'eso naponaxac. Nache denataxaatac, 'eeta': –¿Chaq hueta'ague que'eca ỹale?

¹² Nache qalota na shiỹaxauapi na na'aqtaxaatapigui Somaye. Huo'o na 'eeta': «Se'eso Jesús, Somaye ỹataqta no'on da lataxac.» Qalaxaye huo'o na laỹepi na 'eeta': «Somaye choche ỹatenachettac na shiỹaxauapi.»

¹³ Qalaxaye namayepi saishet da ỹoqta ỹa'axaỹaqchet 'enauac na shiỹaxauapi da 'eetega Somaye, souaxat da ñe'etega na lataxala'pi na judiopi.

¹⁴ Qalaxaye co'ollaq mashe laiñi soua naponaxaqui', nache So Jesús taigui aso no'onaxanaxaqui late'erai, nache dapaxaguenataxan.

¹⁵ Nache na lataxala'pi na judiopi ỹataqta huo'o da la'aalaxa Somaye, nache nnattega't, 'eeta': –¿Chaq hua'ago' ca 'eetec damaye ye ỹataqta qalota na ỹaỹaten, qamaq saishet co'ollaxa da huo'o cam ỹapaxaguen?

¹⁶ Nache So Jesús 'enapeco': –Da ỹapaxaguenataxanaxac, damaye saishet da ỹalamaxat, damaye chegoqo'ot Ñim Aỹem namaq.

¹⁷ Da huo'o ca nshetaique da ỹo'ot cam 'eetapeguec Ñim Lo'onatac 'Enauacna, nache camaye ishet da ỹaỹateeta da naua ỹapaxaguenataxanaxaco chegoqtoto Ñim Lo'onatac 'Enauacna, huo'otaq da choche maiche Aỹem chegoqtoto.

¹⁸ Ca shiỹaxaua da huo'otaq maiche nallegoxottela't ca ltaxaỹaxac, camaye 'eetec de'era, cha'aye nshetaique da na shiỹaxauapi ỹo'oxoren. Qalaxaye Aỹem ñeshetaique da Ñim Lo'onatac 'Enauacna maye Aỹem namaq, nacheñi Ñim talec cam llo'oxoyec maye maiche lalamaxat; qaq ỹoqo'oye Aỹem nache 'eetai' da sa'axattac ca 'eesa.

¹⁹ So Moisés qami' ỹanema co'ollaxa na lqataxacpi, qalaxaye ñaqaiyeta saishet da qaualaqaiguet. ¿Ta'ainco' da huotaique Aỹem qaualauache?

²⁰ Nache so shiỹaxauapi 'enapeco': –'Am ỹataqta huo'o da 'oic, cha'aye ¿negue'to' ca nshetaique da 'am ỹalauat?

²¹ Nache So Jesús 'enapeco': –Aỹem 'oonolec da so'ot sa qaỹauanapega co'ollaq huaigui so na'a'q mataxaqui, nache 'enauac da qoñiita ỹataqta huo'o da qara'aalaqai.

²² Qalaxaye so Moisés qami' ỹamaxaleguete co'ollaxa da qauauo'oi ca na'anaxat na lo'oc ca ỹale. Qaq de'era chegoqtot co'ollaxa som hua'au qarta'ailpi, saishet da ỹoqta chegoqtot so Moisés. Qaq qami' ishet da qauo'oche ca na'anaxat ca nogotolec, na'aictaxa da huetoigui ca na'a'q mataxaqui.

²³ Qaq ỹoqo'oye da qansheetaique da qaupaquiichigui na namaxasoxonaxacpi maye chegoqo'ot so Moisés, nache qami' ishet da qauo'oche ca na'anaxat ca nogotolec, na'aictaxa da huo'otaq huetoigui ca na'a'q mataxaqui, qalaq ¿ta'ainco' qone' ye Aỹem qaualemataỹai souaxat da ñataren so ỹale so na'a'q mataxaqui?

²⁴ Qami' saishet da qoñiitega huo'o ca sa ỹaỹamaxañi da choche qaupicheetega. Iuen da hua'auñi da ỹoqta qauaỹaañita.

So Jesús ỹa'axat cam chegoqchiguiña

²⁵ Nache huo'o na netaña ye Jerusalén na denataxaatac, 'eeta': –¿Saisheto' peta'a da nachera dam da', dam qanmittaique da qaỹauotaique qaỹalauat?

²⁶ Cha'aye damaye ỹataqta nachaxaata da detaqtac, qalaq qaica ca ishet da 'enapega da de'enaxaatai'. ¿Yo'oqta da nataqa'en peta'a na qarta'alpi maye qomi' ilotegueto da ỹa'amaqten damaye, da nachera dam Lca'aguishec Ñim Lo'onatac 'Enauacna?

²⁷ Qalaxaye qomi' saỹaanaqta da chegaqa'ague damaye. Cha'aye qom ivita da nvi' que'eca Lca'aguishec Ñim Lo'onatac 'Enauacna, qalaq qaica ca ishet da ỹaỹaten ca chegaqa'ague.

²⁸ Qaq co'ollaq hua'aqchigui de'era So Jesús maye dapaxaguenataxaatapoigui aso no'onaxanaxaqui late'erai, nache ỹataqta na'axannec da la'aqtac, 'eeta': –Ỹataqta 'eesa da Aỹem sa qauauattoñi, qataq sa qauaỹaañi cam sachegoqta'ague. Aỹem saishet da maiche ñallegoxottela't da ñanac, cha'aye Aỹem lamaxashec Ñim ỹataqta 'eesa, Ñim qami' saishet da qauauattoñi.

²⁹ Aỹem, qalaxaye sauatton, cha'aye sachegoqtot Ñimaye, qataq Ñimaye Aỹem namaq.

³⁰ Huaña, nache qanshetaique da qaỹaconeua'a Somaye da qaicoñe'. Qalaxaye saishet da huo'o ca nañoxot da ỹaconeua'a, cha'aye Somaye saxanaxa da ivita ca laloqo' da qaỹaỹaten da chaq negue't Somaye.

³¹ Qalaxaye ỹataqta qalota na ỹa'amaqten Somaye. Nache namayepi 'eeta': –Ca Lca'aguishec Ñim Lo'onatac 'Enauacna qom nvi', qalaq ivira'a sa ỹañoxot da ỹo'ot na na'anecpi maye ỹo'ot de'era ỹale.

Na fariseopi nama'q soua huataxanaq lashe' da icoñe't So Jesús

³² Na fariseopi co'ollaq hua'aqtapogoigui na shiỹaxauapi da 'eetega So Jesús, nache namayepi qataq nam lataxala'pi na ntaxaỹaxanaxanecpi nama'q soua huataxanaq lashe' maye ilotegueto aso no'onaxanaxaqui late'erai, da yaqto' ỹaconeua'alo Somaye da icoñe't.

³³ Nache So Jesús 'enapeco': –Aỹem ñaq cara'acolec da qami' soota'agueta. Qaq qom ime, nache Aỹem she'eguelaxa Ñim Aỹem namaq.

³⁴ Qaq qami' qome Aỹem qanmichiitaique, qalaq saishet da Aỹem qauanachiỹa, cha'aye saishet da qauañoxoche da qaviyiỹa'a cam soota'a.

³⁵ Nache nam judiopi maiche nnattega't, 'eeta': –¿Chaq hua'ago' ca dataigue damaye da yaqto' saishet da sanataxa? ¿Qalqo' nqo'ona nam judiopi maye netaña na ỹaqa'a 'alhuapi, da yaqto' ỹapaxaguen nataqa'en nam saishet da judiopi?

³⁶ ¿Chaq negue't cam naigui de'era la'aqtac quiye maye 'eeta': «Aỹem qanmichiitaique qome, qalaxaye saishet da Aỹem qauanachiỹa, cha'aye saishet da qauañoxoche da qaviyiỹa'a cam soota'a?»

Ca 'etaxat maye 'ena'am ca la'auaxac

³⁷ Qaq som pa'atec na'a'q soua na'axa'te maye laloxoqui' da qanayenaiguilo naua npe'lolqa, qo'oipaq lcouepi som ỹataqta ỹactec da la'amaqchec. Nache se'eso na'a'q nachaañi So Jesús, nache ỹataqta nlamaxaren da detaqa, 'eeta': –Ca huo'o na laquip, qaq no'on da Aỹem naua'a, yaqto' nỹom.

³⁸ Qaq añi lquiyaqte cam Aỹem ỹa'amaqten, chegoqtoigui ca 'etaxat maye 'eeta'am na la'auaxac da npaxaatasheguem. Cha'aye nache 'ena'ape naua nanettraleguete ana nere maye huetalec na la'aqtacpi Ñim Lo'onatac 'Enauacna.

³⁹ Qaq de'era 'enapec So Jesús, damaye naigui da ca ỹa'amaqten Somaye, nache camaye ỹaconeguet So Saqcha'a La'añaxac Ñim Lo'onatac 'Enauacna. Cha'aye So Saqcha'a Na'añaxac Qui'itta saxanaxa co'ollaxa da anac, cha'aye So Jesús saxanaxa da ivita ca laloqo' da ileu qataq da nca'alec.

Colaxagui da lhuennataxac na shiỹaxauapi

⁴⁰ Nache huo'o na shiỹaxauapi na hua'aqchigui co'ollaxa de'era, nache 'eeta': –De'era shiỹaxaua ỹoqta 'eesa da nachera da la'aqtaxanaxanec Ñim Lo'onatac 'Enauacna, maye qaỹa'axatta'aguet co'ollaxa da naỹa'acna.

⁴¹ Qataq huo'o na laỹepi 'eeta': –Damaye nachera da Lca'aguishec Ñim Lo'onatac 'Enauacna. Qalaxaye huo'o na laỹepi 'eeta': –¿Taloxocheyo' da chegoqchiguiña ye 'alhua Galilea cam Lca'aguishec Ñimaye?

⁴² Ye naua nanettaleguete ana la'aqtac lmalate Ñim Lo'onatac 'Enauacna, naamaye ỹa'axa't da que'eca Lca'aguishec Ñimaye, camaye chegoxoguet na llalaqpi so nta'a David, qataq lañoqo' ye Belén, yem nỹecpi maye lma' co'ollaxa so David.

⁴³ Nache na shiỹaxauapi colaxagui da lhuennataxac, souaxat da saishet da qaỹauatton So Jesús.

⁴⁴ Qataq huo'o na huotaique da ỹaconeua'a Somaye da icoñi', qalaxaye saishet da huo'o ca nañoxot da ỹaconeua'a.

Na lataxala'pi na judiopi saishet da ỹa'amaqten So Jesús

⁴⁵ Nache soua huataxanaq lashe' maye nauaataleguete aso no'onaxanaxaqui late'erai ñe'eguelaxalo ye hueta'a so fariseopi qataq som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Nache se'eso nta'alpi denataxaatac, 'eeta': –¿Ta'ainco' ye sa qanaviquiiuo Camaye?

⁴⁶ Nache soua huataxanaq lashe' 'ena'apo': –¡Ỹataqta sa ỹauano' da huo'o ca 'eeta'am da ltaxaỹaxac de'era ỹale!

⁴⁷ Nache so fariseopi 'enapeco': –¿Qache nataqa'eno' da qoñiita qanashiñiita da choche qami' ỹatenache't?

⁴⁸ ¿Peta'a huo'o ca 'oonolec na qarataxala'pi, huo'otaq nam fariseopi, da huo'otaq ỹa'amaqten Somaye?

⁴⁹ Qalaxaye na ỹa'amaqten Somaye, namayepi sa ỹaỹaten na namaxasoxonaxacpi maye chegoqo'ot so Moisés, qaq ỹoqo'oye Ñim Lo'onatac 'Enauacna ỹauo'o ca nhuaxanaguec namayepi.

⁵⁰ Qaq, nache hueta'a yemaye so fariseo le'enaxat Nicodemo. Somaye huo'o so pe co'ollaxa da nqo'ona So Jesús, nache 'enapeco':

⁵¹ –Nam namaxasoxonaxaco maye qomi' qoỹanema co'ollaxa, naamaye ỹa'axa't da qomi' saishet da so'otaq ca nhuaxanaguec ca shiỹaxaua, da huo'otaq saxanaxa da ña'axaỹaxanaxa.

⁵² Nache qoỹenapego' somaye, qoỹeeta': –¿'Am peta'a nataqa'en 'am Galilea le'ec? Ña 'anapaxaguenalo naua nanettraleguete ana la'aqtac lmalate Ñim Lo'onatac 'Enauacna, yaqto' ishet da 'auaỹaten da qaica ca la'aqtaxanaxanec Ñimaye da huo'otaq chegoqchiguiña co'ollaxa ye 'alhua Galilea.

Aso 'alo maye quisheguetaxai

⁵³ [Nache ñi 'oonolec somayepi taua'alo naua lma'ate,