Juan 20 - La'aqtaqa Ñim Lo'onatac 'Enauacna 2013

Da 'eetec co'ollaq qaltaq nca'alec So Jesús

¹ Qaq som la'auaxanec na'a'q naua na'axa'te, nache aso María maye lma' ye Magdala, asomaye tauga aso huachiqui co'ollaq nte'etom, co'ollaq ñaq napaltañi, qaq co'ollaq mashe saqaỹapeque aso huachiqui, nache asomaye ila'a da so coma' maye lapoxot asomaye da mashe qanqat.

² Nache asomaye jec, nqalgoqtaua'a ca hueta'a so Simón Pedro qataq so lỹa napaxaguenatac som ỹataqta nauochaxaua So Jesús. Nache 'enapegalo', 'eeta': –So Qarataxala' qanqateeguesop co'ollaxa añi nhuachiqui, qaq qomi' saishet da saỹaanaq ca qaỹacha'ague camaye.

³ Nache so Pedro qataq so lỹa napaxaguenatac, soomaye je'c da nqo'ooreuga aso huachiqui.

⁴ Qaq soomaye nqalgoqte', nnaictega't, qalaxaye so 'oonolec sa ilaua'ague ana naloxo, napacalec so Pedro. Nache somaye hua'auñi da ivireuga aso huachiqui.

⁵ Nache somaye ỹamataigui asomaye da imeten. Nache ila'a so laxataxat da huetaiya', qalaxaye saishet da ỹoqta taigui.

⁶ Qaq co'ollaq mashe nvi' so Pedro, nache somaye ỹataqta taigui aso huachiqui. Nache somaye nataqa'en ila'a se'eso lpataxaqui Somaye da huetaiya'.

⁷ Qataq nataqa'en ila'a som hualoq laỹe maye qoỹaxattagui na lqaic So Jesús co'ollaxa. Qaq somaye saishet da huaqta'ai' se'eso lpataxaqui, cha'aye somaye qainaata'a't, qataq ỹaqa'a ye huetaña.

⁸ Nache se'eso lỹa napaxaguenatac maye hua'auchiguiñi co'ollaxa da ivita aso huachiqui, somaye nataqa'en taigui, nache ỹauaachigui 'enauac de'era, nache ỹataqta ỹa'amaqten.

⁹ Cha'aye soomaye saxanaxa da ỹaỹate'n ca llec naua nanettrañi la'aqtaqa Ñim Lo'onatac 'Enauacna, da So Jesús iuen da qaltaq nca'aleeguesop qanqa'en na leuaxaicpi.

¹⁰ Nache so Pedro qataq se'eso lỹa napaxaguenatac, soomaye ỹe'eguelaxareua'a ca lma't.

So Jesús nachaxana aso María maye lma' ye Magdala

¹¹ Qalaxaye aso María no'onañi, pa'ataueegue da laỹe aso huachiqui. Qaq co'ollaq ña nỹeetac, nache nqollemñi da ỹamataigui aso huachiqui.

¹² Nache ila'alo soua dos namaxa'she piguem lashe' lapagaxaiqa naua alogo, nso'ootraña som qaỹachaña co'ollaxa So Jesús. So 'oonolec soomaye nso'ootaña so na'axanaqa', qaq so lỹa neta'ague da nchennaqa'.

¹³ Nache se'esoua namaxa'she inatta'apo' asomaye, 'eeta': –'Am 'alo, ¿ta'ainco' ye 'anỹeetac? Nache asomaye 'enapeco': –Qomye souaxat da qaỹache so Ỹataxala', qaq aỹem sa saỹaten ca qaỹacha'ague ca lo'ocỹaxac.

¹⁴ Qaq co'ollaq choche 'enapec de'era, nache qaltaq namatasheguem. Nache ila'a So Jesús da nachattauo, qalaxaye saishet da ỹaỹaten da nacheso So Jesús.

¹⁵ Nache So Jesús inattac asomaye, 'eeta': –'Am 'alo, ¿ta'ainco' ye 'anỹeetac? Qataq ¿negue't ca 'anmittaique? Nache asomaye ipi'itaxaatega da somaye nacheso som ilotague' se'eso nañiguishe lma'. Nache 'eetego', 'eeta': –'Am ỹale, da huo'otaq nache 'am maye 'auache ca Ỹataxala', qaq no'on da aỹem 'aua'axatem cam 'auacha'ague yaqto' aỹem she'eguena'a camaye.

¹⁶ Nache So Jesús 'enapego' asomaye, 'eeta': –¡María! Nache asomaye ỹamato'ot, nache huota'ai naua la'aqtaqa na hebreo da 'enapega, 'eeta': –¡Raboni! (Damaye naigui da 'eeta': 'Am Napaxaguenataxanaq).

¹⁷ Nache So Jesús 'enapego' asomaye, 'eeta': –Aỹem 'axanec, cha'aye Aỹem saxanaxa da saigue da neta'ague Ñim Ita'a. Qalaxaye 'am qome qojec, nache 'aua'aqtaxanema caua ỹapaxaguenataqa da Aỹem saigue da neta'ague Ñimaye, Ñim nataqa'en Qarta'ai. Ñimaye Ỹataxala', qataq nataqa'en Qarataxala'ai.

¹⁸ Nache aso María maye lma' ye Magdala, asomaye jec da da'aqtaxanema soua napaxaguenataqa da asomaye nauane' som Qarataxala', qataq da Somaye da'aqtaxaatapeguem asomaye de'era.

So Jesús nachaxanalo soua lapaxaguenataqa

¹⁹ Qaq se'eso na'a'q maye la'auaxanec naua na'axa'te co'ollaq mashe pe, nache soua napaxaguenataqa, soomaye lapoota'a't hueta'a ca nỹec. Qaq so lasom se'eso nỹec ỹataqta napochigui, souaxat da qañe'etega na lataxala'pi na judiopi. Nache So Jesús pa'auo, nache vichiguinguilo na laiñi soua lapaxaguenataqa. Nache iqui'n, 'eeta': –Ñim Lo'onatac 'Enauacna qami' ỹanema da lqouagaxanaqtaic qataq da nlagaxayec.

²⁰ Qaq co'ollaq ime da 'enapec de'era Somaye, nache ỹachaxa'n naua lhua'q qataq na laỹe. Nache soomaye ỹataqta huo'o da ntonaxa'c da iloro'ot So Qarataxala'.

²¹ Ime, nache So Jesús qaltaq ỹe'eguelaxalec da 'enapegalo soomaye, 'eeta': –Qami' huo'o da qarlagaxayiqui. Qaq de'era 'eetec co'ollaxa da Aỹem namaq Ñim Ita'a, qaq nachera qome da sheetec da qami' sama'q.

²² Nache Somaye iquetetoiguilo soomaye so la'at, nache 'enapegalo, 'eeta': –Qauacoñiiguet qome na Saqcha'a Na'añaxac Qui'itta.

²³ Qaq cam qami' qauapalaxache na lasouaxashetpi, nache Ñim Lo'onatac 'Enauacna ỹapalaxat na lasouaxashetpi. Qaq cam saishet da qauapalaxache na lasouaxashetpi, nache Ñimaye saishet da ỹapalaxat na lasouaxashetpi.

So Tomás nauane' So Jesús

²⁴ Qalaxaye so Tomás, som 'oonolec soua doce napaxaguenataqa maye qaỹamata'ac da huaya', somaye saishet co'ollaxa da ỹalectaiguilo soua lỹa't co'ollaq nauaneto So Jesús.

²⁵ Qaq ỹoqo'oye co'ollaq nvireuo so Tomás, nache soua lỹa't napaxaguenataqa da'aqtaxaatapeguema somaye, 'eetra': –Qomi' ñauanaxai' So Qarataxala'. Qalaxaye so Tomás 'enapegalo' soomaye, 'eeta': –Saishet da sa'amaqten de'era aỹem qaua'aqtaxañiiteguem da huo'otaq saxanaxa da sela'alo caua lliguiyiñi ana clavo naua lhua'q camaye, qataq da ỹataqta sa'aroigui ana ỹaxaata, qataq da sepoteua'a ca lque'emaxa na laỹe.

²⁶ Qaq co'ollaq mashe ivi' naua ocho na'axa'te, nache soua napaxaguenataqa qaltaq lapoota'a't da huetra'a so nỹec, nache ỹalectauo so Tomás da hueta'agueta soomaye. Qaq na'aictaxa da ỹataqta ỹapochigui so lasom, qalaq So Jesús pa'auo, nache vichiguinguilo soomaye. Nache iqui'n, 'eeta': –Ñim Lo'onatac 'Enauacna qami' ỹanema da lqouagaxanaqtaic qataq da qarlagaxayiqui.

²⁷ Ime, nache 'enapego' so Tomás, 'eeta': –Ñaq 'aumete'n naua ihua'q qataq na ỹaỹe. Qataq 'aua'aroiguilo naua 'aya'axaatal na ique'emaxa. Saishet qome da 'am qolectaxanaxaic, nachaqrata da 'aua'amqaanataxan.

²⁸ Nache so Tomás 'enapeco': –¡'Am Ỹataxala' qataq 'am Ita'a maye 'Aro'onatac 'Enauacna!

²⁹ Nache So Jesús 'enapego' somaye, 'eeta': –'Am Tomás, nagui 'aua'amqaanataxan, cha'aye Aỹem 'anauane'. Qalaxaye ỹataqta machiguiñi qome ca na'aictaxa da saishet da Aỹem ilogui, qalaxaye da'amqaanataxan.

Dam 'eetec da huo'omshe qoỹiyiñi ana'ana nere

³⁰ So Jesús nataqa'en qalota na ỹo'ot na'anecpi maye sa qaỹauanapega da ỹauaachiguilo naqa'e'n soua lapaxaguenataqa da saishet da qoỹettalec ana'ana nere.

³¹ Qalaxaye de'era qoỹiyiñi, damaye qoỹiyiñi, yaqto' qami' ishet da qaua'amaqchiñi da So Jesús, nacheso Som Lca'aguishec Ñim Lo'onatac 'Enauacna maye maiche Llalec, qataq yaqto' qami' ishet da huo'o da qarca'alaqai chochaq tatec da qaua'amaqchiñi Somaye.