Juan 2 - La'aqtaqa Ñim Lo'onatac 'Enauacna 2013

So naronaxac maye huaña ye Caná maye huaigui ye 'alhua Galilea

¹ Qaq co'ollaq mashe inoxoore'c soua tres na'axa'te, nache huo'o so naronaxac huaña ye Caná huaigui ye 'alhua le'enaxat Galilea. Qaq aso late'e So Jesús nache hueta'a yemaye.

² Nache So Jesús qataq soua lapaxaguenataqa, soomaye nataqa'e'n qaicoyegue'n da yaqto' ỹalectraua'a se'eso naronaxac.

³ Qaq co'ollaq imeuo so lataxa, nache aso late'e So Jesús 'enapega Somaye, 'eeta': –Mashe imeuo so lataxa.

⁴ Nache So Jesús 'enapega asomaye, 'eeta': –'Am ỹate'e, ¿ta'ainco' ye qonetec de'era da Aỹem qonapega? Ye Aỹem saxanaxa da ivita ye laloqo' da ñachaxan.

⁵ Qalaxaye asomaye 'enapega som huetapecpi, 'eeta': –Qauo'oche qome 'enauac cam 'enapec Damaye.

⁶ Qaq huo'oi soua seis naco'oña coma' maye laỹe' naxa na 'etaxat maye lỹoxonaxat na judiopi da ỹo'ot da maiche lataxac naxa da nỹoxoc. Qaq añi 'oonole se'esoua naco'oña, huo'o ana ivi' ochenta litro na le'ec 'etaxat, qataq huo'o ana ivi' cien.

⁷ Nache So Jesús 'enapego' som huetacpi, 'eeta': –Qauỹoqoiguilo na 'etaxat ñi'iñiua naco'oña. Nache soomaye iỹoxoguilo, ỹataqta nlaxatchiguilo.

⁸ Nache So Jesús qataq 'enapegalo soomaye, 'eeta': –Nagui, nache huo'o ca qanqacheesheguem na 'etaxat. Ime, nache qaroiua'a ñim ilotague' ne'ena naronaxac, yaqto' ỹe'eguen. Nache soomaye ỹo'o't da 'enapec So Jesús.

⁹ Nache se'eso ilotague' so naronaxac co'ollaq ỹe'eguen se'eso 'etaxat maye nañigui na lataxa, nache ỹataqta ỹe'elaq, cha'aye sa ỹaỹaten ca chegaqa'ague so lataxa. Qalaxaye som huetacpi somayepi ỹaỹaten. Nache se'eso ilotague' so naronaxac sa ỹaỹaloxon da iỹaxana som cheta'ague da huaron.

¹⁰ Nache 'enapega, 'eeta': –'Enauac na shiỹaxauapi ỹa'auaxaachiguiñi naxa da nỹomaxangui na no'on lataxa na namaxasoxoic, qaq da mashe qaỹoqtegue da nỹomaxac, nache qaltaq qanỹomaxangui na lataxa maye saqallegueme da no'on. Qalaxaye 'am 'aupa'axaatec da 'aumenec na no'on lataxa.

¹¹ Qaq de'era ỹo'ot So Jesús co'ollaq huaña ye nỹecpi ye Caná maye huaigui ye 'alhua Galilea. Damaye, nachera da hua'auchiguiñi nam ỹo'otpi na'anec maye sa qaỹauanapega co'ollaq ỹachaxan da llo'oxoyec. Nache soua lapaxaguenataqa ỹataqta ỹa'amaqte'n Somaye.

¹² Qaq co'ollaq ime de'era, nache So Jesús taỹa ye nỹecpi ye Cafarnaúm, lỹatac aso late'e, nataqa'en soua lqaỹa't qataq soua lapaxaguenataqa. Nache ỹataqta huo'oi soua na'axa'te da hueta'a yemaye.

So Jesús do'otaxaalec aso no'onaxanaxaqui late'erai

¹³ Qaq co'ollaq mashe saqaỹapeque so laponaxac na judiopi maye le'enaxat da Lapascua, nache So Jesús nqo'oneua'a ye Jerusalén.

¹⁴ Qaq co'ollaq ivireua'a ye nqasoxoc aso no'onaxanaxaqui late'erai, nache ilalec na imeetac na huacapi qataq ana qaguetapi qataq na qoto'pi. Nataqa'en ilalec na shiỹaxauapi nso'ootañipi, datatalec na nmenaxala'pi, nmenaxanaxaatega't ana alom na shiỹaxauapi.

¹⁵ Qaq co'ollaq ilalec ne'enapi, nache So Jesús ỹacona so nañec da ỹauo'o lalashenaxanaxat. Nache ỹo'orauec 'enauac na nmenaxaicpi, lỹaueegue' naqa'en ana lmena qaguetapi, qataq na huacapi. Qataq icorec ana alom na nmenaxanaxaatega't ana alom na shiỹaxauapi, qataq ỹamaxañi na nmenaxala'pi.

¹⁶ Nache 'enapega na imeetac na qoto'pi, 'eeta': –¡Qanqacheeuec 'enauac ne'enapi! ¡Saishet da qauo'ochec na lma' Ñim Ita'a da menaqa'!

¹⁷ Nache soua lapaxaguenataqa iuennate naua nanettraleguete ana nere maye huetalec na la'aqtacpi Ñim Lo'onatac 'Enauacna, maye 'eeta': «Da ỹauoche ñi 'arma', ỹataqta 'eco' 'eroigui naqa'en da sheeta.»

¹⁸ Nache so lataxala'pi na judiopi inattac Somaye, 'eeta': –¿Negue't ca na'anec qomi' 'auachaxanalo, da yaqto' ishet da 'am sa'amaqtenaq da ỹoqta 'eesa da huo'o ca qonec da 'auo'ot de'era?

¹⁹ Nache So Jesús 'enapeco': –Qomye qanlaxachiiñi ana no'onaxanaxaqui late'erai, nache Aỹem qaltaq ño'oxoosheguem qome; tres na'axa'te, nache qaltaq semat.

²⁰ Nache som lataxala'pi na judiopi 'enapeco': –Ivi', naua cuarenta y seis vi'iye da qano'oxootapiguisheguem ana'ana no'onaxanaxaqui, nache qaimat. ¿Qalaq 'am qonapec ye tres na'axa'te, nache 'aumat da 'ano'oxoosheguem?

²¹ Qalaxaye aso no'onaxanaxaqui maye detaqtega So Jesús, nachera da maiche lalamaxat lo'ocỹaxac.

²² Qaq ỹoqo'oye So Jesús co'ollaq mashe qaltaq nca'alec, nache soua lapaxaguenataqa tachigui lauel de'era la'aqtac Somaye. Huaña, nache ỹataqta ỹa'amaqte'n naua nanettralec ana nere maye huetalec na la'aqtacpi Ñim Lo'onatac 'Enauacna, qataq naua la'aqtaqa So Jesús.

So Jesús ỹauatto'n naua lhuennataxaco na shiỹaxauapi

²³ So Jesús co'ollaq ñaq hueta'a ye Jerusalén da ỹalectaua'alo soua na'axa'te maye laloxoqui' da qaiuennate so na'a'q maye le'enaxat da Lapascua, nache ỹataqta qalota na ỹa'amaqten Somaye, souaxat da ỹauaachigui na ỹo'otpi na'anecpi maye sa qaỹauanapega.

²⁴ Qalaxaye So Jesús saishet da ỹoqta ỹa'amaqten somayepi, cha'aye ỹaỹaten na lhuennataxac 'enauac somayepi.

²⁵ Qaq saishet da iuen da huo'otaq huo'o ca da'aqtaxanem Somaye da lataxac so shiỹaxauapi, cha'aye Somaye maiche ỹaỹateetac da lquiyaqteỹaxac so shiỹaxauapi.