Juan 18 - La'aqtaqa Ñim Lo'onatac 'Enauacna 2013

So Jesús qaỹaconeua'a da qaicoñe'

¹ Qaq co'ollaq ime da natamnaxac So Jesús, nache jec, nnaicapegueto soua lapaxaguenataqa da nqo'ootra so nañiguishe lma' maye na'atague da le'ego so la'auaxac le'enaxat Cedrón.

^2-5 Qaq so Judas Iscariote maye ỹauotaique da ỹaneuo So Jesús. Somaye nataqa'en ỹauana se'eso nanataqa' maye hueta'a So Jesús qataq soua lapaxaguenataqa. Cha'aye mashe qalota naxa da So Jesús hueta'a yemaye. Qaq ivireua'a yemaye co'ollaxa so Judas nnaictague' so huataxanaqpi Roma le'ecpi. Nataqa'en huo'oi soua nnaictagueto huataxanaq lashe' maye ilotegueto aso no'onaxanaxaqui late'erai maye lamaxa'she soua lataxala'ate na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq som fariseopi. Qaq somayepi ỹataqta na'atchiguiñi na lo'ogoxonaxatpi qataq ỹachetac ana lcoỹaraxanaqtepi. –Qaq So Jesús mashe ỹaỹateeta'a de'era, ỹoqo'oye co'ollaq ila'aguet somayepi, nache ca'ata'aguet da inat 'eeta': –¿Negue't ca qanmichiitaique? –Nache somayepi 'enapeco': –Ñimitaqtaique ca Jesús maye Nazaret le'ec. Nache So Jesús 'enapeco': –«Nachaỹem.»

⁶ Nache huañi so huataxanaqpi qataq soua lỹa't huataxanaq lashe' maye ilotegueto aso no'onaxanaxaqui late'erai.

⁷ Nache So Jesús qaltaq ỹe'eguelaxalec da denataxan, 'eeta': –¿Negue't ca qanmichiitaique? Nache somayepi 'enapeco': –Qomye ñimitaqtaique ca Jesús maye Nazaret le'ec.

⁸ Nache So Jesús 'enapeco': –Mashe qami' sheetegalo mque' da Nachaỹem. Da ỹoqta 'eesa da Aỹem qanmichiitaique, qaq no'on da qauaqaita'a ne'ena ỹaỹepi da jec.

⁹ Qaq de'era 'enapec, damaye ipacchigui dam maiche la'aqtac So Jesús co'ollaq 'eeta': «Nam Aỹem ỹanempi Ñim Ita'a, namayepi qaica ca deqat.»

¹⁰ Nache so Simón Pedro, maye huo'o so lainec, somaye nqatsheguem, nache iquesoxouec ana aloiguishe ltela som 'oonolec maye le'enaxat Malco. Somaye nache lamaxashec som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna.

¹¹ Qalaxaye So Jesús 'enapego' so Pedro, 'eeta': –'Avi'eguelaxaañi na 'ainec, 'anshiiñi. Ñim Ita'a da Aỹem ipagaqaana'aguet da ñeque'eenaxac maye 'eeta'am da qanỹomigui ca deshenataxan, qaq ¿peta'a saisheto' da saigui damaxa?

So Jesús qaỹataxanot so lataxala' na ntaxaỹaxanaxanecpi

¹² Nache som alleppi maye Roma le'ecpi qataq som lta'a, qataq som huataxanaqpi maye nauaatalec naxa aso no'onaxanaxaqui late'erai, somayepi ỹaconeua'a So Jesús, nache icoñera't naua lhua'q.

¹³ Ime, nache hua'auchiguiñi da qaỹauegueua'a so lma' so Anás maye lacho' so Caifás, som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna se'eso vi'i.

¹⁴ Qaq se'eso Caifás nacheso' co'ollaxa so 'eetega na lataxala'pi na judiopi da ỹaỹamaqchiguiñi da 'oonolec ca ileualec na lauo' le'ecpi, qaq sa 'ena'am da 'enauac qailaxachigui na nhuo' le'ecpi.

So Pedro nqoleguettac, 'eetega da sa ỹauatton So Jesús

¹⁵ So Simón Pedro qataq so lỹa napaxaguenatac, soomaye ca'attraueegue So Jesús. Qaq se'eso lỹa napaxaguenatac, somaye nauattonaxaua som lataxala' na ntaxaỹaxanaxanecpi. Qaq ỹoqo'oye somaye nache lỹateuo So Jesús da pa'aua'a so nqasoxoc se'eso nataxala'.

¹⁶ Qaq som Pedro, qalaq pa'ataueegue da laỹe so lasom. Qaq ỹoqo'oye ishet da pa'auec se'eso napaxaguenatac maye maiche nauattonaxaua som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Nache somaye detaxaỹapegue' asom ilotague' so lasom, nache ipa'axaneuo so Pedro.

¹⁷ Nache asa'aso lasom lo'o inattaco' so Pedro, 'eeta': –¿Saishet peta'a da nache 'am 'oonolec nam lapaxaguenatacpi de'era ỹale? Nache so Pedro 'enapeco': –'A'i, saishet da nachaỹem.

¹⁸ Qaq cha'aye ỹataqta atom, nache som namaxashecpi qataq som huataxanaqpi maye nauaatalec aso no'onaxanaxaqui late'erai ỹo'ot so l-le', nache nachattañipi da ntootac. Qaq so Pedro nataqa'en ỹalectaigui somayepi, ntootac se'eso norec.

So lataxala' na ntaxaỹaxanaxanecpi inattac So Jesús

¹⁹ Nache som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, somaye ichemaxattega So Jesús, denataxaatapegueque soua lapaxaguenataqa, qataq chaq 'eetec ca lapaxaguenataxanaxac Somaye.

²⁰ Nache So Jesús 'enapeco': –Aỹem ỹataqta ñachaxaata naxa 'enauac nam shiỹaxauapi da setaqtac, qataq saq ỹet da huaigui ana napaxaguenaxaquipi na judiopi da sapaxaguenataxaatac qataq añim no'onaxanaxaqui late'erai maye huaña naxa da lapona't 'enauac na judiopi. Qaq Aỹem saishet da huo'o ca ỹa'aqtac soxottañi.

²¹ Qaq ¿ta'ainco' da Aỹem 'aunattac? No'onctaxa da 'aunat nam shiỹaxauapi maye Aỹem na'axaỹaxaatega, yaqto' namayepi ishet da ỹa'axat cam ỹa'aqtaxanaxac maye sami' namayepi. Cha'aye namayepi ỹaỹateeta dam ỹa'aqtaxanaxac.

²² Nache So Jesús co'ollaq 'enapec de'era, nache som 'oonolec som huataxanaqpi maye ilotague' aso no'onaxanaxaqui late'erai maye ỹalectauo, somaye iuaxanoigui na lashec So Jesús. Nache 'eetega, 'eeta': –¿Nache qoneteco' de'era da 'aua'aqtaxanem ñim lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna?

²³ Nache So Jesús 'enapeco': –Da huo'otaq sa ỹaỹamaxañi ca ỹa'aqtac, qaq no'on da 'aua'axat chaq hua'ague ca 'eetec ca sa ỹaỹamaxañi. Qalaxaye da huo'otaq ỹaỹamaqchiguiñi dam shenapec, qaq ¿ta'ainco' da Aỹem 'auaxan?

²⁴ Nache so Anás ỹamaq So Jesús ỹaxatta'a't naqa'en naua lhua'q da ỹamaxa so Caifás som 'oonolec lataxala' nam ntaxaỹaxanaxanecpi.

So Pedro qaltaq ỹe'eguelaxalec da 'eetega sa ỹauatton So Jesús

²⁵ Qaq so Pedro ñaq queto'ot da nachattañi, ntootapigui so norec. Nache qaltaq huo'o so inattac somaye, 'eeta': –¿Saishet peta'a da nache 'am 'oonolec nam lapaxaguenatacpi de'era ỹale? Nache so Pedro qataq nqoleguettac, 'eeta': –'A'i, saishet da nachaỹem.

²⁶ Nache qaltaq denataxan som 'oonolec nam lamaxashecpi som lataxala' na ntaxaỹaxanaxanecpi, maye maiche lauo' le'ec so ỹale maye iquesoxouec co'ollaxa ana ltela so Pedro, 'eeta': –¿Saisheto' da nache 'am selota'a can huaña ye nañiguishe lma' da qoueta'aguet damaye?

²⁷ Nache so Pedro qaltaq nqoleguettac. Huaña, nache nỹen so 'olgaxa.

So Jesús qaỹataxanot so nta'a Pilato

²⁸ Nache qaỹauec So Jesús, qaỹachegoxotchiguiña so lma' so Caifás da qaỹauega so lma' so nta'a Pilato. Qaq mashe yaqta'a co'ollaxa da yo'oxoñi, qaq nam judiopi saishet co'ollaxa da pa'aua'a so nqasoxoc so nta'a, cha'aye ivittaique da nshepaxan da nachaalataxac. Cha'aye da nache 'eetec de'era, nache saishet da dequi'iỹapegueua'a na nallec se'eso na'a'q maye le'enaxat Lapascua.

²⁹ Qaq ỹoqo'oye so nta'a Pilato npa'auec co'ollaxa, nache inattac somayepi, 'eeta': –¿Negue't cam qauasaqaitapeguelec da lasouaxashet de'era ỹale?

³⁰ Nache somayepi 'enapeco': –Damaye da saishettaxa da qauemaic, nache saishet da 'am ñauegaxaua'a.

³¹ Nache so Pilato 'enapego' somayepi, 'eeta': –Damaye qauaviqui, nache qauroilec nam namaxasoxonaxacpi maye qami' qoỹanema co'ollaxa da maiche qanmichi. Nache somayepi 'enapeco': –Qalaxaye qomi' judío lashe' saishet da huo'o ca qana'aqtac, da yaqto' huo'o ca salauataq.

³² Huaña, nache ỹataqta ipacchigui da 'enapec So Jesús co'ollaq ỹa'axata'a da 'eetec qome da nalaataguec.

³³ Nache so Pilato qaltaq ỹe'eguelaxaigui aso lo'onataxanaxaqui, nache iỹaxaneuga So Jesús, nache inattac, 'eeta': –¿Peta'a nache 'am Lta'a na judiopi?

³⁴ Nache So Jesús 'enapeco': –¿'Am peta'a maiche 'andotelec de'era 'annataxanaxac, qalqo' huo'o ca 'am ỹa'axatem da sheeta?

³⁵ Nache so Pilato 'enapeco': –¿Peta'a aỹemo' judío le'ec? Ye nam maiche 'arhuo' le'ecpi qataq nam lataxala'pi na ntaxaỹaxanaxanecpi, nachena na 'am nauegueua'a aỹem. Qaq ¿chaq negue'to' cam 'auo'ot sa ỹaỹamaxañi?

³⁶ Nache So Jesús 'enapeco': –Da ỹo'onataxanaxac da Aỹem nta'a, damaye saishet da lma' ana 'alhua. Cha'aye da nache 'eetec taxa de'era, nache nam ca'attague'pi Aỹem sogotectaxa da deloqui, da yaqto' saishet da Aỹem qoỹaneua'a na judiopi. Qalaxaye da ỹo'onataxanaxac da Aỹem nta'a, damaye saishet da lma' ana 'alhua.

³⁷ Nache so Pilato 'enapego' Somaye, 'eeta': –¿Qache ỹoqta 'eesa da 'am nta'a? Nache So Jesús 'enapeco': –Aja', Aỹem nta'a, nachera dam qonapec. Aỹem sañiguiñi da ñanaỹa ana 'alhua, da yaqto' sa'axat cam 'eesa. Qaq 'enauac nam ỹalaxalec dam 'eesa, namayepi na'axaỹaxana dam ỹa'aqtaxanaxac.

³⁸ Nache so Pilato 'enapego' Somaye, 'eeta': –¿Chaq negue't cam 'eesa lataxac? Qaq co'ollaq imat da lnataxanaxac so Pilato, nache qaltaq pa'auec da da'aqtaxanem so judiopi, 'eeta': –Aỹem saishet da huo'o ca sanata lasouaxashet de'era ỹale.

So Jesús qoỹaneguet da nalaataguec

³⁹ Qalaxaye qami' huo'o naxa da maiche qarataxaqui da qansheetaique da sesouec ca ncoñeteguishec, souaxat da qoñiita da iviteuga ye na'a'q maye le'enaxat Lapascua. Qaq ¿qansheetaique peta'a da aỹem sesouec Ñim Lta'a na judiopi?

⁴⁰ Nache 'enauac somayepi qaltaq ỹe'eguelaxalec da ỹa'alqagui, 'eeta': –¡'A'i, saishet da nachera de'era ỹale! ¡Nachaqcata ca Barrabás 'ausouec! Qaq se'eso Barrabás ỹataqta cachaxaic co'ollaxa.