Juan 11 - La'aqtaqa Ñim Lo'onatac 'Enauacna 2013

Da l-leuaxa so Lázaro

¹ Qaq huo'o so shiỹaxaua le'enaxat Lázaro, somaye sa no'on. Qaq somaye naigui so lma' ye nỹecpi le'enaxat Betania, yem nataqa'en lma' aso María qataq aso lqaỹa Marta.

² Qaq asa'aso María, maye lqaỹa so Lázaro som sa no'on, nachaso asom icoreleguete co'ollaxa naua lapia'ate So Jesús, so ỹataqta no'on coraxat, qataq deqaxaỹaqtaxana na laue.

³ Nache se'esoua dos nqaỹa't, ỹamaxalo co'ollaxa da la'aqta'c So Jesús, 'eeta': –'Am Nataxala', yem 'anauochaxaua Lázaro, yemaye sa no'on.

⁴ Nache So Jesús co'ollaq hua'axaỹa de'era, nache 'eeta': –De'era lalolaxa, damaye saishet da taỹa'a ca l-leuaxa. Chaqrata da yaqto' damaye ishet da chegoqchigui da ỹachaxan da la'añaxac Ñim Lo'onatac 'Enauacna, qataq da na'añaxac maye Aỹem hueto'ot, Aỹem maye Aỹem Llalec Ñim Lo'onatac 'Enauacna.

⁵ Qaq So Jesús ỹataqta nauochaxaua aso Marta, qataq aso lqaỹa, qataq so Lázaro.

⁶ Qalaxaye co'ollaq qaỹa'aqtaxanem da so Lázaro sa no'on, nache Somaye queuoiguilo soua dos na'axa'te da ñaq hueta'a cam netaña.

⁷ Qaq co'ollaq ime, nache 'enapegalo soua lapaxaguenataqa, 'eeta': –'Onaxaic da she'eguelaxasoxogue da 'alhua Judea.

⁸ Nache soua lapaxaguenataqa, 'eetegalo Somaye, 'eeta': –'Am Napaxaguenataxanaq, ñaq cheta'ague da huo'o nam judiopi maye lma' yi'iye 'alhua, nshetaique da 'am ỹalauat, da 'am ira'a na coma' qalaq ¿ta'ainco' ye qaltaq 'anshetaique da 'aỹa yemaye?

⁹ Nache So Jesús 'enapeco': –¿Saisheto' da ye 'oonolec na'a'q, ivi' naua doce hora? Ye ñi 'oonolec shiỹaxaua da huo'otaq queuotapigui' ye na'a'q, qalaq saishet da huo'o ca ỹe'egueneguet, cha'aye na le'eraxa añi nala' yo'oqtegue naqa'en ca llec camaye.

¹⁰ Qalaxaye ca queuotapigui' ye pe, nache camaye ishet da huo'o ca ỹe'egueneguet, cha'aye qaica na yo'oqchiguiñi.

¹¹ Qaq co'ollaq ime, nache So Jesús qaltaq 'enapeco': –Ye qanauochaxaua Lázaro, yemaye do'ocheta, qalaxaye Aỹem ñeqo'ona da ñequetoxon.

¹² Nache soua lapaxaguenataqa 'ena'apo': –'Am Nataxala', da choche do'ocheta camaye, nache ỹoqta qome da ỹaỹamaxañi.

¹³ Qalaxaye So Jesús detaqtega da l-leuaxa so Lázaro, qalaxaye soua lapaxaguenataqa ipi'itaxaatrega da yo'oqchigui no'ochaxa.

¹⁴ Ỹoqo'oye So Jesús, ỹoqta da'aqtaxaatema soomaye, 'eeta': –Ye Lázaro, yemaye ỹoqta ileu.

¹⁵ Qaq Aỹem ỹataqta huo'o da ña'achec da saishet da soota'a yemaye. Qaq damaye ỹaỹamaqchiguiñi souaxat da qoñiita, yaqto' ishet da huo'o da qardaqa'ai da Aỹem qaua'amaqchiñi. Qalaxaye ¡qolaq ñeqo'onaxa ca hueta'a camaye!

¹⁶ Nache som Tomás maye qaỹamata'ac da huaya', 'enapegalo' soua lỹa't maye napaxaguenaxau', 'eeta': –Qolaq nataqa'en qomi', yaqto' nataqa'en qarleuaxaua damaye.

So Jesús nacheso so nca'alaxa

¹⁷ Qaq co'ollaq ivi' So Jesús, nache natenalec da so Lázaro mashe ivi' naua cuatro na'axa'te da qailareñi.

¹⁸ Qaq yem nỹecpi ye Betania, yemaye saqaỹapeque ye Jerusalén, ivi' tres kilómetros ye lshecta.

¹⁹ Qaq ỹoqo'oye qalota na shiỹaxauapi na nqo'ona aso Marta qataq aso María da ỹa'añaqchetta'ape soomaye, souaxat ye lqaỹa't maye saqca.

²⁰ Qaq aso Marta co'ollaq ỹaỹaten da So Jesús mashe nvi', nache huaqata'aguet; qaq aso María, qalaxaye no'onaña ca lma'.

²¹ Nache aso Marta 'enapego' So Jesús, 'eeta': –'Am Nataxala', da 'am qoueta'actaxa ne'ena, nache saishettaxa da ileu ye ỹaqaỹa.

²² Qalaxaye Aỹem saỹaten da Ñim Lo'onatac 'Enauacna ishet da 'am ỹanem 'enauac cam 'auỹaxanaique.

²³ Nache So Jesús 'enapega asomaye, 'eeta': –Ye 'arqaỹa qaltaq nca'alec.

²⁴ Nache aso Marta 'enapeco': –Aỹem saỹaten da yemaye qaltaq nca'alec qom qanca'alaxatec na leuaxaicpi cam pa'atec na'a'q.

²⁵ Nache So Jesús 'enapego' asomaye, 'eeta': –Aỹem Nachaỹem nca'alaxa, qataq ishet da ca leuaxaic ỹe'eguelaxalec da nca'alec ñaqa'en. Qaq cam huo'o da naquitaxac Aỹem, nache camaye na'aictaxa da ileu, qalaxaye qaltaq nca'alec.

²⁶ Qataq 'enauac nam ña nca'altauec nagui qataq Aỹem ỹa'amaqten, nache namayepi saishet da ivireguet ca nleuaxa maye chochaq tatec. Qaq ¿'aua'amaqten peta'a de'era?

²⁷ Nache asomaye 'enapeco': –Aja', 'am Nataxala'. Aỹem sa'amaqten da nache 'am Lca'aguishec qataq 'am Llalec Ñim Lo'onatac 'Enauacna maye 'am qaỹa'axatta'aguet co'ollaxa da 'auanaỹa ana 'alhua.

So Jesús nỹen co'ollaq hueta'a aso nhuachiqui so Lázaro

²⁸ Qaq co'ollaq ime de'era la'aqtac aso Marta, nache asomaye jec da iỹaxana aso lqaỹa María. Nache isoxootot da 'enapega, 'eeta': –Dam Napaxaguenataxanaq hueta'a ne'ena, qaq damaye 'am nỹaxaneua'a.

²⁹ Qaq co'ollaq choche hua'aqchigui de'era aso María, nache sa naỹaloxon da ñesheguem, nache nqo'oneuga So Jesús.

³⁰ Qaq So Jesús saxanaxa co'ollaxa da inoxoneua'a ca lma't soomaye. Ñaq hueta'a cam huaña co'ollaq natena'aguet aso Marta.

³¹ Qaq na shiỹaxauapi maye hueta'a ca lma' aso María da ỹa'añaqchettac, co'ollaq ila'a da sa naỹaloxon da ñesheguem qataq jec asomaye, nache somayepi ca'attaueegue, cha'aye ipi'itaxaatega da asomaye tauga aso huachiqui da yaqto' huaña da nỹen.

³² Nache aso María co'ollaq ivireuga ca hueta'a So Jesús, nache ỹa'aroto naua l-llectel, nache 'eetega, 'eeta': –'Am Nataxala', da 'am qoueta'actaxa ne'ena, nache saishettaxa da ileu ye ỹaqaỹa.

³³ Nache So Jesús co'ollaq ila'a da nỹeetac aso María qataq so judiopi maye nnaictague', nache Somaye ỹataqta huo'o da laquicoxo, qataq nomteguet da 'eeta lta'araic da lquiyaqteỹaxac.

³⁴ Nache inat somayepi, 'eeta': –¿Chaq hua'ague ca qaỹachaña co'ollaq qailareñi camaxa? Nache somayepi, 'eeta': –'Am Nataxala', 'auanaicna'a, 'ena namaye.

³⁵ Nache So Jesús nỹeetac.

³⁶ Nache so shiỹaxauapi maiche na'aqtaxaatega't, 'eeta': –Ña qauloỹa damaye ỹataqta 'eesa da lauotaxat yemaye.

³⁷ Qalaxaye huo'o na laỹepi 'eeta': –De'era ỹale, ishet da co'ollaxa da nauaañi naqa'en so qanamaic, qalaq ¿taloxocheyectoxo' da saq huo'o ca 'eetec damaye, da yaqto' sa ipaca'aguet naqa'en da l-leuaxa ye Lázaro?

Da 'eetec co'ollaq qaltaq nca'alec so Lázaro

³⁸ Qaq So Jesús qaltaq nomteguet da 'eeta lta'araic, nache nqocheneua'a aso huachiqui maye no'onata naigui so coma' lta'araic, asomaye huo'o so lapoxot coma' som ñegueuo.

³⁹ Nache So Jesús 'enapeco': –Ña qanqache na coma'. Nache aso Marta maye lqaỹa som saqca, asomaye 'enapeco': –'Am Nataxala', yemaye ỹoqta da mashe huo'o na laita, cha'aye mashe ivi' naua cuatro na'axa'te da saqca.

⁴⁰ Qalaxaye So Jesús 'enapeco': –¿Saisheto' da 'am sheetega quiye da huo'otaq 'aua'amaqten Aỹem, nache ishet da 'aulogui da la'añaxac Ñim Lo'onatac 'Enauacna?

⁴¹ Nache qanqat so coma'. Nache So Jesús ỹamato'ot na piguem, nache 'enapeco': –'Am Ita'a, 'am sanot da ña'achecỹaxac, cha'aye 'am Aỹem 'aua'axaỹa.

⁴² Qaq Aỹem saỹaten da 'am, nache 'eetai' naxa da Aỹem 'aua'aqtega. Qalaxaye Aỹem shenapec de'era souaxat nam shiỹaxauapi maye hueta'a ne'ena, yaqto' namayepi ishet da ỹa'amaqten da 'eesa da Aỹem 'aramaxashec.

⁴³ Qaq co'ollaq ime da nasaxauec de'era, nache deỹaxan, 'eeta': –¡Lázaro, 'ampa'auec!

⁴⁴ Nache som leuaxaic mpa'auec. Somaye qoỹaxatta'aguelo naua lhua'q qataq naua lchel som laxataxat qataq qoỹaxattagui na lashec so hualoq laỹe. Nache So Jesús 'enapega somayepi, 'eeta': –Ña qanqache na laxataxat damaye, nache qauaqaỹa'a da queuoỹapigui'.

Da qoỹoxottañi ỹamaxataxac da qaỹaconeua'a So Jesús

⁴⁵ Huaña, nache ỹataqta qalota nam ỹa'amaqten So Jesús nam judiopi maye anaỹa aso María da ỹa'añaqchet, co'ollaq ỹauaachigui dam ỹo'ot So Jesús.

⁴⁶ Qalaxaye huo'oi soua je'c somayepi, da nqo'ooreua'a na fariseopi, nache da'aqtaxanem da ỹo'ot So Jesús.

⁴⁷ Nache nam fariseopi qataq nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi dataỹa't, huaxaiguet so 'amaqtaqaicpi maye nmit da huo'o ye nasouaxashet. Nache somayepi 'enapeco': –¿Hua'ague ca shenaqtec? Cha'aye se'eso ỹale ỹataqta qalota na ỹo'ot na'anecpi maye sa qaỹauanapega.

⁴⁸ Cha'aye qomi' da sa'axasoqta'a Somaye, nache 'enauac na shiỹaxauapi ỹa'amaqten da nacheso So Lca'aguishec Ñim Lo'onatac 'Enauacna. Nache anac na romanopi, nache ilaxachigui añi qaro'onaxanaxaqui late'erai qataq nam qarhuo' le'ecpi.

⁴⁹ Qalaxaye huo'o so 'oonolec somayepi som le'enaxat da Caifás. Maye lataxala' nam ntaxaỹaxanaxanecpi da qaitaxaỹapegue' Ñim Lo'onatac 'Enauacna se'eso vi'i. Somaye 'enapeco': –Qami' qaica ca qauaỹaañiỹapec.

⁵⁰ ¿Sa qauaỹaañiỹo' da ỹaỹamaqchiguiñi da 'oonolec ca ileualec na lauo' le'ecpi, qaq saq ishet da 'eeta'am da qailaxachigui 'enauac na qarhuo' le'ecpi?

⁵¹ Qaq so Caifás saishet da 'enapec de'era da maiche chegoqchigui da lhuennataxac. Qaq cha'aye somaye, nacheso so lataxala' na ntaxaỹaxanaxanecpi se'eso vi'i, nache somaye ilota'aguet da So Jesús ileualec 'enauac na judiopi;

⁵² qaq saishet da nachaqnata nam judiopi, cha'aye nataqa'en 'enauac nam llalaqpi Ñim Lo'onatac 'Enauacna maye nlagaxattac da yaqto' lapona't.

⁵³ Qaq, nache chegoqchiguiña se'eso na'a'q da na lataxala'pi na judiopi, detaxaỹapigui ca lataxac da yaqto' ỹalauat So Jesús.

⁵⁴ Qaq ỹoqo'oye So Jesús mashe saishet da ỹoqta nachaxaata da ỹalectaigui na judiopi, cha'aye sa ỹaỹamaxaren da qaỹauana ca hueta'a. Chaqrata da Somaye ca'ai ye 'alhua Judea da nqo'ona yem nỹecpiolec maye le'enaxat Efraín yem saqaỹapeque ye toolec 'alhua. Huaña, nache hua'a yemaye nnaictagueto soua lapaxaguenataqa.

⁵⁵ Qaq mashe saqaỹauga so na'a'q maye laponaxaqui na judiopi da qaiuennate so na'a'q le'enaxat Lapascua. Nache ỹataqta qalota so shiỹaxauapi maye nañalo naua lỹa't 'aleu' taỹa ye Jerusalén, da yaqto' ỹo'ot da lataxac da nqui'itaxat ca shiỹaxaua, da yaqta'a nvireuo se'eso na'a'q naponaxaqui.

⁵⁶ Qaq qanmittaique So Jesús, qaq co'ollaq qaivita aso no'onaxanaxaqui late'erai, nache nnattega't somayepi, 'eeta': –¿Chaq 'eetec ca qara'aqtaqui? ¿Peta'a anac camaxa, huo'otaq saishet?

⁵⁷ Na fariseopi qataq na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi ỹan da la'aqtac co'ollaxa da huo'otaq huo'o ca ỹaỹaten ca hueta'a So Jesús, nache ishet da ỹa'axat, da yaqto' ỹaconeua'a da qaicoñe'.