Josué 24 - La'aqtaqa Ñim Lo'onatac 'Enauacna 2013

So Josué ncoyeguene' so Israel le'ecpi

¹ So Josué, laỹona't co'ollaxa 'enauac so Israel le'ecpi huaña ye Siquén. Nache iỹaxaneuga so nqueroxonecpi, nataxala'pi, nmit na nasouaxashetpi, qataq so lataxala'pi so alleppi, qaq ỹauaachigui naqa'en Ñim Nataxala',

² da 'enapega 'enauac se'eso nhuo' le'ecpi, 'eeta': Da la'aqtac Ñim Nataxala' maye Natamnaxala' na Israel le'ecpi, 'eeta': «Se'esoua vi'iye maye mashe qaỹoqteguelo, co'ollaq ñaq huo'o so Téraj som lta'a so Abraham qataq so Najor, som hua'au' qarta'alli' soomaye neraña co'ollaxa ye loigue so tala Éufrates, qataq natameetacoto co'ollaxa so ỹaqa'a atamnaxala'pi.

³ Qaq nache sachegoxotchiguiña co'ollaxa ye loigue so tala Éufrates da seỹaxana so Abraham, nache quelec ñaqa'en 'enauac ne'ena 'alhua da ñauega na Canaán. Nache sa'auaxaañi da sanem so llalec Isaac, qataq so'ot da ỹataqta nquictauec so chegoxoguetpi, nache ivitta'a da ỹataqta qalota,

⁴ qaq so Isaac, sanem co'ollaxa da dos soua llalqa, Jacob qataq so Esaú. Nache so Esaú, sanem ye 'alhua maye huaigui aye qasoxonaxapi ye Seír, qaq so Jacob, qataq so llalaqpi, taỹa co'ollaxa ye Egipto da yaqto' naña.

⁵ Huaña co'ollaxa nache samaq so Moisés qataq so Aarón, nache aỹem seque'emaqchetec da nleuaxa so Egipto le'ecpi, nache ivitta'a da qami' ñeqatreguesopa yemaye.

⁶ Qaq se'eso hua'au qarta'ailpi co'ollaq ca'ai ye Egipto, nache so Egipto le'ecpi ncaalec somayepi, ỹauota'a aso laigonapi maye nalaataxaqui qataq so lalo caipi, nache nvittaxaama aso Auaxai Togaxarai.

⁷ Qaq somayepi aỹem iỹaxanot co'ollaxa, nache sauo'o so lta'araic napalaxa da yaqto' napalñi ñaqa'en so llec so Egipto le'ecpi, qataq so 'etaxat aso auaxai talec ñaqa'en somayepi nache ỹapolec. Qaq qami' ỹataqta qauauañiichigui 'enauac som so'otpi co'ollaq huaña ye Egipto. Qaq co'ollaq ime de'era, nache qaỹoqteguelo soua vi'iye da qoñiitalec ye toolec 'alhua,

⁸ nache ivitta'a da qami' ñauegalo ye na'alhua ye amorreopi maye pa'aỹa'ague da nala' lliguisheguem so Jordán. Qaq yemayepi qami' deloctagueto, qalaxaye aỹem, qami' sanema da qoroxoñiqui yemayepi, nache qanaviqui yemayepi, nache qauacoñiỹa yem 'alhuapi.

⁹ Huaña, nache so Balac, som llalec so Sipor, maye nta'a ye Moab, somaye anac co'ollaxa da qami' iloquiaxa'n, qataq somaye damaxasoxona so Balaam, maye llalec so Beor, da yaqto' qami' ỹasaxaleguete ca qauem la'aqtac.

¹⁰ Qalaxaye aỹem sa sashenem somaye da qami' ỹasaxaleguete ca qauem, nacherata da qami' ỹasaxaleguete ñaqa'en da qanchoxonnataguiiqui. Qaq 'era co'ollaxa da 'eetec da qami' ñeca'alaxatrec.

¹¹ Huaña, nache qami' qaua'axasoxoñiilec so tala Jordán, nache qaviyiita'a ye Jericó, nache som netañapi ye Jericó qami' iloquiaxaata'ape, maye nacheso so amorreopi, ferezeopi, Canaán le'ecpi, hitiitapi, gergeseopi, heveopi qataq na Jebús le'ecpi, somayepi ỹataqta qami' deloctagueto co'ollaxa, qalaxaye qami' sanema da qoroxoñiqui somayepi.

¹² Qaq se'esoua dos lta'al so amorreopi, qalaq saishet co'ollaxa da qaroilec ca ỹeelonecpi huo'otaq checnecpi da yaqto' qanaviqui' soomaye, cha'aye aỹem samaq so vi'inaq lalaxatpi da yaqto' datarec naqa'en soomaye.

¹³ Qaq aỹem qami' sanema ne'ena 'alhua maye saishet co'ollaxa da qauo'onataxañiitapeguelec, qataq na huaqta'a't nỹecpi maye saishet da qano'oxoñiisheguem co'ollaxa. Qaq nagui nache qoñiitaigui namayepi, qataq qollequiitac ana ala ana nañiguishe uva qataq ana olivo maye saishet co'ollaxa da qaỹa'añiiñi.» Qaq so Josué nataqa'en, 'enapeco':

¹⁴ «Qaq souaxat 'enauac de'era nache ỹataqta huo'o naq 'enec qome qanqa'eñi Ñim Nataxala', qataq qami' 'eesora, qataq ỹataqta qami' huesote' da qauo'onataxañiitacot Ñimaye. Nache qoquiỹa'ai qome 'enauac na atamnaxala'pi maye natameetacot co'ollaxa so hua'au qarta'ailpi, co'ollaq ñaq neta'atague da le'ego so tala Éufrates, qataq co'ollaq netaña ye Egipto, nache qavio'oxoreñi qome Ñim Nataxala'.

¹⁵ Qalaxaye da sa qavio'oxoreñi Ñim Nataxala', qaq no'on da qalca'aiua'a nagui cam qavio'oxoreñi: da nachena nam atamnaxala'pi maye natameetacot co'ollaxa so hua'au qarta'ailpi co'ollaq ñaq neta'atague da le'ego so tala Éufrates, huo'otaq na natamnaxala'pi na amorreopi, maye lma' co'ollaxa ne'ena na'alhua. Qalaxaye aỹem qataq na ỹalamaxatpi, so'onataxanaqot qome Ñim Nataxala'.»

¹⁶ Huaña nache so nhuo' le'ecpi 'enapeco': «¡Qomi' ỹataqta saishet qome da qolqa'ai Ñim Nataxala', da yaqto' sho'oxorenaq na ỹaqa'a atamnaxala'pi!

¹⁷ ¡Ñim Nataxala', nacheñi Ñim Qanatamnaxala'! Cha'aye Ñimaye nacheñi ñi qomi' nqatrec, qataq so qarta'alpi co'ollaq qomi' nlatacpi huaña ye Egipto. Qataq Ñimaye ỹataqta sauanaqchigui naqa'en da ỹo'ot so lta'araic na'aalaxa, qataq ntela'a qataq npaxattalec da qoyecỹaxac, co'ollaq qolaqchiguingui so ỹotta'a't shiỹaxauapi.

¹⁸ Qataq Ñimaye sauanaqchigui naqa'en da ỹo'orauec 'enauac so nhuo' le'ecpi, qataq so amorreopi maye netaña co'ollaxa ne'ena 'alhua. Qaq ỹoqo'oye qomi' nataqa'en so'onataxanaqot qome Ñim Nataxala', cha'aye Ñim Nataxala', nacheñi Ñim Qanatamnaxala'.»

¹⁹ Huaña, nache so Josué 'enapego' se'eso nhuo' le'ecpi, 'eeta': «Qami' yo'oqta da saishet qome da qauañoxoche da qauo'onataxañiỹot Ñim Nataxala', cha'aye Ñimaye Atamnaxala' maye ỹataqta qui'itta, qataq ca'alaxanaxaic, qataq sa ishetaxateguet na sa ỹaỹamaxañisat qataq na qarasouaxashichi.

²⁰ Qaq da qoquiỹa'ai Ñimaye da qauo'onataxañiỹot na ỹaqa'a atamnaxala'pi, nache Ñim Nataxala' qami' dataỹa'agueta qome, nache ỹauo'o ca qanhuaxanaguiiqui, ivitta'a da qami' nlaxatchiyiñi, qaq na'aictaxa da Ñimaye qalota na qami' ỹo'oteque ỹaỹamaqchiguiñi.»

²¹ Nache so nhuo' le'ecpi qaỹasategueto' so Josué, 'eeta': «Saishet da shenaqtec qome de'era, cha'aye qomi' so'onataxanaqot qome Ñim Nataxala'.»

²² Nache so Josué, 'eeta': «Qami' maiche qauauañiichigui de'era qarasataxaqui, cha'aye naua maiche qara'aqtaqalle', maiche qami' ỹa'axa't da qalca'aiua'a da qauo'onataxañiỹot Ñim Nataxala'.» Nache somayepi, 'enapeco': «Aja', nache 'eetec.»

²³ Nache so Josué, 'enapeco': «Qanqachiiuec nagui 'enauac na ỹaqa'a atamnaxala'pi maye qami' huetaiguilo, nache qaumachiỹo'ot da qarquiyaqteỹaxaqui da qavi'iguelaqaiỹa Ñim Nataxala' maye Natamnaxala' na Israel le'ecpi.»

²⁴ Nache so nhuo' le'ecpi, 'enapeco': «Qomi' so'onataxanaqot qome Ñim Nataxala' maye Qanatamnaxala', qataq so'otaq 'enauac na qomi' ỹamaxaleguete.»

²⁵ Qaq nacheso se'eso na'a'q, co'ollaq huaña ye Siquén, da so Josué qaltaq ỹo'ot so naỹamaxataxac na Israel le'ecpi, nache ỹanem na namaxasoxonaxacpi qataq na nqataxacpi.

²⁶ Nache ỹerelec aso nere maye nanettalec na lqataxacpi Ñim Lo'onatac 'Enauacna, huaña nache ỹacona so coma' lta'araic, nache ỹano'ot na pa'aguiñi aso encina, maye netaña so npe'l maye huañacnaxa da qanauane' Ñim Nataxala',

²⁷ nache 'enapego' 'enauac so nhuo' le'ecpi, 'eeta': «Ne'ena coma', namaye qami' nomtaua'alo ne'ena na'a'q, cha'aye ne'ena hueta'a nache huaña da qaỹa'aqchigui 'enauac na la'aqtacpi Ñim Nataxala' maye qomi' ỹanema. Qaq nachena qome na qami' ỹa'axa't da saq'en da qoquiitague' Ñim Lo'onatac 'Enauacna.»

²⁸ Qaq co'ollaq ime 'enauac de'era, nache so Josué nquine' se'eso nhuo' le'ecpi, nache ñi 'oonolec somayepi taỹa so maiche lalamaxat na'alhua.

Da l-leuaxa so Josué

²⁹ Qaq so mashe lcopata'ague de'era, nache ileu so Josué, som llalec so Nun, maye lamaxashec Ñim Nataxala'. Co'ollaq mashe ivi' soua ciento diez vi'iye da nachaalataxac.

³⁰ Nache qailareña co'ollaxa ye Timnat seraj, maye taalec da lalamaxat co'ollaxa somaye, yem hualec aye qasoxonaxapi maye lalamaxat so chegoxoguetpi so Efraín, maye pa'aỹa'ague da sheu' añi qasoxonaxa Gaas.

³¹ Qaq so Israel le'ecpi, do'onataxaatacot co'ollaxa Ñim Nataxala' co'ollaq ñaq nca'altauec so Josué, qataq co'ollaq ñaq qaỹatatalec so nqueroxonecpi nataxala'pi, maye nataqa'en ỹauaachigui 'enauac nam ỹo'otpi Ñim Nataxala' maye ỹo'otec co'ollaxa so Israel le'ecpi.

So Israel le'ecpi ilalyiñi soua lpi'ineqa so José

³² Qaq soua lpi'ineqa so José, maye so Israel le'ecpi ỹacheta'ape co'ollaq ca'ai ye Egipto, nache qailalyiña ye Siquén, yem 'alhua maye desheenaxana co'ollaxa so Jacob, maye ivi' aso cien lcatpiole plata aso lasheue, co'ollaq desheenaxana se'eso na'alhua so Jamor maye lta'a so Siquén. Qaq se'eso 'alhua nache taỹot da lalamaxat so chegoxoguetpi so José.

Da l-leuaxa so Eleazar

³³ Qaq co'ollaq ileu so Eleazar, som llalec so Aarón, nache qailareña aso lcomaraxalate maye lalamaqte so llalec Finés, maye qoỹanem co'ollaq huaña aye qasoxonaxapi ye Efraín.