Josué 2 - La'aqtaqa Ñim Lo'onatac 'Enauacna 2013

Aso 'alo Canaán lashe itaua'n soua Israel lashe'

¹ Qaq co'ollaq huaña ye Sitín, nache so Josué no'otaxaatrec soua dos da ỹama'q, nache 'enapegalo, 'eeta': «Qanqo'oñiỹa qome da qaumeenaxañiỹa ye 'alhua Canaán qataq ye Jericó.» Nache soomaye je'c, qaq co'ollaq ivildeua'a ye Jericó, nache tatreua'a so lma' aso 'alo quisheguetaxai maye le'enaxat Rajab, nache lo'ochaqa't se'eso pe.

² Qalaxaye qaỹa'aqtaxanem co'ollaxa so nta'a ye Jericó, qoỹeeta': «Huo'oi soua Israel lashe' nvildeuo so mashe pe, da choche nmeenaxara ne'ena 'alhua.»

³ Nache so nta'a, ỹamaxa da la'aqtac aso Rajab, 'eeta': «Ñaq 'anqatrec que'ecaua shiỹaxau' maye 'am natreua'a, qataq huetra'a na 'arma', cha'aye caamaye choche qomi' nmeenaxanalo qataq da imeten na qana'alhua.»

⁴ Qalaxaye asomaye ỹoxooyiñi soomaye, nache 'enapeco': «'Eesa da huo'oi soua shiỹaxau' da huetra'a na ima', qalaxaye sa saỹaten ca chegoqtra'ague.

⁵ Qalaxaye soomaye je'c so mashe napalchiguiñi, nache sa saỹaten ca dataregue. Qalaxaye da saqanaỹaloxoñi da qaucañiileguete nache yo'oqta da qaviyiỹaleguete soomaye, cha'aye mashe yaqta'a da qaỹapogui ñi lasom na lpaqtaxat na huaqta'a't nỹecpi.»

⁶ Qalaxaye asomaye ỹaviguisheguemeque co'ollaxa soomaye so pa'asheguem so lma' l-laq, nache nqañoxooyiñi naqa'en, huetraigui aso qaiqaxaỹaxattacpi naqtapi lino.

⁷ Nache so nalleppi so nta'a icaaleguete soomaye, tateuga so nqa'aic maye taỹaxaama so tala Jordán, nache ivittaxaama so ñeguetapi da qotaitague da le'ego. Qaq co'ollaq chochaq inoxonec so alleppi, nache qaỹapogui so lasom so npaqtaxanaxat.

Aso 'alo Canaán lashe qataq soua nmeenaxanaxanaqa ỹo'o't so naỹamaxataxa'c

⁸ Qaq co'ollaq yaqta'a da do'oche' se'esoua nmeenaxanaxanaqa, nache aso Rajab tasheguemec so pa'asheguem so lma' l-laq. Nache 'enapegalo soomaye, 'eeta':

⁹ «Aỹem saỹaten da Ñim Nataxala' qami' ỹanema ne'ena 'alhua, ỹoqo'oye Ñimaye ỹataqta qomi' ỹo'oteque da lta'araic qarcolanaxa, cha'aye 'enauac na netaña ne'ena, ỹataqta ilem da lcolanaxa souaxat da qoñiita.

¹⁰ Qataq sa'axasoqtapeguelec da 'eetec co'ollaq qoquiỹa'ai ye Egipto, nache Ñim Nataxala' 'imñi naqa'en so 'etaxat so lche aso Auaxai Togaxarai da yaqto' ishet da qaua'axasoxoñiilec. Nataqa'en sa'axasoqtega da ỹataqta qanmachiichiyiñi soua Sijón qataq Og, soua dos lta'al ye amorreopi maye neta'atrague da le'ego ye tala Jordán.

¹¹ Qaq can sa'axasoqchigui de'era, nache ỹataqta qomi' sa ntoonaxanaxa'n da qayi'iỹaxa souaxat da qaica ca ishet da qami' dataỹa'agueta. Cha'aye Ñim Nataxala' maye Qanatamnaxala'ai, Ñimaye nacheñi Ñim Natamnaxala' na neta'ague da piguem qataq na netalec ana 'alhua.

¹² Qaq ỹoqo'oye qami' seỹaxanoto da aỹem qaỹa'añim nagui ca qara'aqtaqui, hua'aqchigui qanqa'eñi Ñim Nataxala' da ỹataqta qaica qome ca qoñiỹa'ac naua maiche ỹalamaqa'ate ihuo' lashe', 'eeta'am qanqa'eñi da qami' sheeteque da ỹataqta qami' selo'ogueta. Qataq qauauo'oi qome ca la'anaxat da ỹoqta qami' 'eesora,

¹³ qataq qauchoxoyiñi qome da nachaalataxac ñi ita'a, ỹate'e, ỹaqaỹañecpi ỹalleppi qataq 'alpi, qataq 'enauaque naua maiche ỹalamaqa'ate ihuo' lashe'. ¡Nache ỹataqta qomi' qanca'alaxachiueeguesopa qome de'era nleuaxa!»

¹⁴ Nache soua nmeenaxanaxanaqa 'ena'apo': «Qomi' sanaq qome da qanachaalataxac da yaqto' saishet da qami' qaỹalaua't, qalaxaye 'am saishet qome da 'aua'axatec de'era qara'aqtac. Nache Ñim Nataxala' qom qomi' ỹanema ne'ena 'alhua, nache ỹataqta qami' sechoxorena'q qataq qami' saỹamaxataqte'.»

Soua nmeenaxanaxanaqa ỹe'eguelaq da taỹa so lanataqa't

¹⁵ Qaq cha'aye so lma' aso Rajab, na'attaua'a so lpaqtaxat so huaqta'a't nỹecpi, nache tatoiguilo naqa'en so nalloxoqui soomaye da tareueegue da laỹe, quichiguinguilo naqa'en so nañec.

¹⁶ Ime nache 'enapegalo soomaye, 'eeta': «Qa'aỹeesheguemec qome añi qasoxonaxa yaqto' saishet da qami' ỹanatalo so alleppi maye qami' nmittrapigui. Qaq nache qanqañoxochiiñi qome caua tres na'axa'te nato' qom ñe'eguelaxaua'a na huaqta'a't nỹecpi som qami' nmittrapigui. Huaña nache ishet da qaltaq qoqui qome.»

¹⁷ Nache soua nmeenaxanaxanaqa 'ena'apo': «Qomi' ỹataqta sepagaqchigui qome de'era 'am sanaxam qara'aqtac maye qomi' 'auỹaxanoto da 'am sanaxam.

¹⁸ Qalaxaye qom mashe ñenoxonaxaua'a ne'ena 'alhua nache ne'ena nañec togaxaraic, 'acoñeraua'a qome ñi nalloxoqui maye saqtoigui 'anqa'en da senotaxauec. Huaña nache 'anauegueua'a na 'arma' ca 'arta'a, 'arate'e, 'arqaỹañecpi, qataq 'enauac ca 'aralamaxat 'arhuo' le'ecpi.

¹⁹ Qalaxaye da huo'o ca 'oonolec namayepi da maiche ca'ai na 'arma', nache camaye maiche nasouaxaala't da ileu, nache saishet da qarasouaqtac. Qalaxaye da huo'o ca ỹe'egueeta'a cam hueta'a na 'arma', nache qomi' qarasouaxashet camaye.

²⁰ Qataq qom 'aua'axatec de'era qara'aqtac, nache qomi' huesoueeguesopa qome de'era 'am sanaxam qara'aqtac, nache saishet da sepagaqchigui sa so'otaq.»

²¹ Nache aso Rajab 'enapeco': «Aja', aỹem saỹamaxareeta.» Huaña nache nquineto soomaye, nache soomaye je'c. Nache asomaye icoñeraua'a so nalloxoqui so nañec togaxaraic.

²² Nache soua dos nmeenaxanaxanaqa je'c, tasheguemeque aso qasoxonaxapi nache nqañoxottrañi soua tres na'axa'te, qaq so alleppi nmittrapigui co'ollaxa soomaye, nmittac 'enauac na nqa'aicpi qataq naua qanayeetaleguete 'aleu' qalaxaye saishet da qaỹanatalo, nache somayepi ỹe'eguelaxaua'a ye Jericó.

²³ Nache soua dos nmeenaxanaxanaqa huenoteeguesop aso qasoxonaxapi, nache ỹa'axasoxoorelec so tala Jordán da ỹe'eguelaxa yem netaña so Josué, nache da'aqtaxaarem somaye 'enauac da hueraigui soomaye.

²⁴ Nache 'eeta': «Ñim Nataxala' mashe qomi' ỹanema da qoroxonec 'enauac yi'iye 'alhua. Cha'aye 'enauac yem netaña yemaye ỹataqta ilem da lcolanaxa souaxat da shenaqta.»