Jonás 4 - La'aqtaqa Ñim Lo'onatac 'Enauacna 2013

Da lalemataic so Jonás

¹ Qaq so Jonás ỹataqta dalemata co'ollaxa, cha'aye sa ỹaỹamaxaren de'era ỹo'ot Ñim Nataxala'.

² Ỹoqo'oye natamnot Ñim Nataxala', 'eeta': «¡Aicoue, 'Am Nataxala'! 'Era da sheetega co'ollaq soota'a ye ña'alhua, ỹoqo'oye huac da satauec da saỹa ye Tarsis, cha'aye saỹaten da 'Am maye 'Aro'onatac 'Enauacna, qaỹoqchiguinguit da 'aralemataic, cha'aye 'am soxoraic, choxonnataxanaxaic, huotaxanaqtaqaic, qataq ishet da 'anaralaxat ca 'arhuennataxac da sa 'aupaguelec cam qauem maye 'autaxaỹa da 'auo'ot.

³ Qaq ỹoqo'oye nagui 'am seỹaxanot 'Am Nataxala', da nache tachiguiña 'anqa'en da ñachaalataxac, 'onaxaico' da seleu, cha'aye saq 'ena'am da ñeca'altauec.»

⁴ Nache Ñim Nataxala' 'enapego' somaye, 'eeta': «¿Peta'a ỹaỹamaqchiguiñi 'anqa'en da 'aualemata?»

⁵ Huaña nache jec so Jonás, ca'ai se'eso huaqta'a't nỹecpi, nache taỹa ye pa'aigue da nala' lliguisheguem, yem huaña da ỹo'ot so lpaqalaxaqui nache taỹot so lpaqal somaye, da yaqto' ỹauaachigui ca 'eetec ca lataxac se'eso huaqta'a't nỹecpi.

⁶ Qaq Ñim Nataxala' maye Lo'onatac 'Enauacna, nañaxat naqa'en so nshe'ela, da yaqto' ipelteetalec naqa'en na lqaic somaye, nache so Jonás ỹataqta machiguiñi souaxat se'eso nshe'ela.

⁷ Qalaxaye so nte'etom so lỹa na'a'q, nache Ñim Lo'onatac 'Enauacna, ỹamaq so qoche'l da chec se'eso nshe'ela, nache deqaqa naqa'en.

⁸ Qaq co'ollaq nnoxoosheguem aso nala', nache Ñim Lo'onatac 'Enauacna, namaq so la'at ỹataqta dapaqa chegaqa'ague da nala' lliguisheguem, nache ỹavigaxat na lqaic so Jonás, nache somaye nomteguet da lquisheuguetaxa, nache nhuooteguela't da ileu, nache, 'eeta': «'onaxaico' da seleu, cha'aye saq 'ena'am da ñeca'altauec.»

⁹ Qalaxaye Ñim Lo'onatac 'Enauacna, 'enapego' so Jonás, 'eeta': «¿Peta'a ỹaỹamaqchiguiñi 'anqa'en da 'aualemata souaxat da deqaqa so nshe'ela?» Nache so Jonás, 'enapeco': «Aja', ỹataqta salemata, souaxat da deqaqa so nshe'ela.»

¹⁰ Nache Ñim Nataxala' 'enapego' so Jonás, 'eeta': «'Am ỹataqta huo'o' da 'arauoche so nshe'ela, qamaq saishet da 'aỹa'aañi qataq saishet da 'auo'ot da lañaxataxac, somaye ñaxat so 'oonolec pe, qaq so lỹa pe nache deqaqa.

¹¹ Qaq ta'ainectoxo' da saq ỹactec ñaqa'en da ichoxonnataxanaxa yem 'amaqtaqaic huaqta'a't nỹecpi ye Nínive, maye hueta'a ye shiỹaxauapi maye napactelec ca ciento veinte mil ye lcata, maye saỹaỹaten ca 'eetec da yaqto' nca'alec, qataq qalota ye hueta'a shiguiỹacpi.»