Jonás 2 - La'aqtaqa Ñim Lo'onatac 'Enauacna 2013

¹ Huaña nache so Jonás natamnot Ñim Nataxala' maye Natamnaxala', co'ollaq huetaigui na lauel aso nỹaq late'e,

² nache 'eeta': «Co'ollaq sootapoigui da ñeque'eenaxac, nache 'am seỹaxanot 'Am Nataxala', nache aỹem 'auasateguet, co'ollaq sootangui añi huachiqui, qaq 'am ñachoxonnot nache aỹem 'aua'axaỹa.

³ Aỹem 'auasaxaña na ỹataqta qaỹoqchiguiña na laiñi ana auaxai, nache ana lle'eguelaxaso na 'etaxat aỹem coleesop, qataq ana lapaxa na 'etaxat aỹem nlectapeguelec.

⁴ Nache tachigui iuel da mashe aỹem 'aualat, qataq sepeta'a da saishet da she'eguelaxa da sootaigui añi 'aralamaqte atamnaxaqui.

⁵ Na 'etaxat qalaq ỹataqta aỹem imoolec, huaña ye ỹataqta qaỹoqchiguiña ana auaxai nache na lpa'a' na qol ỹataqta lpachigui na iqaic.

⁶ Seviraña ye ỹataqta qaỹoqchiguiña loga't ana qasoxonaxapi, ana 'alhua qalaq 'eeta'am da chochaq tatec da aỹem lcoñetegueshec. Qalaxaye 'Am Nataxala' maye 'am Ñatamnaxala', aỹem 'anca'alaxateeguesop da nleuaxa.

⁷ Qaq co'ollaq ñanomteguet da seleetapigui', nache tachigui iuel da qoneta 'Am Nataxala', nache da ñachoxonnaxac 'am iviro'ot, co'ollaq qoneta'a añi qui'itta 'aralamaqte atamnaxaqui.

⁸ Qaq nam quetague' na saq 'en atamnaxala'pi, qalaq ỹaxaañi da 'am ỹa'amaqteetac.

⁹ Qalaxaye aỹem, nache shecto'ot da 'am sho'oxoreetac, qataq 'am saatacot qome aca ỹachetaqtaxanaqte, qataq sepacchigui qome da so'ot na 'am sachaxanapeguempi. ¡Cha'aye nache 'amta 'Am Nataxala', da 'am chegoqo'ot da nca'alaxa!»

¹⁰ Huaña nache Ñim Nataxala', 'enapega aso nỹaq late'e, nache asomaye anolec so Jonás, huaña naqa'en so loigue aso auaxai.