Jonás 1 - La'aqtaqa Ñim Lo'onatac 'Enauacna 2013

So Jonás dataueeguesop Ñim Lo'onatac 'Enauacna

¹ Qaq huo'o so na'a'q nache Ñim Nataxala' 'enapega so Jonás, som llalec so Amitay, 'eeta':

² «'Aue, 'anqo'ona qome ye 'amaqtaqaic huaqta'a't nỹecpi ye Nínive, nache 'aua'aqtaxanem da ỹataqta aỹem iviro'ot nam qauemsat maye ỹo'ottac yemayepi.»

³ Qalaxaye so Jonás, dataueeguesop Ñim Nataxala' taỹa ye Tarsis, qalaxaye ỹa'auaxaañi da taỹa so ñegaxasom le'enaxat Jope, yem huaña da natenalec aso notaxaqui maye mashe huotaique da taỹa da Tarsis. Huaña nache desheenaxana aso lliquiaxaqui da yaqto' huenoteuo da taỹa yemaye da dataueeguesop Ñim Nataxala'.

⁴ Qalaxaye Ñim Nataxala', anacot so la'at lta'araic ỹasheerelec naqa'en aso auaxai, qaq cha'aye ỹataqta lta'araic se'eso la'at, nache 'eeta'am da huotaique dolagui naqa'en aso notaxaqui.

⁵ Nache so lo'opi aso notaxaqui, ỹataqta lta'araic da lli'iỹaxa, nache ñi 'oonolec somayepi nqouagaxaunot so ỹotta'a't natamnaxala'pi, qataq ỹasaxangui so 'etaxat so lla'acpi, maye huetangui aso nnotaxaqui da yaqto' huaỹoxootegue naqa'en asomaye. Qaq so Jonás qalaxaye nale'ena co'ollaxa da taña so pa'aguiñi aso notaxaqui nache do'ocheta.

⁶ Nache so lataxala' so lo'opi aso notaxaqui nqo'ooña so huetaña so Jonás, nache 'enapega, 'eeta': «¿Ta'ainco' da 'auo'ocheta? ¡Qoñisheguem ña 'anqouagaxaunot ca 'anatamnaxala'! shapegueto' da 'am hua'axaỹa, nache qomi' huapegueto da qomi' nca'alaxatrec.»

⁷ Nache so lo'opi aso notaxaqui detaqtega't, 'eeta': «Qomi' no'on da ñalletaxa't, yaqto' saỹatenaq chaq negue't ca ỹoqta lasouaxashet de'era souaqaigui.» Nache somayepi ỹo'ot so nalletaxac, nache taalec so Jonás da lasouaxashet damaye.

⁸ Nache somayepi inat so Jonás, 'eeta': «¿Qomi' 'aua'aqtaxanema nagui da ta'ainco' da ñeque'eenaqtapigui de'era? ¿Negue't ca 'aro'onataxanaxac? ¿Hua'ague ca 'auachegoqta'ague? ¿Negue't ca 'alhua maye 'auachegoqta'a? ¿Negue't ca 'arhuo' le'ecpi?»

⁹ Nache so Jonás, 'enapeco': «Aỹem hebreo le'ec, qaq huo'o naq 'enec ñaqa'en Ñim Nataxala', maye lo'onatac na piguem, auaxai qataq ana 'alhua.»

¹⁰ Qaq co'ollaq hua'axaỹa de'era so notaxaqui lo'opi nache nquictec da lli'iỹaxa, souaxat de'era la'aqtaxanaxac so Jonás, da ỹa'axattac da dataueeguesop Ñim Nataxala', nache 'enapego' somaye, 'eeta': «¿Ta'ainco' da 'auo'ot de'era?»

¹¹ Qalaxaye co'ollaq qaila'a da aso lapaxa so 'etaxat da nquictasheguem, nache qainattaco' somaye: «¿Chaq shenaqtec 'am da yaqto' vi'iiguet ana lapaxa na 'etaxat?»

¹² Nache somaye, 'enapeco': «Aỹem qauasaqaiñigui na 'etaxat, yaqto' vi'iiguet ana lapaxa ana auaxai, cha'aye saỹateeta da nachaỹem ỹasouaxashet de'era lta'araic qoviỹaigui.»

¹³ Nache so notaxaqui lo'opi ỹataqta na'añaxat co'ollaxa da huotaique da ỹe'eguelaxatta so lqaxaỹaxa aso nnotaxaqui. Qalaxaye sa ỹañoxot da ỹe'eguelaxatta, cha'aye ana lapaxa so 'etaxat ỹataqta nquictasheguem, nache ihuogoqchettac somayepi.

¹⁴ Nache somayepi nachoxonnot Ñim Nataxala', 'eeta': «'Am Nataxala', 'am ñachoxonnaqot nagui da saishet da qomi' 'aualaua't, da sasouaxalec de'era shiỹaxaua, qataq saishet da qomi' 'aumataleguete da l-leuaxa damaye da qaica ca ỹasouaxat. Cha'aye 'Am Nataxala', nache 'am maye 'aro'onatac de'era.»

¹⁵ Qaq ime, nache so Jonás qaỹasaxangui aso auaxai, nache aso auaxai vi'iiguet aso lapaxa.

¹⁶ Qaq co'ollaq ỹauaachigui de'era somayepi, nache ỹataqta lta'araic naqa'en da 'enec Ñim Nataxala', nache ỹauo'o aso lachetaqtaxanaqte da ỹanot Ñimaye, qataq ỹan da la'aqtac da nache 'eetai' da natameetacot.

Da natamnaxac so Jonás

¹⁷ Qalaxaye Ñim Nataxala', mashe ỹaqataxaatai' co'ollaxa aso nỹaq late'e da yaqto' iuoxonañi naqa'en so Jonás. Nache so Jonás ivi' soua tres na'axa'te qataq soua tres pe' da huetaigui na lauel asomaye.