Joel 2 - La'aqtaqa Ñim Lo'onatac 'Enauacna 2013

¹ Ña qauashiiyigui ana nasheerepi da huaña na Sión, qataq ana peenaq lcouepi da huaña ana qui'itta qasoxonaxa maye lalamaqte Ñim Nataxala'. Ña qaviloxolli qami' maye qoñiitaña na Judá, cha'aye mashe nayeetai' na na'a'q maye lviraxaqui Ñim Nataxala',

² nam na'a'q maye huaigui na napalaxa, qataq ỹataqta napalñi, nam na'a'q maye sansatchiguiñi na lo'oc na piguem qataq na sansatchiguiñi napo. 'Eeta'am na le'eraxa na na'a'q da mashe yaqta'a yo'oxoñi da imattalec da icoỹarelec ana qasoxonaxapi, qaq nache 'eetec da anac ne'ena qalota qataq 'añaxaicpi shiỹaxauapi. Qaq ỹataqta saỹauanapega da qaỹauaachigui ca 'eeta'am namayepi, qataq saishet qome da qaltaq ỹe'eguelaxalec da qaỹauaachigui cam 'eeta'am namayepi.

³ Qaq nache 'eeta'am na norec da nlaguiñi naqa'en 'enauac nam huo'o, nache na ỹataqta chaxaguet le'eraxa ỹavigaxat da taỹa'ague, qataq nache 'eeta'am na le'eraxa da mashe ỹapacauec. Qaq qom saxanaxa da nvi', nache na 'alhua ỹataqta no'on, qalaxaye da ỹoxogue nache ana 'alhua 'eeta'am ca toolec 'alhua. ¡Qaq nache qaica qome ca ỹet!

⁴ Qaq da lataxac namayepi 'eeta'am na caipi, qataq da naloxoyaxac, 'eeta'am na caipi da qanayeetalec.

⁵ Qaq da l-lamaxa da quetalec ana qasoxonaxapi, qalaq 'eeta'am da l-llimiaxa ana naigonapi alaataxaquipi, qataq 'eeta'am ana qo'oipaq laue deqaqta da ỹavigaxat na norec. Qataq 'eeta'am ca 'añaxaic alleppi da nalochiguiñi da nalat.

⁶ Qaq na ỹotta'a't shiỹaxauapi da ila'aguet nache iviloxol, qataq ỹataqta napagaqtec da lli'iỹaxa.

⁷ Qataq 'eeta'am na ỹataqta 'añaxaic alleppi alaataxaicpi, da naloxo qataq da quisheguemec ca npaqtaxanaxatpi, qaq qaica ca dashelec qataq qaica ca npaxateguet.

⁸ Qataq saishet da huo'o ca ỹe'egueneguet ca lỹa, cha'aye ñi 'oonolec quetegue na maiche llec, qataq da queguet ana checnapi, nache saishet da huo'o ca dasheuec.

⁹ Nache inoxotaua'a na huaqta'a't nỹecpi, qataq nqalgoqta quetalec na lpaqtaxat namayepi, qataq quisheguemec na nỹecpi, nache 'eeta'am ca cachaxaic da tatoigui na nalloxoquipi da inoxotauo.

¹⁰ Nache da nvi' namayepi nache cholaxan ana 'alhua, qataq cholaxan na piguem, qataq 'om añi nala' qataq ñi ca'agoxoic, qataq ana huaqaañipi qaica ca le'eraxa.

¹¹ Qaq Ñim Nataxala' nache hua'auta'ague da taỹa'ague nam nalleppi, da lavilỹaxac Ñimaye ỹataqta dellimigui da ỹa'axaỹaqchet na shiỹaxauapi. Qataq na nalleppi Ñimaye ỹataqta qalota, qataq ỹataqta 'añaxaicpi nam ỹo'ottac nam lamaxasoxonaxacpi Ñimaye. ¡Qaq cha'aye ỹataqta lta'araic qataq chaqaic nam na'a'q maye lviraxaqui Ñim Nataxala'! ¿Qaq negue'tom ca ishet da nala'aguet da dataỹa'aguet?

Da lchoxonnataxanaxa Ñim Nataxala'

¹² Qaq nagui da la'aqtac Ñim Nataxala', 'eeta': Ỹataqta imauec qome da qarquiyaqteỹaxaqui da aỹem qañe'eguelaqaỹa, qataq qanqouaqchichi qome, qanỹeñi, qataq qanachoxoreñi qome.

¹³ ¡Qataq qavi'eguelaqaỹa Ñim Nataxala' maye Qanatamnaxala'ai, qaumachiỹo'ot da qarquiyaqteỹaxaqui, qaq saishet da nachenaua naua qorogolli' da qancolaxacheeta'alo! Cha'aye Ñimaye soxoraic, hualaxaunaxaic qataq choxonnataxanaxaic, qataq qaỹaloqchiguinguit da lalemataic. Qataq ỹataqta lta'araic da lauotaxanaqtaic, qataq huo'o da nqui'ic da ỹan ca lhuaxanaxanaxac.

¹⁴ Cha'aye saiuena'a da huo'o ca ntogotaxac nache qami' ichoxore'n, nache qami' taleguete naqa'en ca lqouagaxanaqtaic, nache huo'o naqa'en ana ala na nañiguishec da yaqto' nachetaqtaxanaqte, qataq na lataxa da yaqto' qoỹanot Ñim Nataxala' maye Qanatamnaxala'ai.

¹⁵ ¡Ña qauashiiyigui qome ana nasheerepi da huaña na Sión, ña qauauo'oi ca qaraponaxaqui qataq qanqouaqchichi qome,

¹⁶ nache qauauo'oi ca laponaxac na nhuo' le'ecpi maye lalamaxat Ñim Lo'onatac 'Enauacna, qataq nqui'itaxatta qanqa'eñi qome namayepi, qataq qauỹaxañiuga na nqueroxonecpi, ñaqpiolec qataq nam ñaq qaillepaxaatacpi, qataq qaupa'axañiiuec cam cheta'ague da huaron nataqa'en acam lhua!

¹⁷ Qataq nỹen qome na ntaxaỹaxanaxanecpi maye lo'onataxanaxanecpi Ñim Nataxala', da huaña ye ñegueuo maye taỹaua'a añi nca'atoxonaxalate, nache 'eeta': «'Am Nataxala', ña 'auapalaxat qome na lasouaxashetpi ne'ena 'aralamaxat nhuo' le'ecpi, qataq qaica ca 'auashenem da ỹe'eetac nam 'aralamaxatpi, yaqto' na ỹotta'a't shiỹaxauapi saishet da choche ilattac qome namayepi. Qataq nam laỹepi ỹotta'a't shiỹaxauapi saishet qome da 'eeta': ¿Ca neta'ague cam Natamnaxala' namayepi?»

¹⁸ Huaña nache Ñim Nataxala' ỹachaxan da lauoche ne'ena na'alhua, nache ichoxoren ne'ena lalamaxat nhuo' le'ecpi.

¹⁹ Nache Ñim Nataxala', 'enapec: «Aỹem samaxa qome namayepi na trigo, lataxa qataq na aceite, nache ivitta'a ñaqa'en da ỹataqta comaraxaicpi namayepi, qaq nam ỹotta'a't shiỹaxauapi saishet qome da sashenem da ỹe'eetac namayepi.

²⁰ Qataq seltaxaneguet qome namayepi na npa'aguenaxauapi maye chegaqa'ague da sheu', nache samaqauga ye toolec 'alhua. Qaq nam huotaique da dataỹa'aguet namayepi qalaq 'ogaxaicpi ñaqa'en huangui aso Auaxai Leuaxai, qaq nam chegaqa'ague da l-laq namayepi, nache huangui ñaqa'en aso Auaxai Mediterráneo. Qaq nam lo'ocỹaxac namayepi, nache ỹataqta nchega na laita. ¡Qaq cha'aye ỹataqta lta'araic qome cam so'ot!»

²¹ Qaq 'am 'alhua, 'auamachiguiñi qome, cha'aye ỹataqta lta'araic qome nam ỹo'otpi Ñim Nataxala'.

²² Qataq saishet da qayi'iitac qami' shiguiỹacpi no'onaxa le'ecpi, cha'aye nsalauec qome na 'auaqpisat, qataq huo'o qome ana ala ana qo'oipaqpi, nache huo'o ana ala ana hiigopi qataq ỹaguec ana ala ana uvapi.

²³ ¡Qataq qauamaichiguiñi qome qami' maye qarma'ai na Sión, qataq qaỹa'añiitacot qome da qantonaxaqui Ñim Nataxala' maye Qanatamnaxala'ai! Cha'aye Ñimaye ipacchigui qome naqa'en ye laloxoqui na auot, yem latomaxa qataq nauoxo, nache 'eeta'am soua hua'au' na'axa'te.

²⁴ Huaña qome, nache choche huañi na ala na trigo, qataq nlaqchigui nam laỹe'pi na lataxa qataq na aceite.

²⁵ Qaq aỹem qami' she'eguelaxatema qome som deqat ala na nañiguishe, maye chec co'ollaxa na qoche'l, pelgaxanaq qataq ana shiiquioxoipi, maye ỹamaxashecpi da qami' ñamaxalo co'ollaxa.

²⁶ Qaq nache qaviyeeta'a da ỹataqta qami' comaraxaiqa, huaña, nache qavio'oxoreñi da le'enaxat Ñim Nataxala' maye Qanatamnaxala'ai, maye qami' ỹo'oteque nam ỹataqta lta'araic maye ỹo'ot da na'aalaxa. Huaña nache ne'ena ỹalamaxat nhuo' le'ecpi, saishet qome da huo'o ca na'aloxootaique.

²⁷ Huaña qome, nache qauaỹachiñiita da qami' salectaiguilo qami' Israel le'ecpi, qataq da nachaỹemta Aỹem Nataxala' maye Qanatamnaxala'ai, nache qaica ca lỹa. Huaña qome nache saishet da qaltaq huo'o ca na'aloxootaique ne'ena ỹalamaxat nhuo' le'ecpi.

Cam na'a'q maye lviraxaqui som lta'araic la'añaxac Ñim Nataxala'

²⁸ Qaq qom ime de'era, nache talec ñaqa'en 'enauac na shiỹaxauapi ca lta'araic ỹa'añaxac, huaña, nache nam qaỹa'alquipi qataq ana qaỹa'allipi, huo'o qome nam ỹa'axata'api, qataq nam ỹa'axaiquipi huo'oi qome naua lchoxonaxaco, qataq na nsoxoppi huo'oi qome naua l-loxoco.

²⁹ Qaq que'ecaua na'axa'te, nataqa'en talec qome ñaqa'en ca lta'araic ỹa'añaxac, nam namaxashecpi qataq ana namaxashepi,

³⁰ qataq sachaxan qome ca lta'araic maye ỹo'ot da na'aalaxa na piguem qataq ana 'alhua, qataq ca ntago'q, norec qataq ca ỹashequitcheguem nmala'q.

³¹ Nache 'om añi nala', qaq ñi ca'agoxoic qalaq 'eco' ntago'q da lo'oxoỹaxac, qom ñaq taỹa'a ca na'a'q maye lviraxaqui Ñim Nataxala', cam na'a'q maye ỹataqta 'amaqtaqaic qataq chaqaic.

³² Qalaxaye 'enauac nam iỹaxaatega da le'enaxat Ñim Nataxala' nca'alec qome, cha'aye añi qasoxonaxa Sión qataq ye Jerusalén, huaña qome da nca'alaxa, cha'aye maiche la'aqtac co'ollaxa Ñim Nataxala'. Qaq que'eca lca'alaxaicpi, nache ỹalectaigui qome nam lca'aguishecpi Ñim Nataxala'.