Jeremías 9 - La'aqtaqa Ñim Lo'onatac 'Enauacna 2013

¹ ¡Da iyaxa da naua ỹa'ai'te, 'eeta'ama ca mpaxaatasheguem 'etaxat, qataq 'eeta'am ca la'auaxac da yaqto' ñeỹeetac ye na'a'q qataq ye pe, souaxat so leuaxaicpi na ihuo' le'ecpi!

² ¡Da iyaxa da huo'o ca ima' yem toolec 'alhua, da yaqto' soota'a nache qaỹoqtaique ñaqa'en na ihuo' le'ecpi! Cha'aye 'enauac namayepi da saỹalaq, namayepi ỹataqta 'etaxaloxoicpi.

³ Namayepi ỹataqta lhuotta naxa da ỹa'axat da natenataxanaxac, 'eeta'am da ỹauota'a ca lchecnec da ỹaỹenec aca lchecna. Ne'ena 'alhua huetalec da natenataxanaxac, qaq qaica dam 'eesa lataxac, namayepi ỹataqta nquigaxattauec da qauem, qaq Ñim Nataxala', 'enapec: «Namayepi saishet da Aỹem ỹauatton.»

⁴ Mashe qaica ca naquitto'ot ca nauochaxaua qataq ca lqaỹa, cha'aye 'enauac nam nqaỹañecpi natenachetta'a't, qataq nam auochaxauapi qalaq ỹasaqteguelec na qauem na laỹepi.

⁵ Ñi 'oonolec qalaq ỹe'enai' ñi maiche lỹa, nache qaica ca ỹa'axattac ca 'eesa. Mashe nlaqchigui da latenataxanaxac cha'aye qauemaicpi qataq saishet da

⁶ naralaxat da lataxac. Ñim Nataxala', 'enapec: «¡Namayepi nlaxagui da natenataxanaxac, qataq qaica ca qairen! Na ỹalamaxat nhuo' le'ecpi aỹem saỹauatton.

⁷ Qaq ỹoqo'oye Aỹem Nataxala', maye Qaica ca Seqalanapec, shenapec: ¿Negue'to' ca lỹa lataxac da so'otec na ỹalamaxat nhuo' le'ecpi? ¡Qomye nacherata da sasaxangui ca norec da yaqto' seỹo!

⁸ Na lachaxat namayepi qalaq 'eeta'am ana checnapi maye qanlem, namayepi ỹa'axattac nam saq 'enpi. Da iquin na nauochaxauapi qalaq ỹachaxana da lauotaxanaqtaic, qalaxaye choche nqoviitac.

⁹ ¿Qaq peta'a saishet da sauo'o ca nhuaxanaguec souaxat de'era? Cam nhuo' le'ecpi da 'eetec de'era, ¿Peta'a saishet da sanem cam naigui nam ỹo'otpi? Qaq 'era da la'aqtac Ñim Nataxala'.

¹⁰ Qanỹeñi qataq qana'alaqaitapiguiñi souaxat ana qasoxonaxapi, qauo'oñi ca choxoraqta no'onec souaxat nam nquia'axanataxanaqa'pi, cha'aye mashe ỹavicta, qataq qaica ca quetalec namayepi, qataq mashe saishet da qaỹa'aqtega ca nnoinaxac na shiguiỹacpi, qataq ivira'a na maỹopi qataq na shiguiỹacpi da datauec.

¹¹ Aỹem so'otec qome na Jerusalén da nlachiguiñi, nache lanataqa' qome na qa'alaqpi, qataq she'eguelaxata da toolec na huaqta'a't nỹecpi maye ỹotta'a't na nañalo ye Judá nache qaica qome ca hueta'a yemaye.»

¹² Qaq ¿negue't cam huo'o ca laỹaanec da yaqto' ỹaỹaten de'era? Qataq ¿negue't ca ỹauattonaxanaxanec co'ollaxa de'era Ñim Nataxala', da yaqto' camaye ishet da ỹa'axatem na laỹepi? ¿Ta'ainco' da nlachiguiñi ne'ena 'alhua, qataq deqaqta 'eeta'am ca toolec 'alhua, nache qaica ca ishet da quetalec?

¹³ Qaq Ñim Nataxala' ỹasat, 'eeta': «'Enauac ne'enapi da huo'o, cha'aye nam Israel le'ecpi ca'ai nam ỹapaxaguenataxanaxacpi maye sanem co'ollaxa, nache saishet Aỹem ỹalaxaguet qataq saishet da napaxaguena da ỹo'ot.

¹⁴ Nacherata da qaramchigui nache quetegueto naua maiche lhuennataxaco da lquiyaqteỹaxac, nache ỹo'oxoreetac nam saq 'en atamnaxala'pi, nache quetelec da lapaxaguenataxanaxac co'ollaxa som hua'au lta'alpi.

¹⁵ Qaq ỹoqo'oye aỹem Nataxala' maye Qaica ca Seqalanapec maye natamnaxala' na Israel le'ecpi, sheeta': Aỹem sequia'axanec qome namayepi ca nallec maye ỹataqta chem, qataq ñeỹomaxangui ca 'etaxat maye huo'o na lalegue qanlem.

¹⁶ Qataq taỹa ñaqa'en da yaqto' ỹalectaigui nam ỹotta'a't shiỹaxauapi maye so hua'au lta'alpi saỹauatton co'ollaxa, qataq so'ot da qairota'a na ỹeelonec da qaicaatac choche ivitta'a da qaica ca no'onañi.»

¹⁷ Ñim Nataxala' maye Qaica ca Ỹaqalanapec, 'eeta': «¡Ñaq qana'axaỹaxañiichiguiñi qataq ñaq qauỹaxañiuga na 'alpi maye lo'onataxanaxac da ỹo'ot da laquicoxo.»

¹⁸ ¡Aja', sanaỹaloxon qome da anac, nache ỹauo'o ca laquicoxo souaxat qomi', qataq ỹo'ot da nlaxaguilo naqa'e'n naua qara'ai'te na qarache' qataq naua qara'ai lapo'ote ipaxaaleguete souaxat da qannoinaxac.

¹⁹ Cha'aye ye Sión chemaqtega da na'alaxac souaxat da qui'ic, ¡'Agai, seviraqta'aguet da qomi' qanlaxaayiñi! ¡Ỹataqta lta'araic da qane'enaguec maye souaqaigui! Nache qomi' iuen da qolaqa'ai na qana'alhua, cha'aye na qarma'pi ỹataqta nlachiguiñi.

²⁰ Qami' 'alpi, ñaq qana'axaỹaxañiỹa da la'aqtac Ñim Nataxala', ñaq qana'axaỹaxañiichigui da la'aqtaxanaxac Ñimaye. Ñaq qauapaxaguiñic da nnoinaxac ana qaỹa'alepi qataq ana nauochaxauapi ỹapaxaguenec da laquicoxo, 'eeta':

²¹ «Da nleuaxa nvitalo naua qarma'ate, qataq taigui na qarma' lta'araicpi, qataq huangui naqa'en na nqa'aic da ỹalauat na ñaqpiolec qataq huaña naqa'en na nlagaqa'pi da ỹalauat na nsoxoppiolec.

²² Qataq huetaiya' naqa'en da lo'ocỹaxac na shiỹaxauapi, 'eeta'am na la'atec na shiguiỹac da huetalec na no'onaxa, qataq 'eeta'am na nañiguishec ala da naañi naqa'en cam deqataxaatac, nache qaica ca ishet da laỹona't.» Qaq 'era da la'aqtac Ñim Nataxala'.

²³ Ñim Nataxala' 'enapec: «Saishet qome da na'amaqten ca ỹaanaxanaxaic souaxat da huo'o da laỹaanec, qataq ca 'añaxaic souaxat da huo'o da la'añaxac, qataq ca sallaxanec souaxat da huo'o da lsallaxa.

²⁴ Qaq da huo'o ca huotaique da na'amaqten qalaq iuen da na'amaqten souaxat da Aỹem ỹauatton, qataq ỹaỹaten da nachaỹem maye Aỹem Nataxala', maye sauota'a da isoxoyec da so'onataxaatac ana 'alhua, qataq so'ot da nalochiguiñi lataxac qataq da no'on lataxac, cha'aye nachera dam saỹamaxareeta. Qaq 'era da ỹa'aqtac, Aỹem Nataxala'.»

²⁵ Ñim Nataxala', 'enapec: Anacta na na'a'q maye huaigui da sauo'o ca nhuaxanaguec 'enauac na nhuo' le'ecpi maye ỹo'ot na na'anaxat da lo'ocỹaxac:

²⁶ Ye Egipto, Judá, Edom, Amón qataq ye Moab, qataq 'enauac nam netalec ye toolec 'alhua maye npetec naua lqaic laỹel. Cha'aye 'enauac yi'iye nhuo' le'ecpi qataq nataqa'en 'enauac nam nhuo' Israel le'ecpi, da ỹataqta 'eesa da saq ỹataq na natamnot.