Jeremías 7 - La'aqtaqa Ñim Lo'onatac 'Enauacna 2013

So Jeremías da'aqtaxan co'ollaq huaña aso atamnaxaqui

¹ Ñim Nataxala' detaxaỹot so Jeremías, nache 'eeta':

² «Qonaña qome ye ñegueuo añi atamnaxaqui maye lalamaqte Ñim Nataxala', qaq nache huaña yemaye da 'aua'axat de'era na'aqtac, qoneta': 'Enauac qami' maye qoviita'a na Judá maye qananaiteua'a naxa ne'ena lasom da qavio'oxoyeñi Ñim Nataxala', ñaq qana'axaỹaxañiỹa dam la'aqtac

³ Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi maye, 'eeta': Qano'onaxache da qarataxaqui qataq dam qaro'onataxanaxaqui, nache Aỹem qami' sa'aqta'alo qome da qoñiitalec ne'ena 'alhua.

⁴ Saishet qome da qaupi'iitega nam qami' ỹatenachetta'ape naxa maye, 'eeta': ¡'Ena na netaña ana atamnaxaqui maye lalamaqte Ñim Nataxala'! ¡'Ena na netaña ana atamnaxaqui maye lalamaqte Ñim Nataxala'! ¡'Ena na netaña ana atamnaxaqui maye lalamaqte Ñim Nataxala'!

⁵ Da qano'onaxache da qarataxaqui qataq dam qaro'onataxanaxaqui, qataq da ñi 'oonolec da qoñiita ỹo'otec ca no'on lataxac ca lỹa,

⁶ qataq da saishet da qanhuoye nam chegaqauecpi, nam saploqpi qataq ana pa'aipi, qataq saishet da qaualauache na qaica ca ỹasouaxat maye hueta'a ne'ena, qataq saishet da qavio'oxoyeñi nam laỹepi atamnaxala'pi, maye ishet da qami' na'aqche't,

⁷ qaq huaña nache, Aỹem qami' sa'aqta'alo da qoñiitalec ne'ena 'alhua, nam 'alhua maye sanem co'ollaxa som hua'au qarta'ailpi da yaqto' nache 'eetai' da lalamaxat.

⁸ Qalaxaye qami' qaupi'iitegalo naua na'aqtaqa, maye tenataxanaxaiqa maye qaica ca naiguilo.

⁹ Nache qaucacheetac, qaualaataxañiitac, qataq qancacheetague' ana sa qarhuai, qataq qaỹa'añiitac nam saq'en qara'aqtaqui qataq qaỹa'añiitacot ñi Baal nam qarchenaxanaxache maye ama na laita, qataq qavio'oxoreñiitac nam atamnaxala'pi maye saishet da qauauattoñi,

¹⁰ qaq ime naxa nache qauanaiua'a ana atamnaxaqui maye aỹem qoỹanot co'ollaxa, da yaqto' aỹem qanachaachiỹot. Qaupi'itaxañiitega da qanviyeeua'a ne'ena nache qanca'alleeuec, qataq qaupi'itaxañiitega da ishet da nache qoquiito'ot da qauo'ocheetac ne'ena lataxacpi maye saishet da sesheteguet.

¹¹ ¿Qaq, qaupicheetega peta'a, da ana'ana atamnaxaqui maye Aỹem qoỹanot co'ollaxa da lma' na cachaxaicpi? Aỹem sauaachigui 'enauac de'era. Qaq 'era da ỹa'aqtac Aỹem Nataxala'.

¹² Qanqo'oñiỹa qome ye atamnaqa' maye naña ye Siló, yem hua'auchiguiñi lleca'aguishec da yaqto' ỹanataqa', nache qaumichiñi dam so'otec co'ollaxa yemaye souaxat nam qauem maye ỹo'ot nam ỹalamaxat nhuo' Israel le'ecpi.

¹³ Qaq na'aictaxa da qalota naxa da qami' sachaxanalo da qano'onaxache da qarataxaqui, qalaxaye qami' saishet da aỹem qaualaqaiguet, qataq saishet da aỹem qauasacheeguet. Qaq 'era da ỹa'aqtac Aỹem Nataxala'.

¹⁴ Qaq ỹoqo'oye dam so'otec co'ollaxa so atamnaqa' maye huaña ye Siló, qaq nache sheetec nataqa'en qome añi atamnaxaqui maye aỹem qoỹanot co'ollaxa, añim qami' sanema co'ollaxa qataq som hua'au qarta'ailpi, añim qaupi'iitega naxa.

¹⁵ Nache Aỹem qami' so'oldauec qome, 'eeta'am co'ollaq da so'orauec so qarqaỹaipi maye chegoxoguet so Efraín.»

So Israel le'ecpi saishet da ỹalaq

¹⁶ «'Am Jeremías, saishet qome da 'anatameelec ne'ena nhuo' le'ecpi, qataq saishet da aỹem 'anachoxoreetacot, qataq da aỹem 'auỹaxaatacot da 'auỹaxaateguelec namayepi, qataq saishet da Aỹem 'avi'eguelaqto'ot, cha'aye Aỹem saishet da 'am sa'axaỹa qome.

¹⁷ ¿Peta'a sa 'aula'a nam ỹo'ottac namayepi, da huaña nam huaqta'a't nỹecpi maye ỹotta'a't naua nañalo ye Judá, qataq na nqa'aicpi na Jerusalén?

¹⁸ Na ñalaqpi qalaq laỹona't na 'epaq maye nle' lashec, qaq na lta'alpi qalaq ỹe'eraxatoigui na norec, qaq na 'alpi qalaq ỹo'ot na ldaqnec da yaqto' ỹo'ot ana lauole, nache ỹanot añi atamnaxalate, maye le'enaxat Nate'e maye neto'ot na Piguem. Nache aỹem inogoqchet namayepi, cha'aye nataqa'en ỹanot na lataxa nam atamnaxala'pi maye ỹaqa'a.

¹⁹ Qalaxaye saishet nachaỹem da Aỹem isheueetac, maye namayepi maiche nsheueetapeguela't da yaqto' maiche pa'aỹo'ot da la'agaxa. Qaq 'era da ỹa'aqtac Aỹem Nataxala'.

²⁰ Qaq ỹoqo'oye Aỹem Nataxala', ỹataqta 'eesa qome da secorelec da inogoxonaxac ne'ena nma' qataq nam shiỹaxauapi, qataq nataqa'en na shiguiỹacpi, qataq na qo'oipaqpi maye huetauga na no'onaxa, qataq ana ala na nañiguishec. Qaq 'eeta'am qome ca norec maye saishet da 'om.»

²¹ Ñim Nataxala' maye Qaica ca Ỹaqalanapec, maye Natamnaxala' na Israel le'ecpi, 'enapega na lalamaxat nhuo' le'ecpi, 'eeta': «Qaỹa'añiiuo qome 'enauac na qarachetaqtaxanaxache maye imauec da qaỹavigaxatta, maye huotaique da qaỹa'añiiuo, ime nache qollequi que'eca lapat.

²² Qalaxaye co'ollaq ñeqateeguesop ye Egipto som hua'au qarta'ailpi, qaq saishet da huo'o ca ỹa'aqtac, qataq ỹamaxasoxonaxac da qaỹauo'o aca nachetaqtaxanaqte maye qaỹavigaxatta qataq ca lỹa nachetaqtaxanaxat.

²³ Qaq nacherata da samaxalec, da Aỹem ỹalaxaguet, qaq da 'eetec de'era, qaq nachaỹem da Aỹem Natamnaxala', qataq nache ỹalamaxat se'eso nhuo' le'ecpi. Qaq shenapega somayepi da ỹalaxalec dam samaxalec yaqto' no'on da llecỹaxac.

²⁴ Qalaxaye saishet da Aỹem ỹalaxaguet qataq saishet da Aỹem qocha'a, nacherata da saỹalaq nache queueegue da qauem lquiyaqteỹaxac. Qaq saishet da aỹem ñe'eguelaxa, nacherata da aỹem ca'ai.

²⁵ Qaq chegoqchiguiña co'ollaq so qarta'ailpi ca'ai ye Egipto, nache choche ivitta'a nagui, da Aỹem qami' ñamaxalo naxa so ỹamaxashecpi maye ỹa'aqtaxanaxanecpi.

²⁶ Qalaxaye qami' saishet da Aỹem qaualaqaiguet qataq saishet da aỹem qauqocheetega, nacherata da ỹapac saqaualaqai, qanapacỹalec som hua'au qarta'ailpi.

²⁷ Qaq 'am Jeremías, 'aua'axat qome 'enauac de'era, na'aictaxa da saishet da 'am qaiqocha'a, qataq 'aua'alaqtalec namayepi na'aictaxa da 'am saỹasateguet.

²⁸ Qonapega namayepi, qoneta': ‹'Ena na shiỹaxauapi maye saishet da ỹalaxaguet Ñim Nataxala' maye Natamnaxala', qataq sa ỹaỹamaxaren da qaỹaỹamaxaañi da lataxac. So huesota lataxac mashe imauec da qaica saishet da huetaigui na alap.›»

²⁹ ¡'Am Jerusalén, 'auchec qome na 'araue nache 'auasaxauec! ¡Qataq 'auo'on ca no'onec maye choxoraqta, da hualec ana lcomaraxalatepi maye toolec! Cha'aye Ñim Nataxala' mashe dalemataỹa na 'am hueta'a shiỹaxauapi, mashe ca'ai qataq saỹaconeguet.

³⁰ Ñim Nataxala', 'enapec: «Na shiỹaxauapi na Judá, huo'o dam ỹo'ot maye sa saỹamaxaren, namayepi ỹanaigui añi atamnaxaqui maye aỹem qoỹanot co'ollaxa nam nqaigaxat atamnaxala'pi, nache nshepaxanaqchet.

³¹ Qataq ỹanangui so ca'amegue ye Ben Jinón, aso nca'atoxonaxalate maye lalamaqte so atamnaxala' Tofet da yaqto' ỹavigaxat so llalaqpi qataq aso llalepi, dam saishet da samaxalec co'ollaxa, qataq saishet da iuennataxa co'ollaxa.

³² Qaq ỹoqo'oye Aỹem Nataxala', shenapec da anacta ca na'a'q da yi'iye 'alhua saishet qome da qaỹamata'ac da le'enaxat Tofet, qataq ca'amegue Ben Jinón, nacherata da qaỹamata'ac, Ca'amegue Nalaataxanqa'. Qaq ye Tofet qalaq qailareña qome na leuaxaicpi souaxat da qaica ca ndaqa'.

³³ Qaq da lo'ocỹaxac ne'ena shiỹaxauapi, qalaq aloq qome na maỹopi maye chec na lapat, qataq na shiguiỹacpi maye no'onaxa le'ecpi, qaq nache qaica ca ishet da ỹo'orapegue' namayepi.

³⁴ Nache so'ot qome na huaqta'a't nỹecpi ye Judá, qataq na nqa'aicpi ye Jerusalén, da deqat na no'onecpi maye ỹo'ot da namaicỹaxac da huo'o ye naponaxac, qataq na no'onecpi da qaỹo'onaxaalec da naronaxac, qaq 'enauac ne'ena 'alhua ỹe'eguelaxa qome da toolec.»