Jeremías 6 - La'aqtaqa Ñim Lo'onatac 'Enauacna 2013

Na pa'aguenaxauapi coleesop ye Jerusalén

¹ Qami' maye qauachegoqoiguet so Benjamím, ¡qanqañoxochiiñi qome qoquiỹa'ai na Jerusalén! Qauashiiyigui ana qarasheerei qom huaña ye Tecoa, qataq qaỹa'añiỹasheguem aca qara'anaxanaqchi da huaña ye Bet Haqueren, cha'aye chegaqa'ague qome da sheu' ca lta'araic qauem qataq cam ilaxachigui 'enauacna.

² Aỹem mashe yaqta'a da selaxachigui nam 'onaxaic qataq huo'o da lyac huaqta'a't nỹecpi ye Sión,

³ Qaq anaỹa qome yemaye na qagueta lo'opi lỹatac ana lalo qaguetapi nache hua'a na loigue yemaye, qaq ñi 'oonolec maiche lca'aique cam huaña da nmatec.

⁴ Nache 'enapec qome: «¡Qanaỹamaxache da yaqto' seloquiaxai' namayepi! ¡Qauanaqui qome yaqto' seloquiaxanaq namayepi qom na'a'q laiñi! Qalaxaye, ¡aicoue! Ye mashe avit, qataq na lpaqal mashe qaỹoqteueegue.

⁵ ¡Qaq ỹoqo'oye no'on da seloquiaxanaq na pe, nache selaxataxagui ana lalloxolatepi namayepi!»

⁶ Ñim Nataxala' maye Qaica ca Ỹaqalanapec ỹan de'era lamaxasoxonaxac, 'eeta': «¡Qauchiqui aca qo'oipaqpi, nache qauo'oche ca ñeguisheguempi da yaqto' qauloquiaxañi ye Jerusalén! Yi'iye huaqta'a't nỹecpi qaỹauo'o qome da nhuaxanaguec, cha'aye nlaqchigui da qaica ca qairen.

⁷ Ye Jerusalén qalaq mpa'axaatasheguem na qauem, 'eeta'am aca nshere da mpa'axaatasheguem na 'etaxat. Qaica ca lỹa qaỹa'axaỹa, nacherata da loquiaxac qataq da qaica ca qairen, qaica ca lỹa sela'a da huetalec yemaye nacherata da nque'emaxa qataq da qui'ic.

⁸ 'Anaralaxat da 'arataxac 'am Jerusalén, cha'aye da saishet da qonetec de'era, nache salemata nache 'am sheca'ai, Qataq so'ot da 'am toolec, nache qaica ñaqa'en ca netalec 'am.»

⁹ Qaq Ñim Nataxala' maye Qaica ca Ỹaqalanapec, 'enapec: «Na Israel le'ecpi maye lca'alaxaicpi qalaq qanmittaique qome 'enauac na pa'aiguelo. 'Eeta'am da qanmittapigui aca uva lcouepi da qanmittaique aca ala, choche ivitta'a da qaca aca no'onañi.»

¹⁰ Qaq aỹem shenapec. «¿Negue't ca aỹem hua'axaỹa da sa'axatem qataq sanem de'era na'axaỹaxac? Ye namayepi ỹapotaguilo naua ltela lauaco, nache saishet da hua'aqa, namayepi ỹe'eeta'ape naua 'ara'aqtaqa qataq saishet da ỹamanegueta.

¹¹ Qaq aỹem nlaqchigui da 'arayeloxo 'am Ỹataxala', qaq mashe saishet da ñalo'oguet.» Nache Ñim Nataxala' aỹem 'enapega, 'eeta': «'Aucorelec da 'arayeloxo na ñaqpiolec maye huetangui na nqa'aicpi, qataq na nsoxoppiolec maye laỹootega't cha'aye qaỹaconeua'a qome da qaicoñe' na ỹalleppi qataq ana lhuapi qataq na ỹa'axaiquipi maye qaỹoqtegue da llaxa.

¹² Qaq na lma'pi, qataq na no'onaxapi qataq ana lhuapi, ỹaqa'a qome ca taỹot. Cha'aye aỹem ñauaxaỹaxaasheguem qome na ihuaq da yaqto' sauo'o ca nhuaxanaguec nam hueta'a ne'ena 'alhua. Qaq 'era da la'aqtac Ñim Nataxala'.

¹³ Qaq 'enauac na ỹepi qataq nam ñaqpiolec, nacherata da iuennatega da lcachaxac da chegaqaigui da lauegaxanaxac, na na'aqtaxanaxanecpi qataq na ntaxaỹaxanaxanecpi qalaq 'enauac da decachetac.

¹⁴ Qataq 'eetega nataren na lque'emaxapi na ỹalamaxat nhuo' le'ecpi, nache 'enapega, 'eeta': ‹Huo'o da qal-lagaxayequi, huo'o da qal-lagaxayequi› Qalaxaye qaica ca l-lagaxayec namayepi.

¹⁵ ¡Qaq iuen taxa da huo'o da la'agaxa da ỹo'ottac nam qauem maye seqaiga! Qalaxaye namayepi qaica ca la'aloxo qaq ỹoqo'oye qom sauo'o ca nhuaxanaguec namayepi nache huañi qome, 'eeta'am na laỹepi shiỹaxauapi. Qaq 'era da ỹa'aqtac Aỹem Nataxala'.»

Na Israel le'ecpi saỹalaq

¹⁶ Ñim Nataxala' 'enapega nam lalamaxat nhuo' le'ecpi, 'eeta': «Qanachaachingui na nqa'aicpi, nache qaumeenaxañi qataq qaunataxañic nam togoshaapec ñecpi, ca hueta'ague cam no'on nqa'aic nache qoquiigue camaye yaqto' qauanachiỹa ca qanmataxaqui.» Qalaxaye namayepi, 'eeta': «Saishet, saishet da saỹamaxarenaq da qolaxague.»

¹⁷ Ñim Nataxala' ỹauo'o co'ollaxa so lauanaxanaxanecpi, nache 'enapega nam nhuo' le'ecpi, 'eeta': «Qana'axaỹaxañiỹa ca la'anaxat ca lchec.» Qalaxaye na nhuo' le'ecpi, 'eeta': «Saishet, saishet da salaxasoxoguet.»

¹⁸ Qaq ỹoqo'oye Ñim nataxala', 'enapec: «Qami' ỹotta'a't shiỹaxauapi qana'axaỹaxañi qome, qauaỹaañiita qome da talec na ỹalamaxat nhuo' le'ecpi.

¹⁹ 'Am 'alhua, ñaq Aỹem 'ana'axaỹaxana: Aỹem ñanacot qome ca qauem da talec ñaqa'en ne'ena nhuo' le'ecpi, maye naigui nam qauempi maye lapaxañi, cha'aye sa ỹalaxagueta naua ỹa'aqtaqa, nacherata da ỹo'ota'n naua iqataxaco.

²⁰ ¿Ta'ainco' da aỹem qandoiua'a nam nchenaxanaxat maye qauachegoxochiỹa'a ye Sabá, qataq ana nañiguishe maye ama na laita maye qauachegoxochiỹa'a cam qaỹoqta 'alhua? Aỹem saishet sa saỹamaxarem nam qarachetaqtaxanaxache maye qauavigaxacheeta qataq na laỹepi.»

²¹ Qaq ỹoqo'oye Ñim Nataxala' 'enapec: «Aỹem so'otec qome ne'ena nhuo' le'ecpi da depoxolaxaañi qataq huañi. Na nta'alpi, na ñalaqpi, na nhuoreuapi qataq nam auochaxauapi 'enauac qome da ileu.»

²² Ñim Nataxala' 'eeta', da la'aqtac: «Yem qaỹoqta 'alhua maye pa'aigue da sheu', mashe naỹamaxattac da anac yem shiỹaxauapi maye 'añaxaicpi.

²³ Mashe nasoqta'a na lchecnecpi qataq na lainecpi; yemayepi ỹataqta qauemaicpi qataq qaica ca ichoxoreetac, da la'alaxac qalaq 'eeta'am da l-lamaxa aso auaxai, qataq netalec na lalo caipi. Qaq mashe lhuotta da iloquiaxan na Sión.»

²⁴ Qaq na shiỹaxauapi maye hueta'a ye Jerusalén, 'eeta': «Qomi' mashe qomi' nviralo da qara'axaỹaxac, nache dam qarcolanaxa qaica ca qara'añaxac naqa'en, huo'o da qarachetataic qataq da qanqui'ic, shenaqta'am aca 'alo da deco'otapigui'.

²⁵ ¡Saishet da qanqo'oñiuga na no'onaxa, qataq saishet da qoquiiguelo naua nqa'aico! ¡Cha'aye na qampa'aguenaxauaipi mashe na'atchiguiñi na lo'ogoxonaxat, qaq huo'o da lchec 'enauac na pa'aiguelo!»

²⁶ ¡Qami' ỹalamaxat nhuo' le'ecpi, qaỹa'añiiyiñi qome naua anogo maye sansattegueta, maye la'anaxat da qanqui'iqui, qataq qanviñingui qome na alo, qataq qaỹa'añiiyiñi naua anogo maye nasouaxaqui', qataq ỹataqta qanỹeñi souaxat da qaraquicoqoi, 'eeta'am da 'eetec da ileu ca 'oonolec ñalec, cha'aye cam qomi' ilaxachiguilo qome mashe sa qaỹaloq da anac da qomi' iloquiaxa'n!

²⁷ Ñim Nataxala' aỹem 'enapega, 'eeta': «'Am sepataxalec da 'avi'iguen na ỹalamaxat nhuo' le'ecpi. Qataq 'aumeteeta da yaqto' 'auaỹateeta cam lataxac namayepi.»

²⁸ «'Am Ỹataxala', 'enauac namayepi da ỹataqta saỹalaq, namayepi ỹataqta na'aqtaqa lo'o, qataq qauem da lataxac, ỹataqta qaramta napacalec ca lcat bronce qataq ca ndota't lcat.

²⁹ Ca nasaunaxanaxat da lta'araic na la'at nache ỹo'ot da ca norec quiguiñi naqa'en ca lcat, qaq namayepi qaica ca naigui da qaiỹo, cha'aye nam qauemaicpi saishet da imeuo.

³⁰ Qaq namayepi iuen da qaỹamata'ac ‹lsoche na lcat plata› cha'aye 'Am Nataxala' mashe 'aualat namayepi.»