Jeremías 5 - La'aqtaqa Ñim Lo'onatac 'Enauacna 2013

Da lasouaxashet ye Jerusalén

¹ Ñim Nataxala', 'enapec: Qoquiiguelo qome naua nqa'aico ye Jerusalén nache qaumichiñiita, qataq qanmiche ye nlagaqa', shapegueto' da qauanachiỹa cam ỹo'ottac da nalochiguiñi lataxac, qataq nmittaique dam 'eesa. Qaq da qauanachiỹa, nache Aỹem sechoxoren qome ye Jerusalén.

² Qaq na'aictaxa namayepi da 'enapec: «Nca'altauec Ñim Nataxala', qalaxaye de'era ỹan la'aqtac saq'en.»

³ 'Am Nataxala', 'Am 'anmittaique cam shiỹaxaua maye huesota da lataxac. 'Auauo'o co'ollaxa da nhuaxanaguec namayepi, qalaxaye saishet da iuet, qataq 'auachoxoren co'ollaxa, qalaxaye saỹaỹamaxaren da qaỹapaxaguen. Namayepi ỹataqta qaramchigui, napacalec ca coma', nache saishet da 'Am ỹe'eguelaxa.

⁴ Qaq aỹem seuennataxan, nache sheeta': 'Era da 'eetec na shiỹaxauapi da qaica ca ỹaỹaana'a, cha'aye saỹaỹaten cam 'eetapeguec Ñim Nataxala', qataq cam damaxasoxoolec Ñim Natamnaxala'.

⁵ Qaq huaña nache shenapec: Ñeqo'oneua'a nam shiỹaxauapi maye 'amaqtaqaicpi nache setaxaỹot qome cha'aye namayepi yo'oqta da ỹaỹaten cam 'eetapeguec Ñim Nataxala', cam damaxasoxoolec Ñim Natamnaxala'. Qalaxaye namayepi 'enauac da dataỹa'aguet Ñim Lo'onatac 'Enauacna, namayepi sanashen da ỹalaxaguet Ñimaye.

⁶ Qaq ỹoqo'oye na llonpi maye chegaqaigui na aviaq mpa'auec qome, nache ỹalauat namayepi, qataq na qa'alaqpi maye huetalec na toolec 'alhua qalaq icolaxattac qome namayepi, qataq na quiyocpi iloquiaxan namayepi qom hueta'a na lalamaxat huaqta'a't nỹecpi, qaq cam pa'auec namayepi, nache icolaxattac, cha'aye qalota na lasouaxashetpi qataq qalota da latenataxanaxac.

⁷ Qaq Ñim Nataxala', 'enapec: «¿Cam 'eeteco' da ishet da 'am sechoxoren souaxat de'era? Ye nam 'aỹa'alaqpi aỹem ca'ai, nache ỹaatacot da la'aqtac nam saishet da atamnaxala'pi. Aỹem sanem co'ollaxa da saqoue da lquia'axac, qalaxaye namayepi Aỹem saỹalaxaguet, nache imauec da nañaneguet da natameetacot na ỹaqa'a atamnaxala'pi.

⁸ 'Eeta'am ca caaỹo da mashe nvi' da lapaxaỹaxa, nache nỹeetai' da ilota'a aca ỹaqa'a 'alo.

⁹ ¿Qaq saishet peta'a da sauo'o ca nhuaxanaguec souaxat de'era? Cam nhuo' le'ecpi da 'eetec de'era, ¿Peta'a saishet da sanem cam naigui nam ỹo'otpi?

¹⁰ ¡Qaq cam mpa'aguenaxauapi namayepi no'on qome da inoxoneua'a, nache nlaxaañi ana lañiguishe uvapi, qaq na'aictaxa da sa imauec da nlaxaañi! ¡Qalaxaye ỹacagaxat qome ana lcouepi cha'aye anamayepi mashe saishet da ỹalamaqte!

¹¹ ¡Na Israel qataq na Judá ỹataqta saỹalaq! Qaq 'era da la'aqtac, Ñim Nataxala'.»

¹² Na Israel qataq na Judá, qaica naqa'en Ñim Nataxala'; namayepi 'enapec: «Qaica cam Lo'onatac 'Enauacna. Qaq saishet qome da qomi' taleguete ca qauem, qataq saishet qome da ñeque'etaxanaxagui ca alaataxac qataq ca nqouaxa.»

¹³ Na na'aqtaxanaxanecpi qalaq 'eeta'am ca la'at, cha'aye naua la'aqtaqa Ñim Nataxala' saishet da hueto'ot namayepi, qaq namayepi maiche talec qome nam ỹa'axattacpi.

¹⁴ Qaq ỹoqo'oye da la'aqtac Ñim Nataxala', Ñim Lo'onatac 'Enauacna maye Qaica ca Ỹaqalanapec, 'eeta': «Qaq cha'aye nam nhuo' le'ecpi nasaxauec de'era, nache Aỹem sanaigui qome na 'ap naua ỹa'aqtaqa qaq naua ỹa'aqtaqa 'eeta'ama qome ca norec, qaq ne'ena nhuo' le'ecpi qalaq 'eeta'am qome ca 'epaq maye nalonaxanaxat, qaq nache ỹavigaxatta qome namayepi ca norec.»

¹⁵ «'Am Israel, 'am ñauega qome da yaqto' 'am dataỹa'aguet cam nhuo' le'ecpi maye qaỹoqtegue ca chegaqa'ague, cam nhuo' le'ecpi maye ỹataqta 'añaxaicpi qataq togoshaapecpi, qataq sa 'auaỹate'n naua la'aqtaqa, nache saishet qome da 'auaỹaten cam nasaxauec. Qaq 'era da la'aqtac Ñim Nataxala'.

¹⁶ Qaq camayepi 'enauac da 'añaxaicpi alaataxaicpi, nam lo'ogoxonaxatpi qalaq naigui da nleuaxa.

¹⁷ Qaq camayepi chec qome na 'añiguishec ala qataq nam 'oq, qataq ỹalauat qome na 'aỹa'alaqpi ỹalleppi qataq ana 'aỹa'alepi 'alpi. Qataq chec ana 'arelopi qaguetapi qataq na huacapi, qataq ana 'añiguishe uvapi, qataq ana hiigopi. Qataq irolec qome nam lo'ogoxonaxatpi da ilaxachigui na huaqta'a't nỹecpi, nam qampaxattaua'a maye 'aupe'etega naxa.»

¹⁸ «Qalaxaye que'eca na'a'q, saishet qome da imauec da qami' selaxachiguilo. Qaq 'era da la'aqtac Ñim Nataxala'.

¹⁹ Qaq namayepi qom 'am inat, da 'eeta': ¿Ta'ainco' da qomi' ỹo'oteque 'enauac de'era Ñim Nataxala' maye Qanatamnaxala'?, qaq 'am qonapec qome: ‹Qaq cha'aye dam 'eetec da qoquiỹa'ai Ñim Nataxala' nache qauo'onataxañiitacot nam atamnaxala'pi maye chegaqauec da huaña na maiche qana'alhuai, qaq nache 'eetec nataqa'en da qauo'onataxañiỹot qome nam shiỹaxauapi maye chegaqauec da huaña ca ỹaqa'a 'alhua.›»

Qaiqata na Israel le'ecpi

²⁰ «Qaua'axachem de'era nam chegoxoguet so Jacob, qataq qoñiỹapega na hueta'a na Judá, qoñeeta':

²¹ ‹Ñaq qana'axaỹaxañiỹa de'era qami' nhuo' le'ecpi maye qaica ca qarauattonaxanaxaqui, qataq qaica ca qauaỹaañiỹapec, cha'aye huo'oi naua qara'ai'chilli' qalaxaye saishet da qanauañiiñi, qataq huo'oi naua qartelai lauacolli' qalaxaye saishet da qaua'aqai.

²² Qaq Aỹem Nataxala', shenapec: ¿Saishet peta'a da huo'o ca shenec qanqa'eñi? ¿Saishet peta'a da qaviloxolli da aỹem qauataito'ot? Aỹem so'ot co'ollaxa na delecpi da loga'tpi ñaqa'en ana auaxai, nam loga'tpi maye ana auaxai saishet da napacalec. Qaq na'aictaxa da dauaxan ana lapaxa qataq dellimigui qalaxaye saishet da napacalec yi'iye loga't.›

²³ Qalaxaye qami' qaramachiguilo naua qarquiyaqtelli' qataq saqaualaqai, Aỹem qoquiỹa'ai co'ollaxa nache qoqui.

²⁴ Saishet da qauennataxañi qataq da, qoñiita': Huo'o naq 'enec ñaqa'enaq Ñim Nataxala' maye Qanatamnaxala', cha'aye qomi' namaxalo naxa na auot maye huaigui yem cotap qataq ye nauoxo, qataq ipacchigui naqa'en ye laloxoqui da ñeqataq na ala na qorañiguishec.

²⁵ Qalaxaye na qarasouaxashechi ỹaqataqchet 'enauac de'era, nache saishet da qanque'etaxañichigui nam no'on maye chegaqaiguipi damaye.

²⁶ Cha'aye ne'ena ỹalamaxat nhuo' le'ecpi, huo'o na ỹalleppi qauemaicpi, maye 'eeta'am ca nqoviitac na qoỹopi da ỹauo'o ana lqoinapi da yaqto' loxonec na shiỹaxauapi.

²⁷ Naua lma'ate qalaq nlaqchiguilo na lcachaxatpi, 'eeta'am aca laỹe' na qoỹo da nlaqchigui qanqa'en. Qaq 'era da 'eetec namayepi da ivira'a da 'añaxaicpi qataq sallaxanecpi,

²⁸ qataq chaxaraicpi, qataq ño'oxonnaxaicpi. Nam qauem maye ỹo'ottacpi qalaq qaica ca loga't, qataq saishet da ỹo'otec ca nalochiguiñi lataxac nam saploqpi, qataq saishet da iueelec nam choxoraqpi.

²⁹ ¿Qaq saishet peta'a da sauo'o ca nhuaxanaguec souaxat de'era? Cam nhuo' le'ecpi da 'eetec de'era, ¿Peta'a saishet da sanem cam naigui nam ỹo'otpi? Qaq 'era da la'aqtac Ñim Nataxala'.

³⁰ Ne'ena 'alhua ỹataqta chaqaic qataq huo'o da lchec dam huetalec namaye.

³¹ Nam na'aqtaxanaxanecpi qalaq saq'en nam la'aqtaxanaxacpi qataq na ntaxaỹaxanaxanecpi maiche ỹoiqueetac da lo'onataxanaxac, ¡Qaq nam ỹalamaxat nhuo' le'ecpi nachera dam ỹaỹamaxareeta! Qalaxaye ¿cam qoñiitec qami' qom qami' nvitalo ca laloqo' de'era?»