Jeremías 49 - La'aqtaqa Ñim Lo'onatac 'Enauacna 2013

Qaỹa'axataxa dam talec qome na amoniitapi

¹ Qaq 'era da la'aqtac Ñim Nataxala' da ỹa'axata'a dam talec qome ye Amón, 'eeta': «¿Ca hueta'ague ca llalaqpi so Israel? ¿Ca hueta'ague cam talec qome na lalamaxatpi? ¿Ta'ainco' ñim atamnaxala' Milcón da lalamaxat nagui ye Gad? ¿Ta'ainco' na amoniitapi da netaigui na huaqta'a't nỹecpi maye lalamaxatpi na israel?

² Qaq ỹoqo'oye Aỹem Nataxala' da ỹa'aqtac, 'eeta': anacta ca na'a'q maye huaigui qome da so'ot da na huaqta'a't nỹecpi maye lalamaxat na amoniitapi maye lma' ye Rabá, hua'axaỹa qome ca na'alaxac da qaỹa'alaxalec da alaataxac, nache ỹe'eguelaxa qome da lapoosheguem, nache na huaqta'a't nỹecpi maye ỹotta'a't naua nañalo ỹavic qome. Qaq huaña qome nache na Israel le'ecpi, qaltaq ñe'eguelaxaala't nam lalamaxat co'ollaxa huaqta'a't nỹecpi maye ỹotta'a't naua nañalo. Qaq 'era da ỹa'aqtac, Aỹem Nataxala'.

³ ¡Ña 'Auaquico qome 'am Hesbón, cha'aye ye Ai qailaxachigui qome! ¡Qanỹeñi qami' 'alpi maye qarmaye na Rabá! ¡Qaỹa'añiiyiñi naua nogo maye nasouaxaqui', qataq qanhuaxañeeta'alo naua qartoguelli'! ¡Qauachegoqỹañi qome qoñeeta'am aca huo'o da aloic, qataq qauque'emaqchichi da qaro'ocỹaxaqui! Cha'aye ñim atamnaxala' Milcón noxonec qome nache qaỹauega ca ỹaqa'a 'alhua caueegue' qanqa'en na ltaxaỹaxanaxanecpi qataq na 'amaqtaqaicpi shiỹaxauapi.

⁴ ¿Ta'ainco' da 'ana'amaqteetapigui da 'ara'añaxac? Da qara'añaxaqui mashe imeuo qami' nhuo' le'ecpi maye yeloxoicpi, maye qanteñeetecot da qarsallaqai maye qalapoñiitasheguem, ime nache qoñeeta' naxa: ‹¿negue't ca ishet da qomi' iloquiaxa'n?›

⁵ Qalaxaye Aỹem chegoqteguelo ñaqa'en qome na ỹauo'o da 'arcolanaxa. Qaq 'era da ỹa'aqtac Aỹem Nataxala' maye Qaica ca Seqalanapec. Ñi 'oonolec da qoñeeta maicheye cam dataigue da datauec, nache qaica qome ca ishet da qaltaq qami' laỹona't.

⁶ Qalaxaye qom ime de'era, nache ñaralaxat da na'achecỹaxac na amoniitapi. Qaq 'era da ỹa'aqtac, Aỹem Nataxala'.»

Qaỹa'axata'a da talec qome ye Edom

⁷ Da la'aqtac Ñim Nataxala' maye Qaica ca Ỹaqalanapec, da ỹa'axata'a dam talec ye Edóm, 'eeta': «¿Mashe qaica ca naỹaanec ye Temán? ¿mashe saỹaỹaten ca 'eetec nam ỹaanataxanaxaicpi? ¿Mashe deqat so laỹaanec?

⁸ ¡Qami' maye qoñeeta'a na Dedán qauataiuec qome qoqui qome qanqañoxochiiñi! Cha'aye selaxachigui qome na nhuo' le'ecpi maye chegoxoguet so Esaú, cha'aye mashe ivita ye laloqo' da sauo'o ca nhuaxanaguec.

⁹ Da ivita naxa da qanqat ana ala ana uva, nache huo'o ana qano'onaxatañi ltaxale, qaq ye pe naxa da nvireuo na cachaxaicpi qaq nachenata na iuen da ỹache.

¹⁰ Qalaxaye na nhuo' le'ecpi maye chegoxoguet so Esaú ỹataqta ñeuotta qome, cha'aye mashe sanata na nqañoxotaqa'pi, qaq saishet qome da nqañoxottapiguiñi. Na llalaqpi, na lauo' le'ecpi qataq na lauoreuapi 'enauac da dolachigui qome, nache qaica ca no'onañi da, 'eeta':

¹¹ Aỹem 'aua'aqta'a da selo'ogue na 'ansaploqpi. Ana 'ampa'aipi ishet qome da Aỹem pi'iỹa'a.»

¹² Ñim Nataxala', 'eeta': «Som saishet taxa da nỹomgui aso ỹomaxaqui maye ỹo'ot da nhuaxanaguec, qalaq nỹomgui asomaye, qaq nache 'eetec nataqa'en 'am da saishet da saqca ca 'anhuaxanaguec, nacherata da nataqa'en 'anỹomgui asomaye.

¹³ Aỹem Nataxala', maiche san da ỹa'aqtac, 'eeta': Ye huaqta'a't nỹecpi ye Bosra, ỹe'eguelaxa da toolec qome qataq nlachiguiñi, nache naloqnaxanaxat da huo'o ca qaica 'enec qataq huetalec da qauem, qaq na laỹepi huaqta'a't nỹecpi maye ỹotta'a't naua nañalo, namayepi qome tatec da nlachiguiñi.»

¹⁴ Aỹem nvira da ỹa'axaỹaxac chegoqo'ot Ñim Nataxala', 'eeta': Huo'o so namaxashec da ỹa'axatem na ỹotta'a't shiỹaxauapi da, 'eeta': «¡Qalapoñiỹa't qome, ime nache qoqui da qauloqui' ye Edóm! ¡Ña qanaỹamaxache da yaqto' qauloqui!

¹⁵ Aỹem 'am so'otec qome da qaica ca 'ara'amaqchec da 'aualectaigui na laỹepi shiỹaxauapi qataq 'am qaỹo'otan da 'aualectaigui na ỹalleppi.

¹⁶ Dam 'año'oxonnaxac co'ollaxa, nachera da 'am ỹatenachet, cha'aye souaxat 'am ncolanaxat. Qataq qouetaigui na lpoxoỹaxapi na coma'pi, qoueta'a na ỹataqta qaỹoqotcheguemec qasoxonaxapi. Qalaxaye na'aictaxa da qaỹoqotcheguemec 'anqa'en ca 'arpata'c da qoneta'am ca vi'ic qalaxaye nache 'am sachegoxotchiguiña qome da 'am ñeqaañi. Qaq 'era da ỹa'aqtac Aỹem Nataxala'.

¹⁷ Qom qailaxachigui ye Edóm, nache ỹataqta lta'araic da ncolanaxa, qaq 'enauac cam nlectot qome yemaye nache ỹataqta ỹe'elaq qom ila'a da nhuaxanaguec yemaye,

¹⁸ cha'aye yemaye, 'eeta'am qome so Sodoma qataq Gomorra qataq som lauoreuapi huaqta'a't nỹecpi maye ỹotta'a't naua nañalo maye qailaxachigui co'ollaxa. Nache qaica qome ca qaltaq nalec yemaye, huo'otaq da choche nmataqa'. Qaq 'era da ỹa'aqtac, Aỹem Nataxala'.

¹⁹ Qom ñanac qalaq ñeque'elaxatta sheeta'am ca llon, da chegoqtoigui ye aviaq ye Jordán, nache tauga nam no'onaxa maye daralata na 'auaqpi, qaq huaña yemaye nache datauec ñaqa'en na Edóm le'ecpi, qataq so'ot qome da ilo'ogue ñaqa'en cam shiỹaxaua maye lleca'aguishec. Qaq ỹoqo'oye, ¿negue't ca ishet da sheeta'am? ¿Qataq negue't ca ishet da Aỹem ñe'eguene'? ¿Qataq negue't ca qagueta lo'o ca ishet da Aỹem dataỹa'aguet?

²⁰ Ña qana'axaỹaxañiỹa dam llapaxañi Aỹem, Nataxala', dam seqataxanai' da yaqto' talec ñaqa'en ye Edom, qataq dam so'ottac lataxac da sataỹa'aguet na lma' ye Temán. Qaq ivira'a qome nam ỹataqta qapio'olecpi nam qagueta llalaqpi da qaỹache qome, nataqa'en na lquiaqa'pi ỹataqta qanlaxatchiguiñi qome.

²¹ Qaq qom nlaguiñi ye Edóm, nache ỹataqta lta'araic ca l-lamaxa, nache ỹacholaxan qome ana 'alhua, huaña nache na'alaqtapiguiñi qome da iỹaxaataique ca ntaunaguec, qaq da la'alaxac ivira'a qome aso Auaxai Togaxarai.

²² Na pa'aguenaxauapi anac qome da iloquiaxan ye Bosra, 'eeta'am ca vi'ic da ipegueere'c naua laua't, qaq que'eca na'a'q nache na alaataxaicpi ye Edóm, ỹataqta iviloxol qome 'eeta'am aca 'alo da deco'otac.»

Qaỹa'axata'a da talec qome ye Damasco

²³ Da na'aqtac da qaỹa'axata'a dam talec qome ye Damasco, 'eeta': «Nam huaqta'a't nỹecpi maye ỹotta'a't naua nañalo ye Hamat qataq ye Arpad, ỹataqta huo'o da la'agaxa cha'aye nvita da qauem la'axaỹaxac. Qaq yeemaye ỹataqta nlaxaguilo da lcolanaxa nache saishet da huo'o ca lle'emaqa'.

²⁴ Ye Damasco mashe qaica ca la'añaxac, nache huotaique da datauec. Qalaq sa nalo'oguet da lta'araic lli'iỹaxa, laquicoxo, qataq da nqui'ic, 'eeta'am aca 'alo da deco'otac.

²⁵ Yem huaqta'a't nỹecpi maye ỹo'oxoraic, huaqta'a't nỹecpi maye huetaña da namaicỹaxac, yemaye mashe qanayeca'ai.

²⁶ Que'eca na'a'q nam lalamaxat nsoxoppi ileu qome huetangui na nqa'aicpi, qataq nataqa'en ileu qome 'enauac na nalleppi maye alaataxaicpi. Qaq 'era da ỹa'aqtac Aỹem nataxala', maye Qaica ca Seqalanapec.

²⁷ Aỹem savigaxat qome na lpaqtaxanaxatpi ye Damasco, nache que'eca norec nlachiguiñi naqa'en qome, na nma' lta'araicpi ye Ben Adad.»

Qaỹa'axata'a da talec qome ye Quedar qataq ye Hasor

²⁸ Da la'aqtac Ñim Nataxala' maye talec som chegoxoguetpi so Quedar qataq so nataxala'pi ye Hasor, som loxonqa co'ollaxa so Nabucodonosor maye nta'a ye Babilonia, 'eeta': «¡Ña qoqui qome da qauloquiaxañi ye Quedar! ¡Qaulaxachiigui qome ye nhuo' le'ecpi maye pa'aigue da nala' lliguisheguem!

²⁹ Qauotaxañic qome ye lpe'lpi qataq ana lalo qaguetapi, qataq nam lapoxonaxatpi, qataq 'enauac nam lhuenecpi. Nataqa'en qauacoñiỹa qome ana lalopi nauanaxanaxapi, ime nache qaua'alaqaitalec yemayepi, qoñeeta': ¡Ỹataqta 'enauac na pa'aiguelo da huo'o da lchec!

³⁰ ¡Ñaq qauataiuec qome, qami' maye qarmaye na Asor! ¡Qoqui qome qanqañoxochiiñi! Aỹem Nataxala' 'era da ỹa'aqtac. Cha'aye ñi Nabucodonosor maye nta'a ye babilonia, mashe lapaqtañi da qami' dataỹa'agueta.

³¹ Aỹem Nataxala' qami' sama'q sheeta': ¡Qoqui qome da qauloquiaxañi yi'iye nhuo' le'ecpi maye qaica ca ñe'etaique qataq ỹe'emaqtac, qataq qaica ca lapoxot ñi nasom qataq qaica ca la'araxat, qataq ỹataqta ndotec ye hueta'a!

³² ¡Qauotaxañec aye lalopi nauanaxanaxapi qataq 'enauac ye na'atetpi! Aỹem selagaxat qome tateugalo ñaqa'en yi'iye shiỹaxauapi maye namare'c naua lqaic laỹel, qataq chegoqteegalo qome na qauem da talec ñaqa'en yemayepi. Qaq 'era da ỹa'aqtac Aỹem Nataxala'.

³³ Qaq ye Hasor, qalaq chochaq tatec qome da toolec, qataq lanataqa' qome ana huaxaỹaxapi. Nache qaica qome ca ỹe'eguelaxa da nalec, huo'otaq da choche lanataqa'»

Qaỹa'axata'a da talec qome ye Elam

³⁴ Co'ollaq cheta'ague da do'onataxan so Sedequías da nta'a ye Judá, nache Ñim Nataxala' ỹanem so la'aqtac so Jeremías da ỹa'axata'a da talec qome ye Elam, 'eeta':

³⁵ «Aỹem Nataxala' maye Qaica ca Seqalanapec, da ỹa'aqtac, 'eeta': Aỹem sacagaxachigui qome na lchecnecpi ye Elam, maye nachena na ỹataqta lo'ogoxonaxat.

³⁶ Aỹem ñanacot qome ca la'at da talec ne'ena nhuo' le'ecpi, chegaqa'alo naua cuatro laỹel ana 'alhua, da yaqto' ilagaxatapec nache tateugalo naqa'en nache ivitta'a da qaica ca no'onañi na 'alhuapi da saivira nam naneltaxaatacpi ye Elam.

³⁷ Aỹem so'ot qome da cholaxan ye Elam qom dataỹa'aguet na mpa'aguenaxauapi maye huotaique da ỹalauat, qataq ñamaxa qome ca lta'araic qauem, qataq talec ñaqa'en da ỹayeloxo yemaye, nache ñamaxa ca alaataxac, nache ivitta'a qome da imauec da nlachiguiñi. Qaq 'era da ỹa'aqtac Aỹem Nataxala'.

³⁸ Sanaña qome aca ñeso'onaxaqui ye Elam, nache salauat na lta'alpi qataq na lataxala'pi. Qaq 'era da ỹa'aqtac Aỹem Nataxala'.

³⁹ Qalaxaye caua pa'atrec na'axa'te, nache ñaralaxat qome da na'achecỹaxac ye Elam. Qaq 'era da ỹa'aqtac Aỹem Nataxala'.»