Jeremías 46 - La'aqtaqa Ñim Lo'onatac 'Enauacna 2013

Noxonec ye Egipto huaña ye Carquemis

¹ Ñim Nataxala' detaxaỹot so na'aqtaxanaxanec Jeremías da ỹa'axat da 'eetec da taỹa'a som ỹotta'a't shiỹaxauapi.

² Qaq 'era da la'aqtaxanaxac da ỹa'axat da 'eetec da taỹa'a ye Egipto, qaq ỹactec da ỹalamaqchigui so nalleppi so faraón Necao som nta'a ye Egipto, maye hueta'a co'ollaxa ye Carquemis, maye hueto'ot na loigue so tala Éufrates, qalaxaye huaña co'ollaxa yemaye nache so Nabucodonosor maye nta'a ye Babilonia loxonec somayepi huetoigui so vi'i cuatro da lo'onataxanaxac da nta'a ye Judá so Joaquim som llalec so Josías:

³ «¡Qauaỹamaxachiiñi ana qarpaqtaxanaqchipi! ¡Nache qoqui da qauloqui!

⁴ ¡Qauo'ocheelec na caipi! ¡Nache qaunocheelec namayepi! ¡Qaỹa'añiiñi ana alaataxaquipi aro'o, nache qanaloiñi! ¡Qaqueuoqui ana taquiaxaipi! ¡Qataq qaỹa'añiiñi ana npaqtaxanaqtepi!

⁵ Qalaxaye ¿negue'to' dam selota'a? Qaq souaxat da lcolanaxa, nache qosheta. Nam alleppi qalaq laga't cha'aye noxonecpi, qataq datauec nache saishet da namatapec. ¡Qaq 'enauaque naua pa'aiguelo huo'o da ncolanaxa! Qaq 'era da ỹa'aqtac Aỹem Nataxala'.

⁶ ¡Nam ỹataqta qayaqaicpi qalaq saỹañoxot da datauec, nam ỹataqta 'añaxaicpi qalaq saỹañoxot da naneltaxan! Qaq huaña na pa'aigue da sheu' maye hueto'ot na loigue so tala Éufrates, da pogolaxaañi nache huañi.

⁷ ¿Negue't nam 'ena maye nquictasheguem, 'eeta'am so tala Nilo, 'eeta'am ca 'etaxat da npaxanec, nache qaica ca iren?

⁸ Qaq nachena na Egipto na nquictasheguem, 'eeta'am ca 'etaxat da npaxanec nache qaica ca iren. Na Egipto 'enapec naxa: ‹Ñequictasheguem qome nache semattalec ana 'alhua, qataq selaxachigui qome na huaqta'a't nỹecpi, qataq nam netaiguipi namayepi.›

⁹ ¡Ñaq jec qome nam netalec na caipi! ¡Ñaq jec qome ana naigonapi! Qataq jec qome na alaataxaicpi, nam alleppi maye lma' ye Etiopía qataq ye Libia ỹaatañi ana lpaqtaxanaqtepi, qataq jec qome na alleppi ye Lidia maye ỹaỹaten da do'ogoxona na checnec!

¹⁰ Qaq que'eca na'a'q nacheca ca lalamaxat Ñim Nataxala' maye Qaica ca Ỹaqalanapec, que'eca na'a'q nache huaigui da ỹe'eguelaxateguet nam mpa'aguenaxauapi. Ca ỹeelonec qalaq qalota qome ca ỹalauat nache ivitta'a da nlaqtegue na ntago'q. Cha'aye Ñim Nataxala' maye Qaica ca Ỹaqalanapec ỹauo'o qome ca lta'araic lalaataxanaxac da huaña ye 'alhua maye pa'aigue da sheu' maye hueto'ot na loigue so tala Éufrates

¹¹ ¡Qami' nhuo' Egipto le'ecpi, qanqo'oñiỹa qome ye Galaad da qauloỹaique ca qaratannaxanaxache! ¡Qalaxaye na'aictaxa da qalota ca natannaxanaxat da qaviñi, qalaxaye qaica qome ca naigui, cha'aye qaica ca natannaxanaxat ca ishet da qami' no'onaxa't!

¹² Nam ỹotta'a't shiỹaxauapi mashe ỹaỹaten da qaica ca qara'amaqchiqui qataq imauec ana 'alhua da qaỹa'aqtega da qara'alaxaqui, ñi 'oonolec nam alaataxaicpi qalaq ỹe'egueetega't ca maiche lỹa, nache 'enauac da huañi hueta'aguet na 'alhua.»

So Nabucodonosor iloquiaxan ye Egipto

¹³ Ñim Nataxala' detaxaỹot so na'aqtaxanaxanec Jeremías, co'ollaq so Nabucodonosor maye nta'a ye Babilonia, jec da iloquiaxan ye Egipto, 'eeta':

¹⁴ «Qaua'aqtaxañim ye Egipto, qataq ye Migdol, ye Menfis qataq ye Tafnes, qoñiita': ¡Ña qanaỹamaxache, nache qami' lhuotte' qome! ¡Cha'aye na ỹeelonec mashe anacta da qami' ilaxachiguilo!

¹⁵ ¿Ta'ainco' da huetaiya' so 'ara'añaxanec? ¿Ta'ainco' da saishet da nachattañi? Cha'aye Ñim Nataxala' ỹamaxañi.

¹⁶ Na 'analleppi qalaq pogolaxaañi, nache huañi, nache ñi 'oonolec 'eetega ñi lỹa, 'eeta': ¡Qolaqa'ai qome ne'ena, nache she'eguelaxasaxa ye qana'alhua, yem 'alhua maye maiche qarañoqo' co'ollaxa! ¡Sataxaueguesop da alaataxac maye qaica ca qairen!

¹⁷ Qaq huo'o na ỹa'alaqtai', 'eeta': ¡Ñi faraón choche lamtapigui! Ñim nta'a ye Egipto qalaq mashe iqataqchet som ldaqa' da huo'o ca ỹo'ot.

¹⁸ Qaq Aỹem maye Aỹem Nta'a, da ỹe'enaxat, 'eeta': Nataxala' maye Qaica ca Ỹaqalanapec, san da ỹa'aqtac maye, 'eeta': 'Eeta'am añi qasoxonaxa Tabor da saishet da 'ena'am ana laỹepi qasoxonaxapi qataq añi qasoxonaxa Carmelo maye netaua'a na laỹe aso auaxai, qaq nache 'eetec qome da anac na pa'aguenaxauapi.

¹⁹ Qami' Egipto le'ecpi ñaq qanaỹamaxache, cha'aye qami' qaỹaue'c qome, cha'aye na Menfis ỹe'eguelaxa da toolec qome qataq nlachiguiñi nache qaica ca ishet da nalec qome.

²⁰ Na Egipto qalaq 'eeta'am aca 'onaxai huaca llale, qalaxaye chegaqa'ague qome da sheu' aca ncoga da inac.

²¹ Nam nalleppi maye isheeten co'ollaxa da yaqto' itauan namayepi qalaq 'eeta'am na chaxaraicpi huaca llalaqpi, qalaxaye nataqa'en qome namayepi da datauec, cha'aye mashe nvi' ca qauem na'a'q qataq ca laloqo' ca nhuaxanaguec.

²² Na Egipto le'ecpi qom datauec, qalaq yo'oxonegue 'eeta'am ca na'araxanaq, qom nayeetai' ca alleppi da iloquiaxan namayepi, ỹauota'a aca nqachepe 'eeta'am da iquesoqtac ana qo'oipaqpi.

²³ ¡Nache nquesoxoñi ye sansattec aviaq! Qaq 'era da ỹa'aqtac Aỹem Nataxala'. Cha'aye namayepi napacalec ye lcata ana shiiquioxoipi, nache qaica ca ishet da naloqten.

²⁴ Qaq ye Egipto, qaica ca 'enec qome, nache nam shiỹaxauapi maye chegoxogue da sheu' loxonec qome.»

²⁵ Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': «Aỹem sauo'o qome ca nhuaxanaguec ñi Amón, maye atamnaxala' ye Tebas, qataq ye Egipto cañe' ñaqa'en nam natamnaxala'pi, qataq nam lta'alpi, qataq ñi faraón qataq nam ỹa'amaqteetac ñimaye.

²⁶ Saneguet qome da lhuaqỹaxac nam npa'aguenaxauapi maye huotaique da ỹalauat namayepi, saneguet dam lhuaqỹaxac ñi Nabucodonosor maye nta'a ye Babilonia, qataq na nalleppi ñimaye. Qalaxaye qom qaỹata'ague de'era, nache ye Egipto ỹe'eguelaxa qome da qaltaq qanayenalec, 'eeta'am so hua'auchiguiñi. Qaq 'era da ỹa'aqtac, Aỹem Nataxala'.

Ñim Nataxala' nca'alaxatec qome so lalamaxat nhuo' le'ecpi

²⁷ Qalaxaye 'am Jacob, maye 'am ỹamaxashec saishet qome da 'añi'i, 'am Israel, saishet qome da huo'o da 'arcolanaxa, cha'aye aỹem 'am ñeqateeguesop qome yem qaỹoqta 'alhua, qataq ñeca'alaxateeguesop qome nam 'am chegoxoguetpi ye 'alhua maye hueta'a nagui da ncoñeteguishecpi. Qaq 'am Jacob 'avi'eguelaq qome nache qouetaigui da 'al-lagaxayec qataq nquictasheguem qome da 'arsallaxa, huaña nache qaica ca 'am iquichoqchettac.

²⁸ 'Am Jacob, maye 'am ỹamaxashec saishet qome da 'añi'i, cha'aye Aỹem 'am soota'aguet. Qaq 'era da ỹa'aqtac Aỹem Nataxala'. Qaq na'aictaxa da ñematchiguiñi qome nam ỹotta'a't shiỹaxauapi maye 'aỹa ñaqa'en co'ollaxa. Qalaxaye 'am saishet da 'am selaxachigui, nacherata da 'am serolec da nalochiguiñi lataxac da 'am ñimit. Qalaxaye saishet da sa sauo'o ca 'anhuaxanaguec.»