Jeremías 4 - La'aqtaqa Ñim Lo'onatac 'Enauacna 2013

Ñim Nataxala' 'enapega na Israel le'ecpi da ỹe'egueloqot Ñimaye

¹ Ñim Nataxala' 'eeta' da la'aqtac: «Da 'auauotaique da 'añe'eguelaq 'am Israel, qaq iuen da nachaỹem da aỹem 'añe'eguelaxa. Da qoca'ai nam nqaigaxat 'anatamnaxala'pi qataq saishet da Ayem qoca'ai,

² qaq da 'auachegoxotchigui da 'eesa qataq da nalochiguiñi lataxac qataq da no'on nataxac da 'aỹa'anot ca 'ara'aqtac Ñim Nataxala', nache da ỹe'enaxat, nachera da chegoqchigui qome da nchoxonnataguec qataq da llo'oxonnataxanaxac nam ỹotta'a't shiỹaxauapi.»

³ Ñim Nataxala' 'enapega na shiỹaxauapi maye netaña ye Judá qataq ye Jerusalén, 'eeta': Qana'ayiisheguem qome nam 'alhua maye saxanaxa da qoỹanaxaalec, nache saishet da qaltaq qa'anaxañiỹoigui ana ỹaxat.

⁴ Qami' shiỹaxauapi maye qoñiitaña na Judá qataq na Jerusalén, qauo'oche qome ca na'anaxat da qaro'ocỹaxaqui, qataq aỹem qauauattoñeeta da Aỹem Nataxala', qauachiỹaiguilo naua qarquiyaqtelli' da la'anaxat da aỹamaxataxac, cha'aye saiuena'a da souaxat cam qauem maye qauo'oche, nache da 'eroigui da inogoxonaxac, 'eeta'am ca norec qataq 'erangui damaye, nache qaica ca ishet da ỹalamat.

Da narenaguec nam lma' ye Judá

⁵ Qaua'aqtaxañim de'era ye Jerusalén qataq ye Judá, qauoita'a ana qarasheerei da qaua'aqtaxañim 'enauac na hueta'a yi'iye 'alhua, qataq ỹataqta qana'axanñic qome da qara'alaxaqui qoñeeta': ¡Qalaỹoñiỹa't qome, nache senoxonaxaua'a nam huaqta'a't nỹecpi maye ỹotta'a't naua nañalo maye qampaxatteua'a!

⁶ Qauachaxañiisheguem aca qara'anaxanaqchi qaloxonaxañiitegue da pa'aỹa'ague ye Sión, ime nache qauataiuec, saishet da huo'o ca qauacheeta'a, da qanmichiỹaique ca qaye'eguenaqa'ai. Cha'aye Aỹem sachegoxota'ague qome da sheu' da ñanacot ca ỹataqta qauem qataq cam lta'araic maye ishet da delaqtaxan.

⁷ Qaq ñi llon mashe ca'ai ñim lle'eguenaxaqui, mashe anacta nam ilaxachigui na ỹotta'a't shiỹaxauapi, qaq mashe ca'ai yem na'alhua da naỹa na 'ana'alhua da yaqto' ilaxachigui, qataq toolec naqa'en, qataq nlachiguiñi naqa'en nam 'aralamaxat huaqta'a't nỹecpi.

⁸ Qaq ỹoqo'oye qaỹa'añiiyiñi qome naua qo'ogolli' maye sansattegueta, qanỹeñi qataq qana'alaqaitapiguiñi souaxat da qanqui'iqui, cha'aye dam 'ettaigui layeloxo Ñim Nataxala' saishet da qomi' ca'aisalo.

⁹ Ñim Nataxala', 'eeta' da la'aqtac: «Qom ivita que'eca na'a'q, nache ñi nta'a qataq na nataxala'pi iviloxolaqchet qome da lli'iỹaxa, na ntaxaỹaxanaxanecpi qalaq huo'o qome da lcolanaxa, qataq ỹe'elaq qome na na'aqtaxanaxanecpi.»

¹⁰ Qaq aỹem shenapec: «¡'Agai, 'Am Nataxala', ta'ainco' da 'auatenachet na shiỹaxauapi na Jerusalén! 'Am 'auachaxanapecot co'ollaxa namayepi da nlagaxayec, qaq nagui qalaq qaỹareeto'ot na lqosot na ỹeelonec.»

¹¹ Qaq qom ivita cam laloqo' de'era, nache qoỹenapega qome na nhuo' le'ecpi na Jerusalén, qoỹeeta': «Chegoqtelec qome ye toolec 'alhua ca la'at dapaqa, da nasheeresheguem nache taalec na pa'aỹa'ague na ỹalamaxat nhuo' le'ecpi. Qalaxaye camaye saishet da taiguet da qaichegoq na ala na trigo,

¹² qaq cam la'at maye ñanacot qome, camaye ỹataqta qapa'atteguet nache saq taiguet de'era, cha'aye nagui Aỹem sa'axat nam lasouaxashetpi da sataỹa'aguet namayepi.»

Na pa'aguenaxauapi coleesop na Israel le'ecpi

¹³ Ña qauloỹa nam pa'aguenaxauapi mashe anacta, 'eeta'am na lo'oc na piguem, ana nnaigonapi maye nalaataxaquipi qalaq 'eeta'am ana daua'ache, qaq na lalopi caipi qalaq ỹataqta qayaqaicpi napacalec na vi'icpi. ¡Choxoraiqolqa qomi' mashe seqataq!

¹⁴ 'Am Jerusalén, ñaq 'auỹoueeguesop na qauem añi 'arquiyaqte, yaqto' 'anca'alec. ¿Chaq laguio', qaq 'axanec na qauem nhuennataxacpi maye huetaigui na 'arqaic?

¹⁵ Qaq chegoqchiguiña ye Dan qataq aye lcomaraxalatepi maye naña ye Efraín da nvi' na qauem na'axaỹaxac:

¹⁶ «Qauqachiỹa na ỹotta'a't shiỹaxauapi qataq qaua'aqtaxañim ye Jerusalén, da chegoqchiguiña qome ca qaỹoqta 'alhua ca npa'aguenaxauapi, nache ỹa'alaqtalec da nalaataxac da iloquiaxan ye Judá.

¹⁷ Qaq coleesop qome ye Judá, 'eeta'am ca shiỹaxauapi maye ilotague' ca no'onaxa, cha'aye yemaye saỹalaxaguet Ñim Nataxala'. Qaq 'era da ỹa'aqtac, Aỹem Nataxala'.

¹⁸ Dam 'arataxac qataq nam 'auo'otpi, nachena na ỹo'ot da 'am talec de'era, nam qauem maye 'auo'otpi nachena na 'am ỹaneguet de'era ỹataqta chem alaỹaxac qataq nachena na ique'emaqchet añi 'arquiyaqte.»

Da nqui'ic so Jeremías souaxat so lauo' le'ecpi

¹⁹ ¡Ỹataqta mashe sa ñalo'oguet da ñequi'ic! ¡Ỹataqta seuet añi iquiyaqte! ¡Saishet da ñamaañi qataq saishet da she'emaqta! Cha'aye sa'aqtega da l-lamaxa ana nasheere qataq da na'alaxac da qaỹa'alaqtalec da alaataxac.

²⁰ Qataq mashe nvi' da na'axaỹaxac da nacalec lỹa nam qailaxachiguipi, 'enauac ne'ena 'alhua qanlaxaañi. Qataq choche nque'elaxatta da qanlaxaañi na ỹanataqa'pi qataq ỹataqta nlachiguiñi qanqa'en so ipe'lpi.

²¹ ¿Chaq laguio' qaq ime da selota'a ana na'anaxanaqtepi, qataq da sa'aqtega da l-lamaxa ana nasheerepi?

²² «Na ỹalamaxat nhuo' le'ecpi ỹataqta qaica ca ỹaỹaanapec, qataq saishet da Aỹem ỹauatton, 'enapec Ñim Nataxala'. Namayepi saishet da deuennataxan qataq qaica laỹaanataxanaxac. Sanqalaate' da ỹo'ot na qauem, qalaxaye saỹaỹaten da ỹo'ot ca no'on.»

So Jeremías ilota'aguet ca qauem na'a'q

²³ Aỹem samatalec ana 'alhua, nache qaica ca laỹamaqa' qataq toolec. Qataq samato'ot na piguem, nache ỹataqta napalñi.

²⁴ Qataq samato'ot ana qasoxonaxapi nache ỹataqta cholaxaatac, qataq 'enauac ana lcomaraxalatepi da ỹataqta iviloxoltac.

²⁵ Semeenaxanapiguiñi, nache qaica da huo'otaq 'oonolec ca sela'a ỹale, qataq 'enauac na maỹopi mashe datauec.

²⁶ Qataq samata'a nam no'on uva lma'pi qalaq ỹataqta toolec, qataq 'enauac som huaqta'a't nỹecpi ỹataqta nlachiguiñi. Cha'aye da ỹataqta chaqaic layeloxo Ñim Nataxala', nachera dam ỹo'ot da huo'o de'era.

²⁷ Ñim Nataxala', 'enapec: «'Enauac ana 'alhua da nlaguiñi qome, qalaxaye saishet qome da imauec da selaxachigui.

²⁸ Ana 'alhua nlaxagui qome da naquicoxo, na piguem qalaq ỹapolec qome na napalaxa. Mashe san da ỹa'aqtac qaq saishet qome da ñaralaxat, damaye mashe iuennataxac qaq saishet qome da huo'o da ñetogotaxac.

²⁹ Qaq qom qaỹa'axaỹa da la'alaxac ca netalec na caipi, qataq cam checna lo'opi, nache 'enauac qome na shiỹaxauapi datauec, nqañoxotoigui na aviaq, qataq quisheguemec ana coma'pi, qaq 'enauac na huaqta'a't nỹecpi maye ỹotta'a't naua nañalo qanayeca'ai, nache qaica qome ca netaigui namayepi.

³⁰ Qaq 'am huaqta'a't nỹecpi ye mashe 'am nlachiguiñi, Qaq ¿negue't ca 'auo'ot nagui? Ye qaica ca naigui da 'aỹa'aatrañi naua 'ogo togaxaraiqa, qataq da 'aỹa'aatañi ana 'ano'otaqte oro, qataq da 'aua'ame'n naua 'ara'ai'te. Cha'aye na 'anauonaxauapi 'am ỹo'otan qome, qataq nmitaique ca lataxac da 'am ỹalauat.

³¹ Aỹem sa'aqtega da na'alaxac souaxat da qui'ic, 'eeta'am aca 'alo da cheta'ague da deco'o, qalaxaye nacheye yem Sión da la'alaxac de'era, maye dachottac qataq ỹaatrauec naua lhua'q nache, 'eeta': ¡Choxoraxaso' aỹem! ¡Aỹem ỹalauat qome na laataxanaxaicpi!»