Jeremías 30 - La'aqtaqa Ñim Lo'onatac 'Enauacna 2013

Dam ỹachaxanapec Ñim Nataxala' cam ñaq natauo na'a'q

¹ 'Era da la'aqtac Ñim Nataxala' maye ỹami' so Jeremías, 'eeta':

² «Ñim Nataxala' maye Natamnaxala' na Israel le'ecpi 'eeta': 'erelec qome aca nere 'enauac nam 'am sa'axatem,

³ cha'aye anacta ca na'a'q da ñaralaxat da na'achecỹaxac nam ỹalamaxat nhuo' le'ecpi na Israel qataq na Judá. Qaq 'era da ỹa'aqtac Aỹem Nataxala'. Aỹem so'ot qome da ñe'eguelaxa nam 'alhua maye sanem co'ollaxa so lta'alpi da yaqto' lalamaxat ñaqa'en.»

⁴ 'Era da la'aqtac Ñim Nataxala' maye taalec na Israel qataq na Judá.

⁵ Ñim Nataxala', 'eeta': «¡Qaỹa'aqtega da na'alaxac maye huo'o da lchec, ncolanaxa qataq qaica ca nlagaxayec!

⁶ Ñaq qaunataxañi da huo'otaq huo'o ca ỹale da ishet da deco'o. Qalaq ¿ta'ainco' nagui da selota'a na ỹalleppi da lpataxaatac na lasot 'eeta'am da nqui'ic aca huotaique da deco'o? ¿Ta'ainnco' da 'enauac namayepi da napagaqtec?

⁷ ¡Mashe nayeetai' ca na'a'q maye chaqaic, na'a'q maye qaica ca lỹa na'a'q da 'eeta'am! Que'eca na'a'q nache huaigui qome ca lta'araic laquicoxo nam chegoxoguetpi so Jacob, qalaxaye Aỹem ñeca'alaxatec qome namayepi.

⁸ Aỹem Nataxala' maye Qaica ca Seqalanapec, 'era da ỹa'aqtac: sesoueeguesop qome na ỹalamaxat nhuo' le'ecpi da ncoñetaguec, nache saishet qome da ỹe'eguelaxa da l-latacpi nam shiỹaxauapi maye ỹaqa'a ca chegaqa'ague.

⁹ Nache namayepi Aỹem do'onataxanot qome, Aỹem Lataxala' qataq Natamnaxala' qataq so David, som sanem qome namayepi da lta'a.

Ñim Nataxala' nca'alaxatec qome na lalamaxat nhuo' le'ecpi

¹⁰ Aỹem Nataxala', 'era da ỹa'aqtac: saishet qome da qayi'i qami' maye qauachegoqoiguet so Jacob som ỹamaxashec, saishet da 'añi'i qome 'am Israel, cha'aye 'am qataq ca 'aỹa'alaqpi qami' sesoueeguesopa qome na hueta'a na qaỹoqta 'alhua maye qoviita'a da qami' ncoñetegui'she. Qaq 'am 'avi'eguelaxa qome da 'aulactapiguiñi, qataq 'avi'imaqtac nache qaica ca 'am iquichoqchet.

¹¹ Aỹem Nataxala', san da ỹa'aqtac da 'am soota'aguet da yaqto' 'am ñeca'alaxatec. Aỹem selaxachigui qome 'enauac nam ỹotta'a't shiỹaxauapi, maye qami' selagaxaaleguete co'ollaxa. Qalaxaye 'am saishet da 'am selagaxachigui qome, nacherata da sauo'o ca 'anhuaxanaguec maye naigui nam 'auo'otpi: qaq saishet da saq sauo'o ca 'anhuaxanaguec.

¹² Ñim Nataxala' 'enapec: da 'arque'emaxa saishet da qanataren, dam qauem maye 'am huetalec qaica ca lata'.

¹³ Qataq qaica ca huapegue' da qoneta, qaica ca nataren na 'arque'emaxa, qataq qaica ca 'am nataren.

¹⁴ 'Enauac nam 'anauonaxauapi 'am icoua'ai, mashe saishet da 'am qochetega. Cha'aye Aỹem 'am seque'emaqchet, sheeta'am ca 'ampa'aguenaxaua, sauo'o so lta'araic 'anhuaxanaguec, souaxat na qalota qauem maye 'auo'otpi. Qataq souaxat nam qalota 'arasouaxashetpi.

¹⁵ ¿Ta'ainco' da 'aua'alaqtac souaxat nam 'arque'emaxapi? Da 'anqui'ic saishet da qanataren. Souaxat na qalota qauem maye 'auo'ot qataq na qalota 'arasouaxashetpi nachena na huo'omshe 'am so'otec de'era.

¹⁶ Qaq 'enauac qome nam 'am chec, namayepi nataqa'en qanallec qome, qataq 'enauac qome nam 'ampa'aguenaxauapi qaỹauega ca ỹaqa'a 'alhua da ncoñeteguishecpi, qataq so'otec da qanhuotta qome nam 'am nhuotta, qataq qaicachiỹot qome nam 'am decachiỹot.

¹⁷ 'Am she'eguelaxatem qome da 'arca'alaxa, qataq ñataren na 'arque'emaxapi, qaq na'aictaxa na 'ampa'aguenaxauapi da 'enapec: ‹Na Sión ỹataqta qaỹalat qaica ca qochetega namaye.› Qaq 'era da ỹa'aqtac Aỹem Nataxala'.

¹⁸ Ñim Nataxala', 'enapec: Ñaralaxat qome da na'achecỹaxac na chegoxoguet so Jacob, nache sasaxalec qome da ichoxonnataxanaxa na na'alhua, na huaqta'a't nỹecpi qalaq qaỹo'oxootelec nam nlaguiñi co'ollaxa, qataq na lta'araic nỹecpi qalaq qoỹaatelec na maiche lma' co'ollaxa.

¹⁹ Nache namayepi chemaqchiguiña qome ca no'onec da qoỹan da 'achecỹaxac, qataq ca naỹalliguiyec souaxat da namaicỹaxac. Qaq saishet qome da nquictañi, cha'aye Aỹem so'otec qome namayepi da nquictauec. Qataq saishet da qaỹe'eetac, cha'aye Aỹem so'otec qome da huo'o naq 'enec.

²⁰ Na Israel le'ecpi 'ena'am qome so hua'au lataxac, na lauo' le'ecpi qalaq saishet da Aỹem ca'ai, qaq Aỹem sauo'o qome ca nhuaxanaguec nam mpa'aguenaxauapi.

²¹ Nache namayepi chegoqtoigui qome cam lataxala' ca 'oonolec namayepi ilo'ogue qome namayepi, Camaye Aỹem nquigueua'a qome qaq camaye nache huetaua'a qome na ỹaỹe, cha'aye ¿negue't ca sairen da nachaalataxac da nquigueua'a Aỹem? Qaq 'era da ỹa'aqtac Aỹem Nataxala'.

²² Qaq qami' nache qami' ỹalamaqa'ate qome, qataq Aỹem qanatamnaxala'ai.»

²³ Da layeloxo Ñim Nataxala' 'eeta'am ca la'at lta'araic, 'eeta'am ca la'ana't la'at, maye ỹacholaxan na qauemaicpi.

²⁴ Da layeloxo Ñim Nataxala', saishet qome da vi'iiguet, choche ivitta'a da imatta da ỹo'ot nam 'eetapeguecpi. Qaq anacta cam na'a'q maye huaigui da qami' qauaỹachiñi qome de'era.