Jeremías 3 - La'aqtaqa Ñim Lo'onatac 'Enauacna 2013

So Israel sa ỹalaxaguet Ñim Nataxala'

¹ Ñim Nataxala', 'enapec: «Ca 'oonolec ỹale da nalate' aca lhua, qaq acamaye da mashe nalate' camaye, qaq huaroneguet ca lỹa ỹale, nache ca hua'auchiguiñi lhua, saishet da ỹe'eguelaxa acamaye. ¡Cha'aye damaye ỹo'ot da lta'araic nayeloxo cam hueta'a 'alhua! Qalaxaye 'am Israel, qalota na 'ancachetague' shiỹaxauapi, ¡qaq nagui qalaq 'auauotaique da aỹem 'añe'eguelaxa! Qaq 'era da ỹa'aqtac, Aỹem Nataxala'.

² Ñaq 'aumeten ana lcomaraxalatepi maye qaica ca ñaxaalec, ¿qaq hua'ague co'ollaxa ca huaña da 'am sanauañe'? 'anso'ootañi qoneto'ot na loigue ca nqa'aic, qoneta'am ca árabe maye netalec ca toolec 'alhua da 'auattaique 'ancachaxauapi. Nache ỹataqta 'anshepaxanaqchet ne'ena 'alhua souaxat da 'arquisheguetaxac qataq na qauem maye 'auo'ottacpi.

³ Ỹoqo'oye qaỹaloqta da huo'o ca auot qataq qaica ca auot ye nauoxo. 'Am qoneta'am da lataxac aca quisheguetaxai, ¡Qamaq ishet taxa da huo'o da 'arcoxo!

⁴ Qaq ñaq cheta'ague da Aỹem 'autaxaỹa naxa qoneta': ‹'Am ita'a, 'Am ñauochaxaua co'ollaq ñaq aỹem nsoqolec›,

⁵ ¿peta'a nache qoqueto'ot da 'aunotac? ¿Peta'a chochaq tatec da 'annogoxonaxac? Qaq co'ollaq ñaq 'autaqtac, nache 'auo'ottac 'enauac nam qauem maye ishet da 'auo'ot.»

Na Israel le'ecpi saỹalaq

⁶ Qaq huetoiguilo soua na'axa'te co'ollaq nta'a so Josías, da Ñim Nataxala' aỹem 'enapega, 'eeta': «¿'Auauaachigui peta'a dam ỹo'ot yem Israel maye saỹalaq? Jec, da tasheguema ayem qaỹoqotcheguemec lcomaraxalatepi, nache huaña da ỹo'ot da lquisheguetaxac hueto'ot ana qo'oipaqpi maye qalochiguiñi ana lcouepi.

⁷ Qaq Aỹem iuennataxac co'ollaxa da ime 'enauac ne'ena ỹo'ottacpi, nache aỹem ñe'eguelaxa, qalaxaye saishet da ỹo'ot de'era. Qaq añim lqaỹa Judá maye saỹalaq, ỹauaachigui de'era,

⁸ qataq nataqa'en ỹauaachigui da Aỹem sheca'ai añim saỹalaq Israel qataq salat añimaye souaxat dam lquisheguetaxac maye ỹo'ottac. Qalaxaye añim saỹalaq Judá maye lqaỹa añi Israel, qaica co'ollaxa ca lcolanaxa, nacherata da nataqa'en añimaye jec, da ỹo'ot da nquisheguetaxac.

⁹ Qaq nache qaica ca lqalaic naqa'en da ỹo'ot damaye, huaña nache nshepaxanaqchet ne'ena 'alhua. Aỹem saỹalaxaguet, nache natameetacot na atamnaxala' coma'pi qataq na 'epaq.

¹⁰ Qaq na'aictaxa 'enauac de'era, añim lqaỹa Judá maye saỹalaq nataqa'en saishet da imauec da lquiyaqteỹaxac da aỹem ñe'eguelaxa, nacherata da aỹem ỹatenachet. Qaq 'era da ỹa'aqtac Aỹem Nataxala'.»

¹¹ Qaq Ñim Nataxala' aỹem 'enapega 'eeta': «Añi qauemai Israel añimaye saq 'amaqtaq da lasouaxashet, qaq saq 'ena'am añim saỹalaq Judá.

¹² Qojec nagui 'aigue da sheu', nache 'aua'axatec qome de'era ỹa'aqtac, qoneta': ‹Ñim Nataxala', 'enapec: ¡Aỹem 'añe'eguelaxa 'am qauemai Israel! Cha'aye saishet qome da 'am saseyacnapec da 'am saconeguet, qataq saishet da nache queta da 'am senotega, cha'aye Aỹem choxonnataxanaxaic. Qaq 'era da ỹa'aqtac, Aỹem Nataxala'.

¹³ Nacherata da 'auaỹateeta da huo'o da 'arasouaxashet, qataq 'auataỹa'aguet Ñim Nataxala', maye 'Anatamnaxala', qataq 'auaỹateeta da qoueto'ot naxa na lpaqal camachaqaca qo'oipaq maye qalochiguiñi ana lcouepi, da 'ancachetague' nam ỹaqa'a shiỹaxauapi, qaq saishet da Aỹem 'aualaxaguet. Qaq 'era da ỹa'aqtac Aỹem Nataxala'.›»

¹⁴ Ñim Nataxala', 'eeta' da la'aqtac: «Ñaq aỹem qañe'eguelaqaỹa qami' qauemaicpi ñalaqpi, cha'aye nachaỹem Qarataxala'ai. Ñim 'oonolec nam huaqta'a't nỹecpi maye ỹotta'a't naua nañalo, qalaq 'oonolec qome ñi sacootaua'a da qoñeeta, qataq ñi 'oonolec nam maiche nhuo' le'ecpi, qalaq dos qome ñeua sacootaua'alo, nache ñe'eguelaxata na Sión.

¹⁵ Qaq sanem qome cam nataxala'pi maye ỹo'ot cam sheetapeguec, qataq huo'o da laỹaanec qataq da laỹaanataxanaxac da ilo'ogue namayepi.

¹⁶ Qaq qom mashe qami' qalote' da qoñiitalec ne'ena 'alhua, qataq mashe qalota ca qaỹa'alquipi, nache qaica qome ca qaltaq detaqtega aso arca maye laỹe' soua naỹamaxataxaco Ñim Nataxala', nache qaica qome ca iuennatega qataq da tatapigui lauel asomaye, qataq mashe saqaiuen qataq saishet qome da qaltaq qaỹo'ot aca dalaxai. Qaq 'era da ỹa'aqtac Aỹem Nataxala'.

¹⁷ Qaq qom ivita que'eca na'a'q, nache ye Jerusalén qaỹamata'ac qome nso'onaxaqui Ñim Nataxala', qaq 'enauac qome nam ỹotta'a't shiỹaxauapi da naỹa yemaye da yaqto' ỹo'oxoren da le'enaxat Ñim Nataxala', qaq huaña nache saishet da ỹe'eguelaxa da quetague' nam qauem maye huetaigui añi lquiyaqte.

¹⁸ Qaq qom ivita que'eca na'a'q, nache ye Judá huaxaiguet qome ye Israel, qaq nache nnaictega't qome da ñe'eguela'q chegoqchiyiña ye 'alhua maye pa'aigue da sheu', da naỹalo nam 'alhua maye sanem co'ollaxa da yaqto' lalamaxat som hua'au qarta'ailpi.

¹⁹ 'Am Israel, aỹem 'am saconeguet co'ollaxa da 'am ỹalec, qataq 'am sanem yem 'alhua maye nqopitaxat, yem 'alhua maye napactelec da lyac 'enauac na laỹepi ana 'alhua, qaq Aỹem sepi'itaxaatega da aỹem 'autaxaỹa nache aỹem 'arta'a, qataq da saishet da aỹem qaỹoqta 'anqa'en.

²⁰ Qalaxaye 'eeta'am aca 'alo da sa ỹalaxaguet ca lhua, qaq nache 'eeteque qami' da saq aỹem qaualaqaiguet. Qaq 'era da ỹa'aqtac Aỹem Nataxala'.

²¹ Huo'o da qaỹa'aqtega na'alaxac chemaqtapeguelec aye lcomaraxalatepi maye qaica ca ñaxaalec. ¡Qaq nachena nam Israel le'ecpi, maye nỹeetagui qataq iỹaxaataique da qaichoxoren! cha'aye ca'ai som ỹaỹamaqchiguiñi nqa'aic, qataq aỹem icoua'ai Aỹem Nataxala' qataq Natamnaxala'.

²² Ñaq Aỹem qañe'eguelaqaỹa qami' ñalaqpi maye saqaualaqai, nache Aỹem ñataren da qarataxaqui maye saỹalaq.» «Qomi' souaqtaina'a, 'am she'eguenaqot, cha'aye nache 'am Nataxala' maye Qanatamnaxala'.

Na Israel le'ecpi ỹasateguet Ñim Nataxala'

²³ Qaica ca naigui da saxasheguema naxa ana lcomaraxalatepi huo'otaq da sa'alaxasoqtai' da sonaqtasheguema ana qasoxonaxapi, cha'aye nachaqñita Ñim Nataxala' maye Qanatamnaxala' da hueto'ot da lca'alaxa na Israel le'ecpi.

²⁴ Chegoqta'a co'ollaq ñaq qomi' nsoxoppi, nache nam ỹo'ot da na'agaxa atamnaxala'pi, nachena nam iqataqchet som la'añaqtegueshec co'ollaxa som qarta'alpi: Aso lalopi qaguetapi qataq so laỹepi na'atetpi qataq so llalaqpi ỹalleppi qataq aso llalepi 'alpi.

²⁵ Ñaq ñemanaq qome, cha'aye huo'o da qara'agaxa qataq qomi' nlaqchiguilo da qane'enaguec, cha'aye chegoqta'a co'ollaq ñaq qomi' nsoxoppi, nache ivitta'a nagui da qomi' qataq so qarta'alpi huo'o da qarasouaxashet hueto'ot Ñim Nataxala' maye Qanatamnaxala' cha'aye saishet da salaxasoxoguet.»