Jeremías 28 - La'aqtaqa Ñim Lo'onatac 'Enauacna 2013

So Jeremías qataq so saq'en na'aqtaxanaxanec Jananías

¹ Qaq so ca'agoxoic cinco, maye nache huaigui se'eso vi'i, qaq de'era 'eeta', co'ollaq mashe ivi' soua cuatro vi'iye da lo'onataxanaxac so Sedequías da nta'a ye Judá, nache so na'aqtaxanaxanec Jananías, som llalec so Azur, maye lma' co'ollaxa ye Gabaón, somaye detaxaỹot so Jeremías huaña aso atamnaxaqui ỹauaachigui naqa'en so ntaxaỹaxanaxanecpi, qataq 'enauac so nhuo' le'ecpi nache, 'eeta':

² Ñim Nataxala' maye Qaica ca Ỹaqalanapec, maye Natamnaxala' na Israel le'ecpi, 'eeta': «Aỹem selaxachigui qome da lo'onataxanaxac ñi nta'a ye Babilonia, nache

³ qom ivi' caua dos vi'iye, nache so'ot qome da qañe'eguelaxata ne'ena nma', 'enauac som nhuenecpi maye lalamaxat añi atamnaxaqui, maye ñi nta'a Nabucodonosor iro'ogue co'ollaxa da Babilonia.

⁴ Qataq nataqa'en so'ot qome da ñe'eguelaxa ne'ena nma', so Jeconías som llalec so Joaquim maye nta'a ye Judá, qataq 'enauac som laỹepi shiỹaxauapi maye qaỹachegoxotchiguiña co'ollaxa na Judá da qaỹaueegue da Babilonia. Aja', Aỹem selaxachigui qome da lo'onataxanaxac ñi nta'a ye Babilonia. Qaq 'era da ỹa'aqtac Aỹem Nataxala'.»

⁵ Nache so na'aqtaxanaxanec Jeremías, ỹasateguet so na'aqtaxanaxanec Jananías, ỹauaachigui naqa'en so ntaxaỹaxanaxanecpi qataq 'enauac so nhuo' le'ecpi, maye hueta'a aso atamnaxaqui, 'eeta':

⁶ «¡Aja', 'onaxaico' da Ñim Nataxala' ỹo'ot de'era! ¡'Onaxaico' da Ñim Nataxala' ipacchigui naqa'en dam 'aua'axattac, da qañe'eguelaxat qome 'enauac so nhuenecpi maye lalamaxat añi atamnaxaqui, qataq da qañe'eguelaxat 'enauac som qaỹaueegue co'ollaxa da Babilonia!

⁷ Qalaxaye ñaq 'ana'axaỹaxana de'era 'am sa'axatem, qataq 'enauac ne'ena nhuo' le'ecpi maye, 'eeta':

⁸ Som hua'au na'aqtaxanaxanecpi co'ollaq saxanaqca 'am qataq aỹem, somayepi ỹa'axatta'aguet co'ollaxa ca alaataxac, nqouaxa qataq ca napiina maye talec na qalota ỹotta'a't shiỹaxauapi, qataq nam nta'alpi maye 'añaxaicpi.

⁹ Qalaxaye da huo'o ca na'aqtaxanaxanec da ỹa'axata'a ca nlagaxayec, qaq da ipacchigui cam ỹa'axat, nache cheta'ague da qaỹa'amaqten, da nacheñi Ñim Nataxala' da lamaxashec camaye.»

¹⁰ Qaq huaña nache so Jananías, nqat so 'epaq nauegaxanaxaqui maye hueto'ot na lqosot so Jeremías, nache ỹacagaxachigui,

¹¹ nache ỹauo'o da la'aqtac hua'aqchigui naqa'en 'enauac so nhuo' le'ecpi, 'eeta': Ñim Nataxala', 'eeta' da la'aqtac: «Qaq nache 'eetec qome de'era da huetoiguilo caua dos vi'iye, da Aỹem ñeqateeguesop na ỹotta'a't shiỹaxauapi da lo'onataxanaxac ñi Nabucodonosor maye nta'a ye Babilonia, nache selaxachigui.» Ime nache so Jeremías jec.

¹² Qaq co'ollaq qaỹata'ague da so na'aqtaxanaxanec Jananías nqateeguesop so nauegaxanaxaqui 'epaq maye hueto'ot na lqosot so na'aqtaxanaxanec Jeremías, nache Ñim Nataxala' 'enapega so Jeremías, 'eeta':

¹³ «Qojec qome, nache qonapega ñi Jananías, da Aỹem Nataxala' 'eeta', da ỹa'aqtac: 'Auacagaxachigui so nauegaxanaxaqui 'epaq, qalaxaye Aỹem mashe saỹamaxattapiguiñi ca nauegaxanaxaqui lcat.

¹⁴ Cha'aye Aỹem Nataxala' maye Qaica ca Seqalanapec maye Natamnaxala' na Israel le'ecpi, 'eeta' da ỹa'aqtac: Aỹem sano'ot na lana'q 'enauac na ỹotta'a't shiỹaxauapi so nauegaxanaxaqui lcat da yaqto' do'onataxanot, da l-latacpi ñi Nabucodonosor maye nta'a ye Babilonia, qataq ivira'a nam huauec shiguiỹacpi da sanem ñimaye da ilo'ogue.»

¹⁵ Qaq huaña, nache so Jeremías 'enapega so Jananías, 'eeta': «¡Ñaq aỹem 'ana'axaỹaxana 'am Jananías! Ñim Nataxala' saishet co'ollaxa da 'am namaq, qaq 'am 'aỹa'aateguem ne'ena nhuo' le'ecpi da ỹa'amaqten da 'aratenataxanaxac.

¹⁶ Qaq ỹoqo'oye Ñim Nataxala', 'eeta': ‹Aja', Aỹem 'am samaq, qalaxaye 'am samaq da yaqto' 'am sapalaxat ana'ana 'alhua. Qaq nachena ne'ena vi'i, nache 'am 'aleu, cha'aye 'auo'otec ne'ena shiỹaxauapi da Aỹem dataỹa'aguet.›»

¹⁷ Nache so na'aqtaxanaxanec Jananías ileu co'ollaxa huetoigui so ca'agoxoic siete se'eso vi'i.