Jeremías 20 - La'aqtaqa Ñim Lo'onatac 'Enauacna 2013

So Jeremías qataq so ntaxaỹaxanaxanec Pasjur

¹ Qaq so Pasjur maye llalec so Imer, maye ntaxaỹaxanaxanec, qataq lataxala' na ilotague' aso atamnaxaqui, co'ollaq hua'axaỹa da la'aqtaxanaxac so Jeremías,

² nache damaxasoxoolec da qaiuaxan qataq qaicoñerai', qoỹanagui so ncoñetaxanaxat 'epaq maye naña so lta'araic nasom so Benjamín maye saqaỹapeque aso atamnaxaqui.

³ Qaq so lỹa na'a'q, nache damaxasoxoolec da qanqat so ncoñetaxanaxaqui 'epaq maye netagui so Jeremías, qaq huaña nache so Jeremías 'enapega somaye, 'eeta': «Ñim Nataxala' naralaxat da 'are'enaxat, qaq nagui saishet da 'are'enaxat Pasjur, maye 'are'enaxat nagui da Magor Misabib.

⁴ Cha'aye Ñim Nataxala', 'enapec: ‹Nagui 'am she'eguelaxata qome da huo'o da 'arcolanaxa, qataq na 'anauochaxauapi, qataq 'auauaachigui qome na 'ampa'aguenaxauapi da ỹalauat na 'anauochaxauapi irolec ca ỹeelonec. Aỹem saneguet qome 'enauac nam hueta'a na Judá, da lhuaqỹaxac ñim nta'a ye Babilonia, qaq ñimaye ỹauega qome namayepi ye Babilonia, huo'otaq da ỹalauat irolec ca ỹeelonec.

⁵ Qataq nataqa'en sanem nam mpa'aguenaxauapi, 'enauac da nsallaxa maye hueta'a ne'ena huaqta'a't nỹecpi, qataq 'enauac nam lalamaxatpi qataq na nogoxoshetpi maye lta'araic da lashiichiỹaxac, qataq 'enauac nam laỹamaqtacpi na nta'alpi na Judá, da yaqto' iro'ogue da Babilonia.

⁶ Qaq 'am Pasjur, 'am qaỹaueegue qome da Babilonia, 'arỹatec qome 'enauac nam 'aỹa'alaqpi. Qaq huaña qome yemaye da 'auleu, qataq nache 'am qailareña yemaye, nataqa'en nam 'anauochaxauapi maye 'aua'aqtaxaata'am naxa nam saq 'en.›»

Da nachoxoc so Jeremías

⁷ 'Am Nataxala', 'Am aỹem 'auatenachet, qaq aỹem ñasheeteguet da aỹem 'auatenachet, cha'aye 'Am ỹactec da 'ara'añaxac, nache aỹem 'anauec, nache imauec ye na'a'q da aỹem qaỹe'eetac, qataq 'enauac da Aỹem qane'eetapigui.

⁸ Cha'aye naxa da setaqa nache nda'a't da sa'axattac da lchec qataq da huo'o na qailaxachigui, nache saq vi'iiguet da aỹem qaisheueetac qataq aỹem qane'eetapigui, cha'aye souaxat da sa'axatta'ape naua 'ara'aqtaqa.

⁹ Qaq da shenapec: «Saishet nagui da seuennatega Ñim Nataxala', qataq saishet da she'eguelaxa da sa'axattac da le'enaxat», nache naua 'ara'aqtaqa maye aỹem netaiguilo ỹe'eguelaxa da 'eeta'am ca norec da ỹavigaxa't naua ipi'ineqa. Qaq aỹem sauotaique naxa da ñala'agueta, qalaxaye sasañoxot.

¹⁰ Huo'o da sa'aqtega naxa na shiỹaxauapi da nsoxootega't, 'eeta': «¡Ỹataqta vichiguiiñalo da lchec!» Qataq 'eeta': «¡Ñaq qauanaqui sauoqo'o ca lasouaxashet!» Qaq ivira'a na ñauochaxauapi iuatta'a da huo'o ca ñe'enaxac. Nache, 'eeta': «Saiuena'a da ishet da satenachetaq, qataq qoroxonec, nache sauoqo'o ca qarvi'.»

¹¹ Qalaxaye 'am Nataxala', aỹem qoueta'aguet qoneta'am ca alaataxaic maye saqanauec, nam aỹem icaatacpi qalaq huañi qome, nache saishet da aỹem loxonec, namayepi saipac qome cam 'eetapeguec, nache huo'o da la'aloxo, nache chochaq tatec qome da ne'enaguec qataq saishet da qaicoua'ai.

¹² 'Am Nataxala' maye Qaica ca 'Auqalanapec, 'Am maye 'auo'onataxana da nalochiguiñi lataxac da huo'o 'anmit, qataq 'am maye 'auaỹaten ye ỹataqta pa'auo lhuennataxac ca shiỹaxaua, ñaq sauaachigui qome 'anqa'en da 'auauo'o ca nhuaxanaguec ne'ena shiỹaxauapi, cha'aye nache 'Am da 'Am sepe'etega.

¹³ ¡Qauo'onaxañiito'ot Ñim Nataxala', qataq qavio'oxoyiñi Ñim Nataxala'!, cha'aye Ñimaye nca'alaxateeguesop ca daquicotac da la'añaxac na qauemaicpi.

¹⁴ ¡Ỹataqta qauem so na'a'q maye ỹañoxoqui! ¡Ỹataqta qauem so na'a'q maye huaigui da aso ỹate'e aỹem deco'oic!

¹⁵ ¡Ỹataqta qauem cam ỹa'axatem co'ollaxa so ita'a da somaye nañiguiñi so llalec ỹale!

¹⁶ ¡Qaq que'eca ỹale, 'onaxaico' da 'eeta'am som huaqta'a't nỹecpi maye Ñim Lo'onatac 'Enauacna sa ichoxoren co'ollaq ilaxachigui! ¡Qataq camaye ye nte'eta qalaq hua'aqtega da na'alaxac souaxat da qui'ic, qataq da l-llimiaxa da alaataxac ye na'a'q laiñi!

¹⁷ ¿Ta'ainco' Ñim Lo'onatac 'Enauacna da saishet da seleuaigui naqa'en na lauel aso ỹate'e? Yaqto' nachaso ctaxa asomaye da 'eeta'am aca ñeuachiqui, nache aỹem taxa saishet da sevira'a da sañiguiñi.

¹⁸ ¿Ta'ainco' da sañiguiñi co'ollaxa da yaqto' nacherata da semeteetac da qui'ic qataq da naquicoxo, qataq da yaqto' imeuo da ñachaalataxac qalaq nlaqchigui da ỹa'agaxa?