Jeremías 2 - La'aqtaqa Ñim Lo'onatac 'Enauacna 2013

So Israel ca'ai Ñim Natamnaxala'

¹ Ñim Nataxala' aỹem 'enapega, nache 'eeta':

² «Qojec qome, nache 'aua'aqtaxanem na hueta'a ye Jerusalén, qoneta': Da la'aqtac Ñim Nataxala' 'eeta': ‹Aỹem seuennate 'am, qataq da 'aralaxayec co'ollaq saxanaxa da 'am ỹe, qataq da 'arauotaxanaqtaic maye 'eeta'am aca auonaxaua co'ollaq aỹem 'auca'attague' da qoquetalec ye toolec 'alhua qataq yem 'alhua maye qaica ca ñaxaalec›»,

³ Qaq na Israel ỹataqta aỹem nañanot co'ollaxa, nachena na ỹataqta la'auaxanec ala na ỹañiguishec. Qaq naxa da huo'o na ỹo'otec da qauem namayepi, nache aỹem sauo'o da nhuaxanaguec, ñamaxa na qauem. Qaq 'era da ỹa'aqtac, Aỹem Nataxala'.

⁴ Ñaq qana'axaỹaxañiỹa da la'aqtac Ñim Nataxala', qami' maye qauachegoqoiguet so Jacob, qataq 'enauac qami' nhuo' le'ecpi maye qauachegoqoiguet so Israel.

⁵ Ñim Nataxala' qami' 'enapegalo 'eeta': «Som hua'au qarta'ailpi, ¿negue't co'ollaxa ca qauem maye ila'a dam sheeta, ye Aỹem ca'ai co'ollaxa? Nache somayepi ca'ategue na atamnaxala'pi maye qaica ca naigui, nache somayepi ỹe'eguelaxa da qaica ca naigui.

⁶ Somayepi saishet co'ollaxa da huo'o ca lhuogoxo da aỹem nmitaique, Aỹem maye ñeqateeguesop co'ollaxa ye Egipto, qataq sauecteuga ye toolec 'alhua, yem 'alhua maye deqaqta qataq qalota na tocotpi, yem 'alhua maye qaica ca 'etaxat qataq huetaña da lchec, yem 'alhua maye qaica ca netalec qataq qaica ca ishet da ỹa'axasoxoolec.

⁷ Aỹem ñauega co'ollaxa somayepi ne'ena no'on 'alhua, da yaqto' chectac na ala qataq nam ỹataqta no'on maye chegaqaigui namaye. Qalaxaye qami' qauanaqui nache saqauyacñiỹapec ne'ena ña'alhua, qataq qauo'oche da seqaiga ne'ena 'alhua maye ỹalamaxat.

⁸ Na ntaxaỹaxanaxanecpi qalaq saishet da aỹem nmitaique, nam ỹapaxagueetac nam ỹalamaxat nhuo' le'ecpi qalaq aỹem saỹauatton, nam nataxala'pi qalaq aỹem dataỹa'aguet, na na'aqtaxanaxanecpi qalaq ỹa'axattac da le'enaxat so Baal, nache ca'ategue na atamnaxala'pi maye qaica ca naigui.

⁹ Qaq ỹoqo'oye, aỹem Nataxala', qami' sataỹa'agueta qome da qami' ñimi't, qataq nam qaỹa'alquipi qataq nam qarhuallipi. Qaq 'era da ỹa'aqtac Aỹem Nataxala'.

¹⁰ Qanqo'oñiỹa aye ỹaqauga 'alhuapiole maye pa'aigue da nala' lliguiñi, nache qaumichiñi; qataq qauauo'oi ca qauamaqỹa ye Quedar da yaqto' imeteeta da huo'otaq huo'o co'ollaxa ca 'eeta'am de'era,

¹¹ da ca ỹotta'a't shiỹaxauapi maye ỹaqa'a da la'amqaanataxanaxac, da naralaxat co'ollaxa nam natamnaxala'pi. ¡Qaq na'aictaxa da saq'en atamnaxala'pi! Qalaxaye nam ỹalamaxat nhuo' le'ecpi Aỹem ca'ai, aỹem maye Aỹem llo'oxoyec co'ollaxa namayepi, nache Aỹem nmeneguet naqa'en nam atamnaxala'pi maye qaica ca naigui.

¹² ¡'Am piguem, 'aue'elaq qome souaxat de'era! ¡Qataq 'aviloxol qome souaxat da 'arcolanaxa! Qaq 'era da ỹa'aqtac, Aỹem Nataxala'.

¹³ Nam ỹalamaxat nhuo' le'ecpi dos naua lasouaxashe'ete: Namayepi Aỹem ca'ai co'ollaxa maye aỹem 'etaxat maye nca'altauec, nache ỹo'ot ana maiche laquipiaxaquipi, nsherepi maye saishet da nllañi na 'etaxat.

Dam naigui da saỹalaq na Israel le'ecpi

¹⁴ So Israel saishet da nlatac, somaye saishet da ñiguiñi co'ollaxa da yaqto' nlatac. Qaq ¿ta'ainco' qone' da qanhuotta?

¹⁵ 'Eeta'am ca llon da desoqtai' nam iloquiaxaatac somaye, nache ỹataqta nlachiguiñi naqa'en nam na'alhua. Qataq qaỹavigaxat som lalamaxat huaqta'a't nỹecpi, nache qaica ca no'onañi da hueta'a.

¹⁶ Qaq na shiỹaxauapi ye Menfis qataq ye Tafnes ilaxachigui na 'arqaic.

¹⁷ Qaq de'era, 'am talec souaxat da aỹem qoca'ai, aỹem Nataxala' maye Aỹem 'Anatamnaxala' maye 'am sauecta'aguet co'ollaq qoquetague' so nqa'aic.

¹⁸ Qaq nagui ¿negue't ca 'araueguec da 'anqo'ona ye Egipto da yaqto' 'anỹomgui na 'etaxat maye huetangui so tala Nilo? Qataq ¿negue't ca 'araueguec da 'anqo'ona ye Asiria da yaqto' 'anỹomgui na 'etaxat maye huetangui so tala Éufrates?

¹⁹ Dam qauem maye 'auo'ottac nachera qome da 'am iuaxan, qataq da sa 'aualaq nachera da ỹo'ot qome ca 'anhuaxanaguec. Ñaq 'auennataxan qome yaqto' 'aula'a da ỹataqta qauem qataq chem da Aỹem 'aualat, qataq da saishet da huo'o 'anqa'en ca ỹa'amaqchec, Aỹem Nataxala' maye Aỹem 'Anatamnaxala'. Qaq 'era da ỹa'aqtac, Aỹem Nataxala' maye Qaica ca Seqalanapec.

So Israel dataỹa'aguet Ñim Nataxala'

²⁰ Mashe qaỹoqteguelo soua vi'iye da aỹem 'auataỹa'aguet co'ollaxa, nache saishet da aỹem 'aualaxaguet. Nache qonapec: Saishet da 'am so'onataxanot. Qaq huaña naxa 'enauac ana qaỹoqotcheguemec 'alhua, qataq na pa'aguiñi ana qo'oipaq maye qalochiguiñi ana lcouepi da qoueta'a naxa da 'anatameetacot na ỹaqa'a atamnaxala'pi.

²¹ Aỹem 'am saañi co'ollaxa qoneta'am aca no'on nañiguishe uva qataq aca ỹataqta no'on ala na uva. Qalaq ¿ta'ainco' da 'avi'eguelaxa da qoneta'am aca uva maye qauem qataq ỹoxosa'a?

²² Qaq na'aictaxa da 'anỹo da 'auỹoxona ca no'on nỹoxonaxat, qataq da 'auỹoxona ca qalota nỹoxonaxatpi, qalaxaye nache 'eetai' qome da Aỹem hueto'ot na 'arasouaxashetpi. Qaq 'era da ỹa'aqtac, Aỹem Nataxala'.

²³ ¿Qaq ca 'eeteco' da qoneta': ‹Saishet da aỹem nshepaxan qataq saishet da sho'oxoreetac nam atamnaxala'pi maye saq 'en›? Ña 'aulogui da 'arataxac co'ollaq huaña ye ca'amegue, ña 'aumeten 'enauac nam 'auo'otpi, 'am nauanaxanaxa maye saishet da 'anamaañi,

²⁴ 'am 'ashena maye saq 'et naxa da 'asheguema añi qasoxonaxa, qataq da nvi' da 'aramanaxanaqtaic nache 'ancoỹaxaata'aguet na la'at, qataq da nvi' da 'arapaxaỹaxa nache qaica ca 'am nllañi. Qataq qaica ca 'ashena lhuaraic da nasamñi da 'am nmittaique, cha'aye da huo'o da 'arapaxaỹaxa nache camaye saqalaq da 'am ỹanata.

²⁵ ¡'Am Israel saishet qome da qaicaua caua 'arapela'ate cha'aye ishet da 'auque'emaq, qataq saishet da deqaqtegue 'anqa'en na 'arqosot souaxat na 'araquip! Qalaxaye 'am qonapec: ‹'A'i saishet, cha'aye aỹem sauotec nam ỹaqa'api atamnaxala'pi, nache aỹem seca'ategue namayepi.›»

Na Israel qaỹauo'o qome ca nhuaxanaguec

²⁶ «Qaq 'eeta'am ca cachaxaic da huo'o da la'aloxo da qaỹauanalec, qaq nache 'eetec na Israel le'ecpi da huo'o qome da la'aloxo, nataqa'en na nta'alpi qataq na nataxala'pi, qataq na ntaxaỹaxanaxanecpi qataq na na'aqtaxanaxanecpi.

²⁷ Cha'aye naxa da detaxaỹot na 'epaq laỹe nache, 'eeta': ‹'Am maye 'am ita'a›, qataq naxa da detaxaỹot na coma' nache, 'eeta': ‹'Am maye 'am ỹate'e.› Qaq Aỹem qalaq aỹem iro'oguet naxa na l-laq, nache saishet da aỹem ỹamato'ot. Qalaxaye naxa da chochaq cara'acolec da huaigui da lchec, nache aỹem detaxaỹot, 'eeta': ‹¡Ña 'auanac da qomi' 'anca'alaxatrec!›

²⁸ 'Am Judá, ¿hueta'ague ca 'anatamnaxala'pi maye 'aro'onatacpi? ¡Ỹataqta qalota nam 'anatamnaxala'pi 'eeta'am ca huaqta'a't nỹecpi! ¡Ña qonapega ctaxa da ñesheguem! ¡Shapegueto' da ishet da 'am nca'alaxatec qom 'am nvita cam qauem!

²⁹ ¿Ta'ainco' da Aỹem qancotaitague', ye 'enauac da qoñiita da saishet da Aỹem qaualaqaiguet? Qaq 'era da ỹa'aqtac Aỹem Nataxala'.

³⁰ Qaq qaica ca naigui da sauo'o co'ollaxa so nhuaxanaguec so qaỹa'alquipi, cha'aye somayepi saishet co'ollaxa da ỹalaq da saỹamaxatteguiñi da lataxac. Qaq 'enauac qami' qoñeeta'am ca llonpi maye dequi'iỹapec, da qaualauache som na'aqtaxanaxanecpi.

³¹ Qaq nataqa'en qami' maye qami' dalaxaicpi, ña qana'axaỹaxañiỹa dam la'aqtac Ñim Nataxala'. 'Am Israel, ¿peta'a sheeta'am 'anqa'en ca toolec 'alhua, huo'otaq cam 'alhua maye huetalec na napalaxa? Qami' ỹalamaxat nhuo' le'ecpi, ¿ta'ainco' da qoñeỹapec. ‹Qomi' huesochiyiñi qaq saishet da qaltaq 'am she'eguelaxasoqot›?

³² ¿Aca qa'añole ishet peta'a da icoua'ai aca no'otaqtepi? ¿Qataq aca nauootac peta'a ishet da icoua'ai aca lapoto maye nauoxonaxaqui? Qalaxaye nam ỹalamaxat nhuo' le'ecpi mashe qaỹoqteguelo soua vi'iye da aỹem icoua'ai.»

³³ «¡'Am ỹataqta saqca ca 'anqalaataxac da 'anmitaique na 'ancachaxauapi! ¡Qaq ivira'a ana quisheguetaxaipi da 'auapaxaguenec dam qauem 'arataxac!

³⁴ Naua 'ogo qalaq huaguilo na ntago'q nam ltago'q na choxoraqpi qataq nam qaica ca ỹasouaxat, nam shiỹaxauapi maye saỹauano' da 'auauanalec da ỹo'ottac ca qauem.

³⁵ Qalaxaye na'aictaxa 'enauac de'era, 'am qonapec: ‹Aỹem qaica ca ỹasouaxashet. Ñim Lo'onatac 'Enauacna mashe saishet da aỹem denotega.› Aja', cha'aye qonapec da qaica ca 'arasouaxashet, nache Aỹem 'am sataỹa'aguet qome da 'am ñimit.

³⁶ ¿Ta'ainco' da ỹaguec da 'arỹalaxa da 'anaralaxat so 'anaỹamaxate'? Ye nataqa'en ye Egipto 'am ỹatenachet qome, 'eeta'am da 'eetec da 'am ỹatenachet co'ollaxa ye Asiria.

³⁷ Qaq 'am nlaqchigui qome da 'ara'agaxa qom 'auachegoqchiguiña ye Egipto da 'añe'eguelaq, cha'aye Aỹem sa saconeguet nam shiỹaxauapi maye 'auachelec da 'arpi'iỹaxac, qaq qaica qome ca 'auachegoxotaigui da 'anauochaxac namayepi.»