Jeremías 18 - La'aqtaqa Ñim Lo'onatac 'Enauacna 2013

Qaỹaloqnaxana so nshaxa lo'o

¹ Ñim Nataxala', aỹem 'enapega, 'eeta':

² «'Anqo'ooña qome ye lma' ñi nshaxa lo'o, qaq huaña qome nache 'am sa'axatem ca ỹa'aqtac.»

³ Qaq aỹem Jeremías, ñeqo'ooña yemaye, nache selalec so nshaxa lo'o da do'onataxaatac, ỹo'ottac na nshaxa ỹauota'a aso lo'onataxanaqte.

⁴ Qaq naxa da saỹaỹamaxañi nam lo'onatac, nache qaltaq ỹe'eguelaxalec da ỹo'ot, nache do'onataxana se'eso nshaxa, nache ivitta'a da ỹataqta ipacchigui dam huotaique lataxac naqa'en.

⁵ Huaña nache Ñim Nataxala', aỹem 'enapega, 'eeta':

⁶ «¿Saishet peta'a nataqa'en da sañoxot da nache sheeteque qami' Israel le'ecpi, dam 'eetec ñim nshaxa lo'o da ỹo'ot se'eso nshaxa? Qami' qoñiitaiguilo naua ihua'q, qoñiita'am som nshaxa maye netaiguilo naua lhua'q so nshaxa lo'o. Qaq 'era da ỹa'aqtac Aỹem Nataxala'.

⁷ Aỹem huo'o ñaqa'en ca laloqo' da ñapogosheguem qataq seqalagoxooñi, qataq selaxachigui ca ỹotta'a't shiỹaxauapi huo'otaq ca no'onataxanaxac.

⁸ Qalaxaye que'eca ỹotta'a't shiỹaxauapi da ca'ai na qauem, nache saishet da ñamaxa ca nhuaxanaguec maye mashe seqataxaatai'.

⁹ Qataq huo'o ñaqa'en ca laloqo' da ño'oxoosheguem qataq nquictauec ñaqa'en ca ỹotta'a't shiỹaxauapi, huo'otaq ca no'onataxanaxac.

¹⁰ Qalaxaye que'eca ỹotta'a't shiỹaxauapi da ỹo'ottac na qauem qataq sa na'axaỹaxana nam ivitaqtaxanaxacpi, nache saishet da ñamaxa ca no'on maye mashe seqataxaatapigui' da sanem.

¹¹ Qaq nagui 'aua'aqtaxanem na shiỹaxauapi na Judá, qataq na lma' na Jerusalén, da aỹem Nataxala', shenapega namayepi, sheeta': ‹Mashe huo'o dam llapaqtegueñi da yaqto' qami' sataỹa'agueta, Aỹem mashe iuennataxa da qami' seuaxa'n. Ñaq qoquiỹa'ai qome som qauem nqa'aic, nache qano'onaxache da qarataxaqui qataq da qaro'onataxanaxaqui.›»

¹² Qaq namayepi qome 'am 'enapega, 'eeta': «¡Saishet qome da qomi' 'aume'egueta! Cha'aye qomi' saỹamaxarenaqta da so'otaqtac ca maiche shenaqtapeguec, qataq nache qolaqto'ot qome da so'otaqta'ape naua qauema lhuennataxaco da qarquiyaqteỹaxac.»

¹³ Qaq ỹoqo'oye Ñim Nataxala', 'eeta': «Qaunache qome na ỹotta'a't shiỹaxauapi, da huo'otaq huo'o ca hua'aqchigui co'ollaxa ca 'eeta'am de'era. ¡Na Israel le'ecpi huo'o da ỹo'ot maye ỹataqta qaiqaiga!

¹⁴ ¿Peta'a huo'o ca huaña co'ollaxa da quiguiñi ana aloñi maye huetalec ana qaỹoqotcheguemecpi coma'pi ye Líbano? ¿Ishet peta'a da deqaxaỹañi nam atom 'etaxat maye chegaqasheguema ana qasoxonaxapi?

¹⁵ Qalaxaye na ỹalamaxat nhuo' le'ecpi Aỹem icoua'ai, nache ỹaatacot na saq'en atamnaxala'pi na lchenaxanaxat maye ama na laita, Namayepi iqataqchet so nqa'aic, som nqa'aic maye togoshaapec, nache quetegueto naua saq 'amaqtaq nqa'aico maye saqaỹauatto'n.

¹⁶ Qaq 'era da 'eetec da toolec naqa'en na na'alhua namayepi, nache ỹo'ot da chochaq tatec da na'aalaxa. Qaq 'enauac nam taalec namaye, nache iconnaxaatac na lqaic souaxat da la'aalaxa.

¹⁷ Qaq Aỹem, sheeta'am qome ca la'at maye chegaqa'ague da nala' lliguisheguem, nache selagaxattac qome na Israel le'ecpi, so'ot da dataueeguesop na mpa'aguenaxauapi Aỹem, sero'oguet qome na ilaq namayepi, qaq saishet da samato'ot qom nvi' cam na'a'q maye huaigui ca nhuaxanaguec.»

Dam qalapaxañi da qaỹataỹa'aguet so na'aqtaxanaxanec

¹⁸ So shiỹaxauapi, 'enapec: «Sauoqo'o qome ca llapaxasoxoñi lataxac da yaqto' sataỹaqa'aguet so Jeremías. Cha'aye saishet da seuenaqtaique ntaxaỹaxanaxanec da qomi' ỹapaxague'n, qataq cam ỹaanaxanaxaic da qomi' ỹanema ca lqataxac, qataq ca na'aqtaxanaxanec da qomi' ỹa'axatema ca la'aqtac Ñim Lo'onatac 'Enauacna. Ñaq sauoqo'o ca lasouaxashet yaqto' qaỹalauat. Qaq saishet qome da salaxasoxoguet nam ỹa'axattacpi.»

Da natamnaxac so Jeremías

¹⁹ ¡'Am Nataxala', ñaq aỹem 'ana'axaỹaxana! ¡Qataq 'ana'axaỹaxana da la'aqtac nam ñepa'aguenaxauapi!

²⁰ ¿Peta'a iuen da qaisheetenaxana ca qauem da qaisheeten ca no'on? ¡Namayepi co'ollaxa nshe' añi ñeuachiqui! Ña 'auennata'a da 'am sataỹa'aguet co'ollaxa da setaqteguelec namayepi da yaqto' 'anqateeguesop namayepi da 'aralemataic.

²¹ ¡Qalaxaye nagui, 'auo'ot qome da nam llalaqpi namayepi ilem na lqouaxa, huo'otaq da ilem ca ỹeelonec, qataq 'auo'ot da pa'aipi qataq qaica ca llalaqpi ana lhuapi namayepi! ¡Qataq na ỹalleppi maye lhuapi anamayepi ỹalauat qome ca napiina, qataq na nsoxoppiolec ileuaigui qome ca alaataxac!

²² Qataq nque'elaxatta qome 'anqa'en da 'anamaxa namayepi ca cachaxaicpi, ¡Ñaq qaỹa'axaỹa qome ca la'alaxac souaxat da lcolanaxa! Cha'aye ỹo'ot co'ollaxa aso lshere da yaqto' aỹem loxonec qataq ỹanangui na ỹec aso lqoinapi.

²³ Qalaxaye 'am Nataxala', 'auaỹaten 'enauac nam lapaxañipi namayepi da yaqto' aỹem ỹalauat. ¡Qaq saishet qome da 'auchoxoreetac souaxat nam qauem maye ỹo'ot, qataq saishet da 'aucoua'ai na lasouaxashetpi! ¡Qaq huañi qome 'anqa'en namayepi, qataq 'auauo'o ca nhuaxanaguec 'aurolec da 'arayeloxo!