Jeremías 16 - La'aqtaqa Ñim Lo'onatac 'Enauacna 2013

So Jeremías ỹaconeguet na lamaxasoxonaxacpi Ñim Nataxala'

¹ Ñim Nataxala' aỹem 'enapega, 'eeta':

² «Saishet qome da 'auaron qataq saishet da 'auauo'o ca 'aỹa'alaqpi ne'ena 'alhua.

³ Cha'aye Aỹem Nataxala', 'am sa'aqtaxanem cam talec qome cam ñalaqpi maye ñeguiñi ne'ena 'alhua, qataq nam lta'alpi camayepi.

⁴ Camayepi ilem qome ca nalolaxa maye ỹataqta qauem, nache qaica qome ca nỹeelec camayepi qataq qaica ca ilayiñi qome: camayepi laguelec qome na'alhua, 'eeta'am na shiguiỹac la'atec. Ca alaataxac qataq ca nqouaxa, nmichiguiñi qome naqa'en camayepi, qaq da lo'ocỹaxac camayepi qalaq chec qome na teguesanpi qataq na huauec shiguiỹacpi.»

⁵ Ñim Nataxala', nataqa'en aỹem 'enapega, 'eeta': «Saishet qome da 'aupa'aigui ca nỹec maye hueta'a da naquicoxo souaxat da huo'o ca ileu, qataq saishet da 'anỹen qome qataq saishet da 'auachaxan da huo'o da 'anqui'ic souaxat camaye, cha'aye ne'ena nhuo' le'ecpi ñeqateeguesop da nlagaxayec maye sanem co'ollaxa, qataq da ỹauotaxanaqtaic qataq da ichoxonnataxanaxa. Qaq 'era da ỹa'aqtac Aỹem Nataxala'.

⁶ Na 'amaqtaqaicpi qataq na qaica ca la'amaqchec 'enauac ileu qome huaña ne'ena 'alhua, nache qaica qome ca ilayiñi, qataq qaica ca nỹeelec, qataq qaica qome ca ỹachaxan da nqui'ic souaxat namayepi, da ique'emaqchet da lo'ocỹaxac qataq namarec na lqaic.

⁷ Qataq qaica qome ca ỹo'ot ca lquia'axac da deque'elec cam leuaxaicpi da yaqto' ỹa'añaqchet ca lauo' le'ecpi camayepi qaq na'aictaxa da huo'otaq l-leuaxa ca nta'a huo'otaq aca nate'e.

⁸ Qaq nataqa'en saishet qome da 'aupa'aigui ca nỹec maye huaigui ca nquia'axac, huo'otaq da 'anso'ona'ai' camayepi da 'auque'e qataq da 'anỹoma'ai'.

⁹ Cha'aye Aỹem Nataxala', maye Qaica ca Seqalanapec qataq Aỹem Natamnaxala' na Israel le'ecpi, sa'axatta da 'eeta': Aỹem so'ot qome da imeuo na no'onecpi da huo'o na na'ashaxac ne'ena 'alhua qataq da namaicỹaxac qataq da qaỹo'onaxaalec ca naronaxac. Qaq de'era nache huaiguilo qome caua maiche lalamaqa'ate na'axa'te, qaq qami' nache qauauañiichigui qome.

¹⁰ Qaq qom 'aua'aqtaxanem ne'ena nhuo' le'ecpi de'era na'aqtaxanaxac, nache 'am qainat qome: ¿Ta'ainco' Ñim Nataxala', da ỹa'axata'a da qomi' taleguete qome de'era ỹataqta lta'araic qauem? ¿Negue'to' cam qauem maye so'otaq? ¿Negue'to' cam qarasouaxashet maye hueto'ot Ñim Nataxala' maye Qanatamnaxala'?

¹¹ Nache 'am 'auasateguet qome, qoneta': Ñim nataxala' 'eeta' da la'aqtac: De'era huo'o souaxat da som hua'au qarta'ailpi Aỹem ỹalat, nache ca'ategue na laỹepi atamnaxala'pi, da yaqto' ỹo'oxoren qataq natamnot, qaq Aỹem qalaq aỹem ca'ai somayepi, qataq sa ipaguelec nam ỹapaxaguenataxanaxacpi maye sanem co'ollaxa.

¹² Qaq qami' qalaq ỹapactec da qanapacỹalec som hua'au qarta'ailpi, cha'aye ñi 'oonolec da qoñiita, quetagueto naua qauema lhuennataxaco dam lquiyaqteỹaxac nache saishet da aỹem ỹalaxaguet.

¹³ Qaq ỹoqo'oye qami' ñeqateeguesopa qome ne'ena 'alhua, nache qami' samaxalo cam 'alhua maye qami' qataq so hua'au qarta'ailpi saishet co'ollaxa da qauauañiỹa, qaq huaña nache ye na'a'q qataq ye pe qauo'onataxañiitacot cam laỹepi atamnaxala'pi, cha'aye aỹem saishet da qami' sechoxore'n qome.

¹⁴ Qalaxaye anacta ca na'a'q maye huaigui da saishet da qoỹan ca na'aqtac da qoỹeeta', ‹Ñim Nataxala' nca'altauec, ñim nqateeguesop co'ollaxa ye Egipto so Israel le'ecpi›,

¹⁵ nacherata qome da qoỹeeta': ‹Ñim Nataxala' nca'altauec, ñim nqateeguesop co'ollaxa na Israel le'ecpi ye 'alhua maye pa'aigue da sheu' qataq 'enauac na laỹepi 'alhuapi maye ilagaxaalec co'ollaxa namayepi.› Cha'aye Aỹem qami' she'eguelaxatalo qome ye qana'alhuai yem 'alhua maye sanem co'ollaxa so hua'au qarta'ailpi. Qaq 'era da ỹa'aqtac Aỹem Nataxala'.

¹⁶ Ñanacot qome na qalota ya'acoxoicpi, Aỹem Nataxala' 'era da ỹa'aqtac, da yaqto' ỹalecaique na Israel le'ecpi. Ime qome nache qaltaq anac ñaqa'en ca qalota 'ipiaxaicpi yaqto' ỹaconeua'a, nache nqateeguesop ana qasoxonaxapi qataq ana qaỹoqotcheguemec 'alhuapi, qataq ivira'a na huetangui na lpoxoỹaxapi ana coma'pi.

¹⁷ Cha'aye Aỹem selota'a 'enauac nam ỹo'ottacpi, nache qaica ca ỹapoguiñi ñaqa'en, ivira'a na lasouaxashetpi saishet da nqañoxocheesop da imeenaxanaxac.

¹⁸ Qaq hua'auñi qome da dos ñaqa'en da ỹe'eguelaxalec da isheeten na qauem maye ỹo'otpi, cha'aye nshepaxanaqchet na ña'alhua, souaxat nam nqaigaxat leuaxaicpi natamnaxala'pi, qataq 'enauac nam 'alhua maye sanem co'ollaxa da lalamaxat, huaña naqa'en da ỹo'ot nam ỹataqta seqaiga.»

So Jeremías iỹaxanot Ñim Nataxala'

¹⁹ 'Am Nataxala', maye 'Am ỹa'añaxac qataq aỹem 'ampaxattalec, qataq ỹe'eguenaxaqui da huo'o ye sevireguet lchec, 'am naỹa qome na ỹotta'a't shiỹaxauapi maye chegaqa'alo naua loga'te ana 'alhua, nache 'am 'enapega, 'eeta': «Nachenata nam saq 'en atamnaxala'pi maye qaca ca naigui qataq qaica ca la'añaxac da ỹaconeguet co'ollaxa som hua'au qarta'alpi da lalamaxat.»

²⁰ «Ca ỹale ishet da ỹo'ot ca maiche natamnaxala'pi. ¡Qalaxaye que'eca atamnaxala'pi, saishet da 'eesa!

Da lasataxac Ñim Nataxala'

²¹ Qaq ỹoqo'oye nagui, Aỹem sachaxana da ỹa'añaxac namayepi, yaqto' namayepi ỹaỹaten da ỹe'enaxat da Aỹem Nataxala'.»