Jeremías 11 - La'aqtaqa Ñim Lo'onatac 'Enauacna 2013

Sa qaipaguelec so aỹamaxataxac

¹ Ñim Nataxala' aỹem 'enapega aỹem Jeremías, nache 'eeta':

² «Na israel le'ecpi ña na'axaỹaxaachigui qome nam na'aqtacpi maye chegaqaigui de'era aỹamaxataxac. Ñaq 'autaxaỹot qome na shiỹaxauapi maye lma' ye Judá qataq na hueta'a na Jerusalén,

³ nache 'aua'aqtaxanem da Aỹem Nataxala' maye Natamnaxala' na Israel le'ecpi, sa'axatta da talec qome ca qauem cam shiỹaxaua maye sa ỹalaxagueta naua na'aqtaqa maye chegaqaiguilo de'era aỹamaxataxac.

⁴ Qaq nachera dam aỹamaxataxac maye so'ot co'ollaq ñaỹamaxate' som hua'au qarta'ailpi, co'ollaq ñeqateeguesop ye Egipto, yem 'alhua maye 'eeta'am aca nqatelaxanaxaqui da qaỹasaxaigui ca qanqatel lcat. Nache shenapega co'ollaxa sheeta': Aỹem qaualaqaiguet qome qataq qauo'oche 'enauac nam qami' samaxaleguete, nache qami' ỹalamaqa'ate qome, qaq qami' aỹem Qanatamnaxala'ai qome.

⁵ Qaq qami' da aỹem qaualaqaiguet, nache aỹem sepacchigui qome som ỹa'aqtac maye sanem co'ollaxa som hua'au qarta'ailpi da sanem ca 'alhua, nam 'alhua maye qoñiitalec nagui nam huaña da na huaca lche' qataq na dapic lli'i 'eeta'am ca 'etaxat da ỹa'auat.» Nache aỹem sasat, sheeta': «Aja' 'am Nataxala'.»

⁶ Qaq huaña nache Ñim Nataxala' aỹem 'enapega 'eeta': 'Aua'axat de'era na'aqtac da huaña nam huaqta'a't nỹecpi maye ỹotta'a't naua nañalo ye Judá, qataq naua nqa'aico ye Jerusalén. Qonapega na shiỹaxauapi, qoneta': «Ñaq qana'axaỹaxañiỹalo naua na'aqtaqa maye huetaiguilo de'era aỹamaxataxac, qaq ime nache qaualaqaileguete.

⁷ Aỹem co'ollaq ñeqateeguesop ye Egipto, som hua'au qarta'ailpi, nache seqattelec da Aỹem ỹalaxaguet, qaq nache chegoqchiguiña nache ivitta'a nagui da ñaq shecto'ot da seqattega.

⁸ Qalaxaye saishet da Aỹem qocha'a qataq saishet da Aỹem ỹalaxaguet, nachaqrata da qaramchigui da lquiyaqteỹaxac nache queguelo na maiche lhuennataxaco. Nache saishet da ipaqueeleguete naua ỹa'aqtaqa maye samaxaleguete co'ollaxa, qaq huaña nache so'ot so iuaxanaxanaxac maye ỹa'axatta'a co'ollaxa de'era ñaỹamaxataxac.»

⁹ Qaq Ñim Nataxala', nache queto'ot da aỹem 'eetega 'eeta': «Na shiỹaxauapi ye Judá qataq na netaña ye Jerusalén aỹem dataỹa'aguet.

¹⁰ Nache ỹe'eguelaxa da ỹo'ot nam nasouaxashetpi maye ỹo'ot co'ollaxa som hua'au lta'alpi, som saishet co'ollaxa da aỹem ỹalaxaguet, nacherata da quegue nam ỹaqa'a atamnaxala'pi nache ỹo'oxoreetac. Qaq yem Israel qataq ye Judá saipaguelec dam ñaỹamaxataxac maye so'ot co'ollaq ñaỹamaxate' som hua'au lta'alpi.

¹¹ Qaq ỹoqo'oye Aỹem ñamaxa qome namayepi cam qauem nache saishet qome da huo'o ca ỹet. Qaq na'aictaxa da ỹa'alaqtagui da Aỹem iỹaxaatacot da setauan, qalaxaye saishet qome da sa'axaỹa namayepi. Qaq 'era da ỹa'aqtac, Aỹem Nataxala'.

¹² Qaq huaña, nache na shiỹaxauapi ye Judá, qataq na netaña ye Jerusalén, nqo'ona qome da iỹaxanot ca ntaunaguec nam natamnaxala'pi maye ỹaatacot naxa na lchenaxanaxat, qalaxaye ne'ena atamnaxala'pi saishet qome da nca'alaxatec namayepi, qom nvi' que'eca qauem.

¹³ Ye Judá, ỹataqta qalota na natamnaxala'pi, 'eeta'am nam huaqta'a't nỹecpi maye ỹotta'a't naua nañalo, qataq na netaña ye Jerusalén qalota ana nauaxaỹaxaasheguem lca'atoxonaxalatepi maye 'eeta'am ye lcata na nqa'aicpi, da yaqto' ỹanot na lchenaxanaxat so Baal.

¹⁴ Qaq ỹoqo'oye 'am Jeremías, saishet qome da 'anatamen da 'auỹaxaalec ne'ena nhuo' le'ecpi, qataq saishet da aỹem 'aỹa'anot ca 'anatamnaxac qataq ca 'anachoxonnaxac da talec namayepi, cha'aye Aỹem saishet qome da sa'axaỹa namayepi da Aỹem iỹaxanot da setauan, qom mashe huetaigui que'eca qauem.

¹⁵ ¿Che negue't, ca 'anmittaique 'am ỹauotaqte Israel, da qoueta'a ana ỹalamaqte atamnaxaqui, ye mashe ime da qalota na 'auo'ot qauem? ¿'Aupettega peta'a da na lcheta qataq na lapat maye 'auavigaxattac da ishet da qaỹoqta naqa'en dam qauem, qataq da ishet da 'am 'ananeltaxan?»

¹⁶ Ñim Nataxala' ỹauo'o co'ollaxa da 'are'enaxat, 'eeta': «oliivo maye qalochiguiñi ana lcouepi, qataq nlaqchigui ana no'on ala.» Qalaxaye huaigui naqa'en so lta'araic nalataxa, da Ñimaye ỹegueua'a ana 'arauepi nache ỹavigoigui ana 'arcouepi.

¹⁷ Ñim Nataxala' maye Qaica ca Ỹaqalanapec ñim 'am ỹaañi co'ollaxa, 'am namaxa so qauem, da 'am talec souaxat nam qauem maye ỹo'ot na Israel qataq ye Judá, cha'aye inogoqche't souaxat da ỹaatracot na lchenaxanaxat so Baal.

So Jeremías huotaique da qaỹalauat

¹⁸ Ñim Nataxala' aỹem ỹaỹaanaxanaxanec da nam ñepa'aguenaxauapi huo'o dam ỹo'ottac qauem maye huotaique da aỹem ỹo'otec. Ñimaye ỹauaachiguilo naua ỹa'ai'te da yaqto' ñanoma damaye.

¹⁹ Qaq aỹem sheeta'am ca qagueta llalec da ỹe'emaqtom da qaỹauecta'a ca nalaataqa', qaq saishet da saỹaten da huo'o dam qaỹauotaique da aỹem qaỹo'otec. Qaq namayepi, 'eeta': «Sechegaq ara qo'oipaq nache cañe' ñeqa'enaq ana ala, ñapogaxasheguem nache ñeqataxasop nam nca'altauecpi ana 'alhua, yaqto' qaica ca qaltaq iuennatega aramaye.»

²⁰ Qalaxaye 'am Nataxala' maye Qaica ca 'auqalanapec 'am maye no'on da 'aro'onataxanaxac da huo'o ca 'anmit, 'Am 'auauatton da lquiyaqteỹaxac qataq cam 'eetapeguec ca shiỹaxaua. Ñaq sauaachigui 'anqa'en ca 'eetec qom 'auaxan yi'iye shiỹaxauapi, cha'aye aỹem huo'o da ipi'iỹaxac 'Am.

²¹ Qaq nam ỹalleppi ye Anatot, maye huotaique co'ollaxa da aỹem ỹalauat qataq aỹem illapeguem da sa'axat da le'enaxat Ñim Nataxala', da yaqto' saishet da aỹem ỹalauat,

²² Ñim Nataxala' maye qaica ca Ỹaqalanapec, 'enapega namayepi, 'eeta': «Aỹem sauo'o ca qanhuaxanaguiqui: nam nsoxoppiolec qaỹalauat qome qaira'a ca ỹeelonec, qaq na qaỹa'alquipi ỹalleppi qataq ana 'alpi ilem qome na lqouaxa.

²³ Nache qaica qome ca no'onañi namayepi, cha'aye anacta cam na'a'q maye huaigui da sauo'o ca qanhuaxanaguiqui, qami' ỹelleppi maye qarmaye ye Anatot, qami' taleguete qome ñaqa'en ca qauem.»