Jeremías 10 - La'aqtaqa Ñim Lo'onatac 'Enauacna 2013

Na atamnaxala'pi maye saq 'en qataq Ñim Lo'onatac 'Enauacna

¹ Ñaq qana'axaỹaxañiỹa qami' nhuo' Israel, dam la'aqtac Ñim Nataxala' maye qami' ỹanema.

² Ñim Nataxala', 'eeta': «Saishet qome da qoquiigue da lataxac na laỹepi ỹotta'a't shiỹaxauapi qataq saishet qome da qami' icolanaqche't nam na'anecpi na piguem da qoñiita'am da lataxac ne'ena ỹotta'a't shiỹaxauapi.

³ Da la'amqaanataxanaxac ne'ena shiỹaxauapi qalaq qaica ca naigui. Namayepi ichec naxa ana lamo ỹachegoxotaigui na aviaq, nache anac na ne'enaqtac lo'o da irolec na lo'ogoxonaxat da naloqchiiñi,

⁴ qaq ime nache ỹauo'o na llo'oxoraxat plata qataq na oro, qataq ỹauo'o ana clavo qataq ana ltoqnaxanaqte, da iuaxaañi da yaqto' saishet da hua'axañi.

⁵ Na atamnaxala'pi qalaq 'eeta'am ca ne'enaqtac shiỹaxaua da qoỹaatalec ca nanaxanaqa' maye lma' ana melón, namayepi saishet da detaqa, qataq iuen da qanachesheguem, cha'aye saishet da queuoỹapigui'. Saishet da qañe'eetega namayepi, cha'aye namayepi saishet da huo'o ca qami' ỹo'oteque qauem huo'otaq 'onaxaic.»

⁶ Qaq 'Am Nataxala' qaica ca 'am 'eeta'am: 'Am 'amaqtaqaic, da 'are'enaxat qalaq lta'araic qataq 'añaxaic.

⁷ ¿Negue'tom ca saishet da 'am ñi'iỹa, 'am Nta'a maye 'aulotague' na ỹotta'a't shiỹaxauapi? 'Am maye 'aiguet da huo'o naq 'enec qanqa'en. Cha'aye 'enauac na ỹaanaxanaxaicpi qataq na nta'alpi ana 'alhua qaica ca 'eeta'am 'am.

⁸ 'Enauac namayepi qaica ca ỹaỹaten qataq qaica ca laỹaanataxanaxac. ¡Qaica ca napaxaguenataxanaxac da ỹachegoxotaigui nam 'epaqpi!

⁹ Nam natamnaxala'pi qalaq nda'a't na lcat plata maye ỹachegoxota'a ye Tarsis qataq na oro maye ỹachegoxota'a ye Ufaz, nam lo'onatacpi nam ne'enaqtac lo'opi qataq na lcat lo'opi, qataq ỹaatañi qanqa'en ana npoto maye imalaqalec qataq togaxaraic, qaq 'enauac namayepi lo'onatac nam sa nqalaate' da huo'o na ỹe'enaxat.

¹⁰ Ñim Nataxala' nacheñi Ñim 'eesa Atamnaxala', Ñim Lo'onatac 'Enauacna maye nca'altauec. Ñim Nta'a maye chochaq tatec. Da dalemata nache cholaxan ana 'alhua, qaq nam ỹotta'a't shiỹaxauapi sa ỹañoxot da dataỹa'aguet Ñimaye.

¹¹ Qami' Israel le'ecpi, qaua'aqtaxañim nam ỹaqa'a da la'amqaanataxanaxac, qoñeeta': «Nam atamnaxala'pi maye saishet da ỹo'ot co'ollaxa na piguem qataq ana 'alhua saishet qome da queta da netalec ana 'alhua, qataq saishet da huo'otaq 'oonolec ca hueta'a na mpa'aguiñi na piguem.»

Da no'onec da qaỹo'oxoren Ñim Lo'onatac 'Enauacna

¹² Ñim Nataxala', irolec da la'añaxac co'ollaq ỹo'ot ana 'alhua, qataq irolec da laỹaanec co'ollaq ỹaỹamaxaañi ana 'alhua, qataq irolec da laỹaanec co'ollaq ilagaxaañi na piguem.

¹³ Da detaqa Ñimaye nache laỹona't na 'etaxat na piguem, qataq chegoqchiguiña naqa'en naua loga'te ana 'alhua da naỹoxoosheguem naqa'en na lo'oc na piguem qataq qashelecteguiñi naqa'en na le'eraxa na auot qataq na la'at chegoqchiguiña naqa'en cam laỹonaqa'.

¹⁴ Qaq 'enauac na shiỹaxauapi qaica ca lauattonaxanaxac qataq ca laỹaanataxanaxac. Na ne'enaqtacpi lo'opi qalaq da'aguelec na le'enaqtacpi, cha'aye da lo'onataxanaxac namayepi choche natenataxanaxac: qaq nam le'enaqtacpi namayepi qaica ca lca'alaxa,

¹⁵ namayepi qaica ca naigui, nda'a't da qane'eetapigui, qaq Ñim Nataxala' qom ivita ca lhuaxanaxanaxac, nache ilaxachigui namayepi.

¹⁶ ¡Ñim Natamnaxala' so Jacob ỹataqta huaỹoqtec da lataxac, cha'aye Ñimaye ỹo'ot co'ollaxa 'enauac nam huo'o! Ñimaye lca'aguishec na Israel le'ecpi da yaqto' lalamaxat. Dam le'enaxat Ñimaye, 'eeta': Nataxala' maye Qaica ca Ỹaqalanapec.

¹⁷ Qaq qami' nhuo' le'ecpi maye mashe qami' qaicoleesopa, ñaq qalaỹoñiỹa't qome na qo'ogoxoshechi.

¹⁸ Cha'aye Ñim Nataxala', 'enapec: Aỹem nagui ỹataqta qaỹoqta qome ca sasaxague nam netalecpi ne'ena 'alhua. Aỹem sa secherapec namayepi, shapegueto' da ishet da Aỹem ỹanata.

¹⁹ ¡Choxoraicolec aỹem ỹataqta lta'araic da ñequi'ic! ¡Na ique'emaxapi qalaq qaica ca lata'! ¡Qaq aỹem sepettega da ishet ñala'aguet de'era ñequi'ic!

²⁰ So ipe'l qalaq nlachiguiñi, 'enauac na lquetpi dacheptac. So ỹalaqpi qalaq aỹem ỹalat, ¡somayepi mashe qaica! Nache qaica ca qaltaq ỹa'ayiñi cam ipe'l, qataq qaica cam lapaxasheguem ca lapoxot camaye.

²¹ Na nataxala'pi ne'ena nhuo' le'ecpi qaica ca ỹaỹaten, namayepi saishet da nmitaique Ñim Nataxala'. Qaq ỹoqo'oye saishet da nquittasheguem da lo'onataxanaxac, qataq 'enauac ana lalo qaguetapi nlagaxattac.

²² ¡Ñaq qana'axaỹaxañiichiguiñi! ¡Nvi' da na'axaỹaxac! Ye 'alhua maye pa'aigue da sheu' chegoqtegue da lta'araic nllimiaxa, maye ỹo'otec qome ye huaqta'a't nỹecpi ye Judá da toolec nache nda'a't qome na qa'alaqpi da coleeteguelec.

²³ 'Am Nataxala', aỹem saỹaten da ca ỹale saishet da lalamaxat da nachaalataxac, qataq saishet da maiche ỹoiqueetac ca llecỹaxac.

²⁴ Ñaq qomi' 'auaỹamaxaayiñi 'auo'ogoxona da nalochiguiñi lataxac, qaq saishet da 'auo'ogoxona da 'arayeloxo, cha'aye damaye ishet da qomi' ilaxachiguilo.

²⁵ Nacherata da 'aucorelec da 'arayeloxo nam ỹotta'a't shiỹaxauapi maye 'am saỹauatton nam nhuo' le'ecpi maye saishet da iỹaxaatega da 'are'enaxat, cha'aye namayepi ilaxachigui na lauo' le'ecpi so Jacob, nache qaica naqa'en ca no'onañi qataq nlachiguiñi naqa'en ne'ena 'alhua.