Isaías 9 - La'aqtaqa Ñim Lo'onatac 'Enauacna 2013

Da lañoxoc qataq da lo'onataxanaxac qome ca nca'aguishec

¹ Qaq saishet qome da nache 'eetai' da huetaigui na napalaxa nam huetaigui nagui da laquicoxo. Ñim Lo'onatac 'Enauacna huetaiya' naqa'en co'ollaxa ye na'alhua so Zabulón, qataq ye na'alhua so Neftalí, qalaxaye taỹa'a naqa'en da huo'o da llo'oxoyec ye Galilea maye na'alhua nam ỹaqa'a da la'amqaanataxanaxac, maye chegoqchiguiña ye pa'aỹa'atague da lỹa le'ego ye Jordán nache ivira'a ye loigue aso auaxai.

² Nam shiỹaxauapi maye huetaigui co'ollaxa na napalaxa, ila'a so lta'araic ne'eraxa, qaq se'eso ne'eraxa, icoỹarelec co'ollaxa nam huetaigui na napalaxa.

³ 'Am Nataxala', 'anache co'ollaxa da lta'araic namaicỹaxac, qataq da ỹataqta lta'araic tonaxac. Nache 'enauac na shiỹaxauapi machiguiñi da 'Am nachatto'ot, 'eeta'am da ivita da qanqat ca ala ca nañiguishec qataq 'eeta'am da qantootalec da qancolaxachigui ca nhuotaxanaxatpi.

⁴ Cha'aye 'Am 'anqateeguesop da nlataguec maye ipataqtañi co'ollaxa na nhuo' le'ecpi, qataq da ncogaxanataguec maye ỹo'ot da laquicoxo, qataq da namaxasaguec maye sa ndaxaasheguem, 'eeta'am da 'eetec co'ollaq 'aulaxachigui ye Madián.

⁵ Qaq na pela'pi maye nalaataxaquipi na alleppi, qataq na nogoxot maye huagui na ntago'q, namayepi qaỹavigaxat qome nache nlachiguiñi souaxat ca norec.

⁶ Cha'aye ñiguiñi qome ca nogotolec, Ñim Lo'onatac 'Enauacna qomi' ỹanema ca 'oonolec llalec, qaq camaye qoỹanagui qome da la'añaxac da nta'a, qataq qoỹanagui qome ne'enaua ne'enaqa'ate: Qaỹa'aalaque naua lqataxaco, Lo'onatac 'Enauacna maye 'añaxaic, Nta'a maye chochaq tatec, qataq Chegoqchigui da nlagaxayec.

⁷ Camaye nso'ongui qome añi nso'onaxaqui so David, huaña nache nquictauec da la'añaxac ivitta'a da ilo'ogue 'enauac ana 'alhua, nache saishet qome da imeuo da nlagaxayec, qataq da lo'onataxanaxac ỹataqta na'atchiguiñi qome, cha'aye na'attalec da no'on qataq nalochiguiñi lataxac, qaq nache chegoqchiguiña nagui nache chochaq tatec qome. Qaq 'era da ỹo'ot qome Ñim Nataxala' maye Qaica ca Ỹaqalanapec souaxat da lta'araic lauotaxanaqtaic.

Ñim Nataxala' dataỹa'aguet na Israel le'ecpi

⁸ Ñim Nataxala' ỹamaxa so la'aqtac da dataỹa'aguet na Israel le'ecpi, nam nhuo' le'ecpi maye chegoxoguet so Jacob.

⁹ Qaq de'era ỹaỹaten qome 'enauac ye nhuo' le'ecpi maye chegoxoguet so Efraín maye hueta'a ye Samaria, yem huo'o naxa da ño'oxonnaxac qataq da na'amqaanaxac da detaqtac,

¹⁰ nache 'eeta': «Yem losocpi mashe naañi qalaxaye qomi' qaltaq ño'oxonaxasheguem qome sauoqta'a ca coma' nchiiguishec. Qataq mashe qaichec so nllecnaxanaxatpi maye chegaqaigui ana sicómoro, qalaxaye nmeneguet qome ñaqa'enaq na cedro».

¹¹ Ñim Nataxala' namaq so ỹataqta qauemaic pa'aguenaxauapi, qaq nacheñi Ñimaye da ỹamaxalec somayepi da deloquiaxanataxan.

¹² Qaq chegoqtegue da nala' lliguisheguem so siiriopi, qataq chegoqtegue da nala' lliguiñi so filisteopi, nache 'eco' 'oonolec da iuoxonañi so Israel le'ecpi. Qalaxaye ñaqaiyeta da layeloxo Ñim Nataxala' saishet da vi'iiguet, Ñimaye nache queto'ot da darenaxaatac.

¹³ Qalaxaye na nhuo' le'ecpi saishet da ỹe'eguelaqot Ñim Lo'onatac 'Enauacna, maye ỹo'ot co'ollaxa da nhuaxanaguec, qataq saishet da nmitaique Ñim Nataxala' maye Qaica ca Ỹaqalanapec.

¹⁴ Qaq ỹoqo'oye Ñim Nataxala' 'oonolec na'a'q qome ca huaigui da icheguec na lqaic, qataq na la'araxashet na Israel le'ecpi 'eeta'am naqa'en ca shiguiỹac, qataq 'eeta'am ca ichec aca chaic qataq aca na'aate.

¹⁵ Qaq na lqaic nache naigui na ỹa'axaiquipi qataq na nataxala'pi, qaq na la'araxashet qalaq nachena na na'aqtaxanaxanecpi maye dapaxaguenataxaateguec da natenataxanaxac.

¹⁶ Cha'aye nam lataxala'pi ne'ena nhuo' le'ecpi nachena na isomaxanaqchet, qaq nam ca'attague' namayepi nache deqat.

¹⁷ Qaq ỹoqo'oye Ñim Nataxala' saishet co'ollaxa da ỹauotec na nsoxoppi, qataq saishet da ichoxoreetac na saploqpi qataq ana pa'aipi. Cha'aye imauec ne'ena nhuo' le'ecpi da qauemaicpi, qataq qauema naua la'aqtaqa 'enauac namayepi. Qalaxaye ñaqaiyeta da layeloxo Ñim Nataxala' saishet da vi'iiguet, Ñimaye nache queto'ot da darenaxaatac.

¹⁸ Cha'aye dam qauem, 'eroigui qome nache 'eeta'am ca norec da ỹavigaxat aca ỹaxat qataq ca huouesat, qataq ỹavigaxat aca qo'oipaqpi maye netaigui ca sansattec aviaq, nache ca lmala'q ỹataqta la'ana't da huaỹoxoosheguem 'eeta'am aca daua'ache.

¹⁹ Qaq souaxat dam layeloxo Ñim Nataxala' maye Qaica ca Ỹaqalanapec, nache ana 'alhua ỹavic, nache ca norec ỹavigaxat na shiỹaxauapi. Nache qaica ca ichoxoreetac ca maiche lqaỹa.

²⁰ Ñi 'oonolec qalaq chec qome ca pa'ata'ague na aloiguishec lhuaq, qalaxaye ñaq 'eetalec da huo'o na lqouaxa, qaq ca lỹa qalaq chec ca pa'ata'ague na ne'emaxashec lhuaq, qalaxaye ñaq 'eetalec da saishet da icoma'. Nache ivitta'a da chec ca maiche llalaqpi.

²¹ So Manasés delogui' qome so Efraín, qaq so Efraín delogui' so Manasés, ime nache soomaye huaxaỹa't da iloquiaxa'n ye Judá. Qalaxaye ñaqaiyeta, da layeloxo Ñim Nataxala' saishet da vi'iiguet, Ñimaye nache queto'ot da darenaxaatac.