Isaías 7 - La'aqtaqa Ñim Lo'onatac 'Enauacna 2013

Da la'aqtaxanaxac so Isaías maye ỹanem so Ajaz

¹ So Resín, maye nta'a ye Siria, qataq so Pecaj, maye nta'a ye Israel, som llalec so Remalías, soomaye iloquiaxa'n co'ollaxa ye Jerusalén da huotaique da deuotaxaarec, qalaxaye sa ỹañoxo't. Qaq de'era, huetoigui co'ollaq so Ajaz, som llalec so Yotán, qataq laual so Uzías da nta'a ye Judá.

² Qaq huaña co'ollaxa nache so nta'a Ajaz, qataq so llalaqpi huo'o da la'axaỹaxac maye 'eeta': «Ye siiriopi huaxaiguet na lma' ye Efraín.» Nache so nta'a, qataq so shiỹaxauapi ỹataqta cholaxan souaxat da lli'iỹaxa, 'eeta'am aca qo'oipaq da cholaxan da huo'o na la'at.

³ Qaq huaña, nache Ñim Nataxala' 'enapega so Isaías, 'eeta': «Qojec qome, 'auauec ñi 'aỹa'alec Sear Yasub, da yaqto' 'anauane' ñi nta'a Ajaz, qom huaña ye loga't so llec na 'etaxat maye chegaqaua'a añi late'erai laỹe' na 'etaxat, maye naña so nqa'aic maye taỹauga ye no'onaxa maye lalamaxat so nỹoxonaq na nogoxot,

⁴ nache qonapega qome qoneta': ‹Maxatchaxa 'avitapigui' qome, qalaxaye saishet da 'aue'elaq, saishet da 'añe'etac, qataq saishet da leuapigui ye 'arhuel, souaxat ñi Resín qataq yem siiriopi qataq ñim llalec so Remalías,› maye 'eeta'ama caua norec lasoqo da nchetrapiguishegue'm, souaxat da 'eroigui da nnogoxonaxa'c.

⁵ Ye siiriopi huaxaiguet ye Efraín le'ecpi, qataq ñim llalec so Remalías, da naỹamaxara't da yaqto' 'am ỹo'otec ca qauem, nache 'eetra':

⁶ Qolaq, ñeqo'onaxa qome ye Judá, nache secolanaqchetaq, seuotaxanaxac yemaye, nache sanaqagui qome da nta'a ñim llalec so Tabel.

⁷ Qalaxaye Ñim Nataxala', 'enapec: ¡Saishet qome da ipacchigui damaye qataq saishet da 'eetec de'era!

⁸ Ye nỹecpi ye Damasco nacheye ye netaña na nta'alpi ye Siria, qaq so Resín, nacheso so nta'a ye Damasco, qalaxaye qom inoxoorec caua sesenta y cinco vi'iye, nache na Efraín nlachiguiñi qome, nache ivitta'a da toolec.

⁹ Ye nỹecpi ye Samaria nacheye ye netaña na nta'alpi ye Efraín, qaq so llalec so Remalías nacheso so nata'a ye Samaria qaq qami' da saishet da aỹem qaua'amaqchiñi, nache qaica qome ca no'onañi da qoñeeta.»

¹⁰ Qaq Ñim Nataxala' nataqa'en 'enapega so Ajaz, 'eeta':

¹¹ 'Auỹaxanot Ñim Nataxala', maye 'Anatamnaxala' da 'am ỹanem ca la'anec maye sa qaỹauanapega, na'aictaxa da huaña na ỹataqta pa'aguiñi ana 'alhua, huo'otaq ca ỹataqta qaỹoqotcheguemec na piguem.

¹² Qalaxaye so Ajaz, 'eeta': Aỹem saishet da she'eguen Ñim Nataxala' da seỹaxanot da ỹauo'o ca la'anec.

¹³ Qaq huaña nache so Isaías, 'enapec: «Aỹem qana'axaỹaxañiỹa nagui, qami' llalaqpi so David! ¿Peta'a qaupi'itaxañiitega da saq 'amaqtaq da sa qaualemaxache na shiỹaxauapi, ye nataqa'en huotaique da sa qaualemaxache Ñim Ñatamnaxala'?

¹⁴ Qaq ỹoqo'oye Ñim Nataxala' Nacheñi ñim qami' ỹanema qome ca na'anec: Aca qa'añole hualaxai qome nache acamaye ỹale qome ca llalec, qaq que'eca llalec acamaye ỹanagui qome da le'enaxat Emanuel, maye naigui da: ‹Ñim Lo'onatac 'Enauacna qomi' hueta'agueta.›

¹⁵ Nache camaye qaiquia'axaateguec qome ca isaxa't huaca lche', qataq ca dapic lli'i, choche ivitta'a da ỹaỹaten da lca'aua'a ca no'on, qataq da sa ỹaconeguet ca qauem.

¹⁶ Cha'aye que'eca nogotolec qom saxanaxa da ỹaỹaten da lca'aua'a ca no'on, qataq da sa ỹaconeguet ca qauem, nache yi'iye 'alhua maye lalamaxat se'esoua dos nta'al maye 'añe'etegalo yemaye qanayeca'ai qome.

¹⁷ Ñim Nataxala', anacot qome da yaqto' 'am talec, qataq na 'arhuo' le'ecpi qataq nam llalaqpi so 'arta'a, caua qauema na'axa'te maye saqaỹauanapegalo, chegoqta'a co'ollaq so Efraín nỹoteeguesop ye Judá, cha'aye Ñimaye anac naqa'en qome ñi nta'a ye Asiria.

¹⁸ Qaq que'eca na'a'q Ñim Nataxala' yo'oxon qome, nache 'eeta'am aca lotaxañi da anac naqa'en ca shiỹaxauapi maye hueta'a cam ỹataqta qaỹoqta talapi ye Egipto, qataq 'eeta'am ca te'esaq lta'a lalaxat da anac naqa'en nam hueta'a ye Asiria.

¹⁹ Nache anac qome 'enauac da yaqto' nalec na qaỹoqchiguingui ca'ameguepi, qataq na auacpi maye naigui na coma'pi, qataq 'enauac na huouesat maye huo'o ana le, qataq nam naña ana laquipiaxaquipi nam shiguiỹacpi.

²⁰ Qaq que'eca na'a'q, Ñim Nataxala' do'ogoxona qome ñi nta'a ye Asiria, 'eeta'am naqa'en ca npetegaxanaxat da qaỹa'aalaxana, qaỹachegoxota'ategue da le'ego ye tala Éufrates, nache npetec, qui'it naqa'en na lqaic, lqa' laue, qataq ivira'a ana laso naua lchel na Israel le'ecpi.

²¹ Qaq que'eca na'a'q, ca 'oonolec ỹale da huo'o aca 'oonole lalo huaca qataq dos caua lalo qagueta,

²² nache camaye ỹataqta ỹaguec qome ca aloq huaca lche', nache ivira'a da chectac ca isaxa't huaca lche'. Qataq 'enauac cam no'onañipi yi'iye 'alhua, chectac qome ca isaxa't huaca lche' qataq ca te'esaq lta'a lli'i.

²³ Qaq que'eca na'a'q, nache nam nanaxanaqa'pi uva lma'pi maye ñaxattalec ana mil nañiguishepi maye ivi' co'ollaxa ana mil anom plata añi lasheue, qalaq nda'a't da ñaxattalec qome aca ỹaxat qataq aca huoue.

²⁴ Da qainoxoneua'a qalaq qaiuen ca checnec qataq aca checna da qañi'ipiaxan, cha'aye imauec qome namaye da imattalec aca ỹaxat qataq aca huouepi.

²⁵ Qataq anam qaỹoqotcheguemec 'alhuapi maye qairota'a co'ollaxa ana nasheugaxanaqte lcat da qoỹanaxaateguelec, qalaq nda'a't qome aca ỹaxat qataq aca huoue da ñaxattalec, nache qaica ca ishet da tasheguema. Nache nda'a't da lquia'aqa' qanqa'en ca nauegaxanaxala' huacapi qataq aca qaguetapi.»