Isaías 60 - La'aqtaqa Ñim Lo'onatac 'Enauacna 2013

Da llo'oxoyec ca dalaxaic Jerusalén

¹ 'Am Jerusalén, ña qoñesheguem nache 'am 'eroigui, cha'aye mashe nvi' na 'arcoỹaraxanaxat, qaq da llo'oxoyec Ñim Nataxala' 'eroigui da 'am icoỹattalec.

² Nam napalaxa qalaq imattalec ana 'alhua, qaq na pe qalaq lpachigui na ỹotta'a't shiỹaxauapi, qalaxaye Ñim Nataxala' 'eroigui qome da 'am icoỹattalec, qataq 'am chegoqchigui qome da yo'oq da llo'oxoyec.

³ Na ỹotta'a't shiỹaxauapi qalaq naỹa qome na 'arcoỹaraxanaxat, na nta'alpi qalaq anac qome da naỹa nam le'eraxa nam yo'oxoñi maye 'anachattaigui.

⁴ Ña 'anamatasheguem nache 'auamata'alo naua laỹel nam qoueta'a, cha'aye 'enauac namayepi laỹona't nache 'am naỹa. Na 'aỹa'alaqpi qalaq chegoqta'a qome ca qaỹoqta da anac, ana 'aỹa'alepi qalaq qanachetasheguem qome da qandoi'.

⁵ Qaq 'am, qom 'aula'a namayepi nache 'am 'eroigui da 'antonaxac, añi 'arquiyaqte qalaq nlaxagui qome da ntonaxac, cha'aye 'am qanda'a qome nam no'on logoxoshetpi nam shiỹaxauapi maye netalec ana ỹaqauga 'alhuapiole aso auaxai, qataq 'am qoỹanem qome da lsallaxa nam ỹotta'a't shiỹaxauapi.

⁶ Nache 'am nlaxagui qome ana cameellopi maye lalopi nam chegaqa'a ye Madián qataq ye Efa, qataq anac qome 'enauac nam chegaqa'a ye Sabá nachetac na lcat oro qataq na nchenaxanaxat maye ama na laita, nache ỹa'axatec qome nam huo'o da llo'oxoyec maye ỹo'otpi Ñim Nataxala'.

⁷ Qataq 'enauac ana qaguetapi maye lalopi na lma' ye Quedar 'aralamaqtepi qome, nam qagueta lhuaraicpi ye Nebaiot, qalaq 'am qoỹanem qome da yaqto' 'aỹa'anot Ñim Nataxala', nache Ñimaye ỹo'ot qome da ỹactec naqa'en da lyac añim 'onaxai lalamaqte atamnaxaqui.

⁸ ¿Negue't nam huaỹotacpi maye 'eeta'am na lo'oc na piguem, qataq 'eeta'am na qoto'pi da huaỹoua'a na lma'pi?

⁹ Qomye nachana anam notaxaquipi da qanayiguingui na 'etaxat anam nnaictega'tpi, na'autec ana nnotaxaqui na lma' ye Tarsis, nachetac na 'aỹa'alaqpi maye ỹachegoxota'a cam qaỹoqta, qataq na lcat oro qataq na lcat plata, da yaqto' ỹo'oxoren Ñim 'Arataxala' maye Qui'itta Natamnaxala' na Israel le'ecpi maye ỹo'ot da 'ayo'oxoyec.

¹⁰ Qaq nam shiỹaxauapi maye chegaqauec nachena qome nam no'oxoosheguem na 'arpaqtaxanaxatpi, qaq na lta'alpi namayepi qalaq 'am do'onataxanot qome, qaq na'aictaxa da 'am iuaxan co'ollaxa Ñim Nataxala' souaxat da layeloxo, qalaxaye nagui 'am ichoxoren souaxat da lsoxoyec.

¹¹ Na 'anasompi qalaq nache 'eetai' qome da nauattaigui, nache saishet da napogui ye na'a'q qataq ye pe, cha'aye 'am qandotapegueua'a qome da lsallaxa nam ỹotta'a't shiỹaxauapi, qataq 'am naua'a qome nam nta'alpi nnaictague' na ltauapi.

¹² Qaq cam shiỹaxauapi maye saishet da 'am do'onataxanot qalaq qaỹapalaxat qome, qataq ca ỹotta'a't shiỹaxauapi imauec qome da qailaxachigui.

¹³ Ñim Nataxala', 'enapega ye Jerusalén, 'eeta': «'Am qanda'a qome, ana huo'o da lyac ciprespi, piinopi qataq ana 'abeetopi ye Líbano, da yaqto' ỹo'ot da lyac añi atamnaxaqui maye ỹalamaqte, qataq ỹo'ot da llo'oxoyec yem ỹapiaqa'.

¹⁴ Nam llalaqpi na 'am ipataqta'a't co'ollaxa, qalaq 'am naỹa qome da yaqto' 'am nmanot, qataq 'enauac na 'am ỹo'otaatac co'ollaxa 'am ỹa'aroto qome naua l-llecte, nache da 'am detaxaỹa qome qalaq, 'eeta': ‹Nỹecpi maye lalamaxat Ñim Nataxala'›, ‹Sión maye lalamaxat Ñim Qui'itta Natamnaxala' na Israel le'ecpi.›

¹⁵ Qaq na'aictaxa da 'am qaỹalat co'ollaxa qataq 'am qaiqaiga qataq qaica ca quetegueto naua 'anqa'aico, qalaxaye so'ot qome da 'am chegoqchigui, dam choche tatec ño'oxonnataxanaxac, qataq da namaicỹaxac.

¹⁶ Qaq nam ỹotta'a't shiỹaxauapi 'am ỹanem qome na ỹataqta no'on nallec, qataq na lta'alpi 'am ndotega qome da lsallaxa, qaq huaña qome nache 'auauattoota da aỹem, nachaỹem Nataxala', Aỹem 'arca'alaxaqui, Aỹem maye aỹem la'añaxanec so Jacob, nachaỹem 'arca'alaxaqui.

¹⁷ Aỹem, 'am ñera'a qome na lcat oro qaq saishet da bronce, qataq 'am ñera'a qome ca lcat plata, qaq saishet da camachaqca lcat, qataq 'am ñera'a qome ca bronce qaq saishet da 'epaq, qataq 'am ñera'a qome ca lcat qaq saishet da coma'. Qaq dam nlagaxayec nachera qome da 'am ilo'ogue, qataq da nalochiguiñi lataxac nachera qome da 'am ỹaueca'aguet.

¹⁸ Na 'ana'alhua qalaq saishet qome da qaltaq qaỹa'aqtega da sandena't na shiỹaxauapi, qataq saishet qome da ỹe'eguelaxalec da huo'o ca qailaxachigui qataq da qanlaxaañi nam 'ana'alhua, nacherata da 'autaxaỹa na 'arpaqtaxanaxatpi qalaq qoneta': ‹Nca'alaxa› qaq nam 'anasompi qalaq 'auamata'ac ‹Ño'oxonnataxanaxac.›

¹⁹ Qaq huaña nache saishet da 'auen da añi nala' 'am icoỹattalec ye na'a'q, qataq ñi ca'agoxoic da 'am icoỹattalec ye pe, cha'aye Aỹem Nataxala', nachaỹem qome maye chochaq tatec 'arcoỹaraxanaxat, Aỹem maye 'Anatamnaxala', nachaỹem qome 'am secoỹattalec.

²⁰ Qaq añi nala' saishet qome da qaltaq inoxooñi, qataq ñi ca'agoxoic saishet qome da deqat na le'eraxa, cha'aye Aỹem maye Aỹem Nataxala', nachaỹem qome maye chochaq tatec 'arcoỹaraxanaqte, qaq naua na'axa'te maye 'arasouaxaqui' qalaq imereuo qome.

²¹ Qaq huaña qome nache 'enauac nam 'arhuo' le'ecpi no'on da lataxac, qataq nache 'eetai' qome da lalamaxat ne'ena 'alhua, nache namayepi 'eeta'am qome da llaxataxa aca nañiguishe maye maiche saañi, maye sauota'aisalo naua ihua'q da so'ot, da yaqto' ỹachaxan da ỹo'oxoyec.

²² Qaq ne'ena nhuo' le'ecpi maye saq 'amaqtaq qalaq ivira'a qome da qalota qataq nam ỹoqta salamai' qalaq ivira'a qome da qalota shiỹaxauapi. Aỹem maye Aỹem Nataxala', so'ot qome da ỹataqta saq qaỹaloq da yo'oq damaye qom ivita ca laloqo'.»